Akore ty Tea i Jehovah Hindesa o Fiangonagneo o Ndaty Nanao Fahotagne Lahibeio?

1. Irie i Jehovah hanao akore o ndatio iaby?

NIMEA i Jehovah safidy malalake o ndatio. Mampiasa o fagnomezagne iohoe tikagne naho fa mandrambe fanapahan-kevetse isan’andro. Ty fanokanan-tegna hoahy i Jehovah naho ty hanjare ho agnisa ty Keleia’e manompo aze, ty fanapahan-kevetse tena lahibey. Izay ty irie i Jehovah hatao o ndatio iaby. Ino ty anto’e? Satria tea’e o ndatio sady tea’e ho fale. Tea’e hifandrambe soa ama’e naho hiaigne nainai’e ka o ndatio.​—Deot. 30:19, 20; Gal. 6:7, 8.

2. Ino ty tamae i Jehovah hatao o ndaty nanao raty tsy mibebakeo? (1 Jaona 2:1)

² Faie tsy mamoresé ndra ia ndra ia hanompo aze ty Jehovah fa magnenga ty tsikiraidraike hanapa-kevetse hanao izay. Akore areke naho misy Kristiana raike fa vita badisa manao fahotagne lahibey? Naho tsy mibebake reke, le tsy maintsy asintake tsy ho amo o fiangonagneo eo. (1 Kor. 5:13) Faie ndra tie eo zay, le mbe mitamà ty Jehovah fa hiheregne Ama’e o mpanotao. Mamela ty fahota ze ndaty mibebake Reke. Izay ty anto’e tena lahibey nagnomea’e i solovoigney. (Vakio ty 1 Jaona 2:1.) Tena tea o ndaty nanotao i Andrianagnaharentikagne bey hateay, le mandrisike iareo mba hibebake reke.​—Zak. 1:3; Rom. 2:4; Jak. 4:8.

3. Ino ty hodinehentikagne amy ty lahatsoratse toy?

³ Teà i Jehovah naho mitovy fomba fihevetse ama’e miomba o fahotagneo naho o ndaty nanotao tikagne. Hirehake ty fomba hanoantikagne izay ty lahatsoratse toy. Hianarantikagne atoa tie, ino ty raha nirehafe i Paoly tie toko’e hatao i fiangonagne ta Korinto agney, amy i lahilahy raike nanao fahotagne lahibeỳ? Ino ka ty nirisihe’e hatao iareo naho fa nibebake i lahilahỳ? Ino ty tsapa i Jehovah miomba ty ndaty nanao fahotagne lahibey?

INO TY NATAO I FIANGONAGNEY NAHO FA NISY NANAO FAHOTAGNE LAHIBEY?

4. Ino ty raha niseho tamy ty fiangonagne ta Korinto tagne tamy ty taonjato voaloha’e? (1 Korintianina 5:1, 2)

⁴ Vakio ty 1 Korintianina 5:1, 2. Tamy i lia misionera fahatelo natao’ey ty Paoly, le naharey vaovao raty niseho tamy i fiangonagne vaho niforogne ta Korinto agney. Nisy rahalahy raike tamy i fiangonagney tao nifampila tamy ty akarene’e. Tena manafintohigne ze raha zay sady ndra ty ndaty tsy manompo an’Agnahare aza mahafantatse tie raty zay. Faie nieretseretse i fiangonagney tie, tsy magnino ndra tie mijanogne amy i fiangonagney eo avao i rahalahỳ. Va’e nieretseretse ty ila’e tie, fomba anehoagne famindram-po zay sady mahatakatse ty Jehovah tie tsy voririke i ndatỳ. Faie tsy teà i Jehovah hiharoharo amo o vahoa’eo o mpanao ratio. Azo antoke fa nanimba ty laza i fiangonagney ka ty findesam-batagne raty nanagna i rahalahỳ. Va’e ho nisy voka’e tamy ze Kristiana nifagnosehose tama’e zay. Ino areke ty raha nirisihe i Paoly hatao i fiangonagney?

5. Ino ty raha nisorate i Paoly tie toko’e hatao i fiangonagney, le ino ty tafilitse amy izay? (1 Korintianina 5:13) (Henteo i sarey.)

⁵ Vakio ty 1 Korintianina 5:13. Noho ty fitariha ty fagnahy masigne, le nanoratse ty Paoly tie mila asintake boake amy i fiangonagney eo i mpanao raty tsy mibebakey. Akore areke ty toko’e hatao o Kristiana tsy mivalikeo? Nirehake tamy iareo ty Paoly mba ‘tsy hifandrambe ama’e sasa.’ Ino ty tafilitse amy izay? Nihazavae i Paoly tie, tafilitse amo o lily iohoe tihoe “tsy hiharo fihinagne ama’e.” (1 Kor. 5:11) Ho mora amy iareo ty hifandrambe amy i ndatỳ naho miarake mihinagne ama’e iareo. Mazava areke ty tea i Paoly horehafegne, le tihoe tsy toko’e hifagnosehose amy i lahilahỳ i fiangonagney. Miaro i fiangonagney mba tsy ho voatarike hanao raty zay. (1 Kor. 5:5-7) Ty tsy fifandrambesagne ama’e ka, le va’e hahavy aze hahatsapa tie nihalavitse i Jehovah reke. Handrisike aze hanegnegne naho hibebake zay.

