MATOAN-DAHATSORATSE | VANDE MAHAVY O NDATIO TSY HO TEA AN’ANDRIANAGNAHARE

Mpampijale ty Andrianagnahare

INO TY INOA O NDATIO?

“Naho fa mate ty ndaty nanao fahotagne mahafate, le avy le miheo [agn’afobey] agne ty fagnahi’e, sady ampijalegne nainai’e amy ‘afo tsy mete mate’ ao.” (Katesizy ty Eglizy Katolika, angilé) Misy mpitondra fivavahagne mirehake fa saze isarahagne aman’Andrianagnahare nainai’e o afobeio.

TY MAREGNE REHAFE TY BAIBOLY

“Tsy mahafantatse ndra ino ndra ino” ty mate. (Mpitoriteny 9:5) Tsy afake ty hijale agnate ty “afo tsy mete mate” areke iareo, sady tsy hahatsiaro tie tafasarake nainai’e aman’Andrianagnahare.

Ty rehake hebreo naho grike nadika mateteke tihoe “afobey” le manondro ze kibory misy o mateo iaby. Nivavake hoe izao ohatse ty Joba naho fa narare mafe: “Naho mba magnetake ahy agnate Kibory [“afobey”, Dikan-dreha i Douay-Rheims]” ao rehe.” (Joba 14:13) Tsy nagniry ho amy ty toeragne fampijaleagne ndra isarahagne aman’Andrianagnahare ty Joba, fa te hitofa tan-kibory agne avao.

NAGNINO ZAY RO ILAEGNE FANTAREGNE?

Tsy ho tea an’Andrianagnahare tikagne naho rehafegne tie mpampijale reke. Hoe ty Rocío, a Meksika agne: “Nampianaregne ahy tamy tie mbe nikede fa misy o afobeio. Natahotse raho le tsy nino tie managne toetse soa ty Andrianagnahare. Nihevetse raho fa masiake naho tsy mandefetse reke.”

Niova hevetse ty Rocío, naho fa nahafantatse ty raha rehafe ty Baiboly miomba ty lilim-pitsara i Jehovah naho ze manjò o ndaty mateo. Hoe reke: “Hoe raha nisy entagne mavesatse nafahagne zay ty tamako. Nanjare natoky raho fa tea naho mipay ze hahasoa antikagne ty Andrianagnahare, sady afake ty ho tea aze raho. Manahake ty rae mitantagne ty ana’e reke, le te hagnomey aze ty fara’e soa.”—Isaia 41:13.

Maro ty mazoto mivavake satria matahotse ty ho agn’afobey agne. Faie tsy tean’Andrianagnahare naho ty tahotse ty anto’e mahavy antikagne manompo aze. Hoe ty Jesosy: “Teavo ty Jehovah Andrianagnahare’o.” (Marka 12:29, 30) Naho fa fantantikagne tie manao ty rare’e reke, le matoky tikagne fa ho ara-drare’e ty lilim-pitsara’e amy ty hoavy. Afake mirehake manahake i Eliho, nama i Joba tikagne tie: “Faly i Andrianagnahare vata’ey ty hanao raty, sady faly i Tompo ty Herỳ ty hanao ty tsy rare’e!”—Joba 34:10.