Ekeo tie Tea Azo ty Jehovah

1. Nagnino rehe ro nanokan-tegna hoahy i Jehovah? (Henteo ka i sarey.)

TADIDI’O vao tamy irehe nanokan-tegna hoahy i Jehovah-y? Nanapa-kevetse hanao izay rehe, satria nanjare nifanta’o naho nitea’o reke. Nampitamà aze ka rehe tie, ty zoton’arofo’e ty hatao’o voalohan-draha amy ty fiaigna’o, sady lava ho tea’o amy ty fo’o, ty vata’o, ty sai’o vaho ty heri’o iaby reke. (Mar. 12:30) Nanomboke tamy izay, le vao mainke nitombo avao ty hatea’o aze. Faie akore naho misy ndaty magnontane azo tie: “Tena tea’o vata’e vao ty Jehovah?” Azo antoke fa tsy hisalasala rehe ty hamale tie: “Tsy misy atakaloko aze.”

2-3. Ino ty tea i Jehovah hekentikagne, le ino ty hodinehentikagne amy ty lahatsoratse toy? (Jeremia 31:3)

² Faie akore naho misy ndaty magnontane azo tie: “Matoky vao rehe fa tena tea azo ty Jehovah?” Misalasala ty hamale izay vao rehe, satria va’e mieretseretse tie tsy fagneva ty hatea i Jehovah? Tsy nahatsapa ze o hatea zao ty rahavave raike tamy tie ireke mbe nikede. Hoe reke: “Fantako fa teako ty Jehovah. Tena tsy misalasala amy izay raho. Faie mateteke raho ro misalasala naho toe tea ahy reke.” Faie tena tea azo vata’e vao ty Jehovah?

³ Tea i Jehovah ho rese lahatse rehe tie, tea azo reke. (Vakio ty Jeremia 31:3.) Nitaone’e hagnatogne aze rehe. Naho fa irehe nanokan-tegna ho aze naho natao badisa, le nahazo raha tena sarobily. Tsy inogne zay fa ty hatea’e naho ty tsy fivaliha’e. Hatea laleke sady tsy misy fiafara’e o hatea iohoe. Izay ty mahavy aze mihevetse o mpanompo’eo ho “fanagna’e sarobily”, agnisa izay rehe. (Mal. 3:17, f.a.p.) Tea i Jehovah naho rese lahatse manahake i Paoly rehe tie, tea azo Reke. Nanoratse hoe izao areke ty Paoly: ‘Matoky raho, fa ndra fate, ndra fiaignagne, ndra anjely, ndra fanjakagne, ndra raha amy izao, ndra raha amy ty hoavy, ndra hery, ndra ty ambone, ndra ty ambane, ndra raha finorogne hafa, le tsy hahavita hampisarake antika amy ty hatean’Agnahare.’ (Rom. 8:38, 39) Hodinehentika tie, nagnino tika ro mila rese lahatse tie tea antika ty Jehovah, le ino ty hagnampe antikagne amy izay.

NAGNINO TIKAGNE RO MILA MAGNEKE TIE TEA ANTIKA TY JEHOVAH?

4. Akore ty hahavitantikagne manohetse ty fitake atao i Satana?

⁴ Naho magneke tika tie, tea antikagne ty Jehovah, le hahatohetse ty “fitake atao” i Satana. (Efes. 6:11) Hatao’e ty hahavy antika tsy hanompo i Jehovah. Agnisa ty fitake atao’e ty fagnaparitahagne ty vande tihoe, tsy tea antika ty Jehovah. Ko haligno fa mpagnararaotse ty Satana. Amy itika malemey reke ro manafike antikagne. Ohatse naho fa itikagne kivy noho ty raha niaignantika taloha, ty raha sarotse amy izao ndra ty raha va’e hiseho amy ty hoavy. (Ohab. 24:10) Manahake ty liona mipay fomba hahazoagne ze biby mora tsepahegne ty Satana. Magnararaotse antika reke amy itikagne kivỳ, amy izay tika tsy manompo i Jehovah sasa. Naho mikezake ho rese lahatse tika tie, tea antika ty Jehovah, le ho vitantika ty “hanohetse” i Satana, ty fitake atao’e vaho ty hafetsea’e.​—1 Pet. 5:8, 9; Jak. 4:7.

