Mahakasike ty Fiaigna’o amy Izao vao ty Raha Rehafe ty Boke Apokalypsy?

1-2. Inogne ty anto’e raike mahavy antika toko’e ho liagne amy ty raha rehafe ty boke Apokalypsy?

FA NISY fotoagne vao rehe nampagnentegne aliboma ty ndaty raike? Naho fa nagnente i sare rey amy izay rehe, le nivoamare’o fa hoe tsy fanta’o zay ty ankamaroa ty ndaty ao. Faie nisy sare raike zay tena nahaliagne azo. Fa nagnino? Satria agnate o sare iohoe ao rehe. Naho fa nandineke i sarey soa rehe, le va’e hotadidi’o tie ombia ty nangalagne i sarey le taia. Hikezake hamantatse ty ndaty hafa trea’o amy i sarey ao ka rehe. Tena lahibey ama’o o sare iohoe.

² Mitovy amo o sare iohoe ty boke Apokalypsy. Fa nagnino? Misy anto’e roe fara fahakede’e. Voaloha’e, nisorategne ho antikagne o boke iohoe. Hoe ty Apokalypsy 1:1: “Ty raha nabaribary i Jesosy Kristy, sady nimein’Andrianagnahare aze, mba hampisehoagne amy ty mpanompo’e ty raha hiseho tsy ho ela.” Tsy hoahy ty ndaty iaby amy ty ankapobei’e areke ty raha voarehake amo o boke iohoe ao, fa hoahy ty vahoan’Andrianagnahare nanokan-tegna ho aze. Tsy toko’e ho gaga areke tika naho mandrambe anjara amy ty fahatanteraha ty faminaniagne trea ao, ndra mahatrea ty tegnantika “agnate o sare iohoe ao.”

3-4. Arake ty boke Apokalypsy, ombia ro ho tanterake ty faminaniagne voarehake agnate’e ao, le toko’e handrisike antika tsikiraidraike hanao ino zay?

³ Ty anto’e faharoe mahavy antika toko’e ho liagne amo o boke iohoe, le ty fotoagne hahatanteraha ty faminaniagne agnate’e ao. Nirehafe i apostoly Jaona tie ombia ze fotoagne zay. Hoe reke: “Nente i fagnahy masigney ho amy i andro i Tompoy agne raho.” (Apok. 1:10) Tamy ty taogne 96 tagne ho agne ty nanorata i Jaona o rehake rehoe. Faie mbe tsy nanomboke o ‘andro i Tompo’ iohoe naho tsy taogne maro tafara izay. (Mat. 25:14, 19; Lioka 19:12) Naho henteagne ty faminaniagne agnate Baiboly ao, le tamy 1914 vaho nanomboke o andro iohoe satria tamy io ty Jesosy ro nanjare Mpanjaka tan-dagnitse agne. Nanomboke tamo o taogne iohoe areke ro nitanterake i faminaniagne mahakasike ty vahoan’Andrianagnahare, trea amy ty boke Apokalypsy ao rey. Ie, tena fa miaigne agnate “i andro i Tompoy” tika amy hinane zao!

⁴ Satria tika miaigne amo ze o vanim-potoagne miambake zao, le ilaentika ty magnorike i torohevetse feno hatea amy Apokalypsy 1:3 aoy. Izao ty voasoratse ao: “Sambatse ze mamaky mafe naho mitsanogne ty rehake amy ty faminaniagne toy ato, le magnorike ze voasoratse agnate’e ato, satria fa marine ty fotoagne fa tinondro.” Ie, tena mila “mamaky mafe”, naho ‘mitsanogne ty rehake amy i faminaniagney ao’ vaho “magnorike” irey tika. Inogne ty ila’e amy ze rehake mila orihentikagne rezay?

ANÒ AZO ANTOKE TIE ANKASITRAHA I JEHOVAH TY FANOMPOA’O

5. Akore ty ampisongadigna ty boke Apokalypsy tie mila ataontika azo antoke fa ankasitraha i Jehovah ty fanompoantikagne?

