Midika Inogne ho Azo ty Mahakama Hariva i Tompo?
“Ndra ia ndra ia mihinagne ty mofo naho minogne amy ty kope i Tompo, amy ty fomba tsy magneva, le ho meloke amy ty vata i Tompo naho ty lio’e reke.”—1 KORINTIANINA 11:27.
1. Ino ty fankalazagne tena lahibey hataontikagne amy ty taogne 2003 toy, le akore ty niatomboha io?
HATAO amy 16 Avrily afara ty fitsofora i masoandroy ty fankalazagne tena lahibey amy ty taogne 2003 toy. Hivory mba hankalaza ty Fahatsiarovagne ty nimateza i Jesosy Kristy, ndra ty Mahakama Hariva i Tompo ty Vavolombelo i Jehovah amo o andro iohoe. Naseho i lahatsoratse taloha teoy fa nankalaza izay voaloha’e ty Jesosy, naho fa nankalaza i Pasakey niarake tamy i apostoli’e rey, tamy 14 Nisana taogne 33. Mifagnitsy amy ty vata i Kristy voririke naho ty lio natsopa’e, ty mofo tsy misy levira naho ty divay mena ampiasaegne amy i Fahatsiarovagney. Io avao ty sorogne afake mandrombake o ndatio amy ty ota naho ty fahafatezagne nilova’e.—Romanina 5:12; 6:23.
2. Ino ty fampitaoagne amy 1 Korintianina 11:27 ao?
2 Ze mihinagne ty mofo naho minogne ty divay i Fahatsiarovagney, le tsy maintsy manao izay amy ty fomba magneva. Nagnazava izay ty apostoly Paoly naho fa nanoratse hoahy ty Kristiana ta Korinto tagne. Nankalaza ty Mahakama i Hariva i Tompo tamy ty fomba tsy magneva iareo. (1 Korintianina 11:20-22) Hoe ty Paoly: “Ndra ia ndra ia mihinagne ty mofo naho minogne amy ty kope i Tompo, amy ty fomba tsy magneva, le ho meloke amy ty vata i Tompo naho ty lio’e reke.” (1 Korintianina 11:27) Ino ty dika izay?
Nankalaza io tamy ty fomba tsy magneva ty ila’e
3. Ino ty natao ty Kristiana maro ta Korinto tagne tamy i Mahakama Hariva i Tompoy?
3 Maro ty Kristiana ta Korinto tagne nankalaza i Fahatsiarovagney tamy ty fomba tsy magneva. Nisaratsarake iareo. Nisy ka ty ninday ty hane’e hariva naho ty raha inome’e, le nihinagne naho ninogne izay taloha naho tagnate i fivoriagney, sady mateteke ro nihinagne naho ninogne tafahoatse iareo. Tsy nifantoke tamy i Fahatsiarovagney ty sai’e naho ty fo’e, ty voka’e “meloke amy ty vata i Tompo naho ty lio’e” reke. Keregne ka ze tsy nanan-kanegne, le tsy nifantoke. Maro vata’e ty nihinagne i mofoy naho ninogne i divaỳ, faie tsy nanao izay tamim-pagnajagne. Tsy taka’e soa fa nisy heve’e tena lahibey i fivoriagney. Tsy mahalatsa naho ninday fagnamelohagne hoahy ty tegna’e iareo.—1 Korintianina 11:27-34.
4, 5. Nagnino ro toko’e handineke ty vata’e ty ndaty zatse mihinagne i mofoy naho minogne amy i divay i Fahatsiarovagneỳ?
4 Naho fa mihamarine i Fahatsiarovagne fatao isan-taogney, le mila mandineke ty vata’e ze zatse mihinagne i mofoy naho minogne i divaỳ. Tsy maintsy salama soa ara-pagnahy iareo vaho afake mihinagne amo o mahakama iharoagne iohoe amy ty fomba magneva. Ze tsy magnaja ty soro i Jesosy ndra manao tsinotsinogne io, le va’e ‘horinganegne tsy ho amy ty vahoan’Andrianagnahare’, manahake ty Israelita misy loto faie mbe mihinagne i mahakama iharoagney avao.—Levitikosy 7:20; Hebreo 10:28-31.
