Midera An’Andrianagnahare Naho i Kristy i Vahoake Maro Tsy Vatse Isahegney

1. Ino ty nivoka’e naho fa naharey ty lahajaka raike tamy i havoriambey tamy taogne 1935 i rahalahy tanora raikey?

NISY ajalahy 18 taogne zay natao badisa tamy 1926. Vavolombelo i Jehovah ty baba’e naho i rene’e. Faie mbe Mpianatse Baiboly ty mbe nahafantaragne antika tamy izay. Dime ty ana iareo. Roe ty ampela, le telo lahilahy. Nitezae iareo mba hanompo i Jehovah naho hanahake i Jesosy Kristy o ana iareo rehoe. Azo antoke fa nihinagne mofo naho ninogne divay amy i Fahatsiarovagney o ajalahy 18 taogne iohoe isan-taogne satria nitamà ho an-dagnitse agne iaby ze Mpianatse Baiboly tamy izay. Faie niova ze raha nitamae iareo zay naho fa naharey ty lahajaka manao tihoe toy iareo: “I Vahoake Maroy.” I Rahalahy J. F. Rutherford ty nanao aze tamy 1935, tamy ty havoriambey natao ta Washington a Etazonia agne. Ino ty raha nanjare takantikagne tamo o lahajaka tsy hay halignovegne iohoe?

2. Miomba ty ino ty hamarenagne nihazavae i Rahalahy Rutherford tamy i lahajaka natao’e tamy i havoriambey tamy 1935?

² Nihazavae i Rahalahy Rutherford tamo o lahajaka iohoe tie ia i “vahoake tsy vatse isahegne” rehafegne amy Apokalypsy 7:9 aoy. Nino o Mpianatse Baibolio amparake izay tie ho an-dagnitse agne avao ka o antoko o ndaty rehoe faie tsy ho mpanjaka miarake amy i Jesosy. Ty anto’e, tsy le nipiteke soa aman’Andrianagnahare iareo naho oharegne amo o voahosotseo. Nampiasa ty Soratse Masigne ty Rahalahy Rutherford mba hagnazavagne tie tsy ho an-dagnitse agne i vahoake maroy. Ndaty ho votso-belogne amy “i haoreagne lahibeỳ” iareo sady hiaigne nainai’e ambone tane etoy. (Apok. 7:14) Nitokave i Kristy tihoe agnondry hafab ka iareo. Izao ty nampitamae i Jesosy iareo: “Managne agnondry hafa tsy am-pò ty zoloke toy ato raho. Tsy maintsy hindeseko ka rey, sady hitsanogne ty feoko, le hiharo raike iareo sady ho raike avao ka ty mpiarake iareo.” (Jaona 10:16) Manondro ty vahoa i Jehovah tsy mivalike mitamà hiaigne nainai’e ambone tane etoy o agnondry hafa rehoe. (Mat. 25:31-33, 46) Andao hodinehentika tie nagnino ro nagnova ty fiaigna ty mpanompo i Jehovah maro o fagnazavagne iohoe, agnisa izay i Rahalahy tanora 18 taogney.​—Sal. 97:11; Ohab. 4: 18.

NITAKA TY KRISTIANA AGN’ARIVO’E TIE AIA TY FANANTENA IAREO

3-4. Ino ty raha nanjare tamae ty Kristiana agn’arivo’e nanomboke tamy 1935, le ino ty anto’e?

³ Tena nifale i mpagnatrekey naho fa nirehake ty Rahalahy Rutherford tie: “Angatahegne mba hitsangagne ze mitamà hiaigne nainai’e ambone tane eto.” Nisy rahalahy raike nagnatreke o havoriambey iohoe nirehake tie ty antsasa’e mahery tamy ty ndaty nagnatreke teo ro nitsangagne. Le hoe ty Rahalahy Rutherford: “Ireo i vahoake maroy.” Tafara izay le tena nifale iaby i mpagnatrekey. Nitaka o ndaty nitsangagne rehoe fa tsy jinobon’Andrianagnahare ho an-dagnitse agne iareo. Nisy 840 ty ndaty natao badisa naho fa nimaray igne. Agnondry hafa ty ankamaroa o ndaty rehoe.