5. Nagnino tika ro mila mahatsapa tie tea antikagne ty Jehovah sady sarobily ama’e tikagne?

⁵ Hiragnetse amy i Jehovah tika naho magneke tie, tea antika reke. Ino ty anto’e? Niforogne’e haneho hatea naho hoteagne tika. Naho fa tea antika ty ndaty raike, le rare’e naho tea aze ka tikagne. Arakarake ty ahatsapantika tie teà i Jehovah naho sarobily ama’e tika, ty vao mainke hahavy antikagne ho tea aze ka. (1 Jaona 4:19) Naho fa mitombo ty hateantika aze, le vao mainke ho teà’e ka tikagne. Hoe areke ty Baiboly tie: “Magnarinea an’Agnahare, le hagnarine anareo reke.” (Jak. 4:8) Akore ty hahavy antika ho rese lahatse tie, tea antikagne ty Jehovah?

INO TY HAGNAMPE ANTIKA HAGNEKE TIE TEA ANTIKAGNE TY JEHOVAH?

6. Naho tsy magneke tikagne tie tea antikagne ty Jehovah, le ino ty azontikagne atao?

⁶ Manoa vavake voafaritse soa, le mahareta amy ty vavake. (Lioka 18:1; Rom. 12:12) Mivavaha mateteke amy i Jehovah naho ilaegne, mba hahafantara’o ty fivazohoa’e azo. Va’e ho sarotse ama’o ty hagneke ty hatea i Jehovah azo naho mahatsapa tegna ho tsy misy dika’e rehe. Faie ko haligno fa lahibey noho ty fo’o reke. (1 Jaona 3:19, 20) Mahafantatse azo soa mandikoatse ty tegna’o reke, sady mahavazoho ty raha tsy trea’o. (1 Sam. 16:7; 2 Tan. 6:30) ‘Aboraho’ ama’e areke ty raha tsapa’o, le angataho reke hagnampe azo hagneke ty hatea’e azo. (Sal. 62:8) Manoa raha mifagnarake amy i vavake natao’oy, le ampiharo retoagne.

7-8. Akore ty natao i mpanao Salamoy mba hagnomeagne toky antikagne tie tena tea antikagne ty Jehovah?

⁷ Atokiso ty raha saontsie i Jehovah. Matoky ty raha nisorate o mpanoratse Baiboly nitarihe ty fagnahi’e masigneo miomba aze tika. Mareho ty fomba nirehafa i Davida mpanao salamo i Jehovah: “Marine ze torotoro fo ty Jehovah sady magnavotse ze mamoe fo.” (Sal. 34:18, f.a.p.) Naho fa kivy rehe, le va’e hahatsiaro ho irerike. Faie nampitamà ty Jehovah tie, marine azo eo reke tie amy izay satria oni’e tie mipay aze rehe. Hoe ka ty Davida amy ty salamo hafa: “Avorio agnate sini’o ao ty ranomasoko.” (Sal. 56:8) Vazoho i Jehovah rehe naho fa misy raha mampijale azo. Mitretré azo reke sady mahatsapa ty raha mahazo azo. Avori’e i ranomaso’o rey sady sarobily ama’e. Manahake ty rano agnate ty siny, sarobily amy ty mpanao lia lavitse zay. Hoe ka ty Salamo 139:3: “Hai’o [Jehovah] soa ty lalako iaby.” Mahavazoho ze kila raha atao’o ty Jehovah, faie ty raha soa ty ifantoha’e. (Heb. 6:10) Ino ty anto’e? Satria sarobily ama’e ze kezake atao’o mba hampifaleagne aze.a

⁸ Mampionogne azo amy ty alala ty Saontsi’e ty Jehovah, le hoe misaontsy ama’o tie: “Teako ho fanta’o tie, tena tea naho mitretré azo raho.” Faie nitreantikagne taloha teo, fa mampiparitake vande ty Satana tie, tsy tea antikagne ty Jehovah. Naho fa misy fotoagne rehe misalasala ty hatea i Jehovah azo, le mitofà hey sady dineho zao: ‘Ia ty inoako, i “Rae ty vandey” vao sa i “Andrianagnahare ty hamaregnagney”?’​—Jaona 8:44; Sal. 31:5.