5 Nampitovie i Paoly tamy mahakama iharoagne tamo o Israelitao eo i Fahatsiarovagney. Nirehake miomba ze ndaty handrambe anjara hiarake amy i Kristy reke, le nirehake tihoe: “Tsy azo’areo atao ty hinogne amy ty fitovy i Jehovah naho ty kope i demonia. Tsy azo’areo atao ty homagne amy ty fandambagna i Jehovah naho ty tihy i demonia.” (1 Korintianina 10:16-21) Naho manao fahotagne lahibey ty ndaty raike zatse mihinagne i mofoy naho minogne amy divay i Fahatsiarovagne, le toko’e hibebake noho ty fahota’e amy i Jehovah reke sady hangatake fagnampeagne amo o androanavi-pagnahio. (Ohabolana 28:13; Jakoba 5:13-16) Ho afake hihinagne i mofoy naho hinogne i divaỳ amy ty fomba magneva reke, naho tena mibebake sady mamokatse voa mifagnentagne amy ty fibebaha’e.—Lioka 3:8.
Magnatreke am-pagnajagne i Fahatsiarovagney
6. Ia ty nimean’Andrianagnahare tombotsoa hihinagne ty mofo naho hinogne ty divay i Fahatsiarovagney?
6 Toko’e hihinagne ty mofo naho hinogne ty divay i Fahatsiarovagney vao ze ndaty manao ty soa amy ze sisa’e amo o rahalahy Kristy 144 000 reo? (Matio 25:31-40; Apokalypsy 14:1) Aha’a. Ze voahoso ty fagnahy masin’Andrianagnahare mba “hiarake mandova amy i Kristy” avao ro nimeagne ze tombotsoa zay. (Romanina 8:14-18; 1 Jaona 2:20) Ino areke ty toko’e hatao ze mitamà hiaigne nainai’e amy i paradisa an-tane etoỳ ambane ty fitondra i Fanjakagney? (Lioka 23:43; Apokalypsy 21:3, 4) Magnatreke am-pagnajagne i Fahatsiarovagney avao iareo, satria tsy hiarake mandova amy i Jesosy sady tsy mitamà ho an-dagnitse agne.—Romanina 6:3-5.
7. Akore ty nahafantara o Kristiana voaloha’eo fa toko’e hihinagne ty mofo naho hinogne ty divay i Fahatsiarovagney reke?
7 Voahosotse ty fagnahy masigne ty tena Kristiana tamy ty taonjato voaloha’e. Maro amy iareo ty nahazo fagnomezagne mahagaga boake amy ty fagnahy, ohatse firehafagne amy ty firehake tsy fantatse. Naho izay areke, le tsy sarotse tama’e ty namantatse tie voahoso ty fagnahy masigne reke sady toko’e hihinagne i mofoy naho hinogne i divay ty Fahatsiarovagney. Faie ty fomba amantaragne izay amy izao, le mioregne amy ty andinin-teny toy: “Ze tarihe i fagnahin’Andrianagnaharey ro anak’Andrianagnahare. Tsy minday anareo ho amy ty fagnandevozagne ty fagnahin’Andrianagnahare, sady tsy mampisy tahotse, fa mahavy anareo ho velomegne ho anake. Sady o fagnahy iohoe ro mahavy antikagne, hitoka tihoe: ‘Aba, Rae!’”—Romanina 8:14, 15.
8. Ia ty oharegne amy ty “vare”, sady ia ty atao tihoe “tsimparefare” amy Matio toko faha-13 ao?
8 Nanomboke tamy ze andro zay, le nihamaro ty tena voahosotse, ndra “vare” tagnate ty teteke feno “tsimparefare”, ndra Kristiana sandoke. (Matio 13:24-30, 36-43) Nanjare nibaribary o “vareo” nanomboke tamy ty taogne 1870. Taogne maro tafara tatoy, le nirehake o androanavi-pagnahy voahosotseo tie : ‘Toko’e hohazavae’areo amy ty mpagnatreke [Fahatsiarovagne] ty fepetse telo hoahy ty mpandrambe anjara retoa: 1) Finoagne ty lio natsopa i [Kristy], naho 2) fanokanan-tegna hoahy i Tompo naho ty fanompoagne aze amparake ty imatezagne. Naho fa avy eo, le toko’e hampankalazae’areo ty nimateza i Tompo ze ndaty manam-pinoagne naho nanokan-tegna hoe izay.’—Fianarana ny Soratra Masina, Boke VI, Ny Olom-baovao, peje faha-473.a
Fipaliavagne “agnondry hafa”
9. Ia i “vahoake maro” rey, naho henteagne ty fagnazavagne tamy ty taogne 1935, le ino ty voka izay tamy ty ndaty ila’e nihinagne ty mofo naho ninogne ty divay i Fahatsiarovagney?
