Ry Tanora, Mikezaha Handroso Avao Afara ty Badisa’o

1. Ino iaby ty raha soa fa natao ty ankamaroa o tanorao?

AGNALE’E ty tanora Kristiana atao badisa isan-taogne. Fa nanao o dingagne iohoe ka vao rehe? Naho eka ty vale’e, le tena fale o rahalahi’o naho o rahavave’o ara-pagnahy reo, le hoe izay ka ty Jehovah. (Ohab. 27:11) Fa mba dineho heike ty hamaro ty raha soa fa natao’o. Nazoto nianatse Baiboly ohatse rehe, sady va’e fa an-tao’e maromaro ty nanoa’o izay. Ze fianara’o zay ty nahavy azo ho rese lahatse tie Saontsin’Agnahare vata’e ty Baiboly. Faie tsy izay avao, fa nanjare nahafantatse naho nitea i nampanoratse o Baibolioy ka rehe. Nihanitombo avao ze hatea’o i Jehovah zay, le izay ty nandrisike azo hanokan-tegna naho hatao badisa. Le vata’e fanjaka ze raha natao’o iaby rezay.

2. Ino ty hodinehentikagne ato?

² Azo antoke fa maro ty raha nitsapa ty finoa’o taloha ty nanoagne badisa azo. Faie hisy raha hitsapa ty finoa’o avao arakarake ty androsoa’o ara-pagnahy. Hatao i Satana ze hampihegne ty hatea’o i Jehovah naho ze hahavy azo tsy hanompo Aze sasa. (Efes. 4:14) Tsy toko’e henga’o hahazo azo ty raha hoe izay. Ino ty hagnampe azo tsy hivalike amy i Jehovah naho hitagne i vava natao’o tie hanompo aze avaoy? Mila mikezake mafe mandroso ara-pagnahy avao rehe mba hahavy azo ho Kristiana matotse. (Heb. 6:1) Akore ty azo’o anoagne izay?

AKORE TY HAHAVY AZO HO KRISTIANA MATOTSE?

3. Ino ty raha toko’e hatao ty Kristiana iaby afara ty badisa iareo?

³ Mila mampihatse i torohevetse nimey i apostoly Paoly ty Kristiana ta Efesosy agne rey tika iaby ndra tie fa vita badisa aza. Nirisihe’e iareo mba hanjare ho “ndaty bey” ndra Kristiana “matotse.” (Efes. 4:13, f.a.p.) Ndra naho atao amy ty rehake hafa le tihoe ‘nila nanao fandrosoagne ara-pagnahy avao’ iareo. Mazava ty raha tea i Paoly ho rehafegne naho fa ireke nampitovy ty fandrosoagne ara-pagnahy amy ty fitomboa o ajajao. Fale o rae aman-dreneo naho fa terake sady rehareha iareo ty managne i ana iareoy. Faie tsy afake ty ho ajaja nainai’e avao i ana iareoy. Naho fa mandeha ty fotoagne, le tsy toko’e hanao raha manahake o ajajao sasa reke. (1 Kor. 13:11) Hoe izay ka ty Kristiana. Mila manao fandrosoagne ara-pagnahy avao tika afara ty badisantikagne. Andao tika handineke soso-kevetse tsiampeampe hagnampe antika hahavita izay.

4. Ino ty toetse hagnampe azo handroso ara-pagnahy? Hazavao. (Filipianina 1:9)

⁴ Ampitombò lognandro ty hatea’o i Jehovah. Fa tena tea i Jehovah rehe amy izao. Faie mbe azo’o ampitomboegne avao zay. Amy ty fomba akore? Nirehake raha raike hagnampe azo amy izay ty apostoly Paoly amy Filipianina 1:9 ao. (Vakio.) Nivavake ty Paoly amo o andine’e iohoe ao tie lonike “mba hitombo lognandro” ty hatea o Filipianao. Azontika atao areke ty mampitombo ty hateantika i Jehovah. Manao izay tika naho mikezake ‘hahafantatse soa naho hahatakatse soa ty zoton’arofon’Andrianagnahare.’ Naho fa mitombo ty fahafantarantikagne i Jehovah, le vao mainke hitombo ka ty hateantikagne aze sady hankasitrahantikagne i toetse’e rey naho ty fomba fanoa’e raha. Vao mainke hitombo ka ty fagniriantikagne hampifale aze sady lasa tsy te hanao raha handiso tamà aze tika. Toko’e hanao ze azontikagne atao areke tika mba hahatakatse ty zoton’arofo’e naho ty fomba azontika anoagne izay.

