Maharetse Nainai’e ty Hatean’Agnahare

1-2. Ino ty raha sarotse atrehe ty ankamaroa o Kristianao?

ERETSERETO tie misy sambo raike ty agnivon-driake ey. Mitioke bey i androy, le aviombio i onjay i samboy. Hindese i onjay amy ze indesa’e aze agne o sambo iohoe naho tsy mandatsake vatofantsike ty ndaty agnate’e ao. I vatofantsikey ty mahavy i samboy tsy hihetseke naho tsy haviombio i tiokey.

² Va’e hahatsapa hoe manahake i samboy rehe naho fa miatreke olagne lahibey. Va’e hikorontagne ambone ambane ty fihetseham-po tsapa’o. Androany rehe matoky tie, tea naho manohagne azo ty Jehovah. Ie maray igne rehe misalasala naho toe mahavazoho ty raha mahazo azo reke. (Sal. 10:1; 13:1) Va’e nirehake raha mampahery ty nama’o raike, le mahatsiaro maivankivagne hey rehe agnate ty fotoagne fohe. (Ohab. 17:17; 25:11) Faie misalasala indraike rehe afara izay. Va’e hieretseretse aza rehe tie, tsy sarobily amy i Jehovah rehe. Akore ty handatsaha’o i vatofantsike agn’ohatsey naho fa irehe miatreke raha hoe izay? Naho atao amy ty rehake hafa le izao, akore ty hahavy azo hatoky naho hatoky lognandro avao ty hatea i Jehovah naho ty fanohagna’e?

3. Ino ty dika i tihoe “bey hatea naho tsy mivalike” rehafegne amy ty Salamo 31:7 naho ty 136:1 aoy, le nagnino tika ro afake mirehake tie i Jehovah ty tena ohatse fanjaka amy izay? (Henteo ka i sarey.)

³ Agnisa ty raha hagnampe azo tsy hiezegnezegne naho fa miatreke raha sarotse ty fitadidia’o tie, bey hatea naho tsy mivalike ty Jehovah. (Vakio ty Salamo 31:7; 136:1.) Tihoe “hatea naho tsy fivalihagne”, le azo irehafagne hatea laleke naho maharetse aseho ty ndaty raike amy ty ndaty hafa. Ohatse tena fanjaka amy izay ty Jehovah. Izay ty mahavy ty Baiboly mirehake tie, “tena bey hatea naho tsy mivalike reke.” (Eks. 34:6, 7) Mirehake hoe izao miomba aze ka ty Baiboly: “Bey hatea naho tsy mivalike amy ze mikanjy ty tahina’o rehe.” (Sal. 86:5) Ino ty dika izay? Tsy ombia hienga ty mpanompo’e tsy mivalike ty Jehovah! Afake ty ho vatofantsike ho azo, ty fitadidia’o tie tsy mivalike reke naho fa irehe miatreke raha sarotse.​—Sal. 23:4.

HEVERO HO AGNISA TY FAMPIANARAGNE FOTOTSE AMY BAIBOLY AO TIHOE BEY HATEA TY JEHOVAH

4. Mirehafa fampianaragne fototse amy Baiboly, le hazavao tie nagnino tika ro tena mino irey.

⁴ Agnisa ty vatofantsike hagnampe antika naho fa miatreke raha sarotse ty fitadidiagne tie, agnisa ty fampianaragne fototse tihoe bey hatea ty Jehovah. Ino ty avy an-tsai’o ao naho fa maharey tihoe “fampianaragne fototse amy Baiboly ao”? Va’e hieretseretse ty hamaregnagne fototse nianara’o boake amy ty Saontsin’Agnahare ao rehe. Nianara’o ohatse tie, i Jehovah ty tahinan’Agnahare, Ana-dahi’e bakotokagne ty Jesosy, tsy misy raha rendre’e o mateo, ho paradisa ty tane toy le hiaigne nainai’e ao o ndatio. (Sal. 83:18; Mpito. 9:5; Jaona 3:16; Apok. 21:3, 4) Naho vata’e vaho nagneke ireo rehe, le sarotse amo o ndatio ty hampisalasala azo. Ino ty anto’e? Satria nanjare fanta’o fa mifototse amy ty hamaregnagne o fampianaragne rehoe. Agnisa ty fampianaragne fototse amy Baiboly ao ka tihoe bey hatea ty Jehovah. Nagnino ty fitadidiagne izay ro afake magnampe azo tsy hieretseretse tie, tsy midare ndra tsy mivazoho ty raha mahazo azo reke?

