Lesogne Boake amy ty Faminaniagne Nirehafe i Jakoba​—Fizaràgne 2

1. Inogne amy i faminaniagne nirehafe i Jakoba taloha ty nimateza’ey ty hodinehentika amy ty lahatsoratse toy?

NIVORY nagnodidigne i Jakoba i ana-dahi’e rey mba hitsanogne ty tso-drano nataon-drae’e hoahy iareo tsikiraidraike. Nitreantika tamy i lahatsoratse taloha itoỳ fa nagnambara raha tsy nampoize i Robena, i Simeona, i Levy vaho i Joda ty Jakoba rae iareo. Tsy maintsy ho nieretseretse ty raha hambara i Jakoba amy i ana-dahi’e valo sisa rey areke iareo efa-dahy. Andao tika handrambe lesogne boake amy ty raha nirehafe’e amy i Zebolona, i Isakara, i Dana, i Gada, i Asera, i Naftaly, i Josefa vaho i Benjamina.a

ZEBOLONA

2. Inogne ty tso-drano niazo i Zebolona, le akore ty nahatanteraha’e? (Genesisy 49:13) (Henteo ka i efajoroy.)

² Vakio ty Genesisy 49:13. Nirehake ty Jakoba tie hitoboke marine ty riake amy ty faritse avaratse amy i Tane Nampitamaegney ty tarana i Zebolona. Roanjato taogne mahery tafara tatoy vaho izay niazo ty tarana i Zebolona i tane lova iareoy. Ampagnivoa ty riake Galelia naho i Mediterane ty misy aze. Naminany hoe izao ty Mosesy: “Mifalea ry Zebolona noho ty varotse atao’o ivela’e agne.” (Deot. 33:18) Va’e midika zay tie tsy sarotse hoahy ty foko i Zebolona ty nanao raharaham-barotse satria nitoboke tam-pagnivoa i riake roey eo iareo. Faie ndra inogn’ino raha niseho, le nanagne anto’e mba hifaleagne ty tarana i Zebolona.

3. Inogne ty hagnampe antika ho afa-po amy ze anagnantika?

³ Ino ty lesogne ho antikagne? Managne anto’e hifaleagne tika ndra aia ndra aia ty misy antika, le ndra inogn’ino ty raha va’e iaignantika. Tsy maintsy afa-po amy ze raha anagnantika tika naho te ho fale. (Sal. 16:6; 24:5) Kindraike le mora ty mifantoke amy ty raha tsy anagnantika, ta tie amy ty raha soa mahavy antika ho fale. Mikezaha areke hifantoke amy ty lafesoan-draha amy ty fiaigna’o.​—Gal. 6:4.

ISAKARA

4. Inogne ty tso-drano niazo i Isakara, le akore ty nahatanteraha’e? (Genesisy 49:14, 15) (Henteo ka i efajoroy.)

⁴ Vakio ty Genesisy 49:14, 15. Niderae i Jakoba ty Isakara noho ireke niasa mafe. Nampitovie’e amy ty birìke matanjake mahaleo enta-mavesatse reke. Nirehake ka ty Jakoba tie hahazo toeragne soasoa ty tarana i Isakara. Arake i nirehafe i Jakobay, le nahazo tane mahavokatse amy ty faritse amy ty Renerano i Jordana ty Isakara. (Jos. 19:22) Azo antoke fa niasa mafe iareo naho fa nambole tamy i tane iareoy. Faie nikezake mafe ka iareo mba hagnampe ty hafa. (1 Mpanj. 4:7, 17) Naho fa niatreke aly ohatse ty firene o Israelio tamy ty andro i Baraka Mpitsara naho i Debora mpaminanivave, le nivognogne ty hagnampe i firenenay ty foko i Isakara.​—Mpits. 5:15.

5. Nagnino tikagne ro toko’e hikezake hiasa mafe?

⁵ Ino ty lesogne ho antikagne? Hevere i Jehovah ho sarobily manahake ty asa mafe natao ty foko i Isakara ty asa mafe ataontika amy ty fanompoagne aze. (Mpito. 2:24) Dineho ohatse o rahalahy miasa mafe mba hikarakaragne o fiangonagneo reo. (1 Tim. 3:1) Tsy tihoe mialy ara-bakiteny o rahalahy rehoe. Faie tsy maintsy mikezake mafe iareo mba hiaro o vahoan’Agnahareo amy ty loza ara-pagnahy. (1 Kor. 5:1, 5; Joda 17-23) Mikezake magnomagne naho manao lahajaka mampahery mba hagnatanjahagne o fiangonagneo ka iareo.​—1 Tim. 5:17.

