Akore ty Handreseantikagne o Fagnirian-dratio?

1. Inogne ty raha mpahazo o ndaty tsy voririkeo iaby?

FA NISY fotoagne vao rehe nagniry mafe hanao ty raha tsy mampifale i Jehovah? Naho izay, le ko mieretseretse tie ty raha atrehe’o ty tena mafe naho ampitahaegne amy ty ahy ty hafa. Hoe ty Baiboly: “Tsy misy tsapa hevetse mahazo anareo naho tsy ty fa mpahazo o ndatio.” (1 Kor. 10:13) Midika zay tie ndra inogn’ino fagnirian-draty atrehe’o, le miatreke izay ka ty hafa. Tsy irerike rehe sady afake ty handrese noho ty fagnampea i Jehovah.

2. Ino ty tsapa hevetse va’e hahazo ty Kristiana ila’e naho o mpianatse Baibolio? (Henteo ka i sare rey.)

² Hoe ka ty Baiboly: “Tsapaegne ty tsikiraidraike naho fa voatary ty fagniria’e, le magneke ho rese izay.” (Jak. 1:14) Va’e tsy hitovy amy ty ahy ty hafa ty raha hahavoatarike ty ndaty raike. Ty Kristiana ila’e zao va’e ho azo ty tsapa hevetse haloto findesam-batagne, le te hila ampela naho lahilahy reke ndra te hila lahilahy naho ampela reke. Misy ty te hila lahilahy manahake aze ndra ampela manahake aze. Ze fa tsy magnente sare vetaveta ka, va’e te hiheregne amy izay indraike. Va’e mbe te hifoke rongony ndra te hinon-toake maro ze fa tsy manao izay. Agnisa ty fagniriagne tsiampeampe atrehe ty Kristiana ila’e naho o mpianatse Baibolio reo. Va’e hahatsapa ty nitsapa i apostoly Paoly toy tikagne: “Naho fa te hanao ty soa raho, le agnateko ao avao ka ty fagniriagne hanao ty raty.”​—Rom. 7:21.

3. Ino ty voka’e naho mateteke mialy amy ty fagnirian-draty ty ndaty raike?

³ Naho mateteke mialy amy ty fagnirian-draty tikagne, le va’e hahatsapa maleme, le hoe tsy ho vitantikagne zay ty handrese i tsapa hevetsey. Va’e hahatsapa rehe tie fa tsy avotse sasa satria hagnameloke azo ty Jehovah noho irehe managne fagnirian-draty. Matokia fa tsy misy maregne o raha tsapa’o rehoe! Ino ty anto’e? Hamale ty fagnonteneagne roe retoa tika amy ty lahatsoratse toy: 1) Boake aia ty fahatsapagne maleme naho tihoe tsy avotse sasa? 2) Akore ty handresea’o o fagnirian-dratio?

INO TY TEA “I RATỲ” HO TSAPANTIKAGNE?

4. a) Nagnino tika ro tea i Satana hahatsapa maleme? b) Nagnino tika ro afake mialy amo o tsapa hevetseo?

⁴ Tea i Satana hahatsapa maleme tika naho fa miatreke tsapa hevetse. Taka i Jesosy zay, le izay ty nahavy aze nandrisike o mpanonjohy ty lia’eo hivavake hoe izao: “Ko minday anay ho amy ty tsapa hevetse, fa afaho amy i ratỳ zahay.” (Mat. 6:13) Nirehake ty Satana tie tsy hankatò i Jehovah o ndatio naho fa miatreke tsapa hevetse. (Joba 2:4, 5) Nagnino reke ro nieretseretse izay? Satria nivoatary ty fagniria’e avao reke sady tsy nivognogne ty tsy hivalike amy i Jehovah. Mieretseretse ka reke tie hanahake aze tikagne, le hiala amy i Jehovah naho fa misy tsapa hevetse. Ndra i Ana-dahin’Agnahare voririkey aza, le nieretserete i Satana hanao hoe izay. (Mat. 4:8, 9) Faie dineho zao: Tena tsy managne hery hialiagne amo o fagnirian-dratio vao tika? Oho’o. Miombon-kevetse amy i apostoly Paoly tikagne. Hoe reke: “Managne hery hiatrehagne ze kila raha miseho raho satria misy magnomey hery ahy.”​—Fil. 4:13.

