Lesogne Boake amy ty Faminaniagne Nirehafe i Jakoba​—Fizaràgne 1

1-2. Inogne ty natao i Jakoba taloha kede ty nimateza’e, le inogne ty anto’e? (Henteo ka i sarey.)

FA 17 taogne teo ho eo zay ty nihova i Jakoba mpanompo i Jehovah tsy nivalike naho ty keleia’e, ta Ejipta agne naho fa niala ta Kanana agne iareo. (Gen. 47:28) Tamy ze fotoagne zay, le tena nifale reke satria nitafaharo indraike amy i ana-dahi’e tena tea’ey, le i Josefa. Ela ty ela, fa niharo iaby indraike i keleia’e rey. Faie tsapa’e hinane zao tie fa marine ho mate reke. Navori’e iaby areke i keleia’e rey satria nisy raha lahibey horehafe’e.​—Gen. 49:28.

² Fomba ty loha ty keleiagne tamy izay ty mamory ty keleia’e, le mamela hafatse hoahy iareo naho fa ho mate reke. (Isaia 38:1) Va’e hanendre ze hisolo aze hitarike i keleiagney ka reke amy io.

3. Arake ty Genesisy 49:1, 2, nagnino ty raha nirehafe i Jakoba ro tena lahibey?

³ Vakio ty Genesisy 49:1, 2. Miambake o fivoria ty keleiagne iohoe. Mpaminany ty Jakoba. Tamo o fivoriagne iohoe, le nimea i Jehovah ty fagnahi’e masigne o mpanompo’e iohoe mba hirehake faminaniagne lahibey amy ty hoavy tena hisy voka’e amy ty tarana’e. Izay kindraike ty mahavy i raha nirehafe’e amy ireke fa ho matey tokavegne tihoe faminaniagne.

4. Inogne ty raha toko’e hotadidientikagne naho fa mandineke i faminaniagne nirehafe i Jakobay? (Henteo ka ty efajoro tihoe “Ty Keleia i Jakoba.”)

⁴ Hodinehentika amy ty lahatsoratse toy ty raha nirehafe i Jakoba tamy ty efatse amy i ana-dahi’e rey. Tsy ia zay fa i Robena, i Simeona, i Levy vaho i Joda. Ty raha nirehafe i Jakoba tamy ty ana-dahi’e valo hafa ty hodinehentika amy ty lahatsoratse magnarake. Hotreantikagne amy ireo fa tsy hoahy i ana-dahy i Jakoba natera’e rey avao ty nampità’e i hafatsey fa hoahy ty tarana iareo ka. Ireo ty nanjare firene o Israely talohao. Naho fa mandineke indraike ty tantara o firenena iohoe tikagne, le hazava soa amantika ty fomba nahatanteraha i faminania i Jakobay. Misy lesogne sarobily hagnampe antika hampifale i Jehovah, i Raentika an-dagnitse agney ty fandinehagne ty raha nirehafe’e.

ROBENA

5. Inogne ty tombotsoa nitamae i Robena boake aman-drae’e?

⁵ I Robena ty nirehafa i Jakoba voaloha’e. Hoe reke: “Talen’anako rehe.” (Gen. 49:3) Amy ty maha talen’anake i Robena, le nitamà reke tie toko’e hahazo anjara lova o ndaty roe boake amy ty fanagna i baba’e. Va’e nitamà ka reke tie ireke ty hanjare loha ty keleiagne, le ty tarana’e ka ty hanagne ze tombotsoa zay naho fa mate ty baba’e.

6. Nagnino ty Robena ro tsy nahazo ty zo amy ty maha talen’anake aze? (Genesisy 49:3, 4)

⁶ Faie tsy niazo i Robena ze zo maha talen’anake zay. (1 Tan. 5:1) Ty anto’e, nilà’e ty Bilaha ampela hafa valy i Jakoba taogne tsiampeampe taloha izay. Mpiasa i Rahely valy tean-dahy ty Bilaha, faie fa nimate ty Rahely. (Gen. 35:19, 22) Ana-dahy i Jakoba amy ty vali’e hafa atao tihoe Lea ty Robena. Va’e tsy nahafehe ty fagniria’e reke. Ndra azo antoke fa nivahore’e ty Bilaha, amy izay tsy ho tean-drae’e mandikoatse an-drene’e. Ndra inogn’ino ty anto’e, le sambe tsy fale tamo o raha natao’e iohoe ty Jehovah naho i baba’e.​—Vakio ty Genesisy 49:3, 4.

