Ampeo ty Ndaty Ampianare’o Baiboly mba Handroso, le Hatao Badisa: Fizaràgne Faharoe

1. Nagnino o asa fampianaragne ataontikagneo ro rehafegne tihoe asa mandrombake aigne?

ASA MANDROMBAKE aigne o asa fampianaragneo! Nagnino tika ro mirehake izay? Satria izao ty raha nirehafe i Jesosy amy i lily nimei’e amy Matio 28:19, 20 aoy: “Mandehana,... anò mpianatse ze ndaty ..., le anò badisa.” Nagnino ty ndaty raike ro tena mila atao badisa? Mila atao badisa reke naho te ho voavonje. Ty anto’e, tsy maintsy mino ze magniry hatao badisa tie tsy ho afake ho nitamà hahazo havelogne nainai’e reke naho tsy nanao sorogne ty fiai’e ty Jesosy sady naho tsy nivelomegne indraike. Izay ty nahavy i apostoly Petera nirehake tamy i Kristiana nama’e rey tie: ‘Mandrombake anareo ka amy hinane zao, ty badisa ... amy ty alala ty namelomagne i Jesosy Kristy indraike.’ (1 Pet. 3:21) Naho vaho vita badisa areke ty ndaty raike, le afake mitamà ty hiaigne nainai’e.

2. Toko’e ho mpampianatse manao akore tika naho ty 2 Timoty 4:1, 2 ro henteagne?

² Mila magnasoa ty ‘fahaiantikagne mampianatse’ Baiboly tika. (Vakio ty 2 Timoty 4:1, 2.) Ino ty anto’e? Satria nandily antika hoe izao ty Jesosy: ‘Mandehana ..., anò mpianatse ze ndaty ... Ampianaro iareo.’ Nirehake ka ty apostoly Paoly tie: “Mahareta amy izay [asa fampianaragne], fa naho manao izay rehe, le hamonje ty fiai’o naho ty fiay ze mitsanogne azo.” Izay ty nahavy i apostoly Paoly nirehake tie: “Ambeno soa ... ty fampianara’o.” (1 Tim. 4:16) Tena mila hasoaentikagne areke ty fahaiantikagne mampianatse.

3. Ino ty hodinehentikagne amy ty lahatsoratse toy?

³ An-tapetrisa’e eo ho eo ty ndaty ampianarentikagne tsy tapake ty hamarenagne. Nirehafentikagne tamy i lahatsoratse taloha itoỳ tie inogne iaby ty raha azontika atao mba hagnampeagne ty ankamaroa o ndaty rehoe handroso, le hatao badisa. Fa amy ty lahatsoratse toy, le handineke raha dime toko’e mbe hatao o mpitorio ka tika.

MAMPIASÀ BAIBOLY FA KO BEY REHAKE

4. Nagnino tika mpitory ro tsy toko’e ho bey rehake naho fa mampianatse Baiboly? (Henteo ka ty fagnamarehagne ambane peje.)

⁴ Tena teantika ty raha ianarantika amy Baiboly ao. Kindraike areke le nainantikagne honignegne iaby ze raha nianarantikagne. Mateteke o rahalahy mitarike fianaragne Fitalakesan-davitseo ndra mitarike fianaragne Baiboly atao ty fiangonagne ro tiahivegne mba tsy ho bey rehake. Tsy toko’e hanao hoe izay ka tika naho fa mitarike fampianaragne Baiboly. Mila mitao areke tika mba tsy hagnazava ze kila raha haintika miomba ty andinin-teny raike ndra ty foto-kevetse raike naho fa mampianatse. Hisy heri’e amy i ndaty amy izay ty raha rehafe ty Baiboly.b (Jaona 16:12) Mba dineho moa zao: ‘Inogne iaby zao ty raha nifanta’o miomba o Baibolio tamy ihe vaho nivita badisay?’ Azo antoke fa va’e ho i fampianaragne fototse rey avao ty nihai’o. (Heb. 6:1) Nila fotoagne lavalava rehe mba hianaragne o raha hai’o iaby amy izaò. Ko le avy le ampianaregne i mpiana’oy iaby areke ze hene raha hai’o.

5. a) Ino ty raha teantika ho taka ty ndaty ampianarentika Baiboly, arake ty 1 Tesalonianina 2:13? b) Ino ty toko’e hataontika mba handrisihagne o mpianatse Baibolio hirehake ty raha ianara’e naho fa mianatse?