5. Akore ty hahafantarantika tie matoky ty Jehovah fa ho afake handrese o fagnirian-dratio tikagne?

⁵ Tsy mitovy amy i Satana ty Jehovah. Matoky reke fa hahatohetse fagnirian-draty tika. Afake mirehake izay tika satria fa nisaontsy mialoha ty Jehovah tie, hisy vahoake maro tsy mivalike hovotso-belogne amy i haoreagne lahibeỳ. Eretsereto moa zay. I Jehovah, i tsy mahay mandagnitsey ty nisaontsy tie ho maro fa tsy ho tsiampe avao ty hilitse amy i tontolo vaovaoy ao. Fa ‘nisasagne naho nifotsiegne tamy ty lio i Anak’agnondrỳ ty akanjo iareo’, le hevere’e ho malio iareo. (Apok. 7:9, 13, 14) Tsy mihevetse antika maleme areke ty Jehovah, le tihoe tsy ho afake hialy amo o fagnirian-dratio.

6-7. Nagnino tika ro tea i Satana hahatsapa ho tsy avotse sasa?

⁶ Tsy tihoe tea i Satana hahatsapa maleme avao tika. Teà’e ka tika naho mieretseretse tie tsy ho avotse sasa, satria hagnameloke antika ty Jehovah noho itika managne fagnirian-draty. Eretsereto indraike moa toy. I Satana ro tsy avotse sasa satria fa nitsarae i Jehovah tie, tsy fagneva ty hiaigne nainai’e reke. (Gen. 3:15; Apok. 20:10) Azo antoke fa teà i Satana hahatsapa izay ka tika, noho itika mitamà tie hahazo i fitahiagne niliere’ey. Mbe ho avotse areke tika. Magnomey toky ty Baiboly tie, te hagnampe antika ty Jehovah fa tsy hagnameloke antika. “Tsy tea’e hisy hozamagne o ndatio fa tea’e hibebake iaby.”​—2 Pet. 3:9.

⁷ Naho itika mahatsapa maleme ndra mieretseretse tie, tsy ho avotse amy ty aly ataontika amo o fagnirian-dratio, le i raha eretserete i Satanay ro eretseretentika. Hagnampe antika ho tapa-kevetse ty hanohetse aze ty fahatakaragne izay.​—1 Pet. 5:8, 9.

INO TY VA’E HO TSAPANTIKA NOHO ITIKA TSY VORIRIKE?

8. Ankoatse ty raha raty atao, inogne ka ty tafilitse amy tihoe ota? (Salamo 51:5) (Henteo ka tihoe “Fagnazavagne.”)

⁸ Ankoatse i Satana, le misy raha hafa va’e hahavy antika hahatsapa maleme ndra tsy ho avotse sasa amy itika mialy amy ty fagnirian-dratỳ. Inogne zay? I ota nilovaentika boake amy i rae aman-drenentika voaloha’e reỳ.a​—Joba 14:4; vakio ty Salamo 51:5.

9-10. a) Ino ty voka ty ota tamy i Adama naho i Eva? (Henteo ka i sarey.) b) Ino ty voka ty ota amantikagne?

⁹ Dineho ty voka ty ota tamy i Adama naho i Eva. Naho fa tsy nankatò i Jehovah iareo, le nietake sady nikezake nanarogne ty vata iareo. Izao ty hazavae ty boke Fandalinana ny Soratra Masina miomba izay: “Naho fa nanota iareo, le nagnamelon-tegna, ninekoneko, natahotse vaho nimegnatse.” Hoe raha nahily agnate ty tragno raike nisy o efetse efatse rehoe ty Adama naho i Eva. Afake nifindrafindra amy ty tsikiraidraike amo o efetse rehoe iareo fa tsy afake niboake i tragnoy. Tsy afake nilay ty ota iareo.

¹⁰ Tsy mitovy tanterake amy ty ahy i Adama naho i Eva ty raha iaignantikagne. Tsy mandrambe soa boake amy i solovoigney iareo. Faie noho i solovoigney, le azo afahagne amy ty ota sady afake ty hanagne feo ty fieretseretagne malio tika. (1 Kor. 6:11) Faie ndra tie izay aza, le mbe nandova ota avao tika. Tsy mahagaga areke naho mbe magnamelon-tegna, minekoneko, matahotse vaho megnatse tika. Ndra ty Baiboly aza mirehake tie misy heri’e amo o ndatio ty ota. Hoe izay avao ka ndra ty ndaty “tsy nanao i fahotagne natao i Adamay aza.” (Rom. 5:14) Va’e hahakivy ze raha zay faie tsy toko’e hahavy antika hahatsapa maleme ndra tsy ho avotse sasa. Afake mandrese ze raha raty tsapantikagne zay tikagne. Amy ty fomba akore?

