Lesogne Boake amy ty Raha Natao i Jesosy Tamy i 40 Andro Niaigna’e Fara’e Tan-tane Etoỳ

1-2. Ino ty raha niseho naho fa nandeha mba Emaosy mbeo ty mpiana i Jesosy roe?

TAMY 16 Nisana taogne 33 tamy izay. Nalahelo i mpiana i Jesosy rey sady tena natahotse. Niala boake a Jerosalema agne ty roe tamy iareo sady nandeha ta Emaosy, tanàgne eo amy ty 11 kilometatse boake a Jerosalema ao. Tena nikivy iareo satria vinono ty Jesosy, i lahilahy norihe iareoy. Nitamà iareo fa hanao raha fanjaka hoahy o Jiosio ty Mesia faie kay ndra nimate . Faie nisy raha tsy nampoizegne niseho.

² Nisy lahilahy zay nagnantogne iareo sady niharo lia tamy iareo. Nitantarae iareo tamy i ndatỳ ty raha nanjò i Jesosy. Nirehake raha tsy ombia ho haligno iareo i lahilahỳ naho fa niavy eo. Nampiasa Soratse Masigne reke mba hagnazavagne tamy iareo tie, nagnino i Mesiay ro tsy maintsy nijale naho nimate. Naho fa niavy ta Emaosy agne iareo telo, le nanjare nifanta iareo tie i Jesosy fa vinelon’Andrianagnahare tamy ty mate i lahilahỳ! Alao sare an-tsaigne moa ty nihafalea i mpianatse rey naho fa nahay tie nivelogne i Mesiay!​—Lioka 24:13-35.

3-4. a) Akore ty fomba nagnampea i Jesosy i mpiana’e rey, le ino ty nivoka’e? b) Ino ty hianarantikagne amy ty lahatsoratse toy? (Asa. 1:3)

³ Niseho tamy i mpiana’e rey mateteke ty Jesosy tagnate i 40 andro niaigna’e fara’e tambone tane etoỳ. (Vakio ty Asan’ny Apostoly 1:3.) Nampahery i mpiana’e kivy naho natahotse rey ty Jesosy. Nanjare nifale naho nanagne herim-po hitoriagne vaho hampianaragne ty talily soa miomba i Fanjakagney areke iareo.a

⁴ Handrambe soa tikagne naho mandineke ty raha natao i Jesosy tamo o fotoagne sisa niaigna’e iohoe. Hodinehentikagne amy ty lahatsoratse toy tie, akore ty nampiasà i Jesosy o fotoagne iohoe 1) mba hampaherezagne i mpiana’e rey, 2) mba hagnampeagne iareo hahatakatse soa ty Soratse Masigne, 3) mba hampiofagnagne iareo hitagne andraikitse lahibey. Hotreantikagne amy ty tsikiraidraike amy ireo ty azontika anahafagne i Jesosy.

AMPAHEREZO TY HAFA

5. Nagnino i mpiana i Jesosy rey ro nila fampaherezagne?

⁵ Nila fampaherezagne i mpiana i Jesosy rey. Ino ty anto’e? Ty ila’e tamy iareo nienga ty tragno’e, ty keleia’e naho ty asa’e mba hagnorihagne i Jesosy. (Mat. 19:27) Nihara ty tsy rare’e ka ty ila’e amy iareo noho iareo nanjare mpiana’e. (Jaona 9:22) Vognogne hanao o sorogne rehoe iareo satria nino tie i Jesosy i Mesia nampitamaegney. (Mat. 16:16) Faie nanjare tsisy raha tamaegne naho nikivy iareo naho fa vinono ty Jesosy satria tsy fanta iareo ty raha hiseho afara izay.

6. Ino ty natao i Jesosy naho fa nivelomegne tamy ty mate reke?

⁶ Azo antoke fa taka i Jesosy soa tie, tsy noho i mpiana’e rey tsy ampe finoagne ty nahavy iareo nalahelo, fa noho ireke nimate. Le avy le nampahery i nama’e rey areke reke tamy i andro namelomagne aze tamy ty matey. Niseho tamy i Maria Magdalena ohatse ty Jesosy tamy ireke nitagny tan-kibory teoy. (Jaona 20:11, 16) Niseho tamy i mpiana’e roe nirehafegne tamy ty fanomboha ty lahatsoratse toỳ ka reke sady niseho tamy i apostoly Petera. (Lioka 24:34) Ino ty azontika ianaragne boake amy ze raha natao i Jesosy iaby rey zay? Dineho ty raha nisy tamy ireke niseho tamy i Maria Magdalenay.

7. Arake ty Jaona 20:11-16, nitrea i Jesosy nagnino ty Maria tamy i maraindraigne 16 Nisanay, le nandrisike aze hanao ino zay? (Henteo i sarey.)