9 Naho fa mandeha ty fotoagne, le nifantoke tamy ty ndaty hafa, ankoatse ty voahosotse mpanonjohy ty lia i Kristy ty fandamina i Jehovah. Nisy fiovagne niambake nifandrambe tamy izay tagnelagnela ty taogne 1930. Taloha izay, le nieretseretegne fa i “vahoake maro” rehafegne amy i Apokalypsy 7:9 aoy, le ho an-dagnitse agne hiarake amy i voahosotse 144 000 nivelomegne tamy ty mate rey, faie sokajy ambane ty misy iareo manahake ty somondrara ragne i valy i Kristỳ. (Salamo 45:14, 15; Apokalypsy 7:4; 21:2, 9) Faie nihazavaegne tamy 31 Mey 1935 fa i “vahoake maroy” le ty “agnondry hafa” miaigne amy i andro fara’ey. (Jaona 10:16) Izay ty fagnazavagne ara-baiboly tamy ty lahajaka raike tamy ty havoriambey ty Vavolombelo i Jehovah ta Washington a Etazonia agne. Tsy nihinagne ty mofo ndra ninogne ty divay ty Fahatsiarovagne sasa ty ndaty ila’e tafara o havoriambey iohoe, satria taka’e fa ho an-tane etoy reke fa tsy ho an-dagnitse agne.
10. Inogne ty fanantenagne naho ty andraiky o “agnondry hafa” amy izaò?
10 Tamy ty taogne 1935 ro tena nanomboke ty fipaliavagne o “agnondry hafao.” Mino i solovoigney iareo sady manokan-tegna ho an’Andrianagnahare ro manohagne o voahosotseo, amy ty fitoriagne i Fanjakagney. (Lioka 12:32) Mitamà hiaigne nainai’e an-tane etoy iareo, faie izay avao ty tsy mampitovy aze amy ze sisa amo o voahosotseo. Manahake ty ambahiny tamo o Israelita talohao nivavake tamy i Jehovah sady nankatò i lalànay o agnondry hafao. Magneke ty andraikitse Kristiana ankinegne ama’e reke, ohatse ty asa fitoriagne i talily soay miarake amo o Israely ara-pagnahio. (Galatianina 6:16) Faie tsy nekegne ho mpanjaka ndra ho mpisorogne tamo o Israelio eo o ambahinio. Manahake izay ka o agnondry hafao. Tsy afake ty ho mpanjaka naho ho mpisorogne an-dagnitse agne iareo.—Deoteronomia 17:15.
11. Ino ty ifandrambesa ty date ty badisa ty ndaty raike naho ty fanantena’e?
11 Nihanazava tagnate o taogne 1930 reo fa amy ty ankapobei’e, le fa voafily ze ndaty ho an-dagnitse agne. Agnondry hafa mitamà hiaigne nainai’e an-tane etoy ro nipaliavegne nanomboke tamy izay. Naho misy voahosotse mivalike, le azo antoke fa mpanompon’Andrianagnahare tsy nivalike fa ela sady agnisa ty agnondry hafa ro hisolo aze mba hameno isake 144 000 rey.
Nagnino ro nisy diso hevetse?