⁴ Tafara i lahajaka ignehoe, le tsy nihinagne mofo naho ninogne divay tamy i Fahatsiarovagney sasa i rahalahy tanoray naho ty ankamaroa ty ndaty hafa tamy izay. Maro amy iareo ty nahatsapa manahake ty rahalahy raike toy. Hoe reke: “I Fahatsiarovagne tamy 1935 igne ty nihinanako mofo naho ninomako divay fara’e. Nitakako tie tsy agnisa ty ndaty nijobogne i Jehovah mba ho an-dagnitse agne raho fa hiaigne nainai’e ambone tane eto avao, sady hagneregne aze ho paradisa ka.” (Rom. 8:16, 17; 2 Kor. 1:21, 22) Nanomboke tamo o taogne iohoe, le nihanitombo avao ty isa ty ndaty agnisa i vahoake maroy, sady miara-miasa amo o voahosotse mbe velogne an-tane etoio iareo.

5. Akore ty fivazohoa i Jehovah i ndaty tsy nihinagne tamy i mofoy naho ninogne tamy i divay i Fahatsiarovagney sasa rey?

⁵ Akore ty fivazohoa i Jehovah i ndaty nijanogne tsy nihinagne tamy i mofoy naho ninogne tamy i divay amy i Fahatsiarovagney sasa rey? Akore naho misy ndaty vita badisa ty amy izao, le mihinagne mofo naho minogne divay naho fa Fahatsiarovagne, faie mahatsapa reke naho fa afara atoy tie kay tsy voahosotse? (1 Kor. 11:28) Nisy tamy iareo nihinagne satria tsy tena nitaka iareo tie aia vata’e ty fanantena iareo. Faie naho fa nitaka iareo tie agnisa ty agnondry hafa iareo, le nijanogne tsy nihinagne tamy i mofoy naho ninogne tamy divaỳ sasa. Tena neke iareo tamy ty fo iareo tie izay ty fanendrea i Jehovah sady nanohy ty fanompoa iareo i Jehovah avao iareo. Faie ndra tie eo zay, le mbe magnatreke Fahatsiarovagne avao iareo satria te hankasitrake i Jehovah naho i Jesosy noho ty raha natao’e hoahy iareo.

MANAGNE RAHA TAMAEGNE FANJAKA IAREO

6 Ino ty raha nandilia i Jesosy o anjelio?

⁶ Mahasoa antikagne areke ty mandineke ty raha rehafe ty Apokalypsy toko faha–​7 miomba o voahosotseo naho i vahoake maroy. Mandily o anjelio ty Jesosy mba tsy hamotsotse i tioke efatse minday fandravagney. Ho tana o anjely rehoe mafe avao o tioke efatse rehoe amparake ty agnisiagne tampò fara’e o voahosotse mbe velogne ambone tane etoio. (Apok. 7:1-4) Hanjare mpanjaka naho mpisorogne miarake amy i Jesosy an-dagnitse agne o rahalahy i Kristy voahosotse rehoe. (Apok. 20:6) Izay ty valesoa iareo noho iareo tsy nivalike hatrake am-para’e. Fa tsy ligne i Jehovah naho i Jesosy vaho o anjelio ty hahatrea o 144000 handrambe o valesoa iareo an-dagnitse agne iohoe.

7. Ia ty nitrea i Jaona amy ty fahitagne raike nitrea’e, arake ty Apokalypsy 7:9, 10? Le inogne ty atao iareo? (Henteo ty sare amy ty fogno ty gazete toy.)

⁷ Tafara ty nirehafa i Jaona i 144000 ho mpanjaka naho ho mpisorogne rey, le nisy antoko o ndaty hafa ka nirehafe’e. Tsy ia zay fa i “vahoake maro” ho votso-belogne amy i Hara-magedonaỳ. Rehafe ty Baiboly tie tsy vatse isahegne ty isa o ndaty rehoe. (Vakio ty Apokalypsy 7:9, 10.) ‘Misarogne lamba foty mireparepa’ iareo. Aseho izay fa mitao iareo mba ‘tsy ho voaloto’ ty tontolo i Satana toy, sady mikezake ka iareo mba tsy hivalike aman’Andrianagnahare naho i Kristy. (Jak. 1:27) Tena fale iareo noho ty raha natao i Jehovah naho i Jesosy, i Anak’agnondrin’Andrianagnaharey, mba hamonjeagne iareo. Minday taho palmie ka iareo. Trea amy io fa tena fale iareo noho i Jehovah nanendre i Jesosy ho Mpanjaka.​—Ampitahao amy Jaona 12:12,13.