5-6. Ino ty azontikagne atao mba hampitomboagne ty hateantika i Jehovah? Hazavao.

⁵ Hitombo ty hateantika i Jehovah naho mikezake hahafantatse soa i Ana-dahi’ey tikagne. Ty anto’e, tena nitovy toetse taman-dRae’e reke. (Heb. 1:3) Ty fianaragne i Filazantsara efatse rey ty fomba tena soa hagnampe antika hahafantatse i Jesosy. Naho mbe tsy managne fahazaragne mamaky Baiboly isan’andro rehe, nagnino naho manomboke manao izay tie amy izao, le i Filazantsara rey ty anombohagne aze? Naho fa mamaky i tantara i Jesosy rey rehe, le mifantoha amy i toetse’e rey. Tsy nampatahotse zao ty nagnatogne i Jesosy. Nitea’e ty nitrotro o ajajao. (Mar. 10:13-16) Nisoa fagnahy naho nimora irehafagne ka ty Jesosy, le izay ty nahavy o mpiana’eo tsy mba nisalasala zao ty nirehake ze raha tan-tsay iareo ao naho fa nirehake tama’e. (Mat. 16:22) Haintika tie nanahake an-dRae’e ty Jesosy. Midika zay fa tsy mampatahotse ka ty magnatogne i Jehovah. Afake mivavake ama’e ohatse tika. Naho fa mivavake ka tika, le azontika rehafegne ama’e iaby ze raha an-tsaintikagne ao naho am-pontikagne ao. Matoky tika fa tsy hitsaratsara antika reke. Ty anto’e, tea antika reke sady mikarakara antika.​—1 Pet. 5:7.

⁶ Nitretré ndaty ty Jesosy. Hoe ty apostoly Matio: “Naho fa nitrea’e i ndaty maroy le niferenaigna’e, satria nampijalegne naho naparitake manahake ty agnondry tsy misy mpiarake iareo.” (Mat. 9:36) Akore ka ty amy i Jehovah? Hoe ty Jesosy: “Hoe izay ka fa tsy tea i Babako an-dagnitse agney hisy montso ndra ty raike amy i madineke rey aza.” (Mat. 18:14) Tena mampahery o reha i Jesosy rehoe! Naho fa mitombo areke ty fahafantarantika i Jesosy, le hitombo ka ty hateantikagne i Jehovah.

7. Nagnino ro mahasoa azo ty fiharoa’o amo o Kristiana matotseo?

⁷ Vao mainke hahay haneho hatea naho ho matotse ara-pagnahy rehe naho mifandrambe mateteke amy ty rahalahy naho ty rahavave matotse amy ty fiangona’areo sady mikezake hahafantatse soa iareo. Hotrea’o amy izay fa tena falefale avao iareo. Tsy manegnegne iareo nijobogne ty hanompo i Jehovah. Ampitantarao iareo ty raha fa nivita iareo tamy ty fanompoagne i Jehovah. Naho fa handrambe fanapahan-kevetse lahibey ka rehe, le mangataha torohevetse amy iareo. Ty anto’e, ‘ho tomombagne ze raha atao naho maro ty mpanolo-tsaigne.’​—Ohab. 11:14.