7. Inogne ty raha niseho tamy i Robena naho ty tarana’e? (Henteo ka ty efajoro tihoe “Faminaniagne Nirehafe i Jakoba Taloha ty Nimateza’e.”)

⁷ Hoe ty Jakoba tamy i Robena: “Tsy ho ambone o rahalahi’o reo rehe.” Niavy eo vata’e o rehake rehoe. Tsy misy firehafagne ty amy Baiboly ao tie nisy tamy ty tarana i Robena ro nanjare mpanjaka, mpisorogne ndra mpaminany. Faie mbe nimea i Jakoba lova avao ty Robena sady nanjare agnisa ty foko o Israelio ty tarana’e. (Jos. 12:6) Nisy fotoagne ty Robena nampiseho toetse soa sady tsy misy firehafagne tie, naloto findesan-tegna ndraike reke.​—Gen. 37:20-22; 42:37.

8. Inogne ty lesogne ianarantika boake amy i Robena?

⁸ Inogne ty lesogne ho antikagne? Mila mikezake mafe tika mba hifehe tegna sady handietse ty findesan-tegna raty. Naho fa tendreke tsapa hevetse hanao fahotagne lahibey tika, le mila mijanogne hey sady mandineke tie ino ty ho voka izay amy i Jehovah naho amy ty keleiantika vaho amy ty hafa. Toko’e hotadidientikagne ka tie, “ze tongise o ndatio avao ro hovokare’e.” (Gal. 6:7) Faie ty raha niseho tamy i Robena, le maniahy antika tie mamindra fo ty Jehovah. Ndra tie tsy miaro antika amy ty voka-draty ty hadisoantikagne aza ty Jehovah, le mitahy antikagne reke naho fa mikezake hanao ty soa tikagne.

SIMEONA NAHO I LEVY

9. Inogne ty nahavy i Jakoba tsy nankasitrake i Simeona naho i Levy? (Genesisy 49:5-7)

⁹ Vakio ty Genesisy 49:5-7. Nampiasa rehake mavesatse tamy i Simeona naho i Levy ty Jakoba, mba hampisehoa’e ty tsy fankasitraha’e iareo. Taogne tsiampeampe taloha io, le nivahore ty lahilahy Kananita raike atao tihoe Sekema ty Dina, anak’ampela i Jakoba. Mazava ho aze fa niboseke tamy ty raha nanjò i rahavave iareoy i ana-dahy i Jakoba rey iaby. Faie, le avy le nanao raha aman-kalozagne ty Simeona naho i Levy. Namitake iareo, le nampitamà tie ho mpilongo avao iareo amy ry Sekema naho i ndati’e rey naho mitapake iareo. Nagneke izay areke i lahilahy rey. Amy iareo mbe mararey, le “sambe nangalake ty mesa’e ty Simeona naho i Levy, le namonovono ze lahilahy iaby tao.”​—Gen. 34:25-29.

10. Akore ty nahatanteraha ty faminaniagne nirehafe i Jakoba miomba i Simeona naho i Levy? (Henteo ka ty efajoro tihoe “Faminaniagne Nirehafe i Jakoba Taloha ty Nimateza’e.”)

¹⁰ Tena nahaboseke i Jakoba ty raha natao i ana-dahi’e roe rey. Nirehafe’e mialoha fa hiparitake magneneke i Israely iareo. Nitanterake o faminaniagne iohoe 200 taogne mahery tafara tatoy naho fa nizilike amy i Tane Nampitamaegney ao ty firene o Israelio. Tamy ty pila-tane ty foko i Joda ty nisy ty anjara lova ty foko i Simeona. (Jos. 19:1) Ty lova ty foko i Levy, le tanàgne 48 niparitake nagneneke i Israely.​—Jos. 21:41.