⁷ Vakio ty Jaona 20:11-16. Tamy ty maraindray ty 16 Nisana, le nisy ampela tsiampeampe nandeha tamy i kibory nandevegnagne i Jesosỳ agne. (Lioka 24:1, 10) I Maria Magdalena ty raike amo o ampela reo. Naho fa niavy tamy i kiborỳ tao ty Maria, le fa tsy tao i vata i Jesosỳ. Nilay malaky mbamy i Petera naho i Jaona mbeo reke mba hampahafantatse izay iareo. Nilay mban-kibory mbeo ka iareo roe lahy, le norihe’e. Naho fa nitrea o lahilahy reo tie tsy tao i vata i Jesosỳ, le noly iareo. Faie tsy noly niarake tamy iareo ty Maria. Nijanogne teo avao reke sady nitagny. Faie tsy nivoamare’e tie teo ty Jesosy nagnente aze. Nitrea’e tie nitagny aze o ampela tsy nivalike iohoe, le tea’e hampaherezegne. Niseho tamy i Maria areke reke sady nanao raha tsotra, faie tena nampahery aze. Nirehake tama’e reke sady nagnomey aze fanendreagne lahibey, le ty hirehake tamy i rahalahi’e rey tie fa nivelomegne ty Jesosy.​—Jaona 20:17, 18.

8. Akore ty azontika anahafagne i Jesosy?

⁸ Akore ty azontika anahafagne i Jesosy? Manahake i Jesosy tika naho mandrisike ty hafa mba hanompo i Jehovah avao sady mikezake hahatakatse ty raha tsapa iareo vaho mampahery iareo naho miatreke raha sarotse iareo. Dineho ty raha niaigna ty rahavave raike atao tihoe Jocelyn. Nimate tamy ty loza tena mampangorigne ty zoke’e ampela. Hoe reke: “Nalahelo mafe raho tagnate ty taogne maro.” Faie naho fa nahafantatse izay ty mpivaly raike, le nanasa aze ho an-tragno iareo agne sady nitsanogne aze soa vaho nagnomey toky aze tie tena tea aze ty Andrianagnahare. Hoe ty Jocelyn: “Nivalike ty lohako sady hoe nilenteke tagnate ty riake maiegne sady mivalitaboake zay raho, le o mpivaly reo ty nampiasae i Jehovah mba hamonjeagne ahy. Nagnampe ahike hagniry hanohy hanompo i Jehovah avao iareo.” Hampahery ty hafa ka tika naho magnenga iareo hirehake ty raha tsapa’e sady mitsanogne soa. Hampionogne naho hagnampe iareo hanompo i Jehovah avao tika naho manao izay.​—Rom. 12:15.

AMPEO TY HAFA MBA HAHATAKATSE SOA TY SORATSE MASIGNE

9. Ino ty raha nisarotse tamo o mpiana i Jesosio, le akore ty fomba nagnampea i Jesosy iareo?

⁹ Nagneke ty Saontsin’Agnahare i mpiana i Jesosy rey sady nikezake nampihatse izay tamy ty fiaigna’e. (Jaona 17:6) Faie tsy nitaka iareo tie nagnino ty Jesosy ro nivonoegne manahake o mpanao ratio. Fanta i Jesosy tie nanam-pinoagne sady tea i Jehovah i mpiana’e rey, faie nivoamare’e ka tie mbe tsy nahatakatse soa ty Soratse Masigne iareo. (Lioka 9:44, 45; Jaona 20:9) Nampea’e mba hahatakatse soa ty Soratse Masigne areke iareo. Dineho ty fomba nanoa i Jesosy izay tamy ireke niseho tamy i mpiana’e roe nandeha tamy i lalagne mba a Emaosy agney.

10. Akore ty nagnampea i Jesosy o mpiana’eo hahafantatse tie i reke i Mesiay? (Lioka 24:18-27)

¹⁰ Vakio ty Lioka 24:18-27. Mareho fa tsy le avy le nirehake tamy i lahilahy rey ty Jesosy tie ia reke, fa fagnonteneagne ro napetra’e. Ino ty anto’e? Va’e nitea i Jesosy hirehake ze raha nitsapa’e naho nieretserete’e iareo. Zay vata’e ty natao iareo. Nirehafe iareo tama’e tie nitamà iareo fa hagnafake o Israelio amo o Romanao ty Jesosy. Naho fa boake nirehake mazava soa ty raha nampinekoneko aze iareo, le nampiasa ty Soratse Masigne ty Jesosy mba hagnampeagne iareo hahatakatse i faminaniagne maro nitanterake rey.b Niseho tamy ty mpianatse hafa reke ty hariva igne sady nagnazava tamy iareo ty dika i faminaniagne rey ka. (Lioka 24:33-48) Ino ty lesogne ianarantika boake amo o tantara iohoe?