8. Ino ty toko’e hatao’o naho ohatse misy mampisalasala azo ty raha rehafe ty Baiboly?

⁸ Anò ze tsy hampisalasala azo. Nirehafegne tamy i fehentsoratse faharoey tagne, tie hatao i Satana ze hikalagnagne azo tsy hanao fandrosoagne ara-pagnahy. Fomba raike anoa’e izay zao toy: Atao’e ze hampisalasala azo miomba ty fampianara ty Baiboly ila’e. Va’e hisy ndaty ohatse handrese lahatse azo tie tsy i Andrianagnahare ty namboatse ze kila raha fa nivoatse miandalagne reo. Va’e tsy le nieretseretse ty miomba ze raha zay loatse rehe tamy ihe mbe nikedekedey. Faie amy irehe fa bey zao le va’e ampianaregne ty miomba izay an-dakilasy agne. Va’e hoe tena mitombegne soa naho mandrese lahatse zay ty fagnazavà i ramosé’areoy ty miomba o evolisionao. Faie va’e mbe lia iareo ka naho nandineke ty porofo magnamaregne tie nisy namboatse ze kila raha. Tsiarovo i toro lalagne amy Ohabolana 18:17 ao manao tihoey tie: “Hoe ze mirehake voaloha’e avao ro managne ty maregne, amparake ty hiavia i ndaty raikey hagnadigne aze soa.” Toko’e handineke ty raha rehafe ty Baiboly areke rehe, fa tsy le avy le hino ze raha ampianaregne azo an-dakilasy agne. Manoa fikarohagne amo o boke naho o gazetentikagneo ao. Mirehafa amo o rahalahy naho o rahavave nino o evolisionao tie taloha rey. Agnonteneo iareo tie ino ty nahavy iareo ho rese lahatse fa misy Mpamorogne raike bey hatea namboatse ze kila raha. Ty fifampirehafagne hoe izay le hagnampe azo ho rese lahatse fa tena misy ty Mpamorogne.

9. Ino ty ianara’o boake amy i Melissa?

⁹ Tena nahasoa i rahavave i Melissab ty fikarohagne natao’e miomba ty famorognagne. Hoe reke: “Hoe tena maregne zay o evolisionao naho henteagne ty fomba fagnazavà o ramoséo aze. Tsy nite hanao fikarohagne raho tamy ty voaloha’e, satria natahotse tie kera ndra maregne vata’e o evolisionao. Faie nieretseretse raho tie tsy tea i Jehovah naho le avy le mino amy izao avao i raha ampianaregne antikagne rey tika fa toko’e hanagne porofo. Nanomboke nanao fikarohagne areke raho. Namaky ty boke tihoe Misy Mpamorogne Raike Midare Azo Vao? (angilé) naho ty bokekele tihoe Akore ty Nampisy Antikagne? Fagnonteneagne Dime Mila Dinehegne raho. Tena itoy i raha nipaliaekoy. Toko’e ho namaky o boke rehoe talohaloha raho.”

10-11. Ino ty hagnampe azo halio findesam-batagne avao? (1 Tesalonianina 4:3, 4)

¹⁰ Mikezaha halio findesam-batagne avao. Mihamafe ty fagniria’o te hila ndaty naho fa mihabey rehe. Va’e hisy fotoagne aza rehe hisy hitaogne haloto findesam-batagne. Tea i Satana naho magnatanterake ze fagniria’o zay rehe. Ino ty hagnampe azo halio findesam-batagne avao? (Vakio ty 1 Tesalonianina 4:3, 4.) Naho fa mivavake amy i Jehovah rehe, le rehafo ama’e ty raha tsapa’o sady mangataha hery ama’e ka. (Mat. 6:13) Tsiarovo fa te hagnampe azo ty Jehovah fa tsy hitsaratsara azo. (Sal. 103:13, 14) Afake magnampe azo ka o Baibolio. Nialy mafe zao ohatse ty Melissa, i rahavave nirehafegne taloha teoy, mba tsy hieretsere-draty. Hoe reke: “Ty famakiagne Baiboly isan’andro ty nagnampe ahy hahavita hialy amy i fagnirian-dratikoy. Naniahy ahike io tie ahy i Jehovah raho sady tena ilaeko reke amy ty fiaignako.”​—Sal. 119:9.

¹¹ Ko mialy irery naho fa managne olagne. Rehafo amy ty rae aman-drene’o ty raha manahiragne azo. Maregne fa tsy mora ty mirehake ty olagne ila’e kindraike, faie tena ilaegne ty manao izay. Hoe ty Melissa: “Nivavake raho mba hanagne herim-po hirehafagne amy i babako ty olagne mahazo ahy. Nahatsiaro ho naivankivagne raho naho fa boake nirehake tama’e. Mino raho fa nahafale i Jehovah ty raha nataoko.”