⁵ Ianarantika amy ty toko voaloha’e amy ty boke Apokalypsy ao fa mahafantatse soa ze kila raha miseho amo o fiangonagneo eo ty Jesosy. (Apok. 1:12-16, 20; 2:1) Magnaporofo izay ty hafatse nalefa’e hoahy ty fiangonagne fito ta Azia Minora tagne. Treantika amo o hafatse rehoe tie nagnomey tari-dalagne mazava soa mba hagnampeagne o Kristiana tamy ty taonjato voaloha’eo reke, amy izay azo iareo antoke fa ankasitraha i Jehovah ty fanompoa iareo. Mihatse amy ty vahoan’Andrianagnahare iaby amy izao ka ty raha nirehafe i Jesosy tamy i hafatse rey ao. Inogne ty lesogne ho antika boake amy izay? Hay i Kristy Jesosy soa, i Mpitarike antikagney tie, manao akore ty ara-pagnahintikagne. Mitarike naho miaro antika reke, sady mibaribary ama’e eo iaby ze kila raha. Hai’e tie inogne ty raha mila ataontika mba hahavy antika hankasitraha i Jehovah avao. Faie inogne ze torohevetse nimei’e mila orihentikagne zay?

6. a) Inogne ty olagne nanagna ty fiangonagne ta Efesosy agne, arake ty trea amy ty Apokalypsy 2:3, 4 ao? b) Inogne ty ianarantikagne amy io?

⁶ Vakio ty Apokalypsy 2:3, 4. Tsy toko’e hengantika hihegne i hateantikagne i Jehovah tamy ty voaloha’ey. Trea tamy i hafatse nirehafe i Jesosy hoahy ty fiangonagne ta Efesosy agney, fa niaretse iareo sady nanohy ty fanompoa iareo i Jehovah avao ndra tie teo aza ty raha sarotse maro natrehe iareo. Faie ty niolagne, nenga iareo hihegne ty hatea iareo i Jehovah tamy ty voaloha’ey. Mila ahere iareo indraike areke ze hatea iareo zay, fa naho tsy izay le tsy hankasitraha’e ty fanompoa iareo. Hoe izay ka tika amy izao. Maregne fa mila miaretse tika faie tsy ampe avao zay. Toko’e ho anto’e soa ka ty mandrisike antika hiaretse. Ty anto’e, tsy ty raha ataontikagne avao ro vazohoe i Andrianagnaharentikagney fa ty anto’e mahavy antika manao aze ka. Tena lahibey ama’e ty anto’e mandrisike antika hanao raha, satria tea’e naho ty hateantikagne aze naho ty fankasitrahantikagne aze ro mahavy antika manompo aze.​—Ohab. 16:2; Mar. 12:29, 30.

7. a) Inogne ty olagne nitrea i Jesosy nanagna ty fiangonagne ta Sardisy agne, arake ty trea amy Apokalypsy 3:1-3 ao? b) Inogne ty raha mila ataontikagne?

⁷ Vakio ty Apokalypsy 3:1-3. Toko’e hifoha ara-pagnahy avao tika. Hafa ty olagne nanagna ty ndaty tamy ty fiangonagne ta Sardisy agne. Nanompo i Jehovah iareo tie taloha, faie nanjare tsy nanao izay sasa tafara tatoy. Nirehake tamy iareo areke ty Jesosy tie mila ‘mifoha’ iareo. Inogne ty fampitaoagne ho antika boake amy izay? Mazava hoaze fa tsy ho haligno i Jehovah ty asa nataontikagne. (Heb. 6:10) Faie tsy toko’e hieretseretse tika tie fa ampe ze nivitantika zay, le tsy mila manompo i Jehovah sasa tie amy izao. Maregne fa va’e ho voafetra avao ty ho vitantika tie amy izao naho oharegne amy ty taloha. Faie mila mikezake tika mba “ho maro raha atao amy ty asa i Tompo”, amy izay tika hahavita hifoha avao hatrake ampara’e.​—1 Kor. 15:58; Mat. 24:13; Mar. 13:33.

8. Inogne ty lesogne ianarantika boake amy ty raha nirehafe i Jesosy tamo o rahalahy ta Laodikia tagneo, arake ty Apokalypsy 3:15-17?

