Akore ty Fihevera i Jesosy ty Tahina i Jehovah?

1-2. a) Inogne ty natao i Jesosy tamy i halegne taloha ty nimateza’ey? b) Ino ty fagnonteneagne hodinehentika amy ty lahatsoratse toy ato?

KAMISY hariva 14 Nisana taogne 33 tamy izay. Hisy hifotetse ty Jesosy, hotsaraegne, homelohegne, hopehegne amy i boda-kataey ey vaho hovonoegne. Vaho avy niarake nihinagne tamy i apostoli’e tsy nivalike rey tambone etaze ao reke tamy izay. Nampahery i apostoli’e rey reke tafara o fihinanagne iohoe. Taloha kede ty nialà iareo amy i efetse fihinanagney ao, le nitofa heike ty Jesosy sady nanao vavake nisy heve’e lahibey. Nisorate i apostoly Jaona o vavake iohoe, le amy Jaona 17 ao ty ahatreavagne aze.

² Naho henteagne i vavake natao i Jesosỳ, le tena nisy raha nampinekoneko aze tamy izay. Ino ty ianarantika boake amo o vavake iohoe? Inogne ty raha tena nilahibey tamy i Jesosy, tamy ireke nanao ty fanompoa’e tan-tane etoỳ, naho henteagne i vavake natao’ey? Ndao tika handineke ty vale o fagnonteneagne rehoe.

“FA NAMPAHAFANTAREKO IAREO I TAHINA’OY”

3. Inogne ty nirehafe i Jesosy miomba ty tahina i Jehovah, le ino ty tea’e horehafegne? (Jaona 17:6, 26)

³ Nirehake hoe izao ty Jesosy tamy i vavake natao’ey: “Fa nampahafantareko iareo i tahina’oy.” Naho ty maregne, le fa indroe ty Jesosy ro nirehake tie fa nampahafantare’e i mpiana’e rey i tahina i Jehovah-y. (Vakio ty Jaona 17:6, 26.) Ino ty tea’e horehafegne? Nampahafantatse agnaragne mbe tsy nifanta iareo vao reke? Jiosy i mpiana i Jesosy rey, le fa nahafantatse tie i Jehovah ty tahinan’Agnahare. Miherenkeregne agnarivo’e amy ty Soratse Masigne Hebreo ao o tahinagne iohoe. Tsy i tahinan’Agnaharey areke ty tea i Jesosy horehafegne fa tihoe Andrianagnahare manao akore ty Jehovah. Nampahafantare i Jesosy ty hevetse amboho i tahina i Jehovah-y ao, agnisa izay ty raha safirie’e, ty raha atao’e naho ty toetse’e. Ireke raike avao ty tena mahay ty miomba i Jehovah.

4-5. a) Akore ty hahavy ty agnara ty ndaty raike ho sarobily amantikagne? Magnomeza ohatse. b) Akore ty fomba nahafantara i mpiana i Jesosy rey soa ty tahina i Jehovah?

⁴ Intoy misy ohatse: Eretsereto tie, dokotera mpandrasa ty ndaty raike atao tihoe David sady androanavy amy ty fiangonagne misy azo eo. Fa tagnate ty taogne maro ty nahafantara’o o rahalahy iohoeke. Faie nipay fitsaboagne meke rehe tie indraike, le nandeha malaky mbamy ty lapotaly iasa i rahalahỳ mbeo. Nampiasa ty fahaia’e mitsabo reke mba hagnavotagne ty fiai’o. Tsy vao mainke misy heve’e manokagne ama’o vao ty agnara o rahalahy iohoe? Mazava hoaze! Tsy tihoe androanavy avao ty fahafantara’o i David manomboke eo, fa i dokotera mpandrasa nagnavotse ty fiai’oy ka.

⁵ Fa nahafantatse i tahina i Jehovah-y ka i mpiana i Jesosy rey. Faie nanjare nisy heve’e lahibey amy iareo o tahinagne iohoe, noho ty fanompoagne natao i Jesosy. Nagnino tikagne ro afake mirehake izay? Satria nampiseho ty toetsen-dRae’e tamy ze kila raha natao’e naho nirehafe’e ty Jesosy. Nanjare ‘nahafantatse’ soa i Jehovah areke i apostoly rey naho fa nitsanogne soa ty fomba fampianara i Jesosy sady nandineke soa ty fomba nindesa’e o ndatio.​—Jaona 14:9; 17:3.

