FIAIGNANTIKA KRISTIANA
Miara-miasa mba Hitoriagne amy ty Ndaty Sambe Hafa Firehake
Mateteke o ndatio naho fa amy ty firehan-draza’e ty hafatse miomba i Fanjakagney, le tena vognogne mitsanogne reke. Izay ty niseho tamy Pentekosta taogne 33 tagne ho agne. Firehake Hebreo ndra Grike ty firehake niharoagne tamy izay. Faie natao i Jehovah ty hitsanogna ty “Jiosy boake amy ty firenena sambe hafa” tamy izay i talily soay amy ty “firehan-draza’e”. (As 2:5, 8) Amy hinane zao ka fiangonagne maro ty manao fivoriagne amy ty firehake sambe hafa faie va’e hitovy ty faritane iasa iareo. Akore ty hahavy ze mpitory amo o fiangonagne reo hiara-miasa mba hitory amy ze kila ndaty fa tsy i tragno raikey avao ro hifandimbeza iareo hitoriagne?
Magnontane ty hafa (Oh 15:22): Toko’e handineke naho handamigne mialoha ty fomba hagnelezagne i talily soay ty mpiandraikitse ty fanompoagne amy i fiangonagney eo. Azo i fiangonagney atao ty mipay ze firehake mampiasa ty fireha i fiangona iareoy. Faie ndra tie eo zay, naho tsy vita iareo i faritane iareoy satria bey loatse, le soa naho ampahafantaregne iareo tie misy ndaty liagne ty agne. (od 93 § 37) Ndra va’e hangatake iareo mba hagnampe i fiangona’areoy hahatrea ndaty mirehake ty fireha’e, le handefa ty adiresi’e amy i faritane’ey agne. (km 7/12 5, efajoro) Tadidio fa va’e hisy ndaty sambe hafa firehake agnate ty tragno raike. Naho fa magnomey ty miomba i ndatỳ i fiangonagney, le toko’e horihegne ty lalàna an-toeragne eo.
Miara-miasa (Ef 4:16): Oriho soa ze tari-dalagne boake amy i mpiandraikitse ty fanompoagney. Mampianatse Baiboly ndaty tsy mampiasa ty fireha i fiangonagney vao rehe? Va’e handroso tsy ela i mpianatsey naho ze fiangonagne mampiasa i fireha’ey ro mampianatse aze.
Miomàna Mialoha (Oh 15:28; 16:1): Naho firehake sambehafa ty ampiasae ty ndaty ama’areo eo, le anò ze azo’o atao mba hitoriagne i talily soay. Azo’o atao ty miomagne mialoha amy ze firehake va’e hotojeke azo, amy izay rehe afake mampiasa Baiboly dikan-drehake tontolo vaovao, sady afake mampiasa video. Azo’o ampiasaegne ka ty JW Language mba hianaragne fiarahabagne amy i firehakey.