⁸ Vakio ty Apokalypsy 3:15-17. Toko’e hafana fo naho hanompo amy ty fontikagne tika. Trea amy ty hafa i Jesosy hoahy ty fiangonagne ta Laodikia agne ka tie hafa ty olagne nanagna iareo. ‘Nimatemate’ ara-pagnahy iareo. Nirehake tamy iareo ty Jesosy tie ‘ore naho nahaferenaigne’ iareo, satria tsy nafana fo tamy ty fanompoagne. Nila nampitombo ty hafanam-po iareo hoahy i Jehovah naho ty fanompoagne Aze areke iareo. (Apok. 3:19) Inogne ty lesogne ho antika? Naho tsapantika tie nihegne ty hafanam-pontikagne, le mila mampitombo ty fankasitrahantika i harena ara-pagnahy anagnantikagne rey tika. (Apok. 3:18) Tsy toko’e ho tondregne hanao ze hanagnantikagne fiaignagne milamigne avao areke tika tie amy izao, satria naho manao izay tika le hanjare tsy hataontika voalohan-draha amy ty fiaignantika sasa ty fanoagne raha ara-pagnahy.

9. Inogne ty raha mila itaoantikagne naho ty raha nirehafe i Jesosy tamy ty Kristiana ta Pergamosy naho ta Tyatira tagne ro henteagne?

⁹ Toko’e handietse ty fampianara o mpivalim-pinoagneo tika. Nimey i Jesosy tsiny ty ndaty ila’e ta Pergamosy tagne satria nampiparitake heve o ndaty naho nanao ze hisia ty fisaratsarahagne tamy i fiangonagney teo. (Apok. 2:14-16) Niderae i Jesosy ty ndaty ila’e tamy ty fiangonagne ta Tyatira tagne, satria niliere iareo tanterake ty “raha laleke ahy i Satana”, sady nirisihe’e iareo mba “hitagne mafe” ty hamarenagne. (Apok. 2:24-26) Faie nanjare naleme ara-pagnahy ty Kristiana ila’e tamo o fiangonagne rehoe tagne, satria nagnorike fampianaran-diso. Nila nibebake areke i Kristiana rey. Akore ka ty amantika amy izao? Tsy maintsy lierentikagne ze fampianaragne mifanohetse amy ty fomba fiheve i Jehovah. Va’e “hoe mpivavake bey” zay o mpivalim-pinoagneo naho henteagne, faie ‘tsy misy heri’e amy iareo ty maha mpivavake aze.’ (2 Tim. 3:5) Ho mora amantika ty hamantatse naho handietse i fampianaran-diso rey naho mianatse soa ty Saontsin’Andrianagnahare tika.​—2 Tim. 3:14-17; Joda 3, 4.

10. Inogne ty lesogne hafa ianarantika boake amy ty raha nirehafe i Jesosy tamy ty fiangonagne ta Pergamosy naho ta Tyatira tagne?

¹⁰ Tsy toko’e ho leferentikagne naho fa karaza findesam-batagne raty iaby. Mbe nanagne olagne hafa ka ty Kristiana ta Pergamosy naho ta Tyatira tagne. Nimey i Jesosy tsiny ty ila’e amy iareo satria tsy nanohetse o findesam-batagne ratio. (Apok. 2:14, 20) Inogne ty lesogne ho antika? Tsy toko’e hitamà tika tie tsy mampagnino i Jehovah ndra tie raty findesam-batagne aza, satria fa nanompo aze tagnate ty taogne maro sady maro ka ty tombotsoam-panompoagne niazontikagne vaho tsy ela. (1 Sam. 15:22; 1 Pet. 2:16) Také’e amantika ty hagnorihantikagne ty fitsipi’e ambone miomba ty findesam-batagne ndra tie miharaty manao akore aza ty fitsipike orihe ty tontolo toy.​—Efes. 6:11-13.

11. Inogne ty raha nianarantikagne hatreto? (Henteo ka ty efajoro tihoe “Lesogne ho Antika amy Izao.”)

¹¹ Akore areke ty azo amintignagne ze raha nianarantika teo rezay? Nitreantika teo fa mila ataontika azo antoke tie ankasitraha i Jehovah ty fanompoantika aze. Naho ohatse tika manao raha va’e hahavy ty fanompoantika tsy hankasitraha i Jehovah, le mila manao raha malaky. (Apok. 2:5, 16; 3:3, 16) Faie nisy raha hafa ka nirehafe i Jesosy tamo o fiangonagne rehoe. Inogne zay?