11-12. a) Ino ty azontikagne ianaragne boake amy ty fomba fampianara i Jesosy? (Henteo i sarey.) b) Akore ty nagnampea i mpampianatse Baiboly azey i Nortey?

¹¹ Akore ty azontika anahafagne i Jesosy? Voaloha’e, naho fa mampianatse Baiboly, le mametraha fagnonteneagne mete soa hahavy i ndatỳ hirehake ty an-tsai’e ao naho ty am-po’e ao. (Ohab. 20:5) Naho fa taka’o soa ty raha tsapa iareo, le ampeo iareo mba hahatrea andinin-teny mifagnarake amy i raha iaigna’ey. Ko rehafegne amy iareo ty raha toko’e hatao iareo fa mametraha fagnonteneagne hagnampe iareo hahatrea ty fomba azo iareo ampiharagne i andinin-tenỳ amy ty fiaigna’e. Dineho ty tantara ty rahalahy raike atao tihoe Nortey a Ghana agne.

¹² Nanomboke nianatse Baiboly ty Nortey tamy tie ireke ni-16 taogne. Faie nanohetse aze ty keleia’e tsy ela tafara izay. Ino ty nagnampe aze hanohy hianatse avao? Nampiasa ty Matio toko 10 i mpampianatse Baiboly azey taloha izay mba hagnazavagne tie tsy maintsy henjehegne ty Kristiana vata’e. Hoe ty Nortey: “Naho fa nanomboke nagnenjeke ahy areke iareo, le nirese lahatse raho tie nahita ty hamarenagne.” Nampiasa ty Matio 10:16 ka i mpampianatse azey mba hagnampeagne aze hitao amy ze raha va’e hahavy iareo amo o keleia’eo hifamale sady hagnaja naho fa mirehake ty raha inoa’e an-tragno iareo ao. Te ho nanao mpisava lalagne ty Nortey tafara ty badisa’e, faie i baba’e te handefa aze hianatse amy oniversité agne. Tsy nirehake ty toko’e hatao’e i mpampianatse azey fa nametrake fagnonteneagne nagnampe aze hahatakatse ty toro lala ty Soratse Masigne. Ino ty nivoka’e? Nanapa-kevetse hanompo marain-tsy hariva ty Nortey, le niroahe i baba’e. Ino ty nitsapa i Nortey? Hoe reke: “Tena rese lahatse raho tie mete i safidy nataokoy.” Naho manokagne fotoagne mba hagnampeagne ty hafa hahatakatse soa ty Soratse Masigne ka tika, le hagnampe iareo hanagne finoagne matanjake naho hanohy hanompo i Jehovah avao zay.​—Efes. 3:16-19.

AMPIOFAGNO O RAHALAHIO MBA HANJARE ‘LAHILAHY FAGNOMEZAGNE’

13. Akore ty natao i Jesosy mba hahavy i asa fitoriagney hitohy avao ndra tie hiheregne an-dagnitse agne aza reke? (Efesianina 4:8)

¹³ Nanao soa ze asa nampanoen-dRae’e aze ty Jesosy tamy ireke tan-tane etoỳ. (Jaona 17:4) Faie tsy nieretseretse ty Jesosy tie, le fa ireke raike avao ty tena hahavita soa i raha nampanoe i Jehovah azey. Natokisa i Jesosy i mpiana’e rey. Nirahe’e hitory naho hampianatse i talily soay vaho hikarakara o vahoa i Jehovah sarobilio iareo. Va’e ho 30 taogne latsake ty ila’e amo o mpianatse nitarike o asa fitoriagneo iohoe. (Vakio ty Efesianina 4:8.) Niara-niasa mafe tamy i Jesosy sady tsy nivalike ama’e o lahilahy reo. Faie aloha ty nandehana’e an-dagnitse agne, le nampiofagne’e soa iareo mba hanjare “lahilahy fagnomezagne.” Akore ty natao’e?

14. Ino ty raha nampianare i Jesosy o mpiana’eo tamy i 40 andro fara’e niaigna’e tambone tane etoỳ ? (Henteo i sarey.)

¹⁴ Nagnomey torohevetse tena nilae i mpiana’e rey ty Jesosy. Voamare’e ohatse fa tsy tena nino ty ila’e tamy iareo tie nitsangagne tamy ty mate vata’e reke. Nanoro hevetse iareo areke reke mba hagnampeagne iareo hahafantatse ty maregne. (Lioka 24:25-27; Jaona 20:27) Nirehafe’e ka iareo mba hifantoke tanterake amy ty fikarakaragne o vahoa i Jehovah-o, fa tsy amy ty fipaliavam-bola. (Jaona 21:15) Nitiahive’e ka iareo mba tsy hampitaha ty raha vita iareo amy ty fanompoagne i Jehovah amy ty vita ty hafa. (Jaona 21:20-22) Nagnitsy iareo amy ze heve-diso ila’e nanagna iareo miomba i Fanjakagney ka reke sady nagnampe iareo hifantoke amy ty fitoriagne i talily soay. (Asa. 1:6-8) Ino ty azo o androanavi-pagnahio ianaragne boake amy i Jesosy?