9. Ino ty toky mea i Jehovah ze ndaty tea aze? (Eksodosy 20:5, 6)

⁹ Saintsaigno ty tsapa i Jehovah miomba ze ndaty tea aze. Mareho ty raha nisaontsie i Jehovah tamy i Mosesy naho o Israelitao. (Vakio ty Eksodosy 20:5, 6.) Nampitamà reke tie ho tea naho tsy hivalike amy ze tea aze. Magnomey toky antika zay tie, tsy halaigne ty mpanompo’e tea aze i Andrianagnaharentika tsy mivalikey. (Neh. 1:5) Naho fa misalasala ty hatea i Jehovah azo rehe, le mitofà hey sady dineho zao: ‘Teako vao ty Jehovah?’ Afara izay, le eretsereto toy: Naho tea aze rehe sady mikezake mampifale aze, le matokia fa tea azo reke. (Dan. 9:4; 1 Kor. 8:3) Nagnino rehe ro mbe misalasala ty hatea i Jehovah azo, ie amy izao reke tena tea’o? Afake matoky areke rehe tie, tea azo sady tsy mivalike ama’o reke.

10-11. Akore ty tea i Jehovah hihevera’o i solovoigney? (Galatianina 2:20)

¹⁰ Saintsaigno i solovoigney. Fagnomezagne lahibey nimea i Jehovah o ndatio i solovoigne nanoe i Jesosy Kristỳ. (Jaona 3:16) Natao ho azo manokagne vao o fagnomezagne iohoe? Ie! Dineho ty raha niseho tamy i apostoly Paoly. Nanao fahotagne lahibey maro reke, taloha ty naha Kristiana aze sady mbe nialy tamy ty fahaleme’e. (Rom. 7:24, 25; 1 Tim. 1:12-14) Faie nihevere’e ho fagnomezagne nimea i Jehovah aze i solovoigney. (Vakio ty Galatianina 2:20.) Ko haligno fa nampanorate i Jehovah i Paoly amy Baiboly ao o rehake iohoe, le ze kila raha ao natao hampianaragne antika ka. (Rom. 15:4) Trea boake amy ty raha nirehafe i Paoly tie, tea i Jehovah hihevetse i solovoigney ho fagnomezagne nimea’e azo rehe. Naho mihevetse i solovoigney hoe izay rehe, le ho rese lahatse tie, tea azo ty Jehovah.

¹¹ Misaotse i Jehovah tika, noho ireke nandefa i Jesosy tan-tane etoy mba ho mate ho antika. Faie niavy etoy ka reke mba hirehake ty maregne miomba an’Agnahare. (Jaona 18:37) Agnisa ze hamaregnagne zay ty tsapa i Jehovah miomba o ana’eo.

AKORE TY AGNAMPEA I JESOSY ANTIKAGNE HO RESE LAHATSE TIE TEA ANTIKA TY JEHOVAH?

12. Nagnino tika ro afake matoky ty raha nirehafe i Jesosy miomba i Jehovah?

¹² Naseho i Jesosy tamy ireke tan-tane etoỳ tie, manao akore ty Jehovah. (Lioka 10:22) Maro ty anto’e atokisantika ty raha nirehafe i Jesosy miomba i Jehovah. Fa niara-niaigne amy i Jehovah tagnate ty taogne maro ka reke, taloha ty niavia’e an-tane etoy. (Kol. 1:15) Nitsapa i Jesosy tamy ty raha niaigna’e naho nitrea’e, fa tea i Jehovah vata’e o ana-dahi’e naho o anak’ampela’e tsy mivalikeo. Akore ty nagnampea i Jesosy o ndatio mba hatoky ty hatea i Jehovah iareo?

13. Ino ty tea i Jesosy ho fantantikagne miomba i Jehovah?

¹³ Tea i Jesosy hohaintika ty hatea i Jehovah antika. In-160 mahery ty Jesosy ro nitoka i Jehovah tihoe “Rae” amy i Filazantsaray ao. Naho fa nirehake tamo o mpanonjohy ty lia’eo reke, le nampiasa ty rehake tihoe “Rae’areo” ndra i “Rae’areo an-dagnitse agney.” (Mat. 5:16; 6:26) Taloha ty niavia i Jesosy tan-tane etoy, le ‘Fara’e Mahery’, ‘Fara’e Ambone’, ‘Mpamorogne Lahibey’ ty nitokava o mpanompo’e tsy mivalikeo i Jehovah. Faie mateteke ty Jesosy ro nitoka aze tihoe ‘Raentika.’ Trea boake amy io tie, tea i Jehovah hahatsapa ho marine aze, manahake ty anake mifandrambe amy ty rae bey hatea tika. Andao handineke ohatse roe nampiasà i Jesosy ty rehake tihoe “Rae.”

14. Akore ty nanoroa i Jesosy tie sarobily agnatreha i Raentikagne an-dagnitse agney tikagne tsikiraidraike? (Matio 10:29-31) (Henteo ka i sarey.)

