Mampibaribary ty Hatea i Jehovah Antika, ty Hilala’e Naho ty Fahareta’e ty Famelomagne ty Mate

1. Ino ty nahavy i Jehovah namorogne ze kila raha?

NISY fotoagne ty Jehovah ni-irerike. Faie tsy nahatsiaro ho nangike reke tamy zay. Ty anto’e, tsy misy raha tsy ampe ty ama’e, le tsy voatere hipay namagne reke. Fa ino ty nahavy i Jehovah namorogne ze kila raha? Bey hatea reke sady tea’e ho fale ka ty hafa.​—Sal. 36:9;1 Jaona 4:19.

2. Ino ty nitsapa i Jesosy naho o anjelio naho fa namorogne ze kila raha ty Jehovah?

² I Ana-dahi’ey ty niforogne i Jehovah voaloha’e. Nampiasae i Jehovah tamy ty famorognagne “ze kila raha” o Ana-dahi’e iohoe, agnisa izay o anjelio. (Kol. 1:16) Tena fale ty Jesosy naho fa niara-niasa taman-dRae’e. (Ohab. 8:30) Tena nifale ka o anjelio naho fa nahatrea i Jehovah naho i Mpiasa Tena Mahaỳ, ndra i Jesosy namboatse i lagnitsey naho ty tane toy. Akore ty ahafantarantikagne izay? Satria “nifalefale iaby” iareo naho fa nivita voatse ty tane toy. Azo antoke fa nifale ka iareo naho fa nahatrea ty raha ila’e niforogne i Jehovah, lohotsie fa o ndatio. (Joba 38:7; Ohab. 8:31) Trea amy ze kila raha finoro i Jehovah fa bey hatea naho mahilala reke.​—Sal. 104:24; Rom. 1:20.

3. Afake mitamà ty hahazo inogne tika noho i solovoigney, arake ty 1 Korintianina 15:21, 22?

³ Tea i Jehovah hiadagne naho ho velogne nainai’e an-tane etoy o ndatio. Faie nanohetse an-dRae’e ty Adama naho i Eva, le nanjare tsy afake niaigne nainai’e sasa iareo. Hoe izay ka ty tarana iareo satria nandova ota naho fate boake amy iareo. (Rom. 5:12) Akore ty natao i Jehovah naho fa niseho ze raha zay? Le avy le nanao raha reke mba hagnavotagne o ndatio. (Gen. 3:15) Nampitamà ty Jehovah fa hagnomey solovoigne mba hagnafahagne ty tarana i Adama naho i Eva amy ty ota naho ty fate. Afake mitamà hahazo havelogne nainai’e areke ze ndaty mijobogne ty hanompo aze.​—Jaona 3:16; Rom. 6:23; vakio ty 1 Korintianina 15:21, 22.

4. Ino iaby ty fagnonteneagne hodinehentikagne?

⁴ Va’e maro ty raha teantikagne ho fantatse miomba ty famelomagne ty mate. Ohatse, ino ty raha azo inoagne fa hiseho naho fa hovelomegne indraike ty mate? Ho haintikagne vao ty hamantatse i longontika hovelomegne rey? Ino ty ho tsapantikagne amy izay? Nagnino ty fisaintsaignagne miomba ty famelomagne ty mate ro hampitombo ty fankasitrahantikagne i Jehovah noho ireke bey hatea, mahilala naho manam-paharetagne? Andao tika handineke ireo.

INO TY RAHA AZO INOAGNE FA HISY NAHO FA HOVELOMEGNE INDRAIKE TY MATE?