12. Ino ty hagnampe azo handrambe fanapahan-kevetse soa?

¹² Oriho ty toro lala ty Baiboly. Mitombo ty fahafaha’o hanapa-kevetse raike amy ty raha ila’e arakarake ty ibeiza’o. Faie mbe maro ty raha tsy fanta’o. Ino areke ty hagnampe azo tsy hanao raha va’e hanimba ty fifandrambesa’o amy i Jehovah? (Ohab. 22:3) Nirehake ty raha nagnampe aze handrambe fanapahan-kevetse soa ze rahavave atao tihoe Kari zay. Nitsapa’e fa ty Kristiana matotse le tsy mipay lalàna amy ze kila raha atao’e amy ty fiaignagne. Hoe reke: “Nila nahatakatse ty toro lala ty Baiboly raho fa tsy tihoe magnorike lily avao isake tie hanao raha raike.” Naho fa mamaky Baiboly areke rehe, le saintsaigno zao: ‘Inogne ty fomba fiheve i Jehovah ianarako boake amy ty andinin-teny toy? Misy toro lalagne hagnampe ahy hanao ty soa vao ty ao? Naho misy, le ino ty soa ho rambeseko naho mampihatse aze raho?’ (Sal. 19:7; Isaia 48:17, 18) Naho ihe mamaky Baiboly sady misaintsaigne ze raha vakie’o ao, le hotrea’o fa ho mora ama’o ty handrambe fanapahan-kevetse mampifale i Jehovah. Naho ihe mikezake manao fandrosoagne avao, le hotrea’o tie tsy mila lalàna mazava amy ze kila raha hatao’o rehe satria fa hai’o ty fomba fiheve i Jehovah miomba i raha rey.

13. Nagnino ro mahasoa ty fanagnagne namagne soa? (Ohabolana 13:20)

¹³ Ze ndaty tea i Jehovah ro jobogno hatao namagne. Fa nirehafentika taloha teo tie tena afake hagnampe azo ho Kristiana matotse ty namagne filie’o. (Vakio ty Ohabolana 13:20.) Nihegne ohatse ty fifalea ty rahavave raike atao tihoe Sara. Faie nisy raha nagnampe aze vao mainke ho falefale indraike. Hoe reke: “Nahatrea namagne soa raho, sady tena tamy ty fotoagne nipaliako namagne ty nahatreavako iareo. Nisy rahavave tanora zay niarake nianatse Fitalakesan-davitse tamako isan-keregnandro. Le nisy rahavave hafa ka nagnampe ahy mba hagnomey toin-drehake naho fa am-pivoriagne agne. Noho o namako rehoe ty nahavy ahy nanomboke nianatse raike naho hivavake amy ty fo. Nanomboke nifandrambe soa tamy i Jehovah raho, le nanjare nifalefale indraike.”

14. Akore ty nahavy i Julien hanagne namagne soa?

¹⁴ Akore ty hahavy azo hanagne namagne soa? Hoe ty Julien, androanavi-pagnahy: “Tamy iraho mbe nitanora, le nanagne namagne soa satria niarake nanompo tamo o rahalahio naho o rahavaveo. Nafana fo iareo sady nampea iareo ka raho hahatrea tie mahafale o fanompoagneo. Nanomboke nanao tanjogne ty hanompo marain-tsy hariva areke raho. Tamy izay ka raho ro nahatsapa tie kay o nahavy ahy tsy nanagne namagne soa marò le noho iraho niarake tamy ty ndaty nitovy taogne amako avao. Nanagne namagne mahafinaritse tamy i Betela ao raho tafara tatoy. Nagnampe ahy hahay hijobogne soa ty fihisagne ataoko ty modely iareo, sady nagnampe ahy vao mainke hifandrambe marine amy i Jehovah zay.”

15. Ino ty raha nampitaoe i Paoly i Timoty miomba ty ndaty toko’e hifagnosehosegne? (2 Timoty 2:20-22)

¹⁵ Faie akore naho misy ndaty amy i fiangonagne eo trea’o tie tsy le soa hiarahagne? Nihay i apostoly Paoly fa nisy ndaty tamo o fiangonagneo eo tsy ao soa ty ara-pagnahi’e, le nampitao i Timoty reke mba tsy hiarake amy i ndaty rey. (Vakio ty 2 Timoty 2:20-22.) Tena sarobily ty fifandrambesantikagne amy i Jehovah. Nikezake mafe tika mba hanagne io. Tsy toko’e hisy ndaty areke hengantikagne hanimba ty fifandrambesantikagne amy i Raentikagne an-dagnitse agney.​—Sal. 26:4.