‘NOHO I TAHINA’O NIMEA’O AHIKEY’

6. Inogne ty dika tihoe nimea i Jehovah i Jesosy i Tahina’ey? (Jaona 17:11, 12)

⁶ Nivavake hoahy i mpiana’e rey hoe izao ty Jesosy tamy i vavake natao’ey: ‘Arovo iareo noho i tahina’o nimea’o ahikey. ‘ (Vakio ty Jaona 17:11, 12.) Midika vao zay tie azo tokavegne tihoe Jehovah ty Jesosy? Oho’o. Mareho fa natao i Jesosy tihoe “i tahina’oy” i tahina i Jehovah-y amo o vavake iohoe. Tsy nanjare agnara i Jesosy areke i tahina i Jehovah-y. Inogne areke ty tea i Jesosy horehafegne amy tihoe, nimeagne aze i tahinan’Andrianagnaharey? Voaloha’e, solontegna i Jehovah ty Jesosy, sady Mpinday ty Saontsi’e. Niavy tamy ty tahina i Baba’e reke sady nanao fahagagagne tamy ty alala o tahinagne iohoe. (Jaona 5:43; 10:25) Fagnampe izay ka le midika tihoe “I Jehovah ro Famonjeagne” ty agnara i Jesosy. Misy ifandrambesa’e marine amy i tahina i Jehovah-y areke ty agnara i Jesosy.

7. Magnomeza ohatse ahatreavagne tie afake mirehake amy ty tahina i Jehovah ty Jesosy.

⁷ Intoy misy ohatse: Solontegna ty mpitondra raike ty ambasadera raike sady mirehake amy ty agnara i mpitondray reke. Manan-kery manahake ty reha i mpitondray areke ty reha i ambasaderay. Solontegna i Jehovah hoe izay ka ty Jesosy, sady mirehake amo o ndatio amy ty alala ty Tahina’e.​—Mat. 21:9; Lioka 13:35.

8. Nagnino ty Jehovah ro nisaontsy tie ‘amy i Jesosy ao’ i tahina’ey ndra tie taloha ty niavia’e an-tane etoy aza? (Eksodosy 23:20, 21)

⁸ Amy ty maha Saontsy i Jesosy, le ninday ty Saontsy i Jehovah reke. Nampita hafatse naho toromareke hoahy o anjelio naho hoahy o ndatio reke. (Jaona 1:1-3) Va’e i Jesosy, i anjely nirahe i Jehovah mba hikarakara o Israelitao tamy iareo tam-patrambey agney. Nisaontsy hoe izao ty Jehovah mba hahavy o Israelitao hankatò o anjely iohoe: “Satria ama’e ao i agnarakoy.”a (Vakio ty Eksodosy 23:20, 21.) Nisolontegna i Jehovah ty Jesosy, sady ireke raike avao ty tena nanohagne naho nagnamasigne i tahina i Baba’ey. ‘Amy i Jesosy ao’ areke i tahina i Jehovah-y.

“O BABA, MEO VONINAHITSE I TAHINA’OY”

9. Akore ty ahatreavagne tie nilahibey tamy i Jesosy ty tahina i Jehovah? Hazavao.

⁹ Nitreantikagne teo tie, tena nilahibey tamy i Jesosy i tahina i Jehovah-y, ndra tie taloha ty niavia’e tan-tane etoy aza. Azo antoke fa nisy ifandrambesa’e marine tamy ty tahina i Jehovah ze kila raha natao i Jesosy tambone tane etoy. Naho fa hifaragne ty fanompoa i Jesosy, le nangatake hoe izao reke: “O Baba, meo voninahitse i tahina’oy.” Tamy io avao, le avy le namale aze tamy ty feo mafe boake an-dagnitse ty Baba’e. Hoe reke: “Fa nagnomey voninahitse aze raho sady mbe hagnomey voninahitse aze indraike.”​—Jaona 12:28.

10-11. a) Akore ty fomba nagnomea i Jesosy voninahitse i tahina i Jehovah-y? (Henteo ka i sarey.) b) Nagnino i tahina i Jehovah-y ro mila hamasignegne naho liovegne?

¹⁰ Nagnomey voninahitse ty tahina i Baba’e ka ty Jesosy. Tamy ty fomba akore? Nambara’e amy ty hafa i toetse i Baba’e fanjaka rey naho ty raha natao’e. Maro ka ty raha hafa natao i Jesosy, mba hagnomeagne voninahitse o tahinagne iohoe. Toko’e hohamasignegne i tahina i Jehovah-y sady mila liovegne ty laza’e.b Natoro i Jesosy tamy i vavake nampianare’e ty mpanonjohy ty lia’ey fa tena lahibey ty hanoagne izay. Hoe reke: “Rae’ay amy i lagnitsey ao, hohamasignegne abey ty tahina’o.”​—Mat. 6:9.