5. Nagnino tika ro afake mirehake tie tsy hovelomegne amy ty fotoagne raike iaby o ndaty nimateo?

⁵ Azo inoagne fa tsy le avy le hovelome i Jehovah amy ty fotoagne raike iaby o ndaty an-tapetrisa’e nimateo. Fa nagnino? Naho izay ty raha hisy, le hikorontagne ty tane toy, satria tampoketampokeo le avy le hisy ndaty tsy vatse isahegne ty eto. Faie tsy tea i Jehovah ty raha tsy milamigne hoe izay. Ty anto’e, tsy hisy fiadanagne ty etoy naho tsy alami’e ty raha atao’e. (1 Kor. 14:33) Trea zao tie mahilala naho manam-paharetagne ty Jehovah naho fa nagnomagne ty tane toy hitoboha o ndatio. Tsy le avy le namboatse ndaty ohatse iareo amy i Jesosy fa nomane iareo hey ze raha ilae o ndatio. Hila o toetse rehoe ka ty Jesosy agnate i arivo taogne hanjaka’ey. Ty anto’e, mila magnomagne ze raha ilae o ndaty hovelomegne amy ty mateo reke naho ze ndaty ho votso-belogne amy i Hara-magedonay.

6. Ia ty agnisa ty hovelomegne amy ty mate naho henteagne ty Asan’ny Apostoly 24:15?

⁶ Mila ampianaregne miomba ty Fanjakan’Andrianagnahare naho ze raha také i Jehovah ka o ndaty hovelomegne reo. Nagnino? Satria ndaty rehafe ty Baiboly tihoe “tsy maregne” ty ankamaroa iareo. (Vakio ty Asan’ny Apostoly 24:15.) Maro ty raha mila ovà iareo amy ty fiaigna’e mba hahavy iareo handrambe soa amy i solovoigney. Tena hiasa mafe areke o ndaty ho votso-belogneo hampianatse o ndaty tsy mahafantatse i Jehovah reo. Hampianaregne tsikiraidraike manahake o ataontikagne amy izaò vao iareo? Mbe hisy fiangonagne manahake ty amy izao ka vao ty amy izay, le hotendregne amy ze fiangonagne toko’e hisy aze ze mifily ty hanompo i Jehovah? Naho izay ty raha hiseho, hampiofagnegne vao iareo mba hampianatse ty ndaty hovelomegne afara iareo? Mbe ho treantikagne eo avao ty vale’e. Fa ty raha azo antoke le tihoe “hahafantatse i Jehovah ty ndaty amy ty tane toy” amy ty fara’e i Fanjakagne Arivo Taogney. (Isaia 11:9) Asa bey areke ty mandigne antika faie tena hahafinaritse ty hanao aze!

7. Nagnino ty vahoa i Jehovah ro mila mitretré i ndaty hovelomegne rey naho fa mampianatse iareo?

⁷ Midika vao zay tie fa tsy mila manao fagnovàgne amy ty fiaigna’e sasa ty vahoa i Jehovah agnate o Fanjakagne Arivo Taogne iohoe? Aha’a, tsy izay. Mbe mila miova iareo amy izay hahavita hitretré i ndaty hovelomegne rey naho fa magnampe iareo hanohetse ty eretsere-draty naho fagnirian-draty agnate’e ao vaho hankatò ty fitsipy i Jehovah. (1 Pet. 3:8) Naho fa trea i ndaty hovelomegne rey tie miambane ty vahoa i Jehovah sady mbe manao fiovagne avao, le hagniry hanompo aze ka iareo.​—Fil. 2:12.

HO FANTANTIKAGNE VAO I NDATY REY NAHO FA HOVELOMEGNE?