⁵ Teantika naho taka o ndaty ampianarentikagneo tie boake amy Baiboly ao ty raha ampianarentika iareo. (Vakio ty 1 Tesalonianina 2:13.) Akore ty hanoantikagne izay? Risiho reke mba hirehake ty raha ianara’e. Naho fa misy andinin-teny vakiegne ohatse, le ireke ro asao hagnazava aze ama’o fa tsy ihe ro magnazava aze. Ampeo reke hahatrea ty fomba hampihara’e ty raha ianara’e amy ty fiaigna’e. Mahaia mametrake fagnonteneagne. Naho fa manao izay rehe, le fagnonteneagne hahavy aze hirehake ty raha an-tsai’e naho am-po’e agne ro agnonteneo aze. (Lioka 10:25-28) Agnonteneo ohatse reke tie: “Ino amy ty raha rehafe ty andinin-teny toy ro magnampe azo hahatrea ty toetse i Jehovah?” “Akore ty nagnampea ty hamarenagne azo amy ty fiaigna’o?” “Ino ty tsapa’o amo o raha nianara’o iohoe?” (Ohab. 20:5) Tadidio fa ty hatea i ndatỳ ty raha ianara’e naho ty fampihara’e aze amy ty fiaigna’e ro tena lahibey fa tsy ty hamaro ty raha fanta’e.

6. Nagnino tika ro toko’e hiarake amy ty mpitory za-draha naho fa mampianatse Baiboly?

⁶ Mbe lia’o vao naho niarake tamy ty mpitory za-draha naho fa nampianatse Baiboly? Naho izay, le azo’o atao ty manasa iareo hiarake ama’o. Azo’o atao ka ty magnontane iareo tie: ‘Manao akore ty fitarihako fianaragne Baiboly? Ino ty toko’e hataoko mba tsy ho bey rehake?’ Mila miambane hoe izay rehe naho te hagnasoa ty fomba fampianara’o. (Ampitahao amy ty Asan’ny Apostoly 18:24-26.) Agnonteneo ka i mpitory za-drahay tie tena taka i mpianatsey vao ty raha ianara’e. Azo’o atao ka ty mirehake ama’e mba hampianatse i ndaty ampianare’oy naho ohatse rehe tsy ho eo agnate ty heregnandro raike ndra heregnandro maromaro. Tsy ho tapatapake amy izay i fianara i mpianatsey sady ho taka’e tie tena ilaegne ty mianatse Baiboly. Ko mieretseretse tie “mpiana’o” raike avao igne, le tsy toko’e hampianare ty ndaty hafa. Naho manao izay rehe, le trea tie mihevetse ze hahasoa i mpianatsey sady ho afake hianatse ty hamarenagne avao ka reke.

ASEHÒ FA TENA TEA’O NAHO INOA’O TY RAHA AMPIANARE’O

7. Ino ty hagnampe o mpianatse Baibolio ho tea ty raha ianara’e?

⁷ Anò trea ty ndaty ampianare’o fa tena tea’o naho inoa’o ty hamarenagne amy Baiboly ao. (1 Tes. 1:5) Vao mainke ho tea’e amy izay ty raha ianara’e. Naho mete aza, le rehafo ama’e ty toro lala ty Baiboly nagnampe azo tamy ty fiaigna’o. Ho taka’e amy izay fa handrambe soa ka reke naho mampihatse ty toro lala ty Baiboly.

8. Ino ka ty raha hafa azo’o atao mba hagnampeagne ty mpiana’o Baiboly, le ino ty mahasoa izay?

⁸ Naho fa mianatse Baiboly ka nareo, le azo’o atao ty mirehake ty raha natao ty rahalahy naho rahavave hafa naho fa niatreke olagne manahake ty olagne atrehe’e. Azo’o atao ka ty minday ndaty raike agnivo fiangonagne eo trea’o tie azo i mpiana’o Baibolỳ atao modely. Ndra magnentea tantaram-piaigna o ndaty amy jw.org^® ao.c Misy lahatsoratse naho video maro ty ao afake magnampe i mpiana’oy hahatsapa tie tena ilaegne ty magnorike ty toro lala ty Baiboly.