11. Inogne ty raha soa natao ty foko i Simeona naho i Levy?

¹¹ Tsy nagneregne ty hadisoagne natao ty razambey iareo sasa ty tarana i Simeona naho i Levy. Tena tsy nivalike amy ty fivavahagne malio ty foko i Levy. Naho fa nangalake ty Lalàna boake amy i Jehovah tamy i Vohitse Sinaỳ agne ty Mosesy, le maro tamo o Israelitao ty nanompo i sare sarakey. Faie nanohagne i Mosesy avao o Levitao sady nagnampe aze nandringagne ze ndaty nanao izay. (Eks. 32:26-29) Nimea i Jehovah tombotsoa manokagne o Levitao, le ty hanao ty asa ty mpisorogne. (Eks. 40:12-15; Nom. 3:11, 12) Nagnampe ty foko i Joda ty foko i Simeona tafara tatoy, naho fa nialy mba hahazoagne i Tane Nampitamaegney iareo, arake ty fa nisafirie i Jehovah.​—Mpits. 1:3, 17.

12. Inogne ty lesogne ianarantika boake amy ty tantara i Simeona naho i Levy?

¹² Ino ty lesogne ho antikagne? Ko engagne hikomandy azo amy ty fanapahan-kevetse rambese’o naho amy ty raha atao’o ty haboseha’o. Ara-dalàna tihoe boseke naho nihara ty tsy rare’e rehe ndra ty ndaty maifitse azo. (Sal. 4:4) Faie ko haligno fa tsy hankasitraha i Jehovah tikagne, naho mirehake ndra manao raha mba hampisehoagne ty habosehantikagne. (Jak. 1:20) Toko’e hampihatse ty toro lala ty Baiboly tika naho fa miatreke tsy rare’e, ndra amy fiangonagne eo zay ndra ivela’e agne. Tsy hihara ty voka-draty ty habosehagne tsy voafehe tikagne naho manao izay. (Rom. 12:17, 19; 1 Pet. 3:9) Ndra tie manao raha tsy mampifale i Jehovah aza ty rae aman-drene’o, le ko haligno fa tsy voatere hanahake iareo rehe. Ko le avy le magnatsoake hevetse tie, tsy hahavita hampifale i Jehovah rehe ndra tsy hahazo ty fitahia’e. Hamale soa ty kezake atao’o mba hanoagne ty soa ty Jehovah.

JODA

13. Nagnino ty Joda ro va’e ninekoneko naho fa ireke ka ty nirehafa i baba’e?

¹³ I Joda ka zao ty irehafa i Jakoba. Va’e ninekoneko ty Joda naho fa naharey ty raha nirehafe i Jakoba tamy i zoke’e rey. Naho ty maregne, le nanao hadisoagne lahibey maromaro ka reke. Nandrambe anjara tamy ty fanafihagne ty tanà i Sekema reke. (Gen. 34:27) Namarotse i Josefa ho ndevo niarake tamy i rahalahi’e rey reke, le navande taman-drae’e iareo. (Gen. 37:31-33) Naho fa tafara tatoy, le nilà’e ty Tamara vinanto’e satria nieretserete’e ho makorely.​—Gen. 38:15-18.

14. Inogne ty raha soa natao i Joda? (Genesisy 49:8, 9)

¹⁴ Faie ndra tie teo zay, le nitarihe ty fagnahy masigne ty Jakoba mba hitso-drano naho hirehake raha soa miomba i Joda avao. (Vakio ty Genesisy 49:8, 9.) Tena nihevetse ty fihetseham-po o rae’e fa antetse iohoe ty Joda. Niferenaigne i Benjamina zai’e ka reke.​—Gen. 44:18, 30-34.