DANA

6. Inogne ty fanendreagne niazo ty foko i Dana? (Genesisy 49:17, 18) (Henteo ka i efajoroy.)

⁶ Vakio ty Genesisy 49:17, 18. Nampitovie i Jakoba amy ty meregne mialy amy ty fahavalo bey noho ireke ty Dana, agnisa izay ty sovala mpialy naho ty mpitingitse aze. Fahavalo ty fahavalo o Israelio ty Dana. Ty foko i Dana ty “tafara ao niaro” i firenenay tamy iareo ho mbamy i Tane Nampitamaegney mbeoy. (Nom. 10:25) Tena lahibey ze fanendreagne zay ndra tie tsy nivoamare ty foko ila’e amy i firenenay ao aza ty raha iaby natao ty foko i Dana.

7. Ino ty toko’e hotadidientika miomba ze fanendreagne mea i Jehovah antika?

⁷ Ino ty lesogne ho antikagne? Tsy voamare ty hafa vao ty asa atao’o? Va’e magnampe amy ty fagnaliovagne naho ty fikojakojagne ty Anjomba i Fanjakagney rehe, ndra miasa an-tsitrapo amy ty havoriambey faritse ndra vondrom-paritse ndra manao asa hafa. Naho izay, le tena deraegne rehe! Tadidio avao fa voamare i Jehovah sady sarobily ama’e ze kila raha atao’o ho aze. Tena fale reke naho manompo aze rehe satria te hampiseho ty hatea’o aze fa tsy tihoe te hipay dera boake amy ty hafa.​—Mat. 6:1-4.

GADA

8. Nagnino ty Gada ro mora tafihe ty fahavalo o Israelio? (Genesisy 49:19) (Henteo ka i efajoroy.)

⁸ Vakio ty Genesisy 49:19. Nirehake mialoha ty Jakoba tie hotafihe o malasò ty Gada. Roanjato taogne tafara tatoy, le niazo ty foko i Gada ty faritse atignana ty Renerano i Jordana. Ty fahavalo i firenenay ty nagnodidigne o tane iohoe. Mora nitafihegne areke ty toeragne nisy o foko iohoe. Faie ndra tie teo zay, le nite hipetrake amo o toeragne iohoe o Gaditao satria nimete soa tamy i biby tineza iareo rey ty tao. (Nom. 32:1, 5) Trea areke tie ndaty tena bey herim-po o Gaditao. Tsy izay avao fa natoky iareo tie, hagnampe iareo mba hiaro i tanàgne nimea’e iareoy ty Jehovah naho fa hanafike iareo i malaso rey. Iareo aza mbe nandefa ty maramila iareo mba hagnampe i foko hafa rey tagnate ty taogne maro. Ty anto’e mbe nisy fahavalo nila niresé iareo nitoboke tamy i Tane Nampitamaegne ahandrefa i Jordanay ey. (Nom. 32:16-19) Natoky iareo tie harova i Jehovah ty valy aman’ana iareo naho fa tsy eo i maramila rey. Nitahy ty herim-po naho ty fahafoezan-tegna iareo ty Jehovah.​—Jos. 22:1-4.

9. Ino ty voka ty fatokisantika i Jehovah amy ty raha filientika amy ty fiaignantika?

⁹ Ino ty lesogne ho antikagne? Tsy maintsy matoky i Jehovah tika naho te hahavita hanompo aze avao naho fa miatreke raha sarotse. (Sal. 37:3) Maro ty mpanompo i Jehovah amy izao mampiseho tie matoky aze. Manao sorogne iareo mba hanohagnagne amy ty tetik’asa fagnoregnagne, hagnampeagne amy ty toeragne mila mpitory maro ndra mba hanoagne fanendreagne hafa. Manao izay iareo satria matoky tie, hikarakara iareo lognandro ty Jehovah.​—Sal. 23:1.