6. Ino ty nivoka i taratasy i Paolỳ tamy i fiangonagney naho tamy i ndaty nanotay?

⁶ Tafara ty nandefasa i Paoly i taratasy hoahy ty Kristiana ta Korinto agney, le nieretseretse ty ho fandrambesa i fiangonagney i taratasi’ey reke. Nirehake vaovao mahafale ty Titosy naho fa tafara tatoy, le tihoe nagnorike i raha nisorate i Paolỳ i fiangonagney. (2 Kor. 7:6, 7) Nibebake i ndaty nanao fahotagney volagne tsiampeampe tafara ty nandefasa i Paoly i taratasỳ. Nagnova ty findesam-bata’e naho ty toe-tsai’e reke sady nanomboke nagnorike ty fitsipy i Jehovah. (2 Kor. 7:8-11) Ino areke ty nirisihe i Paoly hatao i fiangonagney ka hinane zao?

INO TY NATAO I FIANGONAGNEY NAHO FA NIBEBAKE I NDATY NANOTAY?

7. Ino ty voka’e soa naho fa nasintake tsy ho amo o fiangonagneo eo i mpanao ratỳ? (2 Korintianina 2:5-8)

⁷ Vakio ty 2 Korintianina 2:5-8. Nirehake ty Paoly tie, “ampe hoahy i ndatỳ ze fagnanaragne mafe natao ty ankamaroa’areo zay.” Midika zay fa nisy voka’e ama’e i fagnanaragney satria nahavy aze hibebake.​—Heb. 12:11.

8. Ino ka ty raha mbe toko’e hatao i fiangonagney?

⁸ Nandrisike i fiangonagney hoe izao ty Paoly: ‘Toko’e ho vognogne hamela ty helo’e [i rahalahy nanotay] aman-kasoa fagnahy nareo ... sady hampionogne aze’ vaho “hagnomey toky aze tie tea’areo reke.” Tsy tihoe ty handrambe aze amy i fiangonagney eo avao ty nirisihe i Paoly hatao iareo, fa hanao raha mihoatse izay ka. Teà i Paoly hatoro iareo amy ty raha rehafe iareo, ty fihetse iareo vaho ty raha atao iareo fa tena namela i lahilahy nibebakey iareo sady tea aze. Ho tsapa i lahilahỳ ka tie amy izay tie, tena fale iareo fa niheregne reke.

9. Nagnino ty ndaty ila’e ro nisalasala ty handrambe i lahilahy nibebakey?

⁹ Nisy amy ty ndaty ila’e amy i fiangonagney eo vao va’e nisalasala ty handrambe i lahilahy nibebakey? Ie aloha tsy mirehake izay i fitantaragney faie va’e ho nisy zay. Va’e mbe niboseke ty ila’e satria niterake olagne tamy i fiangonagney eo i raha natao’ey ndra va’e nahavy ty ndaty ila’e hahatsiaro ho megnatse ka zay. Va’e ho nahatsapa ka i aze tsy nivalike rey tie, tsy rare’e tihoe i ndaty nanotay ro ho rambesegne ho rahalahy indraike. (Ampitahao amy ty Lioka 15:28-30.) Nagnino ro tena lahibey ty hampisehoa i fiangonagney tie teà iareo i rahalahy iareo niheregney?

10-11. Ino ty raha hiseho naho ohatse tsy nandrambe i lahilahy nibebakey o androanavi-pagnahio?

¹⁰ Eretsereto ty raha niseho naho ohatse tsy nandrambe i lahilahỳ o androanavi-pagnahio ndra tsy nampiseho hatea aze i fiangonagney naho fa niheregne reke. Va’e ‘halahelo mafe’ naho kivy reke. Ho nieretseretse aza reke tie, tsy afake ty hanompo i Jehovah sasa. Ho nikivy ka reke, le tsy hikezake hiova mba hifandrambe amy i Jehovah.

¹¹ Naho tsy nandrambe i mpanota nibebakey ty rahalahy naho ty rahavave tamy i fiangonagney eo, le ho nisimba ty fifandrambesa iareo amy i Jehovah. Izay ty tena raty. Tsy mamela heloke manahake i Jehovah iareo naho nanao izay, fa raty fagnahy naho tsy mamindra fo manahake i Satana. Manjare iareo ty fitaovagne ampiasae i Devoly mba hahavy i lahilahỳ tsy hanompo i Jehovah.​—2 Kor. 2:10, 11; Efes. 4:27.

