Vognogne Hanokan-tegna Hoahy i Jehovah vao Rehe?

1-2. Ino ty raha toko’e hatao ty ndaty raike aloha ty hanoagne aze badisa?

TAGNATE ty dime taogne lasa, le an-tapetrisa’e ty ndaty natao badisa le nanjare Vavolombelo i Jehovah. Maro amy iareo ty nahafantatse ty hamarenagne tamy tie ireke “mbe nianak’ajaja” manahake i Timoty, i mpianatse tamy ty taonjato voaloha’ey. (2 Tim. 3:14, 15) Ty ila’e le tamy tie ireke fa bey ndra fa antetse ty nianatse ty miomba i Jehovah. Nisy rakemba 97 taogne zay zao nianatse Baiboly tamy ty Vavolombelo i Jehovah, le natao badisa!

² Naho mpianatse Baiboly rehe ndra nitezaegne tagnate ty hamarenagne ao, fa nieretseretse ty hatao badisa vao rehe? Tanjogne tena soa zay! Faie aloha ty badisa’o le mila manokan-tegna hoahy i Jehovah hey rehe. Hohazavaegne amy ty lahatsoratse toy ato ty atao tihoe fanokanan-tegna. Hagnampe azo zay hahatrea tie nagnino rehe ro tsy toko’e hatahotse ty hanokan-tegna naho hatao badisa naho fa vognone hanao izay.

INO TY ATAO TIHOE MANOKAN-TEGNA?

3. Mirehafa ndaty amy Baiboly ao nanokan-tegna hoahy i Jehovah.

³ Amy Baiboly ao, le voatokagne mba hanao raha masigne ty ndaty raike manokan-tegna. Firenena voatokagne hoahy i Jehovah zao o Israelitao. Faie nisy tamy ty ndaty tamy i firenenay ao ka nanokagne ty tegna’e manokagne hoahy i Jehovah. Nisy “famantaragne masigne tihoe voatokagne” vita tamy ty volamena ohatse ty satroke nagnisia i Arona. Nampiseho io tie finily mba hanao fanompoagne manokagne hoahy i Jehovah reke zane hoe ho mpisorom-bey. (Lev. 8:9) Nanokan-tegna hoahy i Jehovah ka o Naziritao. Ty rehake tihoe “Nazirita” le boake amy ty rehake Hebreo tihoe nazirʹ midika tihoe “Tafasarake” ndra “Voatokagne.” Nagnorike ty raha nitaké i Lalà i Mosesỳ tamy iareo o Naziritao.​—Nom. 6:2-8.

4. a) Naho fa manokan-tegna hoahy i Jehovah rehe, ino ty raha manjare lahibey amy ty fiaigna’o? b) Ino ty dika tihoe “mandietse” ty vata’o? (Henteo i sarey.)

⁴ Naho fa manokan-tegna hoahy i Jehovah rehe, le manjare mpiana i Jesosy Kristy sady ty zoton’arofo i Jehovah ty hatao’o lahibey amy ty fiaigna’o. Ino ty tafilitse amy tihoe manokan-tegna? Hoe ty Jesosy: “Toko’e handietse ty vata’e ze te hagnorike ahy.” (Mat. 16:24) Ty ndaty nanokan-tegna hoahy i Jehovah areke le mila mandietse ze raha iaby tsy mampifale Aze. (2 Kor. 5:14, 15) Midika zay fa toko’e ho liere’o ze “asa ty nofotse” agnisa izay ty fijangajangagne. (Gal. 5:19-21; 1 Kor. 6:18) Sarotse vao ty mankatò izay? Aha’a. Hahavita izay rehe naho tea i Jehovah sady rese lahatse tie mahasoa ty mankatò ty lili’e. (Sal. 119:97; Isaia 48:17, 18) Nirehake hoe izao ty rahalahy raike atao tihoe Nicholas: “Afake mihevetse ty fitsipy i Jehovah ho pirizò mikalagne azo tsy hanao ze raha tea’o hatao rehe ndra afake mihevetse aze manahake ty lakoro vigne miaro azo amy ty liona magnoho-doza.”

5. a) Akore ty atao naho fa manokan-tegna hoahy i Jehovah? b) Ino ty tsy mampitovy ty fanokanan-tegna naho ty badisa? (Henteo i sarey.)

