‘Magnoriha’ i Jesosy Avao Ndra tie fa Vita Badisa aza Rehe

1-2. Ino ty fitahiagne ho azo ty ndaty raike afara ty badisa’e?

TENA fale tika naho fa natao badisa sady manjare agnisa ty keleia i Jehovah. Tena tombotsoa tihoe managne fifandrambesagne maifitse amy i Jehovah. Mitovy hevetse amy ty raha nirehafe i Davida mpanao salamo toy tika: “Sambatse ze filie’o [Jehovah] sady ampagnatogne’o azo mba hitoboke an-kiririsa’o eo.”​—Sal. 65:4.

² Tsy tihoe mitaogne o ndatio mba hagnatogne aze avao ty Jehovah. Nitreantika tamy i fianaragne taloha itoỳ fa mifily ty hifandrambe amy ze ndaty te hifandrambe ama’e Reke. (Jak. 4:8) Naho fa manokan-tegna hoahy i Jehovah rehe sady atao badisa, le manjare managne fifandrambesagne manokagne Ama’e. Afara ty badisa’o, le afake matoky rehe fa ‘handrotsake fitahiagne maro ho azo reke, mihoatse ze paliae’o aza.’​—Mal. 3:10; Jer. 17:7, 8.

3. Ino ty andraikitse lahibey takegne amy ty Kristiana nanokan-tegna naho natao badisa? (Mpitoriteny 5:4, 5)

³ Naho ty maregne, le fiatomboha ty fanompoagne i Jehovah ty badisa. Afara ty anoa’o ze dingagne zay, le azo antoke fa te hanao ze fara’e soa vita’o rehe mba hiaigne mifagnarake amy i fanokanan-tegna’oy ndra tie miatreke tsapa hevetse ndra raha sarotse aza. (Vakio ty Mpitoriteny 5:4, 5.) Fa agnisa ty mpiana i Jesosy rehe hinane zao, le azo antoke fa hagnorike ty ohatse naho ty lily nimea’e arake ze vita’o. (Mat. 28:19, 20; 1 Pet. 2:21) Hagnampe azo hanao izay ty lahatsoratse toy.

‘ORIHO AVAO’ TY JESOSY NDRA TIE MISY RAHA SAROTSE NDRA TSAPA HEVETSE

4. Ino ty dika tihoe hinday i “hatae fijaleagney” ze mpanonjohy ty lia i Jesosy? (Lioka 9:23)

⁴ Ko mieretseretse tie tsy hisy olagne hatrehe’o rehe afara ty badisa’o. Naho ty maregne le fa nirehake tamo o mpiana’eo ty Jesosy tie toko’e hinday i “hatae fijaleagney” iareo. Toko’e hinday izay “lognandro” iareo. (Vakio ty Lioka 9:23.) Midika vao zay fa hijale lognandro ty mpanonjohy ty lia i Jesosy? Tsy izay. Te hirehake reke tie ankoatse ty fitahiagne ho azo iareo amy ty fiaigna’e, le hiatreke raha sarotse iareo. Tena tsy ho mora amy iareo ty ila’e amy ze raha sarotse rey zay.​—2 Tim. 3:12.

5. Ino ty fitahiagne nampitamae i Jesosy hoahy ze nahafoe raha noho ty ama’e?

⁵ Va’e fa nagnenjeke azo ty keleia’o ndra ka rehe nanao sorogne le namoe vola naho fanagnagne mba hanoagne voalohan-draha i Fanjakagney. (Mat. 6:33) Ony i Jehovah soa ze raha iaby atao’o ho aze. (Heb. 6:10) Azo antoke ka fa va’e fa nahatsapa ty raha nirehafe i Jesosy toy rehe: “Tsy misy ndaty fa nahafoe tragno, ndra rahalahy, ndra rahavave, ndra rene, ndra rae, ndra anake, ndra teteke noho ty amako naho i talily soay le tsy hahazo raha maro mihoatse lavitse o raha nafoe’e rehoe amy izao. Agnisa izay ty tragno, rahalahy, rahavave, rene, anake naho teteke, vaho fagnenjehagne. Amy ty hoavy ka reke hahazo i havelogne nainai’ey.” (Mar. 10:29, 30) Maro vata’e ty fitahiagne niazo’o naho ampitahaegne amy ty raha nafoe’o.​—Sal. 37:4.