ASERA

10. Inogne ty raha tsy natao ty foko i Asera? (Genesisy 49:20) (Henteo ka i efajoroy.)

¹⁰ Vakio ty Genesisy 49:20. Fa nirehake mialoha ty Jakoba tie hanjare mpagnarivo ty foko i Asera, le izay vata’e ty raha niseho. Amy ty faritse ila’e fara izay ty mamokatse amo o Israelio eo ty lova niazo ty foko i Asera. ( Deot. 33:24) Narine ty riake Mediterane sady nisy ty figaràn-tsambo i Sidona, ahy o Fenisiana mpanan-karenao ka o toeragne iohoe. Faie tsy nahavita nagnafake o Kananitao boake amy i taney ao ty foko i Asera. (Mpits. 1:31, 32) Va’e nanjare nisy voka’e raty tamy ty foko i Asera ty toe-tsaigne raty nanagna o Kananitao, le nanomboke nifantoke tamy ty raha ara-nofo iareo. Tsy nazoto nanohagne ty fivavahagne malio sasa areke iareo. Tsy nagnampe ohatse iareo naho fa nipay fagnampeagne ty Baraka Mpitsara, tamy tie ireke nialy tamo o maramila Kananitao. Voka’e, tsy nitrea i fokoy ty fandreseagne niambake tamy ty “rano i Megido teo.” (Mpits. 5:19-21) Tsy maintsy ho nahamegnatse ty foko i Asera ty naharey ty hiram-pandreseagne natao i Baraka naho i Debora. Izao ty agnisa ty togno o hira iohoe: “Nitobo-bey tamoron-driake teo avao ty Asera.”​—Mpits. 5:17.

11. Nagnino tika ro mila mahay manahatsahatse miomba ty fiheverantika o fanagnagneo?

¹¹ Ino ty azontika ianaragne? Te hagnomey ty fara’e soa hoahy i Jehovah tika. Faie mba hahavitantika izay, le mila mandietse ty fomba fihevera ty tontolo toy ty vola naho ty fanagnagne tikagne. (Ohab. 18:11) Mila mikezake hanahatsahatse ty fiheverantika o volao tikagne. (Mpito. 7:12; Heb. 13:5) Tsy engantika hanembatsembagne ty fanompoantika an’Agnahare ty raha tsy tena ilaegne. Manomboke amy izao tikagne, le magnomey ty ankamaroa ty fotoantika naho ty herintika hoahy i Jehovah. Fantantika fa amy ty hoavy tika vaho tena hanagne fiaignagne milamigne naho miadagne.​—Sal. 4:8.

NAFTALY

12. Akore ty va’e nahatanteraha i tso-drano nimeagne i Naftalỳ? (Genesisy 49:21) (Henteo ka i efajoroy.)

¹² Vakio ty Genesisy 49:21. Va’e manondro ty fomba fireha i Jesosy tamy ireke nanao ty fanompoa’ey tihoe “rehake mahafinaritse” nambara i Jakoba eo io. Ta Kapernaomy agne tagnate ty fotoagne elaela ty Jesosy, i mpampianatse mahaỳ. Tanà ty foko i Naftaly io. Izay ty mahavy ty tanà i Kapernaomy tokavegne tihoe ‘tanà’e.’ (Mat. 4:13; 9:1; Jaona 7:46) Naminany ty Isaia tie, noho i Jesosy, le hanjare hahatrea “hazavagne lahibey” ty foko i Zebolona naho i Naftaly. (Isaia 9:1, 2) Nitrea tamy ty fampianara i Jesosy fa ‘tena hazavagne mamilepiletse amy ze kila ndaty’ reke.​—Jaona 1:9.

13. Akore ty hahavy ty raha rehafentika hampifale i Jehovah?

¹³ Ino ty lesogne ho antikagne? Tena lahibey amy i Jehovah ty raha rehafentika naho ty fomba irehafantikagne aze. Akore ty ahafahantika manao “rehake mahafinaritse” mba hampifaleagne i Jehovah? Mila mirehake ty maregne tikagne. (Sal. 15:1, 2) Hampahery ty hafa tika naho mipay fomba hideragne iareo fa tsy meke hagnakiagne ndra ho bey taraigne miomba iareo. (Efes. 4:29) Azontikagne atao tanjogne ty hahay hanombo-drehake amy izay tikagne afake mitory.

JOSEFA

14. Hazavao ty fomba nahatanteraha i tso-drano nimeagne i Josefay. (Genesisy 49:22, 26) (Henteo ka i efajoroy.)

¹⁴ Vakio ty Genesisy 49:22, 26. Azo antoke fa nirehareha noho ty amy i Josefa ty Jakoba satria “nambahagne tamo o rahalahi’eo” reke. Nitokave i Jakoba tihoe “sampa ty hatae mamoa” reke. I Jakoba i hataey, le i Josefa ty sampa’e. Talen’ana i Jakoba amy i Rahely, i vali’e tena tea’ey ty Josefa. Nirehafe i Jakoba mialoha fa i Josefa ty hahazo ty lova anjara o ndaty roe ndra tie i Robena aza ty talen’ana i Jakoba tamy i Lea vali’e. (Gen. 48:5, 6; 1 Tan. 5:1, 2) Naho fa nitanterake i faminaniagney, le sambe nahazo anjara tane ty tarana i Efraima naho i Manase, i ana-dahy i Josefa roey sady nanjare foko roe sambe hafa iareo.​—Gen. 49:25; Jos. 14:4.