8. Ino ty rehafe ty Apokalypsy 7:11, 12 miomba ty keleia i Jehovah an-dagnitse agne?

⁸ Vakio ty Apokalypsy 7:11, 12. Nitrea i Jaona ka fa tena nifale ze an-dagnitse agne sady nidera an’Andrianagnahare ka iareo naho fa nahatrea i ndaty agnisa ty vahoake maroy. Tena ho fale ka iareo naho fa hahatrea i vahoake maroy ho votso-belogne amy i haoreagne lahibeỳ.

9. Ino ty atao i vahoake maroy amy izao, arake ty Apokalypsy 7:13-15?

⁹ Vakio ty Apokalypsy 7:13-15. Nirehake ka ty Jaona tie “sinasa i vahoake maroy naho nampangotritriahe iareo tamy ty lio i Anak’agnondrỳ i saro iareo mireparepay.” Midika zay tie managne feo ty fieretseretagne malio agnatreha i Jehovah eo iareo sady mahafale i Jehovah ka ty raha atao iareo. (Isa. 1:18) Kristiana nanokan-tegna ho an’Andrianagnahare naho vita badisa o ndaty rehoe. Trea ka tie mino ty sorogne natao i Jesosy iareo sady mifandrambe maifitse amy i Jehovah. (Jaona 3:36; 1 Pet. 3:21) Tsy mahalatsa areke naho afake mitsangagne agnatreha ty sezan-droandrian’Andrianagnahare eo iareo sady afake ‘manompo aze andro halegne’ amy i kiririsa i tempoly ara-pagnahỳ eo. Tena mafana fo amy ty fitoriagne i talily soa miomba i Fanjakagney naho amy ty asa fampianaragne o vahoake maro rehoe amy izao. Ty anto’e, io ty raha tena lahibey amy iareo.—Mat. 6:33; 24:14; 28:19, 20.

10. Ino ty raha atokisa i vahoake maroy, le ino ty raha tamae iareo?

¹⁰ Matoky i vahoake maro ho votso-belogne amy i haoreagne lahibeỳ fa mbe hikarakara iareo avao ty Andrianagnahare. Ty anto’e, rehafe ty Baiboly fa ‘hamelatse ty tragno lai’e amy iareo eo i miambesatse amy i sezan-droandriagney eoy.’ Hotanterake amy ze fotoagne zay ka ty raha tamae o agnondry hafao toy: “Le hofafa’e ze ranomaso amy ty maso iareo, le tsy hisy sasa ty fate, ty alahelo ndra ty toreo ndra ty fanaintaignagne, fa tsy eo iaby ty raha taloha.”​—Apok. 21:3, 4.

11-12. a) Inogne iaby ty fitahiagne ho azo i vahoake maroy amy ty hoavy, arake ty Apokalypsy 7:16, 17? b) Ino ty azo o agnondry hafao atao naho fa Fahatsiarovagne, le ino ty anto’e?

¹¹ Vakio ty Apokalypsy 7:16, 17. Mijale ty mpanompo i Jehovah ila’e amy hinane zao? Fa nagnino? Misy olagne ara-toe-karena ndra aly tsy misy fitofa’e ty amy iareo agne. Ty voka’e, tsy le manam-bola fire hivilianagne ze raha ilae’e iareo. Ty ila’e ka gadraegne noho ty finoa iareo. Faie ndra tie eo zay, le fale avao iareo. Tsy ho keregne amy ty lafi’e ara-nofo naho ara-pagnahy iareo afara ty handravàgne ty tontolo i Satana toy. Naho fa handrava ty tontolo toy ty Jehovah, le atao’e azo antoke tie ho voaaro i vahoake maroy mba tsy hihara ty havignera’e. Ampitovie o Baibolio amo o ‘andro mae’ le mipisagneo ze havignera’e zay. Hotarihe i Jesosy mbamy i ‘rano i havelogne nainai’ey’ mbeo o vahoake maro ho votso-belogne rehoe afara i haoreagne lahibeỳ. Ndaty an-tapetrisa’e velogne amy hinane zao ro va’e tsy ho mate. Tena fanjaka ka areke ty raha tamae iareo.​—Jaona 11:26.