8. Nagnino tika ro afake mirehake tie ho fantantikagne ty longontika naho ty namantika hovelomegne indraike?

⁸ Maro ty anto’e mahavy antika mirehake tie ho fantantikagne i longontika naho i namantika hovelomegne indraike rey. Naho fa namelogne ty mate ohatse ty Jehovah tie taloha, le nimei’e vatagne vaovao i ndatỳ faie ty tarehe’e naho ty fomba fireha’e vaho ty fomba fiheve’e mbe nitovy avao tamy ie mbe nivelogney. Ko haligno ka fa nampitovie i Jesosy amy ty ndaty miroro o mateo. Azo fohazegne i ndaty miroro rey. Midika ka zay fa azo velomegne indraike i ndaty nimate rey. (Mat. 9:18, 24; Jaona 11:11-13) Naho fa fohazagne o ndaty mirorò, le tsy tihoe manjare hafa ty tarehe’e, ndra miova ty fomba fireha’e. Tsy tihoe manjare miova ka ty raha tsiaro’e. Magnamaregne izay ty tantara i Lazarosy. Fa nimate tagnate ty efatse andro reke, le azo antoke tie fa nanomboke simba ty vata’e. Faie naho fa nivelome i Jesosy reke, le avy le nahafantatse aze i rahavave’e rey sady le avy le nitsiaro i Lazarosy ka iareo.​—Jaona 11:38-44; 12:1, 2.

9. Le avy le ho voririke vao ze ndaty hovelomegne indraike? Hazavao.

⁹ Nampitamà ty Jehovah tie tsy hisy ndaty hirehake tie ‘marare raho’ naho fa amy i Paradisay ao. (Isaia 33:24; Rom. 6:7) Ho salama soa areke i ndaty hovelomegne rey. Faie tsy midika zay tie le avy le ho voririke iareo. Tsy ho hay ty longo’e naho ty nama’e reke naho izay ty raha miseho. Amy ty fara i Fanjakagney Arivo Taogne ka vaho ho voririke tanterake o ndatio sady hahere i Jesosy aman- dRae’e i Fanjakagney. Fa vita iaby areke ty raha toko’e hatao o Fanjakagne iohoe amy izay, agnisa izay ty fagneregnagne o ndatio ho voririke.​—1 Kor. 15:24-28; Apok. 20:1-3.

INO TY HO TSAPANTIKAGNE NAHO FA HOVELOMEGNE TY MATE?

10. Ino ty ho tsapa’o naho fa hovelomegne indraike ty mate?

¹⁰ Alao sare an-tsaigne tie igne rehe manalaka i longo’o nivelomegne indraike rey. Hanao akore hoe rehe ty hafalea’o amy izay? Azo antoke fa ho fale rehe, le hihira fideragne hoahy i Jehovah. Hitombo ka ty hatea’o i Raentikagney naho i Ana-dahi’ey noho iareo namelogne indraike o longontikagneo.

11. Afake mitamà inogne ze ndaty mankatò i Jehovah, arake ty Jaona 5:28, 29?

¹¹ Eretsereto ka tie hanao akore ty ho hafalea i ndaty vinelogne indraike rey noho iareo nahavita nagnova ty fiaigna’e, le nankatò i Jehovah. O ndaty nahavita niova rehoe ro hatsangagne ho amy ty fiaignagne ndra hiaigne nainai’e. Faie tsy hengà i Jehovah hiaigne nainai’e ze ndaty tsy mete hiova fa manohetse aze satria tsy hampisy fiadanagne amy i Paradisay ao.​—Isaia 65:20; vakio ty Jaona 5:28, 29.

12. Inogne iaby ty fitahiagne ho azo ty vahoa i Jehovah amy i Paradisay ao?

¹² Ino ka ty ho tsapa ty vahoa i Jehovah iaby naho fa amy i tontolo vaovaoy agne? Ho tsapa iareo fa maregne ty raha rehafe ty Ohabolana 10:22 toy tie: “Ty fitahia i Jehovah ro mampanan-karena sady tsy ampea’e haoreagne zay.” Hanjare hanan-karena ara-pagnahy ka iareo satria homey i Jehovah ty fagnahi’e, le vao mainke ho afake hanahake ty toetse i Kristy sady hihavoririke erike. (Jaona 13:15-17; Efes. 4:23, 24) Hihasalama avao ka ty vata iareo isan’andro. Ho soa vata’e ty fiaignagne amy izay! (Joba 33:25) Faie nagnino ty fisaintsaignagne miomba ty famelomagne ty mate ro mahasoa azo amy hinane zao?