15. Akore ty natao i Josefa naho fa nisy tsy rare’e?

¹⁵ Nirehake ka ty Jakoba tie, “nitifitse sady nitagne am-po tama’e [i Josefa] i mpitifitse folesidoro rey.” (Gen. 49:23) I rahalahi’e nialogne aze rey io satria iareo ty nahavy ty ankamaroa ty tsy rare’e nahazo aze. Faie tsy niboseke tamy i rahalahi’e rey ndra tamy i Jehovah ty Josefa. Izay ty nahavy i Jakoba nirehake tie: “Mbe amy ty pilasi’e avao i folesidoro’ey [Josefa], le matanjake sady malaky avao ty tagna’e.” (Gen. 49:24) Niantehetse tamy i Jehovah avao ty Josefa tagnate i raha sarotse nahazo aze rey. Tsy vita tihoe namela i rahalahi’e rey avao reke, fa naneho hasoa fagnahy tamy iareo ka. (Gen. 47:11, 12) Nenga i Josefa hagnasoa ty toetse’e i raha sarotse natrehe’e rey. (Sal. 105:17-19) Voka’e, afake nampiasa aze amy ty fomba miambake ty Jehovah.

16. Akore ty azontika anahafagne i Josefa naho fa misy tsy rare’e?

¹⁶ Ino ty lesogne ho antikagne? Tsy toko’e hengantika hampagnalavitse antika amy i Jehovah ndra amo o mpiara-manompò ty raha sarotse atrehentika. Tadidio fa va’e henga i Jehovah hiseho i raha sarotse mitsapa ty finoantikagne rey satria agnisa ty fampiofagna’e antika zay. (Heb. 12:7, f.a.p.) Hagnampe antika hanagne toetse Kristiana naho hagnasoa ty toetse fa anagnantika, agnisa izay ty fitretrézagne naho ty famelan-keloke i fampiofagna’e rey. (Heb. 12:11) Hitahy ty fiaretantikagne manahake ty natao’e tamy i Josefa ty Jehovah.

BENJAMINA

17. Akore ty nahatanteraha i tso-drano nimeagne i Benjaminay? (Genesisy 49:27) (Henteo ka i efajoroy.)

¹⁷ Vakio ty Genesisy 49:27. Nirehake mialoha ty Jakoba tie, ho mpialy mahay manahake o amboadalao o Benjaminitao. (Mpits. 20:15, 16; 1 Tan. 12:2) I Saoly boake amy ty foko i Benjamina ty ni-mpanjaka voaloha’e tamy ty foko o Israelio eo. Izay ty teagne horehafegne amy tihoe “maraindraigne” amy ty fanjakà o Israelio. Trea tie bey herim-po reke naho fa nialy tamo o Filistinao. (1 Sam. 9:15-17, 21) Nagnavotse o Israelitao, tamy ty fandringanagne ho natao o Fanjakagne Persianao ty Estera Mpanjakavave naho i Mordekay Praiminisitse. Sambe Benjaminita iareo. Izay ty teagne horehafegne amy tihoe “amy ty hariva” amy ty tantara i fanjakagney.​—Est. 2:5-7; 8:3; 10:3.

18. Akore ty azontika anahafagne ty tsy fivaliha o Benjaminitao naho fa misy lamigne boake amy i Jehovah?

¹⁸ Ino ty lesogne ho antikagne? Tena nifale o Benjaminitao naho fa nahatrea ty raike tamy iareo nanjare mpanjaka mba ho fahatanteraha i tso-drano nimeagne iareoy. Faie naho fa nafindra i Jehovah tamy i Davida, agnisa ty foko i Joda i fitondragney, le nanohagne ze fagnovàgne zay o Benjaminitao. (2 Sam. 3:17-19) Tsy nivalike tamy i Joda sady nanohagne avao ze mpanjaka nitendre i Jehovah o Benjaminitao ndra tie nivalike aza ty foko ila’e. (1 Mpanj. 11:31, 32; 12:19, 21) Lonike ka tikagne mba hanohagne avao ze nitendre i Jehovah hitarike o vahoa’eo tie amy izao.​—1 Tes. 5:12.

19. Ino ty lesogne azontika ianaragne boake amy i faminaniagne nirehafe i Jakoba taloha ty nimateza’ey?

¹⁹ Mahasoa antika i faminaniagne nirehafe i Jakoba taloha ty nimateza’ey. Ty fandinehantika ty fahatanteraha i faminaniagne rey, le vao mainke mahavy antika hatoky ty faminaniagne agnate ty Saontsy i Jehovah ao. Ty tso-drano nimea i Jakoba i ana-dahi’e rey ka, le magnampe antika hahafantatse soa ty raha azontika atao mba hampifaleagne i Jehovah.