11. Akore ty toko’e hataontika naho fa mahatsapa maleme, le ino ty anto’e? (Romana 6:12)

¹¹ Naho fa itika mahatsapa maleme, le va’e hieretseretse tie tsy hahavita handrese fagnirian-draty. Faie azontika heveregne ho “mirehake” i fahotagney tie amy izay, le tsy toko’e hotsanognantika. Ino ty anto’e? Satria ampianare ty Baiboly tie, tsy toko’e hengantika “hanjaka” amantika ao ty ota. (Vakio ty Romana 6:12.) Afake mifily ty tsy hagnatanterake fagnirian-draty areke tika. (Gal. 5:16) Matoky ty Jehovah tie hahavita handrese tsapa hevetse tika, fa naho tsy izay, le tsy nitake ty hanoantika izay reke. (Deot. 30:11-14; Rom. 6:6; 1 Tes. 4:3) Mazava areke fa tsy tihoe maleme tikagne, le tsy hahavita hialy amo o fagnirian-dratio.

12. Ino ty toko’e hataontika naho mahatsapa ho tsy avotse sasa, le inogne ty anto’e?

¹² Hoe izay ka fa naho fa itika mahatsapa ho tsy avotse sasa, le va’e hieretseretse tie hagnameloke antika ty Jehovah noho itika managne fagnirian-draty. Faie azontika heveregne ho “mirehake” i fahotagney tie amy izay, le tsy toko’e hotsanognantika. Ino ty anto’e? Satria ampianare ty Baiboly fa ony i Jehovah tie mpanota tikagne. (Sal. 103:13, 14) “Mahaonigne ze kila raha” miomba antika reke, agnisa izay ze raha hahavy antikagne hanota. (1 Jaona 3:19, 20) Naho fa mikezake tsy magnatanterake fagnirian-draty tikagne, le hevere i Jehovah ho malio agnatreha’e eo. Nagnino tika ro matoky izay?

13-14. Rese vao tika satria managne fagnirian-draty? Hazavao.

¹³ Ambaha ty Baiboly soa ty tsy mampitovy tihoe manao raha raty (azo fehegne) naho tihoe managne fagniriagne hanao raty (va’e tsy ho satriegne). Nifampila tamy ty lahilahy ndra ty ampela manahake aze zao ohatse, ty ila’e tamy ty Kristiana ta Korinto agne taloha ty naha Kristiana iareo. Izao ty nisorate i Paoly: “Nihoe izay ty ila’e tama’areo taloha.” Midika vao zay tie tsy nanagne ze fagniria iareo taloha zay sasa iareo? Sarotse inoagne zay satria ty fagniriagne hoe izay mateteke, le tafalenteke agnatentikagne agne. Faie ze Kristiana nifehe tegna sady tsy nagnatanterake ze fagniria iareo zay, le nankasitraha i Jehovah. Ama’e le fa “voasasa malio” iareo. (1 Kor. 6:9-11) Afake ty hanahake izay ka rehe.

¹⁴ Ndra inogn’ino fagnirian-draty ialia’o, le afake ty handrese irey rehe. Ndra tie tsy mahavita magnafake tanterake irey aza rehe, le afake mikezake hifehe tegna sady tsy ‘hanao ze raha tea ty nofotse naho ty sai’o’ avao. (Efes. 2:3) Inogne ty hagnampe azo hahavita izay naho handrese ze fagnirian-draty ialia’o?

AKORE TY HAHAVY AZO HANDRESE?

15. Nagnino tika ro toko’e hanao ty maregne amy ty tegnantika naho te handrese fagnirian-draty?

¹⁵ Mila manao ty maregne amy ty vata’o rehe naho te handrese fagnirian-draty, le magneke tie managne ty fahalemea’o. Mitaoa mba tsy hamita-tegna amy ty “heve-diso.” (Jak. 1:22) Ho mora rese ty tsapa hevetse rehe naho magnamaivagne i olagney, le mieretseretse tie, ‘ty ila’e mbe minogne maro mandikoatse ahy.’ Hoe izay ka ty voka’e naho magnomey tsiny ty hafa rehe, le manao izao tie, ‘tsy hovoatarike hagnente sare vetaveta raho naho maneho hatea ty valiko.’ Ko magnamaren-tegna amy i raha tsy mete atao’oy areke ndra tie an-tsai’o agne avao aza. Tompon’andraikitse amy ty raha atao’o rehe.​—Gal. 6:7.

16. Akore ty hahavy azo ho tapa-kevetse hanao ty soa?

¹⁶ Tsy ampe tihoe manao ty maregne amy ty tegna’o, le mamantatse ty fahalemea’o. Mila tapa-kevetse ty handrese irey ka rehe. (1 Kor. 9:26, 27; 1 Tes. 4:4; 1 Pet. 1:15, 16) Fantaro tie ino ty raha tena mahavy azo ho mora rese ty tsapa hevetse, le isake ombia ty isehoa’e. Tsapa hevetse manao akore zay ndra amy ty fotoagne manao akore amy i androy ro tena sarotse ama’o ty manohetse i tsapa hevetsey. Sarotse ama’o vao ohatse ty manohetse i tsapa hevetsey naho fa rokake rehe ndra naho fa halegne bey i androy? Miomàna hiatreke i tsapa hevetsey, le fantaro tie inogne ty hatao’o. Aloha ty hisehoa’e ty fotoagne soa anoagne izay.​—Ohab. 22:3.