¹¹ Nagnino i tahina i Jehovah-y ro nila nihamasignegne naho niliovegne? Satria tsy nagnomey voninahitse naho nandratiraty i Jehovah Andrianagnahare ty Satana Devoly tamy i tonda Edenay ao. Nirehake ty Satana tie mpavande ty Jehovah sady misy raha soa tsy nimea’e i Adama naho i Eva. (Gen. 3:1-5) Nirehake ka ty Satana tie, tsy mete ty fomba anoa i Jehovah raha. Ty laza i Jehovah ndra i tahina’ey ty tena voakasike amy i vande i Satanay. Tafara tatoy, le nirehake ty Satana tamy ty andro i Joba tie, noho o ndatio mahazo raha boake amy i Jehovah ty mahavy iareo manompo Aze. Tsy misy ndaty tea i Jehovah zao hatasa o mpandratiraty iohoe sady tsy hanompo Aze sasa iareo naho fa miatreke raha sarotse. (Joba 1:9-11; 2:4) Tena mila fotoagne areke ty hagnaporofoagne tie i Jehovah sa i Satana ty tena mpavande.

“MAHAFOE TY FIAIKO RAHO”

12. Nivognogne ty hanao inogne ty Jesosy noho ty hatea’e i tahina i Jehovah-y?

¹² Noho ty hatea i Jesosy i Jehovah, le nanao ze azo’e natao reke mba hagnamasignagne naho hagnaliovagne i tahina i Jehovah-y. Hoe ty Jesosy: “Mahafoe ty fiaiko raho.” (Jaona 10:17, 18) Tena vognogne hamoe ty fiai’e noho ty amy i tahina i Jehovah-y reke.c Niambohoa i Adama naho i Eva, i ndaty roe voririke voaloha’e rey ty Jehovah, le nanohagne i Satana iareo. Faie nifanohetse tamy izay ty natao i Jesosy. Nivognogne ty ho an-tane etoy reke sady nagnaporofo ty hatea’e i Jehovah. Tsy nivalike tamy ze kila raha natao’e tamy ty fiaigna’e naho ze raha nirehafe’e ty Jesosy. (Heb. 4:15; 5:7-10) Tsy nivalike reke nanomboke tamy ty niavia’e tan-tane etoy hatrake amy ty nimateza’e amy i hazo fijaleagney eo. (Heb. 12:2) Izay ty nagnaporofoa’e ty hatea’e i Jehovah naho i Tahina’ey.

13. Nagnino ro i Jesosy raike avao ty tena nisoa toeragne mba hagnaporofo tie mpavande ty Satana? (Henteo ka i sarey.)

¹³ Nivoaporofo tamy ty fomba fiaigna i Jesosy tie, i Satana ty mpavande fa tsy i Jehovah. (Jaona 8:44) Ireke ty tena nahafantatse soa i Jehovah, mandikoatse ze kila raha miaigne iaby. Naho toe nisy nimaregne i fandratiratiagne natao i Satana mba hanoheragne i Jehovah-y, le ho nifanta i Jesosy zay. Faie niaro mafe ty laza i Jehovah ndra ty tahina’e ty Jesosy. Ndra tie tsy niaro i Jesosy aza ty Jehovah, le nivognogne ty ho mate avao reke ta tie hiamboho i Rae’e bey hateay.​—Mat. 27:46.d

“FA NIVITAKO I ASA NAMPANOE’O AHỲ”

14. Akore ty natao i Jehovah mba hamaleagne soa i Jesosy?

¹⁴ Nivavake hoe izao ty Jesosy tamy ty halegne fara’e taloha ty nimateza’e: “Fa nivitako i asa nampanoe’o ahỳ.” Natoky reke tie noho ireke tsy nivalike, le hamale soa aze ty Jehovah. (Jaona 17:4, 5) Tsy diso ty Jesosy naho natoky i Baba’e. Tsy nenga i Jehovah hijanogne ela tan-kibory ao reke. (Asa. 2:23, 24) Vinelo’e tamy ty mate ty Jesosy sady nimea’e toeragne ambone an-dagnitse agne. (Fil. 2:8, 9) Tafara tatoy, le nanomboke ninday amy ty maha Mpanjaka i Fanjakàn’Agnaharey aze reke. Inogne ty hatao o Fanjakagne iohoe? Mirehake hoe izao ty tapa’e faharoe amy i vavake modelỳ: “Lonike abey mba ho avy i Fanjakà’oy. Lonike abey mba hatao an-tane etoy ty zoton’arofo’o [Jehovah], manahake ty an-dagnitse agne.”​—Mat. 6:10.