9. Akore ty azo’o agnampeagne ty mpiana’o Baiboly mba hirehake ty raha ianara’e amy ty longo’e naho ty nama’e?

⁹ Naho manambaly ty ndaty ampianare’o Baiboly, le asao hianatse ka i vali’ey. Risiho i mpiana’oy mba hirehake ty raha ianara’e amy ty longo’e naho amy ty nama’e. (Jaona 1:40-45) Akore ty azo’o anoagne izay? Agnonteneo ohatse reke tie: “Akore ty azo’o agnazavagne o hevetse iohoe amy ty longo’o?” ndra “ino ty andinin-teny azo’o ampiasaegne mba hagnaporofoagne o hevetse iohoe amy ty nama’o?” Mampiofagne i mpiana’oy mba ho lasa mpitory rehe naho manao izay. Le naho fa agne ty fotoagne ahafenoa’e fepetse ho mpitory, le ho afake ty ho mpitory tsy vita badisa agnivo fiangonagne eo reke. Agnonteneo ka i mpiana’oy kera misy ndaty fanta’e te hianatse Baiboly. Naho misy, le avy le anò ze hahatreava’o ze ndaty zay, le asao hianatse Baiboly. Atoro aze ka i video tihoey tie Akore ty Atao Naho fa Mianatse Baiboly?d

AMPEO REKE MBA HAHAZO NAMAGNE AGNIVO FIANGONAGNE EO

10. Akore ty azontikagne anahafagne i Paoly naho ty 1 Tesalonianina 2:7, 8 ro henteagne?

¹⁰ Asehò fa tena mihevetse ze hahasoa o ndaty ampianare’o Baibolio rehe. Ino ty hagnampe azo hahavita izay? Anò an-tsaigne tie va’e ho lasa rahalahy naho rahavaventikagne iareo naho fa afara agne. (Vakio ty 1 Tesalonianina 2:7, 8.) Tsy mora hoahy iareo ty tsy hifagnosehose sasa amy ty nama’e taloha naho ty hanao fagnovàgne amy ty fiaigna’e. Mila ampeantikagne ka areke iareo mba hahatrea namagne soa agnivo fiangonagne eo. Mikezaha mba ho nama’e, le manokàna fotoagne hiarahagne ama’e ankoatse ty fotoagne ianara’areo Baiboly. Antsò ohatse reke ndra andefaso mesaze ndra tiliho amy ty fotoagne hafa. Tena mihevetse aze rehe naho manao izay.

11. Ino ty raha teantika ho tsapa o ndaty ampianarentikagne Baibolio, le ino ty anto’e?

¹¹ Hoe ze fomba firehake raike zay: “Tsy ana o ndaty raike o anakeo.” Hoe izay ka fa mila ty ndaty iaby agnivo fiangonagne eo o mpianantika Baibolio mba hagnampe aze. Toko’e hikezake areke tika mba hampifankafantatse aze amy ty ndaty agnivo fiangonagne eo fa tena mahasoa iareo zay. Ty anto’e, afake magnampe aze hifandrambe maifitse amy i Jehovah iareo ro sady afake magnampe aze naho managne olagne reke. Toko’e hataontikagne tsapa o mpianantika Baibolio fa agnisa ty keleiantikagne ara-pagnahy reke sady tena mifankatea tika, amy izay reke naina’e hiarake amantikagne avao. Ho mora ama’e ka amy izay ty tsy hifagnosehose sasa amy i ndaty malaigne i Jehovah rey. (Ohab. 13:20) Tsy ho sahiragne ka reke ndra tie heje i nama’e taloha rey, satria afake mahatrea namagne soa agnivo i fandaminagne eo.—Mar 10:29, 30; 1 Pet. 4:4.

IREHAFO MATETEKE MIOMBA TY FANOKAGNAN-TEGNA NAHO TY BADISA REKE

12. Nagnino tikagne ro toko’e hirehake miomba ty fanokanan-tegna naho ty badisa amy ty ndaty ampianarentika Baiboly?

¹² Ko misalasala mirehake amo o mpianatse Baibolio ty maha lahibey ty fanokanan-tegna naho ty badisa. Ty anto’e, ty hagnampe iareo mba ho lasa Kristiana vita badisa ty tena tanjontika. Ndra tie vaho volagne tsiampeampe avao areke ty nianara’e Baiboly, ndra vaho tsiela tafara ty nagnatreha’e fivoriagne voaloha’e, le mila ataontikagne taka’e fa te hagnampe aze ho lasa Vavolombelo i Jehovah tikagne.

13. Ino iaby ty dingagne mila atao ty mpianatse Baiboly raike magniry ty hatao badisa?

¹³ Misy dingagne maromaro mila atao ty mpianatse Baiboly naho magniry ty hatao badisa reke. Mila mahafantatse i Jehovah naho tea aze vaho maneho finoagne aze reke. (Jaona 3:16; 17:3) Hagnampe aze hinamagne amy i Jehovah naho amo o rahalahio naho rahavaveo ty fanoa’e izay. (Heb. 10:24, 25; Jak. 4:8) Hanegnegne amy ty raha raty natao’e ka reke, le hiova. (Asa. 3:19) Hirehake amy ty hafa ty raha inoa’e ka reke. (2 Kor. 4:13) Amy ty fara’e, le hanokan-tegna hoahy i Jehovah naho hatao badisa reke. (1 Pet. 3:21; 4:2) Andro tsy misy hoe’e ho antika naho hoahy i mpianatsey o andro anoagne badisa aze iohoe! Isake tie mahavita ty raike amo o dingagne rehoe areke i mpianatsey, le derao sady risiho avao mba hanohy ty kezake atao’e.