17. Ino ty ianarantika boake amy ty ohatse nenga i Josefa? (Genesisy 39:7-9) (Henteo ka i sare rey.)

¹⁷ Mareho ty raha natao i Josefa, naho fa nitarike aze hifampila ama’e i valy i Potifaray. Le avy le nandietse reke sady hentetse naho fa nanao izay. (Vakio ty Genesisy 39:7-9.) Inogne ty treantika boake amy izay? Fa nitapa-kevetse ty tsy hangalatse valy o ndaty ty Josefa, taloha ty nitsoborea i valy i Potifaray aze. Hoe izay ka fa mila tapa-kevetse ty hanao ty soa rehe, aloha ty hisehoa i tsapa hevetsey ama’o. Ho mora ama’o amy izay ty hagnatanterake ze fanapahan-kevetse fa nirambese’o naho fa misy tsapa hevetse.

“MANDINEHA TEGNA LOGNANDRO”

18. Akore ty hahavy azo handrese ty fagnirian-draty? (2 Korintianina 13:5)

¹⁸ Mba hahavitantika handrese fagnirian-draty, le mila “mandinen-tegna lognandro” tika. Dineho mateteke tie manao akore ty raha atao’o. (Vakio ty 2 Korintianina 13:5.) Dineho mateteke ty raha eretserete’o naho ty raha atao’o, le ahitsio ze mila ahitsy. Ndra tie nahavita nandietse tsapa hevetse aza rehe, le dineho zao: ‘Ela ela vao raho vaho nahavita nandietse aze?’ Ko magnamelon-tegna naho tsapa’o tie, tsy le avy le nandietse rehe, fa manoa raha mba hagnasoagne izay amy ty magnarake. Dineho ty fagnonteneagne retoa: ‘Le avy le vitako vao ty magnafake ze eretsere-draty avy an-tsaiko ao? Sarotse amako vao ty manohetse tsapa hevetse noho ty fihisagne filieko? Le avy le atsileko hafa vao ty masoko mba tsy hahatrea sare maloto? Takako vao tie nagnino ty fitsipy i Jehovah ro lava mahasoa avao ndra tie tsy maintsy mifehe tegna aza raho?’​—Sal. 101:3.

19. Nagnino ro magnasarotse ty aly ataontikagne amy ty fagnirian-draty ty fanapahan-kevetse madinedineke tsy mete ataontikagne?

¹⁹ Tsy toko’e hagnamaren-tegna ka rehe. Hoe ty Baiboly: “Mamitake ambone ze kila raha ty fo sady sarotse fehegne.” (Jer. 17:9) Nirehake ty Jesosy tie, boake ao o ‘eretsere-dratio.’ (Mat. 15:19) Naho fa mandeha ohatse ty fotoagne, le va’e hieretseretse ty ndaty raike fa tsy magnente sare vetaveta sasa tie, “tsy magnino” ty magnente sare manaitaitse satria tsy miboridagne i ndaty amy sarey. Va’e hieretseretse hoe izao ka ohatse reke: ‘Tsy magnino ty mieretseretse raha maloto satria tsy raha hataoko i rahay.’ Mamitake ze ndaty zay ty fo’e, le ‘magnomey fahafaham-po ty fagniria ty nofotse’ reke. (Rom. 13:14) Ino ty hagnampe azo tsy hanao izay? Fantaro naho isintaho ty fanapahan-kevetse tsy mete madinedineke, va’e hitarike azo handrambe fanapahan-kevetse raty lahibey, agnisa izay ty fahotagne lahibey.b Isintaho ka ty “eretsere-draty” va’e hahavy azo hanao fialan-tsiny hanoagne raha raty.

20. Ino ty raha tamaentikagne amy ty hoavy, le ino ty hagnampe antikagne tie amy izao?

²⁰ Nitreantika teo fa managne hery handreseagne tsapa hevetse tika, noho ty fagnampea i Jehovah. Noho ty famindram-po’e ka, le mitamà ty hiaigne nainai’e amy i tontolo vaovaoy ao tika. Ho velombelogne tika tie amy izay naho fa manompo i Jehovah amy ty saigne naho fo malio. Amparake ty hiavia izay, le matoky tika fa tsy tihoe maleme, ndra tsy avotse sasa naho fa mialy amo o fagnirian-dratio. Noho i Jehovah mitahy ty kezake ataontikagne, le afake ty handrese tika!