¹² Mankasitrake i Jehovah naho i Jesosy o agnondry hafao noho ty raha fanjaka tamae iareo. Maregne fa tsy nijobognegne mba hiaigne an-dagnitse agne iareo, faie tena sarobily amy i Jehovah ka iareo. Sambe midera an’Andrianagnahare naho i Kristy iaby ndra o voahosotseo ndra o agnondry hafao. Fomba raike anoa iareo izay zao ty fagnatrehagne ty Mahakama Hariva i Tompo.

DERAO AMY TY FO’O TY JEHOVAH NAHO I JESOSY LOHOTSIE FA AMY I ANDRO I FAHATSIAROVAGNEỲ

13-14. Nagnino o agnondry hafao naho o voahosotse mbe ambone tane etoio ro toko’e hagnatreke ty Fahatsiarovagne ty nimateza i Kristy?

¹³ Naho iahegne, le raike amy ty ndaty 1000 magnatreke Fahatsiarovagne ro mihinagne amy i mofoy naho minogne amy i divaỳ tato ho ato.Tsy misy ndaty mihinagne amy i mofoy naho minogne amy i divaỳ ty ankamaroa ty fiangonagne magneran-tane. Trea amy izay fa mitamà hiaigne ambone tane eto ty ankamaroa o ndaty magnatreke Fahatsiarovagneo. Faie nagnino iareo ro magnatreke ty Mahakama Hariva i Tompo? Naho misy mpivaly raike ohatse atao mariaze, le avy magnatreke eo ty nama’e mba hagnotrogne iareo sady mba hampisehoa iareo ka tie tena tea iareo o mpivaly atao mariaze iohoe. Hoe izay ka o agnondry hafao. Magnatreke Fahatsiarovagne iareo satria te hampiseho tie tena tea naho manohagne i Kristy naho o voahosotseo sady mankasitrake i sorogne natao i Jesosy hoahy iareoy. Afake mitamà hiaigne nainai’e ambone tane eto iareo noho o sorogne iohoe.

¹⁴ Magnatreke Fahatsiarovagne ka o agnondry hafao satria te hankatò ty lily nimey i Jesosy. Izao ty nirehafe’e tamy i apostoli’e rey tamy iareo nankalaza ty Mahakama Hariva i Tompo voaloha’e: “Tohizo avao zao ho fahatsiarovagne ahy.” (1 Kor. 11:23-26) Hagnatreke Fahatsiarovagne avao areke o agnondry hafao amparake ty tsy hisia o voahosotseo ambone tane eto. Faie manasa ndaty hafa ka iareo mba hiarake hankalaza amy iareo ty Fahatsiarovagne ty nimateza i Jesosy.

15. Akore ty azontikagne ampisehoagne fa midera an’Andrianagnahare naho i Kristy tikagne naho fa Fahatsiarovagne?

¹⁵ Akore zao ty azontikagne ampisehoagne fa midera an’Andrianagnahare naho i Kristy tikagne naho fa Fahatsiarovagne? Mampiseho izay tikagne naho fa miarake mihira naho mivavake. Izao ty ho loha heve ty lahajaka ty Fahatsiarovagne amy ty taogne toy: “Ankasitraho ze Raha Nataon’Andrianagnahare Naho i Kristy ho Azo.” Hagnampe antikagne hankasitrake ty raha natao i Jehovah naho i Kristy o lahajaka iohoe. Naho fa ampandalovegne areke i mofoy naho i divaỳ, le ho afake hisaintsaigne ty raha mifanandrife amy irey tikagne. Tsy inogne zay fa ty vata i Jesosy naho ty lio’e. Ho afake hisaintsaigne ty hatea i Jehovah antikagne ka tika amy izay. Nafoe’e ho antikagne i Ana-dahi’ey mba hahafahantikagne hahazo havelogne nainai’e. (Mat. 20:28) Ino areke ty toko’e hataontikagne tsikiraidraike mba hampisehoagne fa tena teantika i Raentikagne an-dagnitse agney naho i Ana-dahi’ey? Miavia naho fa Fahatsiarovagne.