5. Hazavao tie akore ty fomba nahavità ty ndaty raike manohetse fampianaran-diso.

⁵ Tamy tie irehe nanomboke nianatse Baiboly, ino ty nagnampe azo handietse fampianaran-diso? Va’e nampitaha ty raha nampianare ty fivavaha’o amy ty raha ampianare ty Baiboly rehe. Andao hatao tihoe, nino rehe tie i Jesosy i Andrianagnahare Fara’e Amboney. Naho fa nianatse Baiboly rehe, le nieretseretse tie: ‘Tena maregne vao ze fampianaragne zay?’ Naho fa boake nandineke porofo amy Soratse Masigne ao rehe, le afake mirehake tie tsy maregne zay. Nisoloa’o ty hamaregnagne amy ty Soratse Masigne ao toy i fampianaran-disoy tafara izay, le tihoe: I Jesosy, i ‘voaloha’e amy ze kila raha niforognegney,’ sady “i Anan’Agnahare bakotokagney.” (Kol. 1:15; Jaona 3:18) Mazava ho aze fa “mafe fototse” i fampianaran-diso rey sady sarotse ty magnafake aze. (2 Kor. 10:4, 5) Faie vata’e vaho nianatse ty hamaregnagne rehe, le tsy te hiheregne amy irey sasa.​—Fil. 3:13.

6. Nagnino rehe ro rese lahatse tie “bey hatea naho tsy mivalike nainai’e” ty Jehovah?

⁶ Mila manao hoe izay ka rehe amy ze ampianare ty Baiboly miomba ty hatea i Jehovah. Naho manomboke misalasala miomba ty hatea i Jehovah rehe, amy irehe miatreke raha sarotsey, le eretsereto zao: ‘Maregne vao ze eretsereko zay?’ Ampitahao amy ty Salamo 136:1, i andinin-teny fototse amy ty lahatsoratse toỳ, i raha mampisalasala azoy. Nagnino ty Jehovah ro misaontsy tie “bey hatea naho tsy mivalike” reke? Nagnino ty rehake tihoe “bey hatea naho tsy mivalike nainai’e” ro miheregne in-26 amo o salamo iohoe ao? Nitreantika teo fa tihoe bey hatea naho tsy mivalike ty Jehovah, le agnisa ty fampianaragne fototse amy Baiboly ao, manahake i fampianaragne fototse hafa fa nekentika rey. Agnisa ty fampianaran-diso tihoe mihevetse azo ho tsy misy dika’e ndra tsy tea azo ty Jehovah. Liero manahake ty nandiera’o i fampianaran-diso hafa rey zay!

7. Magnomeza ohatse amy Baiboly ao magnomey toky tie bey hatea ty Jehovah.

⁷ Maro ty fagnomezan-toky miomba ty hatea i Jehovah amy Baiboly ao. Nirehake tamo o mpanonjohy ty lia’eo ohatse ty Jesosy tie: “Sarobily ambone o folio iaby nareo.” (Mat. 10:31) Nisaontsy tamo o vahoa’eo ka ty Jehovah tie: “Hagnatanjake azo raho sady hagnampe azo. Hitagne mafe azo amy ty tagnako havana raho, le i tagnako manao ty rare’ey.” (Isaia 41:10) Mareho moa zay! Tsy nirehake ty Jesosy tie ‘Va’e tena ho sarobily nareo,’ sady tsy nisaontsy ty Jehovah tie ‘Va’e hagnampe azo raho.’ Izao ty nisaontsie iareo: ‘Tena sarobily nareo’ sady ‘Hagnampe azo raho.’ Tsy tihoe hagnampe azo ho tony avao o andine’e reo naho misalasala miomba ty hatea i Jehovah rehe naho fa miatreke olagne, fa tena hagnampe azo ka ho rese lahatse tie tena tea azo reke. Mifototse amy ty hamaregnagne reo. Naho mivavake miomba i olagne mahazo azoy rehe sady misaintsaigne ireo, le ho afake hirehake i rehake amy 1 Jaona 4:16 ao tihoey tie: “Nanjare fantantika tie tea antika ty Andrianagnahare, le mino izay tika.”a

8. Ino ty azo’o atao naho misalasala rehe kindraike tie tea azo vao ty Jehovah?

⁸ Ino ty azo’o atao naho mbe misalasala avao rehe kindraike tie tea azo vao ty Jehovah? Ampitahao amy ty raha fanta’o ty raha tsapa’o. Miovaova ty raha tsapantika fa ty hatea i Jehovah nampianare’e agnate ty Soratse Masigne ao maregne soa. Tsy midare i toetse i Jehovah lahibeỳ, le ty hatea tika naho tsy mino tie tea antika reke.​—1 Jaona 4:8.