6. Nagnino rehe ro mila manohetse “ty fagniria ty nofotse” avao afara ty badisa’o?

⁶ Afara ty badisa’o ka rehe le mbe mila mialy amy ty “fagniria ty nofotse” avao. (1 Jaona 2:16) Manao izay rehe satria mbe tsy voririke. Misy fotoagne rehe va’e hahatsapa manahake ty nitsapa i apostoly Paoly. Hoe reke: “Mahafinaritse ahy vata’e ty lalàn’Agnahare, amy ty toetse maha ie ahy, faie amy ty vatako ao le ahatreavako lalàna hafa mialy amy ty lalà ty saiko sady mitarike ahy ho ndevo ty lalà ty ota amy ty vatako ao.” (Rom. 7:22, 23) Va’e ho kivy rehe satria mbe mialy amo o fagnirian-dratio. Ndra tie eo aza zay, le saintsaigno avao ty raha nampitamae’o i Jehovah naho fa nanokan-tegna ho aze rehe. Hagnampe azo handrese tsapa hevetse zay. Naho ty maregne, le hagnampe azo i vava natao’oy naho fa miatreke tsapa hevetse rehe. Amy ty fomba akore?

7. Nagnino ty fanokanan-tegna’o ro hagnampe azo tsy hivalike amy i Jehovah?

⁷ Naho fa manokan-tegna hoahy i Jehovah rehe le mandietse ty vata’o. Midika zay tie mila mandietse ty fagniria’o manokagne naho ze raha iaby tsy mampifale i Jehovah rehe. (Mat. 16:24) Naho fa miatreke tsapa hevetse ndra raha sarotse rehe, le tsy toko’e hisalasala miomba ty raha hatao’o. Fa nanapa-kevetse mialoha miomba ty raha hatao’o rehe, le tihoe tsy hivalike amy i Jehovah. Toko’e ho tapa-kevetse ty hampifale i Jehovah rehe. Afake ty hanao manahake i Joba rehe. Ndra tie niatreke raha fara’e izay ty sarotse aza reke, le mbe nahavita nirehake hoe izao avao tie: “Tsy hagneke hivalike raho!”​—Joba 27:5.

8. Nagnino ty fitadidiagne i vavake natao’o tamy irehe nanokan-tegnay ro hagnampe azo handrese tsapa hevetse?

⁸ Naho fa mandineke i vavake natao’o tamy irehe nanokan-tegna hoahy i Jehovah-y rehe, le hagnampe azo hanagne hery hanoheragne tsapa hevetse zay. Hagniry valy o ndaty vao ohatse rehe? Oho’o, satria fa nampitamà i Jehovah rehe fa tsy hanao izay. Naho fa tsy magnenga ze fagniriagne zay hitombo rehe, le tsy ho sarotse ama’o ty hialy ama’e afara izay. ‘Hitsile’ rehe, le tsy hagnorike ty “lala ty raty fagnahy.”​—Ohab. 4:14, 15.

9. Nagnino ty fitadidiagne i vavake natao’o tamy irehe nanokan-tegnay ro hagnampe azo hanao voalohan-draha ty fanompoagne i Jehovah avao?

⁹ Akore ka naho misy ndaty magnomey asa azo faie hahavy azo hanapatapake fivoriagne zay? Azo antoke fa hai’o ty toko’e hatao’o. Taloha ty nagnomea’e azo i asay, le fa nitapa-kevetse rehe fa tsy hanao raha hahavy azo hanapatapake fivoriagne. Tsy hagneke hanao asa manahake izay areke rehe sady hikezake hanao voalohan-draha i Jehovah avao. Afake magnampe azo ty fisaintsaignagne ty ohatse nengà i Jesosy. Tapa-kevetse hampifale an-dRae’e reke. Manahake i Jesosy ka le avy le tohero ze raha fanta’o fa tsy hampifale i Jehovah.​—Mat. 4:10; Jaona 8:29.

10. Akore ty fomba hagnampea i Jehovah azo afara ty badisa’o mba hahavy azo “hagnorike” i Jesosy avao?

¹⁰ Naho fa irehe miatreke olagne ndra tsapa hevetse hanao raty, le afake magnaporofo rehe tie tapa-kevetse ty ‘hagnorike i Jesosy avao.’ Afake matoky ka rehe fa hagnampe azo hanao izay ty Jehovah. Hoe ty Baiboly: “Tsy mivalike amy ty saontsi’e ty Andrianagnahare, le tsy hienga anareo ho azo ty tsapa hevetse mihoatse ze fa tante’areo, fa naho fa misy tsapa hevetse, le hisia’e hirike hiakara’e, soa tie hahatanteza’areo aze.”​—1 Kor. 10:13.