15. Inogne ty raha hotanterahe i Jesosy?

¹⁵ Tsy ho ela ty Jesosy, le hialy amo o fahavalon’Agnahareo sady hanjamagne ze ndaty raty fagnahy amy i Haramagedonay. (Apok. 16:14, 16; 19:11-16) Afara kede izay, le hatora’e amy i “lavake tsikeokeokey” agne ty Satana. Tsy ho afake hanao ndra inogn’ino manahake o mateo reke. (Apok. 20:1-3) Agnate i Fanjakà i Jesosy Arivo Taogney ao, le hatao’e ze hahavy o ndatio hiadagne naho ho voririke. Hovelome’e iaby ze ndaty nimate. Hatao’e paradisa ty tane toy iaby. Tsy misy tsy hotanterake ze raha iaby nisafirie i Jehovah!​—Apok. 21:1-4.

16. Inogne ty raha hotanterake amy ty fara i Fanjakagne Arivo Taogney?

¹⁶ Inogne ty raha hiseho naho fa tapetse i Fanjakagne Arivo Taogney? Fa tsy hisy sasa ty ota naho ty tsy fahavoririhagne. Tsy hisy sasa ty ndaty hangatake famelan-keloke mioregne amy i solovoigney noho ty fahotagne natao’e. Tsy hipay mpagnelagnelagne ndra mpisorogne sasa o ndatio. “Hofoagnagne i fahavalo fara’ey, le ty fahafatezagne [i boake amy i Adamay].” Hovelomegne o ndaty nimateo sady ho voririke iaby ze kila ndaty ambone tane etoy.​—1 Kor. 15:25, 26.

17-18. a) Ino ty raha hiseho naho fa tapetse i Fanjakagne Arivo Taogney? b) Inogne ty hatao i Jesosy naho fa tapetse ty fitondra’e? (1 Korintianina 15:24, 28) (Henteo ka i sarey.)

¹⁷ Inogne ka ty raha hafa hiseho naho fa tapetse i Fanjakagne Arivo Taogney? Tena hiambake ty raha hiseho amy izay. Tsy hisy firehafagne miomba ty fagnamasignagne ty tahina i Jehovah sasa. Ino ty anto’e? Nirehake ty Satana tamy i tonda i Edenay tao tie mpavande ty Jehovah sady trea amy ty fomba fitondra’e tie tsy tea’e o ndatio. Naho fa nimaro ty ndaty nagnomey voninahitse sady nagnaja i Jehovah, le vao mainke nihamasigne i tahina’ey. Faie amy ty fara i Fanjakagne Arivo Taogney vaho izay malio tanterake ty laza i Jehovah. Niporofoe i Jesosy tamy ze raha iaby natao’e ty hatea’e i Baba’e bey hatea an-dagnitse agney.

¹⁸ Hovoaporofo tanterake amy ty fara’e tie vande iaby i raha nirehafe i Satana rey. Inogne ty hatao i Jesosy naho fa tapetse i fotoagne itondra’ey? Hanahake i Satana vao reke, le higoreve amy i Jehovah? Ay! (Vakio ty 1 Korintianina 15:24, 28.) Hagneregne i Fanjakagney aman-dRae’e ty Jesosy. Hanohagne ty fitondra i Jehovah reke. Tsy hanahake i Satana ty Jesosy fa vognogne hamoe ze kila raha noho ty hatea’e i Jehovah.

19. Akore ty fihevera i Jesosy ty tahina i Jehovah?

¹⁹ Tsy isalasalagne fa nivognogne ty hagnomey i Tahina’ey hoahy i Jesosy ty Jehovah! Nisolontegna an-dRae’e tamy ty fomba voririke vata’e ty Jesosy. Akore areke ty fihevera i Jesosy ty tahina i Jehovah? Io ty raha fara izay ty lahibey tama’e. Nivognogne ty ho mate noho ty amo o tahinagne iohoe reke sady vognogne ty hagneregne indraike ze kila raha amy i Jehovah amy ty fara i Fanjakagne Arivo Taogney. Akore ty azontika anahafagne ty ohatse nenga i Jesosy? Hamale ze fagnonteneagne zay tika amy ty lahatsoratse magnarake.