12. Ombia ty ndaty raike ro tsy toko’e hihinagne ty mofo naho hinogne ty divay i Fahatsiarovagney sasa, le nagnino?
12 Tena rese lahatse o Kristiana voahosotseo fa tinoka ho an-dagnitse agne vata’e iareo. Faie akore ty amy ze mihinagne ty mofo naho minogne ty divay i Fahatsiarovagney, ie amy izao tsy tinoka ho an-dagnitse agne? Azo antoke fa hikalagne aze tsy hanao izay sasa ty eretsere’e, satria fanta’e hinane zao fa tsy ho an-dagnitse agne reke. Tsy ankasitrahan’Andrianagnahare ty ndaty raike, naho misehoseho tie tinoka ho mpanjaka naho ho mpisorogne ho an-dagnitse agne, ie amy izao fanta’e soa fa tsy tinoka ho agne reke. (Romanina 9:16; Apokalypsy 20:6) Vinono i Jehovah ty Levita atao tihoe Kora, satria te ho mpisorogne manahake i Arona naho i ana-dahy i Aronay reke ie amy izao tsy ombia ho hoe izay. (Eksodosy 28:1; Nomery 16:4-11, 31-35) Naho misy Kristiana mahatsapa tie diso reke naho fa nihinagne ty mofo naho ty divay i Fahatsiarovagney, le tsy toko’e hanao izay sasa sady hiambane, le hangatake famelan-keloke amy i Jehovah.—Salamo 19:13.
13, 14. Nagnino ty ndaty ila’e ro va’e hihevetse fa tinoka ho an-dagnitse agne reke, ie amy izao tsy izay?
13 Nagnino ty ila’e ro va’e hihevetse fa tinoka ho an-dagnitse agne reke, ie amy izao tsy izay? Va’e manjare tsy tea’e sasa ty fiaignagne ambone tane etoy noho ty fahafateza i vali’e ndra ty haoreagne hafa manjò aze. Va’e te ho an-dagnitse agne ka reke, satria misy Kristiana nama’e mirehake tie voahosotse vata’e. Mazava ho aze fa tsy misy ndaty tinendren’Andrianagnahare hitaogne ty hafa mba homeagne voninahitse ho voahosotse. Tsy mandefa feo boake an-dagnitse agne ka ty Jehovah mba hampahafantaragne ty ndaty raike fa ho mpandova i Fanjakagney reke.
14 Va’e hihevetse ty ila’e fa tinoka ho an-dagnitse agne reke, noho i heve-diso ampianare ty fivavahagne ila’e tihoey mban-dagnitse mbeo iaby ze ndaty soa fagnahy. Mila mitao areke tikagne mba tsy hisy heri’e amantikagne i heve-diso nanagnantikagne taloha zay. Afake mieretseretse ohatse ty ila’e tie: ‘Misy voka’e amy ty fihetseham-poko vao ty fagnafoly ampiasaeko? Tsekatsekake vao raho, le va’e hiheve-tegna ho voahosotse ndra tie tsy ho izay aza?’
15, 16. Ino ty va’e hahavy ty ndaty ila’e hino fa voahosotse ty tegna’e?
15 Afake mieretseretse ka ty ila’e tie: ‘Mipay laza vao raho, sa manomboke amy izao mipay fahefagne, ndra fahefagne amy ty maha mpiara-mandova amy i Kristy?’ Tsy nanagne andraikitse amo o fiangonagneo eo ty ila’e amy ze mpandova i Fanjakagney tamy ty taonjato voaloha’e. Tsy nipay laza ka ty ndaty tinoka ho an-dagnitse agne sady tsy mirehareha noho ireke voahosotse. Miambane reke, satria izay ty takegne amy ze ndaty managne ty “say i Kristy.”—1 Korintianina 2:16.
16 Va’e misy ty mihevetse fa tinoka ho an-dagnitse agne reke, satria tena mahay Baiboly. Faie tsy voatere hanam-pahalalagne miambake o ndatio naho fa voahosotse ty fagnahy, satria tsy maintsy nampianatse naho nagnanatse ty voahosotse ila’e ty Paoly. (1 Korintianina 3:1-3; Hebreo 5:11-14) Managne fandaharagne mba hagnomeagne hanegne ara-pagnahy hoahy ze mpanompo’e iaby ty Andrianagnahare. (Matio 24:45-47) Tsy toko’e hisy Kristiana voahosotse areke hihevetse fa manam-pahendreagne ambone ty ndaty mitamà hiaigne an-tane etoy reke. Tsy ty fahaiagne mamale fagnonteneagne ara-baiboly, ndra fahaiagne mitory naho manao lahajaka, ro amaritagne tie voahosotse ty ndaty raike ndra tsy voahosotse. Manam-pahaiagne miomba izay ka ty Kristiana mitamà hiaigne an-tane etoy.