12. Akore ty hanahafa i fiangonagney i Jehovah?

¹² Akore areke ty hanahafa i fiangonagne ta Korinto aoy i Jehovah fa tsy i Satana? Manao izay iareo naho mamela i ndaty nibebakey manahake i Jehovah. Mareho ty raha nirehafe ty mpanoratse Baiboly ila’e miomba i Jehovah. Hoe ty Davida: “Soa toetse naho vognogne hamela heloke” reke. (Sal. 86:5) Izao ty nisorate i Mika: ‘Ia ty Andrianagnahare manahake azo, i mamela hadisoagne naho mamela helokey?’ (Mika 7:18) Hoe ka ty Isaia: “Lonike ze raty fagnahy hiala amy ty raha raty fanoe’e, le ze mpanao raty tsy hieretseretse raha raty sasa. Toko’e hiheregne amy i Jehovah, i hamindra fo ama’ey reke, le i Andrianagnaharentikagney satria tena mamela heloke vata’e reke.”​—Isaia 55:7.

13. Nagnino ro tsy toko’e hangatahagne andro ty handrambesagne i lahilahỳ amy i fiangonagney eo? (Henteo ty efajoro tihoe “Ombia i Lahilahy ta Korinto Agney ro Nivoarae Indraike?”)

¹³ Manahake i Jehovah i fiangonagne ta Korinto agney naho mandrambe soa i lahilahy nibebakey sady magnomey toky aze tie tea iareo reke. Ty fagnoriha iareo i toroheve i Paolỳ ty ampisehoa iareo tie, “mankatò amy ze kila raha” iareo. (2 Kor. 2:9) I fagnanaragney ty nandrisike i lahilahỳ hibebake ndra tie nafahagne tsy ho agnisa i fiangonagney aza reke tagnate ty volagne tsiampeampe. Tsy nila nandigne ela bey areke o androanavi-pagnahio vaho izay nandrambe aze amo o fiangonagneo eo.

TAHAFO TY FANOA I JEHOVAH TY RARE’E NAHO TY FAMINDRAM-PO’E

14-15. Ino ty ianarantikagne boake amy ty fomba nandaminagne i raha niseho ta Korinto agney? (2 Petera 3:9) (Henteo i sarey.)

¹⁴ Ty fomba nandaminagne i raha niseho ta Korinto tagney, le nisorategne agnate Baiboly ao mba “hampianaragne antikagne.” (Rom. 15:4) Nianarantikagne boake amo o tantara iohoe, fa tsy enga i Jehovah hiharoharo amo o vahoa’eo ty mpanota tsy nibebake. Misy ty mieretseretse tie, toko’e henga i Jehovah amy i fiangonagney eo avao o ndaty nanao ratio ndra tie tsy mibebake aza satria mamindra fo reke. Faie tsy hoe izay ty fomba anehoa’e famindram-po. Tsy milefetse sady tsy miova amy ty fitsipi’e miomba ty soa naho ty raty reke. (Joda 4) Tsy mamindra fo reke naho magnenga i mpanota tsy mibebakey amo o fiangonagneo eo satria hagnoho-doza i fiangonagney zay.​—Ohab. 13:20; 1 Kor. 15:33.

¹⁵ Faie tsy tea i Jehovah hisy hozamagne o ndatio fa tea’e ho vonjegne naho mbe azo atao. Mamindra fo amy ze mpanota niova sady te hifandrambe ama’e indraike reke. (Ezek. 33:11; vakio ty 2 Petera 3:9.) Naho fa nibebake sady niala amy i raha raty natao’ey i lahilahy ta Korinto agney, le nampiasa i Paoly ty Jehovah mba hagnazava amy i fiangonagney tie, toko’e hamela i lahilahỳ iareo sady handrambe aze indraike.

16. Ino ty tsapa’o naho fa mandineke ty fomba nandaminagne i raha niseho ta Korinto agney rehe?

¹⁶ Ty fandinehantikagne i raha niseho ta Korinto agney, le magnampe antikagne hahatrea tie bey hatea, manao ty maregne sady manao ty rare’e ty Jehovah. (Sal. 33:5) Tsy mandrisike azo hidera i Jehovah vao o toetse’e rehoe? Mpanota iaby tikagne, le mipay ty famela i Jehovah. Tena mankasitrake aze areke tikagne noho ireke mamindra fo sady nagnomey i solovoigney. Tena mampahery naho magnomey toky antikagne ty fahafantaragne tie, tena tea o vahoa’eo reke sady tea’e hiaigne nainai’e iareo.

17. Ino iaby ty hodinehentikagne amy i lahatsoratse magnarake rey?

¹⁷ Naho misy ndaty raike manao fahotagne lahibey tie amy izao, le akore ty ampisehoa o androanavi-pagnahio tie, bey hatea manahake i Jehovah iareo sady akore ty hagnampea iareo i ndatỳ mba hibebake? Akore ty toko’e hatao o fiangonagneo naho manapa-kevetse o androanavi-pagnahio tie, hasintake i fiangonagney i ndatỳ ndra rambesegne indraike? Hodinehentikagne amy i lahatsoratse magnarake rey o fagnonteneagne rehoe.