MIOMANA HIATREKE FAGNENJEHAGNE

12. Inogne ty raha nirehafe i Jesosy tamy ty rahalahy ta Smyrna naho ta Filadelfia tagne, le toko’e hahaliagne antika amy izao? (Apokalypsy 2:10)

¹² Andao tika handineke ty hafa i Jesosy hoahy ty fiangonagne ta Smyrna naho ta Filadelfia tagne. Nirehake tamy ty Kristiana tagne reke mba tsy hatahotse fagnenjehagne, satria hahazo valesoa iareo naho tsy mivalike. (Vakio ty Apokalypsy 2:10; 3:10) Inogne ty lesogne ho antika? Toko’e fa hampoizentikagne tie henjehegne tika sady toko’e ho vognogne ty hiaretse izay ka. (Mat. 24:9, 13; 2 Kor. 12:10) Nagnino ro tena ilaentika ty mitadidy izay?

13-14. Inogne ty voka i raha niseho rehafegne amy Apokalypsy toko faha-​12 aoy tamo o vahoan’Andrianagnahareo?

¹³ Rehafe ty boke Apokalypsy fa henjehegne ty vahoan’Andrianagnahare “amy i andro i Tompoy”, ndra amo ze o andro iaignantika hinane zao. Rehafe ty Apokalypsy toko faha-​12 tie nisy aly nipoake ty tan-dagnitse tagne tafara kede ty nanjarea i Jesosy ho Mpanjaka i Fanjakàn’Andrianagnaharey. I Mikaela, ndra i Jesosy Kristy, naho o tafi’eo nialy tamy i Satana naho o demonia’eo. (Apok. 12:7, 8) Nirese i fahavalon’Andrianagnahare rey tamo o aly iohoe. Natorake tan-tane etoy iareo, le ninday fijaleagne hoahy ty tane toy naho hoahy o ndatio. (Apok. 12:9, 12) Inogne ty voka ze raha zay tamo o vahoan’Andrianagnahareo?

¹⁴ Rehafe ty andine’e magnarake amo o toko faha-12 iohoe ty raha natao i Satana tafara izay. Tsy afake nandeha tan-dagnitse agne sasa reke, hafara’e ze voahosotse mbe ambone tane eto ro amoia’e ty helo’e. Iareo ty solontegna i Fanjakàn’Andrianagnaharey naho ‘nampitoriegne ty miomba i Jesosy.’ (Apok. 12:17; 2 Kor. 5:20; Efes. 6:19, 20) Akore ty nahatanteraha o faminaniagne iohoe?

15. Manondro an’ia i “vavolombelogne roe” rehafegne amy ty boke Apokalypsy aoy, le inogne ty raha nanjò iareo?

¹⁵ Natao i Satana ze hahavy o fahavalon’Andrianagnahareo hagnenjeke o rahalahy voahosotse nitarike ty asa fitoriagne miomba i Fanjakagneio. O lahilahy rehoe i “vavolombelogne roe” rehafegne amy ty boke Apokalypsy ao tie hovonoegney.b (Apok. 11:3, 7-11) Natao kitomboke ty valo amo o rahalahy mpiandraikitse rehoe tamy 1918, le sambe nivoaheloke higadra tagnate ty fotoagne lava iaby. Nieretseretse ty ankamaroa o ndatio tamy izay tie tsy hitohy sasa ty asa hatao o voahosotse rehoe, satria hoe ‘nimate’ iareo tamy izay.

16. Inogne ty raha tsy nampoizegne niseho tamy 1919, faie inogne ty raha nitohiza i Satana avao ty fanoagne aze hatrake amy izao?

¹⁶ Rehafe ty faminaniagne amy Apokalypsy toko faha-​11 ao avao ka tie hovelomegne indraike i “vavolombelogne roe” rey afake fotoagne kedekede. Tena tsy nampoizegne ty nahatanteraha o faminaniagne iohoe, satria mbe tsy niampe tao’e raike ty nampigadragne iareo le fa navotsotse. Nafahagne boake am-pirizò agne i rahalahy voahosotse ginadra rey tamy Marsa 1919, sady nifoagnagne i kitomboke natao iareoy tafara izay. Le avy le nitarike i asa fitoriagne miomba i Fanjakagney indraike iareo. Faie tsy tihoe lelia’e tsy nagnenjeke o vahoan’Andrianagnahareo sasa ty Satana. Nanomboke tamy izay reke, le nitarike “renerano” ndra nanao ze hagnenjehagne o vahoan’Andrianagnahareo iaby. (Apok. 12:15) Mila “miaretse naho managne finoagne” areke tika tsikiraidraike.​—Apok. 13:10.