⁵ Akore ty atao naho fa manokan-tegna hoahy i Jehovah? Mampitamà aze amy ty alala ty vavake rehe fa hanompo aze raike avao sady hanao ty zoton’arofo’e ho voalohan-draha amy ty fiaigna’o. Mampitamà i Jehovah ka rehe fa hotea aze amy ty “fo’o iaby naho amy ty tegna’o iaby naho amy ty sai’o iaby vaho amy ty heri’o iaby.” (Mar. 12:30) Vava atao’o amy i Jehovah raike avao ty fanokanan-tegna fa tsy misy ndaty hafa magnatreke aze. Mifanohetse amy izay ty badisa satria atao agnatreha o ndaty maro eo mba hampisehoa’o fa nanokan-tegna rehe. Raha tena lahibey ty fanokanan-tegna sady mitamà ty Jehovah fa hagnatanterake i vava nanoe’oy rehe sady izay ka ty toko’e hatao’o.​—Mpito. 5:4, 5.

NAGNINO REHE RO MANOKAN-TEGNA HOAHY I JEHOVAH?

6. Ino ty anto’e mahavy ty ndaty raike hanokan-tegna hoahy i Jehovah?

⁶ Ty anto’e lahibey le noho ty hatea’o aze. Tsy fihetseham-po avao zay. Nitombo ty hatea’o i Jehovah naho fa ‘nahafantatse soa’ ty miomba aze naho ty fikasà’e rehe. (Kol. 1:9) Ty raha nianara’o boake agnate Baiboly ao ty nahavy azo ho rese lahatse tie 1) tena misy ty Jehovah, 2) Saontsi’e o Baibolio, 3) mampiasa ty fandamina’e reke mba hagnatanteraha’e ty zoton’arofo’e.

7. Ino hey ty raha toko’e hataontika aloha ty hanokanantika tegna hoahy i Jehovah?

⁷ Ze ndaty manokan-tegna hoahy i Jehovah, le toko’e hahafantatse ty fampianaragne fototse amy ty Saontsin’Agnahare ao sady miaigne mifagnarake amy ty fitsipi’e. Manao ze azo’e atao ka iareo mba hirehafagne amy ty hafa ze raha nianara’e. (Mat. 28:19, 20) Mitombo ty hatea iareo i Jehovah sady manjare magniry hanompo aze raike avao iareo. Tsy hoe izay ka vao rehe? Noho irehe tea aze amy ty fo’o ty mahavy azo te hanokan-tegna naho hatao badisa, fa tsy tihoe manokan-tegna hoahy i Jehovah rehe satria te hampifale i mpampianatse Baiboly azoy naho ty rae aman-drene’o ndra ka manao izay rehe satria manao izay ty nama’o.

8. Nagnino ty fankasitrahagne ro hagnampe azo ho tapa-kevetse hanokan-tegna hoahy i Jehovah? (Salamo 116:12-14)

⁸ Naho fa misaintsaigne ty raha iaby natao i Jehovah rehe, le manjare te hankasitrake aze sady izay ty mahavy azo te hanokan-tegna ho aze. (Vakio ty Salamo 116:12-14.) Tokave ty Baiboly tihoe Mpagnomey “ze fagnomezagne soa naho ze fagnomezagne voririke” ty Jehovah. (Jak. 1:17) Ty fagnomezagne fara izay ty lahibey nimea’e, le ty sorogne nimea i Ana-dahi’ey, zane hoe i Jesosy. Mba eretsereto moa! Noho i solovoigney le azo’o atao ty mifandrambe maifitse amy i Jehovah. Mea’e fahafahagne hiaigne nainai’e ka rehe. (1 Jaona 4:9, 10, 19) Fomba ampisehoa’o ty fankasitraha’o ze hatea lahibey naseho i Jehovah zay naho ty fitahiagne hafa nimea’e azo ty fanokana’o ty tegna’o ho aze. (Deot. 16:17; 2 Kor. 5:15) Mirehake ty fomba azo’o ampisehoagne ze fankasitraha’o zay ty lesogne 46, hevetse 4, amy ty boke tihoe Ankamamio Nainai’e o Fiaignagneo! Misy video 3 minitra manao tihoe zay ty ao tie Manoa Fagnomezagne ho An’Andrianagnahare.