ASEHÒ FA MANKASITRAKE I JEHOVAH REHE NOHO IREKE BEY HATEA

13. Nagnino ty Salamo 139:1-4 ro mampiseho tie tena mahafantatse soa antika ty Jehovah, le nagnino ty famelomagne ty mate ro magnaporofo izay?

¹³ Nitreantika teo fa hahere i Jehovah amy i ndaty hovelomegne rey indraike ty raha tadidy iareo naho ty toetse maha ie iareo. Ino ty toetse i Jehovah trea boake amy izay? Tena tea antika reke satria mandineke naho mitadidy ze raha eretseretentikagne, ty raha tsapantika naho ty raha rehafentikagne vaho ataontikagne. Tsy ho sarotse ama’e areke ty magneregne an-tsaintikagne ao ze raha nitsiarontika, ty toe-tsaintikagne naho ty toetse maha ie antikagne. Nitaka i Davida Mpanjaka fa tena mahafantatse soa antika tsikiraidraike ty Jehovah. (Vakio ty Salamo 139:1-4.) Ino ty voka izay amantika?

14. Ino ty toko’e ho tsapantikagne naho fa misaintsaigne tie mahafantatse soa antika ty Jehovah?

¹⁴ Toko’e hahavy antika hivali-doha vao ty fisaintsaignagne tie mahafantatse soa antika ty Jehovah? Aha’a. Tsiarovo fa tena tea antika ty Jehovah sady sarobily ama’e tika tsikiraidraike. Oni’e soa ty raha iaby niaignantika sady irey ro nahavy antika nanagne i toetsentikagne taloha rey. Tena mampahery ty mahafantatse izay! Tsy irerike tika fa agnilantikagne eo avao reke mba hahafaha’e magnampe antika.​—2 Tantara 16:9.

ASEHÒ FA MANKASITRAKE I JEHOVAH REHE NOHO IREKE MAHILALA

15. Nagnino ty famelomagne ty mate ro mampiseho tie mahilala vata’e ty Jehovah?

¹⁵ Agnisa ty raha tena atahora o ndatio o fateo. Ampiasae ty ndaty amy ty tontolo i Satana toy ze tahotse zay mba hanereagne o ndatio hivalike amy ty nama’e ndra hiala amy ty raha inoa’e. Faie tsy matahotse ty ho mate tika satria mino tika tie mbe hovelome i Jehovah indraike ndra tie vonoe ty fahavalontikagne aza. (Apok. 2:10) Tena rese lahatse tika fa tsy misy raha hampisarake antika amy i Jehovah. (Rom. 8:35-39) Mahilala vata’e ty Jehovah naho henteagne ty safiri’e hamelogne ty mate. Io ty mahavy antika tsy hatahotse ty ho mate ndra tie misy magnorohoro antika. Io ka ty mahavy antika ho tapa-kevetse tsy hivalike amy i Jehovah ndra inon-kido.

16. Ino ty fagnonteneagne mila saintsaignentika mba hahafantarantika tie tena matoky i Jehovah tika?

¹⁶ Naho misy fahavalo i Jehovah magnorohoro azo tie ho vonoegne rehe, tena atokisa’o vao fa hamelogne azo indraike ty Jehovah? Akore ty ahafantara’o fa tena matoky izay rehe? Saintsaigno ty fagnonteneagne retoa: ‘Trea amy ty fanapaha-kevetse rambeseko isan’andro vao fa matoky i Jehovah raho?’ (Lioka 16:10) ‘Trea amy ty raha ataoko vao fa matoky raho tie hagnomey ze raha ilaeko ty Jehovah naho manao voalohan-draha i Fanjaka’ey raho?’(Mat. 6:31-33) Naho eka iaby ty avale’o o fagnonteneagne rehoe, le izay ty ahatreava’o tie matoky i Jehovah rehe sady vognogne hiatreke ze fitsapagne hiseho amy ty hoavy.​—Ohab. 3:5, 6.