INO TY AZO’O ATAO MBA HAGNORIHA’O I JESOSY AVAO?

11. Ino ty fomba raike tena soa hahafaha’o hagnorike i Jesosy avao? (Henteo i sarey.)

¹¹ Nafana fo tamy ty fanompoagne i Jehovah ty Jesosy sady nikezake nifandrambe ama’e tamy ty alala ty vavake. (Lioka 6:12) Naho ty maregne, ty fomba soa hagnoriha’o i Jesosy avao afara ty badisa’o, le ty fanoa’o raha mba hifandrambesa’o amy i Jehovah avao. Hoe ty Baiboly: “Faie fa nisy fandrosoagne nivitantikagne, le andao tika hikezake handroso hoe izay avao.” (Fil. 3:16) Naho fa mandeha ty fotoagne, le haharey ty tantara ty rahalahy naho rahavave maro nitapa-kevetse hanao raha maro amy ty fanompoagne i Jehovah rehe. Va’e nagnatreke ty Sekoly ty Mpitory i Fanjakagney iareo ndra nifindra amy ty toeragne mila fagnampeagne. Naho afake manao izay ka rehe le tanjogne soa ze atao’o zay. Mazoto mampitombo ty fanompoa’e o vahoa i Jehovah-o. (Asa. 16:9) Akore naho tsy afake manao izay rehe ty amy izao? Ko mieretseretse tie tsy misy dika’e rehe naho ampitahaegne amy ze afake manao ireo. Ty raha tena lahibey le ty fiareta’o. (Mat. 10:22) Ko haligno fa mampifale i Jehovah rehe naho fa manao ze fara’e soa mifagnarake amy ty raha iaigna’o naho ze vita’o. Izay ty fomba tena lahibey hagnoriha’o i Jesosy avao afara ty badisa’o.​—Sal. 26:1.

12-13. Ino ty azo’o atao naho fa manomboke mihegne ty hafanam-po’o? (1 Korintianina 9:16, 17) (Henteo ka ty efajoro tihoe “Tohizo Avao i Laỳ.”)

¹² Akore ka naho misy fotoagne rehe mahatsapa tie tsy tena boake amy ty fo’o ty vavake atao’o ndra tsy tena mahafale azo ty fanompoa’o? Akore ka naho tsy mahafinaritse azo manahake ty taloha ty famakia’o Baiboly? Naho miseho ze raha rey zay afara ty badisa’o, le ko mieretseretse tie niala tama’o ty fagnahy i Jehovah. Noho itika tsy voririke le va’e hiovaova ty raha tsapantika. Naho fa manomboke mihegne ty hafanam-po’o, le saintsaigno ty ohatse nengà i apostoly Paoly. Ndra tie nikezake hanahake i Jesosy aza reke, le nisy fotoagne nitsapa’e tie tsy tena nafana fo reke kindraike. (Vakio ty 1 Korintianina 9:16, 17.) Hoe reke: “Ndra tie tsy boake amy ty foko aza ty anoako aze le mbe managne asa nankinegne amako raho.” Ankoatse izay le tapa-kevetse ty hamita ty fanompoa’e ty Paoly ndra inogn’ino ty raha nitsapa’e tamy ze fotoagne zay.

¹³ Manahake izay ka, le ko mandrambe fanapahan-kevetse mioregne amy ty raha tsapa’o. Manoa ty soa avao ndra tie tsy mifagnarake amy ty raha tea’o hatao aza zay. Misy fotoagne va’e hiova ty raha tsapa’o faie hahavita hanao ty soa avao rehe naho mikezake manao izay. Hagnampe azo hagnorike i Jesosy avao afara ty badisa’o ty fianaragne raike tsy tapake, ty vavake, ty fagnatrehagne fivoriagne naho ty fitoriagne. Naho trea o rahalahy naho rahavaveo miaretse avao amy ty fanompoagne i Jehovah rehe, le hampahery iareo zay.​—1 Tes. 5:11.