SAINTSAIGNO TY ‘HATEA I JEHOVAH AZO’

9-10. Ino ty rehake magnodidigne amy i reha i Jesosy tihoe “tena tea i Rae nareo” amy Jaona 16:26, 27 aoy? (Henteo ka i sarey.)

⁹ Tena hahafantatse miomba ty hatea i Jehovah rehe, naho mandineke ty raha nirehafe i Jesosy tamo o mpanonjohy ty lia’eo toy: “Tena tea i Rae nareo.” (Vakio ty Jaona 16:26, 27.) Tsy ty hahavy o mpiana’eo ho fale avao ty nahavy i Jesosy nirehake io. Naho ty maregne, le tsy nirehake ty raha tsapa i mpiana’e rey reke amy ty rehake magnodidigne amo o andine’e iohoe, fa nirehake raha hafa, le ty vavake.

¹⁰ Nirehake tamy i mpiana’e rey ty Jesosy tie toko’e hivavake amy ty alala’e iareo fa tsy tihoe hivavake ama’e. (Jaona 16:23, 24) Tena lahibey ty hahafantara iareo izay. Tafara ty nitsangana i Jesosy tamy ty mate, le va’e nite hivavake ama’e i mpiana’e rey. Nanjare nihay iareo soa tie nama iareo ty Jesosy. Va’e ho nieretseretse areke iareo tie, noho i Jesosy tea iareo, le hitsanogne ty fangataha iareo reke sady hangatake amy i Rae mba hagnampe iareo. Faie nirehafe i Jesosy tie tsy toko’e hieretseretse izay iareo. Ino ty anto’e? Satria hoe reke tamy iareo: “Tena tea i Rae nareo.” Agnisa ty fampianaragne fototse miomba ty vavake amy Baiboly ao zay. Dineho tie nagnino zay ro mahakasike azo: Naho fa nianatse Baiboly rehe, le nanjare nahafantatse naho nitea i Jesosy. (Jaona 14:21) Faie manahake i mpianatse tamy ty taonjato voaloha’e rey, le afake mivavake aman’Agnahare am-pahatokiagne rehe satria mahafantatse tie ‘tena tea azo reke.’ Naho mivavake mateteke amy i Jehovah rehe, le atoro’o tie mino ze rehake zay rehe.​—1 Jaona 5:14.

FANTARO TIE BOAKE AIA O FISALASALAGNEO

11. Nagnino ty Satana ro fale naho nisalasala miomba ty hatea i Jehovah tikagne?

¹¹ Ino ty mahavy antika hisalasala miomba ty hatea i Jehovah antika? Va’e hirehake rehe tie i Satana ty mahavy izay sady tena maregne zay. Mipay antika ty Devoly mba ‘havorembore’e’, le fale reke naho fa itika misalasala miomba ty hatea i Jehovah. (1 Pet. 5:8) Naho ty maregne, le noho ty hatea i Jehovah ro nahavy aze nagnomey i solovoigney, ie amy izao teà i Satana tika naho mahatsapa ho tsy fagneva izay. (Heb. 2:9) Ia areke ty fale naho fa itika misalasala miomba ty hatea i Jehovah? Mazava hoaze fa i Satana. Ia ka ty fale naho fa itika kivy, le tsy manompo i Jehovah sasa? Mbe i Satana avao. Tea’e tika naho mieretseretse tie tsy tea antika ty Jehovah, ie amy izao tsy maregne zay. Ireke ty tena heje i Jehovah. Faie mikezake mafe reke mba hahavy antika hahatsapa tie tsy tea antika ty Jehovah sady magnameloke antika. Agnisa ty “fitake ampiasae’e” zay. (Efes. 6:11) Vao mainke ho tapa-kevetse ty ‘hanohetse i Devoly,’ i fahavalontikagney tikagne, naho fantantika ty raha atao’e.​—Jak. 4:7.