15-16. a) Akore ty fomba azo o androanavi-pagnahio anahafagne i Jesosy? b) Ino ty soa nirambese i Patrick naho fa nahazo torohevetse reke?

¹⁵ Akore ty azo o androanavi-pagnahio anahafagne i Jesosy? Tsy maintsy mampiofagne o rahalahio iareo agnisa izay o tanorao, mba hahafeno fepetse amy ty andraikitse lahibey agnivo o fiangonagneo eo.c Tsy toko’e hitamà o androanavi-pagnahio tie mahay ze kila raha i ndaty ampiofagne iareo rey. Toko’e hanoro hevetse o rahalahy tanorao aman-katea iareo mba hanagna iareo traikefa naho hagnampeagne iareo hiambane, ho azo atokisagne naho ho vognogne hanompo ty hafa.​—1 Tim. 3:1; 2 Tim. 2:2; 1 Pet. 5:5.

¹⁶ Dineho ty soa nirambese ty rahalahy raike atao tihoe Patrick, noho ty torohevetse nimeagne aze. Tamy tie ireke nitanora, le nasiake sady tsy nisoa fagnahy tamy ty hafa, agnisa izay o rahavaveo. Nivoamare ty androanavi-pagnahy raike ze fahalemea’e zay, le nanoro hevetse aze taman-kasoa fagnahy reke faie mivantagne. Hoe ty Patrick: “Tena fale raho fa nanao izay reke. Nikivy raho naho fa nahatrea rahalahy nahazo ze tombotsoam-panompoagne niteako. Faie nagnampe ahy hiambane i torohevetse nimea’ey, le hanompo o rahalahy naho rahavaveko fa tsy hifantoke amy ty fahazoagne tombotsoam-panompoagne.” Voka’e, nivoatendre ho androanavi-pagnahy ty Patrick tamy tie ireke ni-23 taogne.​—Ohab. 27:9.

17. Akore ty nampisehoa i Jesosy tie natoky i mpiana’e rey reke?

¹⁷ Tsy ty hitory avao ty andraikitse nimea i Jesosy i mpiana’e rey, fa ty hampianatse ka. Va’e nahatsapa ho tsy nahafeno fepetse amy ze fanendreagne zay i mpiana’e rey. Faie natoky ty Jesosy tie ho vita iareo i asay. Tena natoky izay reke, le nirehake hoe izao: “Nagnirake ahy ty Rae, le iraho ka magnirake anareo.”​—Jaona 20:21.

18. Akore ty azo o androanavi-pagnahio anahafagne i Jesosy?

¹⁸ Akore ty azo o androanavi-pagnahio anahafagne i Jesosy? Mampiofagne naho magnomey andraikitse ty hafa ty androanavi-pagnahy ampe traikefa. (Fil. 2:19-22) Afake manasa tanora raike mba hagnalio naho hikojakoja i Anjomba i Fanjakagney ohatse o androanavi-pagnahio. Mea iareo asa i rahalahỳ, le avy eo ampiofagne iareo amy ty fomba hanoagne aze. Afara izay, le mila matoky iareo tie hanao soa i asay reke. Androanavi-pagnahy vaovao ty Matthew. Nirehake reke tie tena mankasitrake o androanavi-pagnahy ampe traikefao satria nampiofagne aze mba hanao asa sambe hafa agnivo ty fiangonagne eo iareo sady natoky aze tie hamita soa i asay. Hoe ka reke: “Naho diso ty nanoako ty ila’e, le nampea iareo raho mba handrambe lesogne amy i hadisoakoy amy izay tsy magneregne igne sasa amy ty afara.”d

19. Tapa-kevetse ty hanao ino tikagne?

¹⁹ Nampiasa i 40 andro fara’e niaigna’e tan-tane etoỳ ty Jesosy mba hampaherezagne, hampianaragne naho hampiofagnagne ty hafa. Lonike areke tika mba ho tapa-kevetse ty hagnorike soa ty ohatse nenga’e. (1 Pet. 2:21) Hagnampe antika hanao izay reke sady toe nampitamà ka tie: “Hiarake ama’areo avao raho, amparake ty hiavia ty fara ty tontolo toy.”​—Mat. 28:20.