VOGNOGNE TY HANOKAN-TEGNA NAHO HATAO BADISA VAO REHE?

9. Nagnino ty ndaty raike ro tsy toko’e ho seregne hanokan-tegna?

⁹ Va’e hahatsapa rehe tie mbe tsy vognogne hanokan-tegna naho hatao badisa. Ty anto’e, satria va’e mbe misy fagnovàgne mila atao’o amy ty fiaigna’o amy izay mba mifagnarake amy ty fitsipy i Jehovah. Va’e mbe mila mampitombo ty finoa’o ka varagne rehe. (Kol. 2:6, 7) Tsy mitovy ty fandrosoa o mpianatseo sady tsy voatere hitovy ka ty fotoagne anoa iareo fandrosoagne. Mikezaha areke hamantatse ty fagnovàgne mila atao’o, le ko mampitaha ty tegna’o amy ty hafa.​—Gal. 6:4, 5.

10. Ino ty azo’o atao naho ohatse rehe mahatsapa tie mbe tsy vognogne ty hanokan-tegna naho hatao badisa? (Henteo ka ty efajoro tihoe “Hoahy ze Tineza Tagnate ty Hamarenagne Ao.”)

¹⁰ Ndra tie tsapa’o aza fa mbe tsy vognogne hanokan-tegna hoahy i Jehovah rehe, le mikezaha hanagne ze tanjogne zay avao. Angataho ty Jehovah hitahy ty kezake mila atao’o mba hanoagne fagnovàgne. (Fil. 2:13; 3:16) Afake matoky rehe fa hijanjigne ty vavake atao’o reke sady hamale izay.​—1 Jaona 5:14.

NAGNINO TY ILA’E RO MISALASALA?

11. Akore ty hagnampea i Jehovah antika mba tsy hivalike ama’e?

¹¹ Misy ndaty ila’e misalasala ty hanokan-tegna naho hatao badisa ndra tie fa vognogne aza. Va’e hieretseretse iareo tie: ‘Akore naho manao fahotagne lahibey raho le voaroake?’ Naho matahotse hoe izay ka rehe, le matokia fa hagnomey ze kila raha ilae’o ty Jehovah amy izay rehe “hagnomey voninahitse aze le hampifale aze.” (Kol. 1:10) Hagnomey hery azo mba hanoa’o ty soa ka reke. Fa nagnampe ndaty maro hanao izay reke. (1 Kor. 10:13) Noho ze raha zay, le tsy ampe avao ty ndaty voaroake tsy ho agnisa ty fiangonagne Kristiana. Magnampe o vahoa’eo mba tsy hivalike ty Jehovah.

12. Ino ty hagnampe antika tsy hanao fahotagne lahibey?

¹² Va’e halaem-pagnahy hanao raha raty o ndatio satria tsy voririke. (Jak. 1:14) Faie afake mifily ty raha hatao’o rehe naho fa misy tsapa hevetse. Naho ty maregne, le irehe raike avao ty afake mifily ty raha hatao’o amy ty fiaigna’o. Faie misy ndaty mieretseretse tie tsy afake mifehe ty raha tsapantika naho ty raha hataontika tika naho fa misy tsapa hevetse. Faie diso zay. Afake mifehe o fagnirian-dratio rehe. Intoa misy raha hagnampe azo: Mivavaha avao isan’andro, manàgna fahazaragne mianatse raike ty Saontsin’Agnahare, magnatreha fivoriagne sady rehafo amy ty hafa ty raha inoa’o. Naho manao ireo avao rehe le hahavita hiaigne mifagnarake amy ty fanokanan-tegna’o. Tadidio avao ka fa hagnampe azo ty Jehovah.​—Gal. 5:16.

13. Ino ty ohatse soa nimey i Josefa antika?

¹³ Ho mora ama’o ty hiaigne mifagnarake amy ty fanokanan-tegna’o naho ohatse fanta’o mialoha tie ino ty hatao’o naho fa misy tsapa hevetse. Mirehake ndaty maromaro tsy voririke nanao izay ty Baiboly. Ohatse zao, nandrese lahatse i Josefa mba hiarake ama’e i valy i Potifaray. Faie tsy nisalasala miomba ty raha toko’e hatao’e ty Josefa. Rehafe ty Baiboly fa “nandietse reke” sady nirehake tie: “Le hataoko akore ty hanao i raha raty lahibey zay sady hanota aman’Andrianagnahare?” (Gen. 39:8-10) Mazava areke fa nifanta i Josefa, taloha ty nitaona i ampelay aze ty raha toko’e hatao’e. Tsy nisarotse tama’e areke ty nanao ty soa naho fa nisy tsapa hevetse.