12-13. Nagnino i ota nilovaentikay ro va’e hahavy antika hisalasala miomba ty hatea i Jehovah?

¹² Misy raha hafa ka va’e hahavy antika hisalasala miomba ty hatea i Jehovah. Tsy inogne zay fa i ota nilovaentikagney. (Sal. 51:5; Rom. 5:12) Nampisarake antika amy i Mpamorogney ty ota. Misy voka’e raty amy ty saintika, ty fontika vaho ty vatantika ka io.

¹³ Mahavy ty fihetseham-pontika hikorontagne, mahavy antika hahatsiaro ho meloke, hinekoneko, hahatsiaro ho tsy voaro naho ho megnatse ty ota. Va’e hahatsapa ireo tika naho fa misy fahotagne nataontika. Faie mete hahatsapa hoe ireo avao ka tika noho itika mahay tie mpanota tikagne, ie amy izao tsy hoe izay ty fomba namorogna i Jehovah antika. (Rom. 8:20, 21) Naho fa kefoke ty piné ty tobile raike, le tsy mandeha soa arake ty namboaragne aze i tobiley. Tsy voririke ka tika, le tsy mifagnarake amy ty fomba namorognagne antika. Tsy mahalatsa areke naho misy fotoagne tika misalasala miomba ty hatea i Jehovah. Naho fa miseho zay, le toko’e hotadidientika tie, i Jehovah, i “Andrianagnahare miambake naho fagneva ty hatahoragney ... le tea vaho tsy mivalike amy ze tea naho mankatò ty lili’e.”​—Neh. 1:5.

14. Nagnino ty fisaintsaignagne i solovoigney ro mahavy antika ho rese lahatse tie, tsy ombia tsy ho tea antika ty Jehovah? (Romana 5:8) (Henteo ka ty efajoro tihoe “Mitaoa fa ‘Mahavita Mamitake ty Ota.’”)

¹⁴ Misy fotoagne tika va’e hahatsiaro ho tsy fagneva ty hatea i Jehovah. Naho ty maregne, le tena tsy fagneva o hatea iohoe tika. Izay ty mahavy ty hatea’e hiambake. Tsy tihoe fagneva ty hatea i Jehovah tika noho ty raha nivitantikagne. Faie i solovoigney ty mandrongogne ty fahotantikagne, le nanao o fandaharagne iohoe ty Jehovah noho ty hatea’e antika. (1 Jaona 4:10) Ko haligno ka fa niavy mba hagnavotse ty mpanota ty Jesosy, fa tsy ty ndaty voririke. (Vakio ty Romana 5:8.) Tsy misy amantika afake hanao raha voririke sady tsy mitamà izay amantika ty Jehovah. Naho fa takantika tie, noho itika tsy voririke ty mahavy antika hisalasala miomba ty hatea i Jehovah, le vao mainke tika tapa-kevetse ty tsy hagnenga izay hiseho.​—Rom. 7:24, 25.

MIFILIANA TY TSY HIVALIKE LOGNANDRO

15-16. Naho tsy mivalike amy i Jehovah tika, le ino ty azontika atokisagne sady ino ty anto’e? (2 Samoela 22:26)

¹⁵ Teà i Jehovah tika naho mifily ty ‘hipiteke ama’e.’ (Deot. 30:19, 20) Naho manao izay tika, le hatoky tie tsy ombia hivalike amantika reke. (Vakio ty 2 Samoela 22:26.) Afake matoky tika tie, lava hagnampe antika avao ty Jehovah amy ze kila raha atrehentika amy ty fiaignagne arakarake ty tsy ivalihantika ama’e.

¹⁶ Nirehafentika tato tie, misy anto’e maro ahafahantika mandatsake i vatofantsikey naho fa itika miatreke raha sarotse. Fantantika tie tea sady hanohagne antika ty Jehovah. Izay ty ampianare ty Baiboly. Isake tie misalasala miomba ty hatea i Jehovah tika, le toko’e hitadidy tie, ty raha fantantika ro tena maregne fa tsy ty raha tsapantikagne. Lonike areke tika mba hatoky ty hamaregnagne fototse amy Baiboly ao tihoe, bey hatea naho tsy mivalike nainai’e ty Jehovah.