‘MANDINEHA-TEGNA … LE FANTARO TY TEGNA’O’

14. Ino ty raha toko’e hodinehe’o mateteke, le ino ty anto’e? (2 Korintianina 13:5)

¹⁴ Ty fandineha’o ty tegna’o tsy tapake ka le hagnampe azo afara ty badisa’o. (Vakio ty 2 Korintianina 13:5.) Isan’andro, le dineho ty fiaigna’o naho ty fahazara’o mba hahatreava’o tie mivavake tsy tapake vao rehe, mamaky Baiboly, magnatreke fivoriagne naho manao fanompoagne. Mikezaha hahatrea fifaleagne naho handrambe soa maro boake amy ireo. Magnontenea tegna ohatse tie: ‘Haiko vao ty magnazava ty fampianaragne fototse amy Baiboly ao amy ty hafa? Akore ty hahafahako mampitombo ty fifaleagne tsapako amy ty fanompoagne? Voafaritse soa vao ty vavake ataoko sady trea amy irey vao fa miantehetse tanterake amy i Jehovah raho? Mivory tsy tapake vao raho? Akore ty hagnasoako ty fifantohako naho ty fandrambesako anjara naho fa am-pivoriagne agne?’

15-16. Ino ty raha nianara’o boake amy ty raha niaigna ty rahalahy raike miomba ty fanoheragne tsapa hevetse?

¹⁵ Ho fanta’o ka ty fahalemea’o naho fa mandine-tegna rehe. Nitantara ty raha niaigna’e hoe izao ty rahalahy raike atao tihoe Robert: “Nanagne asa tapa-potoagne raho tamy tie iraho ni-20 taogne. Indraike andro zay naho fa nirava niasa zahay, le nanasa ahike mba ho an-tragno’e agne ty ampela raike mpiara-miasa amako. Nirehake reke tie izahay roe avao ty ho ao sady ‘tena hahafinaritse o fotoagne iohoe.’ Niala-tsiny kedekede avao raho tamy ty voaloha’e faie tafara izay le nandietse raho sady nihazavaeko tama’e ty anto’e.” Nandrese tsapa hevetse ty Robert sady fagneva ty ho deraegne reke. Faie tafara tatoy, le nandineke miomba i raha nisehoy reke le nitsapa’e fa toko’e nisy fomba hafa tena soa nahafaha’e niatreke igne. Nieke hoe izao reke: “Tsy le avy le nandietse malaky manahake ty natao i Josefa, tamy i valy i Potifaray nitsapa hevetse azey raho. (Gen. 39:7-9) Naho ty maregne le nitsapako fa tsy nimora tamako ty nandietse. Nagnampe ahy hahatrea igne tie mila magnamafe ty fifandrambesako amy i Jehovah raho.”

¹⁶ Afake ty handrambe soa manahake i Robert ka rehe naho mandine-tegna. Ndra tie mahavita manohetse tsapa hevetse aza rehe, le magnontenea tegna avao tie: ‘Le avy le mandietse vao raho?’ Naho trea’o tie misy fagnitsiagne mila atao’o le ko magnamelo-tegna. Tena soa tihoe fanta’o ty fahalemea’o. Mivavaha miomba i fahalemea’oy, le manoa raha mba hampitomboa’o ty fagniria’o hiaigne mifagnarake amy ty fitsipy i Jehovah.​—Sal. 139:23, 24.

17. Nagnino ro nagnomey voninahitse ty tahina i Jehovah ty raha natao i Robert?

¹⁷ Izao ka ty raha hafa ianarantika boake amy i Robert. Hoe reke: “Tafara ty nandierako ty fanasà i ampela mpiara-miasa amakoy, le hoe reke tamako: ‘Nandrese rehe!’ Nagnontane aze raho tie ino ty tea’e horehafegne. Nihazavae’e tamako tie nisy nama’e ni-vavolombelogne taloha nirehake tama’e tie manao raha raty o tanora Vavolombelo i Jehovah-o iaby faie aeta’e. Nirehake tamy i nama’ey reke fa hitsapa ahy mba hahatreava’e tie hanao hoe izay ka vao raho. Tena fale raho tafara izay naho fa nitreako tie nagnomey voninahitse ty tahina i Jehovah.”

18. Tapa-kevetse hanao ino rehe afara ty badisa’o? (Henteo ka ty efajoro tihoe “Lahatsoratse Roe Hagnampe Azo ho Fale.”)

¹⁸ Naho fa irehe manokan-tegna hoahy i Jehovah naho atao badisa, le atoro’o amy izay tie te hagnamasigne i tahina’ey rehe ndra inogn’ino raha miseho. Afake matoky ka rehe tie mahaonigne ty raha sarotse naho ty tsapa hevetse atrehe’o ty Jehovah. Hitahy ty kezake mafe atao’o mba tsy hivalihagne ama’e reke. Afake matoky rehe fa hagnomey ty fagnahi’e masigne reke mba hagnomey hery azo hanoagne izay. (Lioka 11:11-13) Noho ty fagnampea i Jehovah le afake ty hagnorike i Jesosy avao rehe afara ty badisa’o.