17. Miankigne amy ty ino ty mahavy ty ndaty raike ho voahosotse ty fagnahy, le ia ty mifily aze?
17 Naho misy mpiara-manompo amantikagne managne fagnonteneagne miomba ty fitokavagne ho an-dagnitse agne, le afake magnampe aze o androanavi-pagnahio ndra o Kristiana matotseo. Faie tsy itika ro manapa-kevetse tie voahosotse ty ndaty raike ndra tsy voahosotse. Naho tinoka ho an-dagnitse agne vata’e reke, le tsy voatere hagnontane ty hafa naho tena izay vata’e. “Naterake indraike nareo, tsy tamy ty voa mora lo, fa tamy ty tsy mete lo, le tamy ty alala i saontsy i Andrianagnahare velogne sady maharetsey.” (1 Petera 1:23) Mampiasa ty fagnahi’e naho ty Saontsi’e ty Andrianagnahare mba hamboleagne “voa” amy iareo ao, mba hahavy iareo ho “ndaty vaovao” mitamà ho an-dagnitse agne. (2 Korintianina 5:17) I Jehovah areke ty mifily iareo. “Boake aman’Andrianagnahare” ty mahavy ty ndaty raike ho voahosotse, fa ‘tsy noho ty fagniria’e, noho ireke milay.’ (Romanina 9:16) Akore areke ty ahafaha ty ndaty raike mahazo antoke fa tinoka ho an-dagnitse agne reke?
Nagnino iareo ro mahazo antoke?
18. Nagnino ty fagnahin’Andrianagnahare naho ty say o ndatio ro miarake magnaporofo tie voahosotse reke? Hazavao.
18 Ty fagnambarà ty fagnahin’Andrianagnahare ty mahavy ty Kristiana voahosotse hagneke vata’e fa ho an-dagnitse agne reke. Hoe ty Paoly: “O fagnahy iohoe ro mahavy antikagne, hitoka tihoe: ‘Aba, Rae!’ Ty fagnahin’Andrianagnahare naho ty saintikagne ty miarake magnaporofo fa anak’Andrianagnahare tikagne. Naho anake areke tikagne le mpandova ka: Eka vata’e, mpandova an’Andrianagnahare, fa mpiharo lova amy i Krisity ka, naho miharo fijaleagne ama’e tikagne mba homeagne voninahitse miharo ama’e ka.” (Romanina 8:15-17) Fagnahy masigne ty misy heri’e amy ty say o voahosotseo, le voatoseke hampihatse amy ty tegna’e ty raha rehafe ty Soratse Masigne miomba ty anake ara-pagnahy i Jehovah reke. (1 Jaona 3:2) Mahavy iareo hahatsiaro tegna ho anak’Andrianagnahare naho hanagne fanantenagne tsy misy hoe’e ty fagnahin’Andrianagnahare. (Galatianina 4:6, 7) Maregne fa tena hahafinaritse ty fiaigna o ndatio naho fa voririke nainai’e iareo tie ambone tane etoy, miarake amy ty keleia’e naho ty nama’e, faie tsy izay ty fanantenagne nimein’Andrianagnahare o voahosotseo. Nandatsahan’Andrianagnahare ty fagnahi’e iareo, le mafe oregne ty fanantena’e an-dagnitse agne. Naho izay, le vognogne iareo hamoe ze ndaty naho ze raha tea’e ambone tane etoy.—2 Korintianina 5:1-5, 8; 2 Petera 1:13, 14.
19. Ino ty voka i fifagnekeagne vaovaoy amy ty fiaigna o Kristiana voahosotseo?
19 Tsy misalasala o Kristiana voahosotseo tie tinoka ho an-dagnitse agne reke sady napidiregne amy ty fifagnekeagne vaovao ao. Nirehake miomba izay ty Jesosy, naho fa nanao i Fahatsiarovagne voaloha’ey. Hoe reke: “Ty kope toy ro fifagnekeagne vaovao mioregne amy ty lioko hatsopake ho anareo.” (Lioka 22:20) Andrianagnahare naho o voahosotseo ty tafilitse amy i fifagnekeagne vaovaoy ao. (Jeremia 31:31-34; Hebreo 12:22-24) I Jesosy Kristy ty mpagnelagnelagne, le ty lio’e ro mampanan-kery io. Tsy Jiosy avao ty tafilitse amy i fifagnekeagne vaovaoy, fa ndaty boake amy ty firenena hafa ka, mba hankalaza ty tahina i Jehovah naho ho agnisa ty “tarana” i Abrahama. (Galatianina 3:26-29; Asan’ny Apostoly 15:14) Noho o “fifagnekeagne nainai’e” iohoe, le azo velomegne amy ty mate ze Israelita ara-pagnahy iaby mba hiaigne nainai’e an-dagnitse agne.—Hebreo 13:20.