15. Tamy ty fomba akore ty nahatanteraha ty tso-drano nimeagne i Joda?

¹⁵ Naminany ty Jakoba tie hitarike o rahalahi’eo ty Joda. Faie tsy nitanterake aniany zay. Roanjato taogne teo ho eo tafara tatoy, le i Joda ty nitarike o Israelio tafara ty nialà iareo boake Ejipta agne. O foko iohoe ty nitarike o Israelitao nanegnategna i fatrambeỳ ho mbamy i Tane Nampitamaegney mbeo. (Nom. 10:14) Taogne maro tafara tatoy, le i Joda ty nitarike ty aly mba hahazoagne i Tane Nampitamaegney. (Mpits. 1:1, 2) I Davida agnisa ty tarana i Joda, ty mpanjaka voaloha’e naharetse boake amo o foko iohoe. Faie tsy io avao ty nahatanteraha i faminaniagney.

16. Akore ty nahatanteraha ty faminaniagne amy Genesisy 49:10 ao? (Henteo ka ty efajoro tihoe “Faminaniagne Nirehafe i Jakoba Taloha ty Nimateza’e.”)

¹⁶ Nirehake ty Jakoba tie, ho Mpitarike nainai’e o ndatio ty raike amy ty tarana i Joda. (Vakio ty Genesisy 49:10 naho i fagnamarehagne ambane pejey.) I Jesosy Kristy, i rehafe i Jakoba tihoe Siloy o Mpitarike iohoe. Hoe ty anjely raike miomba i Jesosy: “Homea i Jehovah Andrianagnahare aze ty sezan-droandria i Davida rae’e.” (Lioka 1:32, 33) “Liona boake amy ty foko i Joda” ka ty irehafagne i Jesosy.​—Apok. 5:5.

17. Akore ty azontika anahafagne ty fomba fivazohoa i Jehovah o ndatio?

¹⁷ Ino ty lesogne ho antikagne? Nitahie i Jehovah ty Joda ndra tie nanao hadisoagne lahibey maromaro aza. Va’e nieretseretse vao i rahalahy i Joda rey tie ino ty raha nivazoho i Jehovah tama’e tao? Ndra inogn’ino ty raha nieretserete iareo, le nahavazoho raha soa tamy i Joda tao ty Jehovah kanao nitahy aze. Akore ty azontika anahafagne i Jehovah? Naho misy Kristiana raike mahazo tombotsoa manokagne, le va’e ho azo ty tsapa hevetse hifantoke amy ty tsy fahavoririha’e tikagne. Faie mila tadidientikagne tie, mahafale i Jehovah ty toetse soa anagna’e. Mipay ze raha soa amy ty mpanompo’e ao ty Jehovah, le toko’e hanao hoe izay ka tikagne.

18. Nagnino tika ro tena mila manam-paharetagne?

¹⁸ Ianarantika boake amy ty tantara i Joda fa tena ilaegne ty manam-paharetagne. Lava magnatanterake ty raha ampitamae’e avao ty Jehovah. Faie mateteke, le tsy amy ty fomba eretseretentikagne ndra amy ty fotoagne iteavantikagne aze ty anoa’e izay. Tsy le avy le nitarike tamo o vahoan’Agnahareo eo ty tarana i Joda. Faie nanohagne ze nitendre i Jehovah avao iareo, agnisa izay ty Mosesy Levita, i Josoa Efraimita ndra i Saoly Benjaminita. Lonike ka tikagne mba hanohagne ze nitendre i Jehovah hitarike amo o androntika hinane zao.​—Heb. 6:12.

19. Inogne ty lesogne ianarantika miomba i Jehovah boake amy ty fandinehagne i faminaniagne nirehafe i Jakoba taloha ty nimateza’ey?

¹⁹ Inogne ty nianarantikagne boake amy i faminaniagne nirehafe i Jakoba taloha ty nimateza’ey? Trea tamy igne fa “tsy mitovy amy ty fomba fagnentea o ndatio ty fomba fivazohoan’Agnahare.” (1 Sam. 16:7) Tena manam-paharetagne naho mamela heloke ty Jehovah. Heje i Jehovah ty findesan-tegna raty faie tsy mitamà reke tie, ho voririke o mpanompo’eo. Naho nisy ndaty nanao fahotagne lahibey faie tena mibebake sady mikezake manao ty soa, le hitahy aze indraike reke. Handineke ty raha nirehafe i Jakoba amy i ana-dahi’e valo sisa rey tika amy ty lahatsoratse magnarake.