ASEHÒ FA MANKASITRAKE I JEHOVAH REHE NOHO IREKE MANAM-PAHARETAGNE

17. a) Nagnino ty famelomagne ty mate ro mampiseho tie manam-paharetagne ty Jehovah? b) Akore ty ampisehoantikagne fa mankasitrake i Jehovah tika noho ireke manam-paharetagne?

¹⁷ Fa hay i Jehovah tie ombia ty andro naho ty lera handrava’e ty tontolo raty toy. (Mat. 24:36) Faie manam-paharetagne reke, le tsy hanao raha aloha ze fotoagne zay. Tena fa tsy ligne’e ohatse ty hamelogne indraike i ndaty nimate rey. (Joba 14:14, 15) Faie mbe mandigne i fotoagne hameloma’e iareoy reke. (Jaona 5:28) Tena toko’e hankasitrake i Jehovah areke tika noho ireke manam-paharetagne. Nagnino? Satria noho i Jehovah managne o toetse iohoe, le maro ty ndaty mbe afake mibebake, agnisa izay tika. (2 Pet. 3:9) Tena maro ty ndaty tea i Jehovah hahazo havelogne nainai’e. Asehò areke tie mankasitrake aze rehe. Mikezaha mafe hikaroke ze ndaty managne toe-po soa mba hahazoagne i havelogne nainai’ey, le ampeo iareo mba ho tea i Jehovah naho hanompo aze. (Asa. 13:48) Handrambe soa amo o toetse i Jehovah iohoe iareo amy izay, manahake antika ka.

18. Nagnino tika ro toko’e hanam-paharetagne amy ty hafa?

¹⁸ Mbe handigne agnate ty arivo taogne ka ty Jehovah vaho izay ho voririke iaby o ndatio. Amparake ty hiavia izay, le vognogne hamela ty fahotantikagne reke. Mila manahake aze areke tika, le hifantoke avao amy ty toetse soa ty hafa sady hanam-paharetagne amy iareo. Dineho ohatse ty raha nanjò ty rahavave raike toy. Nisy raha nampinekoneko aze ty vali’e, le nanomboke tsy nivory sasa. Hoe i rahavavey: “Tena nimafe tamako ze raha zay. Nanjare niova tampoke ty fiaigna’ay, le tsy nivita’ay ty tanjogne nitea’ay ho tratraregne.” Faie nikezake hanam-paharetagne amy i vali’e avao o rahavave bey hatea iohoe. Niantehetse tamy i Jehovah reke sady nikezake nagnampe i vali’e avao. Nanahake i Jehovah ka reke, le nifantoke tamy ty toetse soa i vali’e avao. Hoe ka reke: “Managne toetse soa ty valiko satria nikezake mafe reke mba tsy hinekoneko loatse.” Tena ilaegne areke ty manam-paharetagne amy ty longontika ndra ty mpiara-manompo miatreke raha sarotse.

19. Toko’e tapa-kevetse ty hanao ino tika?

¹⁹ Tena nifale ty Jesosy naho o anjelio naho fa vita forogne ty tane toy. Faie alao sare an-tsaigne tie hanao akore ka ty hafalea iareo naho fa hahatrea ty tane toy ho feno ndaty voririke tea i Jehovah naho manompo aze! Alao sare an-tsaigne ka ty hafaleagne ho tsapa i hiara-manjaka amy i Jesosy rey naho fa hahatrea tie mandrambe soa amy ty asa atao iareo o ndatio! (Apok. 4:4, 9-11; 5:9, 10) Alao sare an-tsaigne ka tie tsy hitagny noho ty alahelo sasa tikagne, tsy harare, tsy hijale sady tsy ho mate sasa! (Apok. 21:4) Faie amparake ty hiavia izay, le mikezaha ho tapa-kevetse hanahake i Raentika bey hatea, mahilala naho manam-paharetagney. Naho manao izay rehe, le ho falefale avao ndra ino ndra ino raha sarotse hatrehe’o amy ty hoavy. (Jak. 1:2-4) Tena mankasitrake i Jehovah tika noho ireke mampitamà tie ‘hovelomegne indraike ty mate.’​—Asa. 24:15.