¹⁴ Voaloha’e, andao hagnente ty raha nirehafe i Jesosy amy Matio 10:29-31 ao. (Vakio.) O folio le vorogne kedekede tsy ombia ho tea ndra hanompo i Jehovah. Faie ndra ty raike amy iareo aza poke an-tane eo, le tena sarobily amy i Raentikay. Sarobily ama’e sady tea’e mandikoatse irey, ze manompo aze aman-katea. Nirehake ka ty Jesosy tie, ony i Raentikagney ndra “ty isa ty volon-dohantikagne tsikiraidraike” aza. Kanao ty Jehovah mahaonigne ty raha kedekede amantika, le tena afake matoky tika tie, mahaonigne antikagne soa reke. Tea i Jesosy hagneke areke tika tsikiraidraike tie, sarobily amy i Raentika an-dagnitse agney.

15. Mampibaribary ino miomba i Rae’o an-dagnitse agney i reha i Jesosy amy Jaona 6:44 aoy?

¹⁵ Mareho amy ty ohatse faharoe toy, ty nampiasae i Jesosy ty rehake tihoe “Rae.” (Vakio ty Jaona 6:44.) Nitaogne azo mba hagnatogne ty hamaregnagne i Rae’o an-dagnitse agney. Ino ty anto’e? Satria nioni’e fa managne toe-po soa rehe. (Asa. 13:48) Va’e nagneregne i saontsy i Jehovah amy i Jeremia 31:3 aoy ty Jesosy, naho fa nirehake ty Jaona 6:44. Hoe ty Jehovah tamo o vahoa’eo: “Nitaogne azo hagnatogne ahy raho satria tea azo naho tsy mivalike ama’o.” (Jer. 31:3; ampitahao amy ty Hosea 11:4.) Eretsereto zay. Lava mahavazoho ze raha soa ama’o ao avao i Raentika bey hatea an-dagnitse agney ndra tie tsy trea’o aza zay.

16. a) Ino ty raha nirehafe i Jesosy amantika, le nagnino tika ro toko’e hatoky izay? b) Akore ty hahavy azo ho tena rese lahatse tie i Jehovah i Rae tena ilae’oy? (Henteo ty efajoro tihoe “I Rae Tena Ilaentikagne Iabỳ.”)

¹⁶ Naho fa nirehake ty Jesosy tie Raentika ty Jehovah, le hoe te hirehake reke tie: “Tsy Raeko raike avao ty Jehovah fa Rae’areo ka. Matokisa areke fa tea anareo reke sady mahafantatse anareo tsikiraidraike.” Naho fa misalasala miomba ty hatea i Jehovah azo rehe, le mitofà hey sady dineho zao: ‘Tsy toko’e hatoky ty raha rehafe i Anakey vao raho, ie amy izao ireke ty mahafantatse soa i Raentikagney sady lava mirehake ty maregne avao?’​—1 Pet. 2:22.

MIKEZAHA HO RESE LAHATSE

17. Nagnino tika ro tsy maintsy magnamafe ty fatokisantikagne tie, tea antika ty Jehovah?

¹⁷ Mila mikezake lognandro tika mba ho rese lahatse tie, tea antika ty Jehovah. Nianarantikagne teo fa manao ze azo’e atao ty Satana, i fahavalontikagne mpamitakey mba hahavy antika tsy hanompo i Jehovah. Amy itikagne malemey, le atao’e ty hahavy antika tsy ho rese lahatse tie, tea antikagne ty Andrianagnahare. Faie tsy engantikagne handrese ty Satana.​—Joba 27:5.

18. Ino ty azo’o atao mba hahavy azo vao mainke hatoky tie tea azo ty Jehovah?

¹⁸ Mba hahavy azo vao mainke hatoky tie tea azo ty Jehovah, le mivavaha ama’e tsy tapake mba hampea’e hahatsapa izay. Saintsaigno ty fomba nirehafa i mpanoratse Baiboly rey ty hatea’e. Tadidio fa lava ho tea ze ndaty tea aze avao reke. Eretsereto tie nagnino rehe ro afake mihevetse i solovoigney ho fagnomezagne ho azo manokagne. Atokiso i reha i Jesosy tihoey tie, i Jehovah i Rae’o an-dagnitse agney. Le naho fa misy ndaty magnontane azo tie: “Matoky vao rehe fa tena tea azo ty Jehovah?” Le tsy hisalasala rehe ty hamale tie: “Ie, tea ahy reke, le manao ze azoko atao raho isan’andro mba hanoroako tie tena teako reke!”