20. Inogne ty fifagnekeagne hafa raike iharoa o voahosotseo naho i Kristy?
20 Tsy misalasala miomba ty fanantena’e o voahosotseo. Nirambesegne tamy ty fifagnekeagne hafa raike ka iareo, le ty fifagnekeagne amy i Fanjakagney. Hoe ty Jesosy miomba izay: “Inareo ty nipiteke tamako tagnate i fitsapagne nanjò ahikey, le manao fifagnekeagne ama’areo raho, manahake ty nanoan-dRaeko fifagnekeagne tamako ho amy i Fanjakagney.” (Lioka 22:28-30) Manan-kery nainai’e o fifagnekeagne natao i Kristy amy ty mpiara-manjaka ama’e iohoe.—Apokalypsy 22:5.
Fotoagne Mahafale o Fahatsiarovagneo
21. Ino ty toko’e hataontikagne naho fa marine i Fahatsiarovagney?
21 Maro ty raha mahafale naho fa marine i Fahatsiarovagney. Mandrambe soa ohatse tikagne naho fa magnorike ty fandaharagne famakiagne Baiboly aloha io. Tena soa ka ty mivavake naho misaintsaigne miomba ty fiaigna i Jesosy tan-tane etoy naho ty fahafateza’e. Fotoagne itoriagne i Fanjakagney ka amy io. (Salamo 77:12; Filipianina 4:6, 7) Tiahivegne antikagne amy i Fahatsiarovagney ty hatea nasehon’Andrianagnahare naho i Kristy, naho fa nanao i solovoigney ty Jesosy. (Matio 20:28; Jaona 3:16) Mahavelom-panantenagne naho mampahery o sorogne iohoe, sady toko’e hahavy antikagne vao mainke ho tapa-kevetse hanonjohy i Kristy. (Eksodosy 34:6; Hebreo 12:3) Toko’e hagnatanjake antikagne ka i Fahatsiarovagney, mba hiaignantikagne mifagnarake amy ty fanonkanan-tegnantikagne ho an’Andrianagnahare naho hagnorihantikagne lognandro ty lia i Ana’e mami’ey.
22. Ino ty fagnomezagne tena soa nimein’Andrianagnahare hoahy o ndatio, sady akore ty fomba raike azontikagne anehoagne ty fankasitrahantikagne izay?
22 Maro vata’e ty raha fanjaka mey i Jehovah antikagne! (Jakoba 1:17) Mitari-dalagne antikagne amy ty alala ty Saontsi’e naho ty fagnahi’e reke sady mampitamà fiaignagne nainai’e. Ty fagnomezagne tena soa, le ty sorogne natao i Jesosy mba ho afake amy ty fahotagne ze voahosotse naho ze ndaty mino iaby. (1 Jaona 2:1, 2) Sarobily ama’o vao ty nimateza i Jesosy? Hampiseho ty fankasitraha’o vao rehe, le hagnatreke ty Mahakama Hariva i Tompo, amy 16 Avrily 2003 afara ty itsofora i masoandroy?
[Fagnamarehagne ambane peje]
a Naboa ty Vavolombelo i Jehovah faie fa tsy atao pirinty sasa.
Akore ty Havale’o Iretoagne?
• Ia ty toko’e hihinagne ty mofo naho hinogne ty divay i Fahatsiarovagney?
• Nagnino o “agnondry hafao” ro magnatreke am-pagnajagne avao ty Mahakama Hariva i Tompo?
• Akore ty hahafantara ty Kristiana voahosotse raike fa toko’e hihinagne ty mofo naho hinogne ty divay i Fahatsiarovagney reke?
• Ino ty raha soa toko’e hatao naho fa marine i Fahatsiarovagney?
[Sare]
(Henteo i Gazetey)
Mpagnatreke Fahatsiarovagne
TAPETRISA
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Sare]
Hagnatreke ty Mahakama Hariva i Tompo vao rehe amy ty taogne toy?
[Sare]
Soa naho manokagne fotoagne maro hamakiagne Baiboly naho hitoriagne naho fa marine i Fahatsiarovagney