ISAORO TY JEHOVAH NOHO IREKE NAGNOMEY RAHA TAMAEGNE AZO

16. Ino ty mampitovy o agnondry hafao naho o voahosotseo?

¹⁶ Tea i Jehovah ambone o agnondry hafao vao o voahosotseo? Aha’a, tsy izay. Mitovy avao ty hatea’e iareo. Sambe sarobily ama’e iareo, satria sambe nivilie’e tamy ty fiay i Ana-dahi’ey. Maregne fa tsy mitovy ty raha tamae iareo. Faie sambe toko’e hikezake iareo mba tsy hivalike aman’Andrianagnahare naho i Kristy. (Sal. 31:23) Ko haligno ka fa sambe mea i Jehovah fagnahy masigne ka iareo arakarake ze raha paliae iareo ndra voahosotse iareo ndra agnondry hafa.

17. Inogne ty raha tamae o voahosotse mbe velogne ambone tane etoio?

¹⁷ Tsy tihoe vaho aterake o voahosotseo le fa mitamà hiaigne an-dagnitse agne. I Andrianagnahare ty magnomey iareo zay. Mieretseretse i raha tamae iareo igne avao iareo, mivavake miomba izay ka sady fa tsy ligne iareo ty hahazoa iareo i valesoa iareo an-dagnitse agney. Tsy azo iareo sare an-tsaigne ka tie hanao akore ze o managne vatagne ara-pagnahy zao. (Fil. 3:20, 21; 1 Jaona 3:2) Faie ndra tie eo zay, le fa tsy ligne iareo ty hahatrea i Jehovah naho i Jesosy, naho o anjelio vaho ze voahosotse fa nimate taloha iareo. Fa tsy ligne iareo ka ty hanjaka amy i Fanjakàn’Andrianagnahare an-dagnitse agney.

18. Ino ty raha fa tsy ligne o agnondry hafao?

¹⁸ Akore ka ty amo o agnondry hafao? Mitamà hiaigne nainai’e ambone tane eto iareo. Tena mahafale iareo zay sady toe izay ka ty fagniria o ndatio. (Mpito. 3:11) Ino iaby ohatse ty raha fa tsy ligne iareo? Ty hiavia i fotoagne hagnovà iareo ty tane toy ho paradisay naho ty hagnamboara iareo ty tragno iareo manokagne vaho i fotoagne hanagna iareo teteke hamboleagne. Tsy ligne iareo ka ty hiharo amy ty keleia iareo naho ty ana iareo ho voririke. (Isaia 65:21-23) Faie misy raha fa tsy ligne iareo ka. Ty handeha hitete tane maro naho hanganike vohitse naho hagnente ala ndra riake vaho hianatse ty raha maro namboare i Jehovah. Fa ty tena mahafale iareo le tihoe vao mainke hifandrambe marine amy i Jehovah iareo amy izay.

19. Ino ty raha azontikagne tsikiraidraike atao naho fa Fahatsiarovagne? Ombia ty hanoagne i Fahatsiarovagne amy ty taogne toỳ?

¹⁹ Nimea i Jehovah fanantenagne fanjaka ty mpanompo’e tsikiraidraike fa nanokan-tegna ho aze. (Jer. 29:11) Andro manokagne ho antika tsikiraidraike ty Fahatsiarovagne ty nimateza i Kristy. Afake midera an’Andrianagnahare naho i Kristy tikagne amo o fotoagne iohoe. Ty anto’e, manjare mitamà hiaigne nainai’e tika noho ty raha natao iareo. Ty Fahatsiarovagne ty nimateza i Jesosy ty fotoagne tena lahibey tsy misy hoe’e amo o Kristianao isan-taogne. Amy ty hariva ty Sabotsy 27 Marsa 2021 ty hanoagne io amy ty taogne toy. Afake mankalaza o Fahatsiarovagne iohoe malalake ty ankamaroantikagne isan-taogne. Faie ty ila’e tsy hoe izay satria am-pirizò agne ndra amy ty tane andraragne ty asantikagne agne. Faie ndra aia ndra aia misy antikagne, le ko haligno fa mivazoho antika ty Jehovah naho i Jesosy, naho o keleia’e an-dagnitse agneo naho fa magnatreke Fahatsiarovagne tikagne. Lonike areke tikagne iaby mba sambe hagnatreke o fotoagne tena mahafale sady tsy misy hoe’e iohoe, le ty Fahatsiarovagne ty nimateza i Jesosy.