14. Ino ty hagnampe antika tsy ho rese ty tsapa hevetse?

¹⁴ Akore ty hanahafa’o i Josefa? Amy izao rehe le fa afake mamantatse mialoha ty raha toko’e hatao’o naho fa misy tsapa hevetse. Mianara le avy le mandietse ze raha heje i Jehovah. Ndra ty hieretseretse izay aza le falio. (Sal. 97:10; 119:165) Tsy ho rese ty tsapa hevetse rehe naho manao izay satria fa fanta’o ty raha toko’e hatao’o.

15. Akore ty ampisehoa ty ndaty raike tie “mikodebe mafe” i Jehovah reke? (Hebreo 11:6)

¹⁵ Va’e inoa’o tie nahatrea ty hamarenagne rehe sady magniry mafe ty hanompo i Jehovah amy ty fo’o iaby. Faie va’e mbe misy raha mampisalasala azo. Afake mitsikombe ty raha natao i Davida Mpanjaka rehe. Mangataha amy i Jehovah tie: “O Andrianagnahare, dineho amy ty pitsopitso’e raho le fantaro ty foko. Dineho raho le fantaro ze raha mampinekoneko ahy. Vazohò kera misy raha raty ty agnateko ao le tariho mbamy ty lalagne nainai’e mbeo raho.” (Sal. 139:23, 24) Magnomey fitahiagne hoahy ze “mikodebe aze mafe” ty Jehovah. Atoro’o aze fa manao izay rehe naho fa manao ze azo’o atao mba hanagnagne tanjogne hanokan-tegna naho hatao badisa.​—Vakio ty Hebreo 11:6.

MAGNATOGNA I JEHOVAH AVAO

16-17. Nagnino ty ndaty raike nitezaegne tagnate ty hamarenagne ao ro mbe atao tihoe nitaone i Jehovah avao? (Jaona 6:44)

¹⁶ Nirehafe i Jesosy tie i Jehovah ty mitaogne o mpiana’e reo. (Vakio ty Jaona 6:44.) Mba eretsereto moa zay naho tihoe midika ino ho azo zay! Vazoho i Jehovah ty raha soa agnate ty ndaty tsikiraidraike nitaone’e. Mihevetse iareo ho “fanagna’e manokagne” ndra fanagnagne “sarobily” reke. (Deot. 7:6; f.a.p.) Hoe izay ka ty fivazohoa’e azo.

¹⁷ Va’e nitezaegne tagnate ty hamarenagne tao rehe. Mete hahatsapa rehe tie manompo i Jehovah manahake ty atao ty rae aman-drene’o avao fa tsy tihoe Ireke ro nitaogne azo. Faie hoe ty Baiboly: “Magnarinea an’Andrianagnahare, le hagnarine anareo reke.” (Jak. 4:8; 1 Tan. 28:9) Naho ohatse rehe manao raha voaloha’e mba hiharineagne i Jehovah le hiharine azo ka reke. Tsy tihoe mihevetse azo ho agnisa ty fikambanagne raike avao ty Jehovah. Nitaogne ze ndaty tsikiraidraike reke agnisa izay ty ndaty tineza agnate ty hamarenagne ao. Naho ohatse manao raha hiharineagne i Jehovah ty ndaty hoe izay, le hanao raha ka Reke arake ty rehafe ty Jakoba 4:8.​—Ampitahao amy ty 2 Tesalonianina 2:13.

18. Ino ty hianarantika amy ty lahatsoratse magnarake? (Salamo 40:8)

¹⁸ Naho fa manokan-tegna hoahy i Jehovah naho atao badisa rehe, le mampiseho ty toe-tsaigne nanagna i Jesosy. Nivognogne hahafoe tegna ho an-dRae’e reke le hanao ze raha nasae’e hatao’e. (Vakio ty Salamo 40:8; Heb. 10:7) Amy ty lahatsoratse magnarake, le hodinehentika ty raha hagnampe azo hanohy hanompo i Jehovah avao afara ty badisa’o.