NAGNINO TY FANAGNAGNE TANJOGNE RO MAGNAMPE AZO HO MATOTSE?

16. Tanjogne manao akore ty toko’e hikezaha’o hanagnagne?

¹⁶ Managna tanjogne mahasoa. Mijobogna tanjogne hagnampe azo hagnamafe ty finoa’o naho hahavy azo ho matotse ara-pagnahy. (Efes. 3:16) Azo’o atao ohatse ty magnasoa ty fianara’o raike naho ty famakia’o Baiboly. (Sal. 1:2, 3) Ndra va’e hotrea’o ka tie mila mivavake mateteke sady hanao izay amy ty fo rehe. Ndra trea’o ka tie mila mikezake rehe mba hifehe-tegna amy ty fihisagne filie’o naho ty raha andania’o ty fotoa’o. (Efes. 5:15, 16) Ho fale ty Jehovah naho fa vazoho’e tie mikezake mafe mba hanao fandrosoagne ara-pagnahy avao rehe.

17. Nagnino ro mahasoa azo ty magnampe ty hafa?

¹⁷ Hanjare Kristiana matotse rehe naho magnampe ty hafa. Hoe ty Jesosy: “Mahasambatse vata’e ty magnomey ta tie mandrae.” (Asa. 20:35) Vao mainke ho fale rehe naho manokagne fotoagne sady mampiasa ty heri’o mba hagnampeagne ty hafa. Azo’o atao tanjogne ohatse ty hagnampe ty Kristiana fa bey naho manan-kandra amy ty fiangona’areo eo. Afake manao bezara hoahy iareo rehe ndra magnampe iareo hahay hampiasa o varam-bazahao. Naho rahalahy rehe, le azo’o atao tanjogne ty ho mpagnampe amy ty fiangonagne, amy izay rehe tena ho afake hagnampe o rahalahio naho o rahavaveo amy ty fomba maro. (Fil. 2:4) Maneho hatea o ndatio ka rehe naho mitory ty talily soa i Fanjakagney amy iareo. (Mat. 9:36, 37) Naho mete aza, le azo’o atao tanjogne ty hanao fanompoagne marain-tsy hariva.

18. Nagnino ty fanompoagne marain-tsy hariva ro magnampe azo hanao fandrosoagne ara-pagnahy?

¹⁸ Hagnampe azo hanao fandrosoagne ara-pagnahy ty fanoagne fanompoagne marain-tsy hariva. Va’e ho afake hagnatreke ty Sekoly ty Mpitory i Fanjakagney naho hanao mpisava lalagne ohatse rehe. Va’e ho afake hanompo amy i Betela agne ka rehe ndra hanao fagnoregnagne. Hoe ze rahavave mpisava lalagne tanora atao tihoe Kaitlyn zay: “Agnisa ty raha lahibey nagnampe ahy hanao fandrosoagne ara-pagnahy tafara i badisakoy, ty fiarahagne manompo amo o rahalahy naho o rahavave za-drahao. Nandrisike ahy hianatse soa o Baibolio naho hagnasoa ty fomba fampianarako ty modely iareo.”

19. Ino ty fitahiagne ho azo’o naho ohatse rehe mikezake manao fandrosoagne ara-pagnahy avao?

¹⁹ Hahazo fitahiagne maro rehe naho mikezake handroso ara-pagnahy avao. Tsy handany ty fahatanora’o amy ty raha tsy misy dika’e rehe amy izay. (1 Jaona 2:17) Tsy hijale noho ty voka-draty ty fanapahan-kevetse raty va’e ho nirambese’o ka rehe. Ho tomombagne aza ty raha atao’o sady tena ho sambatse rehe. (Ohab. 16:3) Hampahery o mpiharo finoagne ama’ò ty modeli’o, ndra mbe tanora iareo ndra fa antetse. (1 Tim. 4:12) Fa ty tena lahibey le tihoe, hilamin-tsaigne naho hahatsiaro ho afa-po rehe satria mampifale i Jehovah sady mifandrambe maifitse ama’e.​—Ohab. 23:15, 16.