DINEHO MATETEKE TY FANDROSOAGNE ATAO I MPIANATSEY

14. Akore ty azontikagne amantaragne tie mandroso ty mpianatse Baiboly raike?

¹⁴ Mila manam-paharetagne tika naho te hagnampe ndaty raike hanao fandrosoagne ndra hanokan-tegna naho hatao badisa. Faie mila dinehentikagne ka tie tena magniry ty hanompo i Jehovah vata’e vao reke. Trea’o amy ty fiaigna’e vao fa mikezake mankatò ty lily i Jesosy reke? Sa mba te hahafantatse ty raha ampianare o Baibolio avao?

15. Akore ty amantarantikagne fa vognogne hatao badisa ty mpianatse Baiboly raike?

¹⁵ Dineho mateteke ty fandrosoagne atao i mpianatsey. Ohatse, tena abora’e amy i Jehovah vao ty raha am-po’e ao naho fa mivavake reke? (Sal. 116:1, 2) Tea mamaky Baiboly vao reke? (Sal. 119:97) Magnatreke fivoriagne tsy tapake vao reke? (Sal. 22:22) Mampihatse ty raha ianara’e vao reke sady fa nisy fagnovàgne natao’e ka tamy ty fiaigna’e? (Sal. 119:112) Rehafe’e amy ty longo’e naho ty nama’e vao ty raha ianara’e? (Sal. 9:1) Fa ty tena lahibey le tihoe, tena magniry ho lasa Vavolombelo i Jehovah vao reke? (Sal. 40:8) Naho trea’o fa tsy mba manao ty raike amo o raha rehoe ty mpiana’o, le fantaro ty anto’e. Naho fa hai’o zay, le ko misalasala rehe mirehake ama’e. Toko’e ho soa fagnahy ka rehe naho fa magnampe aze.e

16. Ino ty hagnampe azo hahafantatse naho toko’e hajanogne ty fampianara’o Baiboly ty ndaty raike?

¹⁶ Dineho zao naho mieretseretse rehe tie toko’e hajanogne sa mbe ho tohizagne ty fampianaragne Baiboly ty ndaty raike: ‘Magnomagne vao reke isake tie hianatse zahay? Mba misy fotoagne vao reke te hivory? Mbe tsy miala amy ty fahazaran-drati’e avao vao reke? Fa nisintake tamy ty raha mifandrambe amo o fivavahan-diso vao reke?’ Naho aha’a iaby ty vale’e o fagnonteneagne rehoe, le soa naho ajano’o ty fampianara’o aze. Nagnino moa rehe ro mbe handany lera hampianatse avao ty ndaty raike tsy mba tea ty raha ianara’e hoe izay sady tsy vognogne hanao fagnovàgne amy ty fiaigna’e? Naho mbe mampianatse aze avao rehe, le hoe mampianatse ndaty raike hilaogne, ie amy izao o ndaty iohoe tsy mba magniry hilaogne zao ndra kidikidy.

17. Ino ty raha mila atao o mpitorio naho teantika ty ‘hiambegne soa ty fampianarantikagne,’ arake ty 1 Timoty 4:16?

¹⁷ Tena mila tanterahentikagne soa i andraikitikagne hampianatse Baibolỳ satria teantika handroso ty ndaty ampianarentikagne, le hatao badisa. Mampiasà Baiboly areke naho fa mampianatse fa ko bey rehake. Asehò fa tena tea’o naho inoa’o ty raha ampianare’o. Ampeo ty ndaty ampianare’o mba hinamagne amy ty ndaty agnivo fiangonagne eo. Asongadigno fa tena ilaegne ty manokan-tegna naho atao badisa, le dineho mateteke ty fandrosoagne atao i mpianatsey. (Henteo ty efajoro manao tihoe “Ino ty Raha Mila Atao o Mpitorio Mba Hagnampeagne o Mpianatse Baibolio handroso, le Hatao Badisa?”) Mahafale antika ty mandrambe anjara amo o asa mandrombake aigne iohoe! Lonike areke tika ho tapa-kevetse hanao ze azontikagne atao mba hagnampeagne ty ndaty ampianarentika handroso, le hatao badisa.