MANDRAMBESA ANJARA FENO AMY I ASA NIMEY I JEHOVAH ANTIKAGNEY

17. Inogne ty raha tsy ampoizegne niazo o vahoan’Andrianagnahareo ndra tie teo aza ty fagnenjeha i Satana iareo?

¹⁷ Rehafe ty Apokalypsy toko faha-​12 fa hahazo fagnampeagne boake amy ty raha tsy ampoizegne o vahoan’Andrianagnahareo. Hazavae’e fa ‘hatele o taneo i reneranoy’ ndra o fagnenjehagneo. (Apok. 12:16) Le izay vata’e ty raha nisy. Nisy fotoagne nagnavotse o vahoan’Andrianagnahareo ty ampaha’e amy ty tontolo i Satana toy eto, agnisa izay o mpitsara mahay mandinekeo. Mateteke o mpanompo i Jehovah-o ro nandrese tamy ty raharaha ara-pitsaragne nitsaràgne iareo sady nahavy iareo hanagne fahafahagne zay. Akore ty nampiasà iareo ze fahafahagne zay? Nampiasà iareo tamy ty fomba soa ze fahafaha iareo zay, satria nihararaote iareo nanoagne i asa nankine i Jehovah tamy iareoy. (1 Kor. 16:9) Inogne iaby ty tafilitse amo o asa iohoe?

18. Inogne ty hafatse tena ambarantikagne o ndatio amo ze o andro fara’e zao?

¹⁸ Naminany ty Jesosy tie ‘hitory magneran-tane ty talily soa i Fanjakàn’Andrianagnaharey o vahoa’eo, ho vavolombelogne amy ty firenena iaby, vaho izay ho avy ty fara’e.’ (Mat. 24:14) Ampea o anjelio iareo naho fa manao o asa iohoe. Ty anto’e, rehafe ty boke Apokalypsy tie misy anjely “ninday talily soa ... nainai’e hotoriegne amy ty mponegne ambone tane etoy, naho amy ty firenena naho ty foko vaho ty ndaty sambe hafa firehake sady ty vahoake iaby.”​—Apok. 14:6.

19. Inogne ka ty hafatse tsy maintsy torie ze ndaty tea i Jehovah?

¹⁹ Tsy ty talily soa miomba i Fanjakagney avao ty hafatse ambara o vahoan’Andrianagnahareo. Mila manohagne ty asa i anjely rehafegne amy Apokalypsy toko faha-​8 hatrake amy toko faha-​10 aoy ka iareo. Mirehake loza sambe karaza’e hanjò ze manohetse i Fanjakàn’Andrianagnaharey o anjely rehoe. Midika zay tie, mila magnambara lilim-pitsaragne ka o Vavolombelo i Jehovah-o. Ampitoviegne amy ty “havandra naho afo” o hafatse iohoe, satria mampiseho ty fitsaràn’Andrianagnahare ty ampaha’e sambe hafa amy ty tontolo raty i Satana toy. (Apok. 8:7, 13) Mila ampahafantaregne o ndatio areke tie fa marine ty fara’e, amy izay iareo afake manao fiovagne lahibey amy ty fiaigna iareo, le ho votso-belogne amy i andro ty havignera i Jehovah-y. (Zef. 2:2, 3) Faie tsy tea o ndatio o hafatse iohoe. Mila managne herim-po areke tika naho te hahavita hagnambara aze. Vao mainke ho mafe aza ty lilim-pitsaragne fara’e hotorientikagne amy i haoreagne lahibeỳ.​—Apok. 16:21.

ORIHO TY RAHA REHAFE I FAMINANIAGNEY

20. Inogne ty hodinehentikagne amy ty lahatsoratse roe magnarake?

²⁰ Le vata’e mila magnorike ty raha ‘rehafe ty faminaniagne’ amy ty boke Apokalypsy ao areke tika, satria mandrambe anjara amy ty fahatanteraha ty faminaniagne ao. (Apok. 1:3) Faie akore ty hahavitantika tsy hivalike naho fa miatreke fagnenjehagne sady ho sahy hitory avao? Misy raha roe retoagne hagnampe antika: Voaloha’e, mampibaribary ty fahavalon’Andrianagnahare ty raha rehafe ty boke Apokalypsy. Faharoe, hahazo fitahiagne tika naho tsy mivalike. Hodinehentikagne amy i lahatsoratse roe magnarake rey o raha rehoe.