‘Mirehafa amo o Androanavio’

1. Akore ty nanoroa i Jehovah tie sarobily ama’e o agnondri’eo?

SAROBILY amy i Jehovah o agnondri’eo. Nivilie’e tamy ty lio i Jesosy iareo, le o androanavio ty nampikarakarae’e iareo. (Asa. 20:28) Teàn’Andrianagnahare naho indesegne aman-kasoa fagnahy o agnondri’eo. Mamelombelogne sady miaro o agnondrio amy ty loza ara-pagnahy o androanavy ambane ty fitariha i Kristy reo.​—Isaia 32:1, 2.

2. Ia ty tena anehoa i Jehovah fikarakaragne manokagne? (Ezekiela 34:15, 16)

² Tena mitretré ty agnondri’e iaby ty Jehovah, faie karakarae’e manokagne ka ze maleme ara-pagnahy. Magnampe iareo amy ty alala o androanavio reke. (Vakio ty Ezekiela 34:15, 16.) Faie tea’e tika naho mipay fagnampeagne naho fa mila izay. Ankoatse tihoe mihalale mba hahazo ty fanohagna’e, le tea’e tika naho mangatake fagnampeagne amo o “mpiarake naho mpampianatse” amo o fiangonagneò.​—Efes. 4:11, 12.

3. Akore ty ahafahantika mandrambe soa boake amy ty asa o androanavio?

³ Handineke ty fandaharagne ataon’Agnahare mba hagnampeagne antika amy ty lafi’e ara-pagnahy amy ty alala o androanavio tika. Hovaleantika retoa: Ombia tika ro toko’e hipay fagnampeagne amy iareo? Nagnino tika ro toko’e hanao izay? Akore ty agnampea iareo antikagne? Ndra tie mbe tsy miatreke raha sarotse aza tika, le hampitombo ty fankasitrahantika ty raha ataon’Agnahare naho hagnavotse ty fiaintika indraike andro agne, ty vale ireo.

OMBIA TIKA RO TOKO’E HIPAY FAGNAMPEAGNE AMO O ANDROANAVIO?

4. Nagnino tika ro mirehake tie aretegne ara-pagnahy ty rehafe ty Jakoba 5:14-16, 19, 20? (Henteo ka i sare rey.)

⁴ Nirehake ty fandaharagne ataon’Agnahare mba hahazoantika fagnampeagne ara-pagnahy ty Jakoba mpianatse. Hoe reke: “Misy marare vao ty ama’areo eo? Toko’e hirehake amy ty androanavy amo o fiangonagneo eo reke.” (Vakio ty Jakoba 5:14-16, 19, 20.) Trea amy ty andine’e magnodidigne fa aretegne ara-pagnahy ty nirehafe i Jakoba. Tsy dokotera ohatse ty toko’e hohantogne i mararey fa androanavy. Hositragne ka reke naho fa voavela ty fahota’e. Misy raha ila’e atao ty marare, toko’e hatao ty ndaty marare ara-pagnahy. Naho fa marare ohatse tika, le magnantogne dokotera, magnazava i aretegney sady magnorike ty raha rehafe’e. Naho fa marare ara-pagnahy ka tika, le toko’e hagnantogne o androanavio, hirehake i raha mahazo antikagney sady hagnorike ty toroheve ty Baiboly mea iareo.

5. Akore ty ahafantaragne tie fa manomboke marare ara-pagnahy tikagne?

⁵ Ty Jakoba 5, le mandrisike antika mba hagnantogne o androanavio ndra ombia ndra ombia ilantika fagnampeagne ara-pagnahy. Soa naho amy i fifandrambesantika aman’Agnahare mbe tsy simbay ty ahazoantika fagnampeagne! Tsy maintsy manao ty maregne amy ty vatantika tika. Mampitao ty Baiboly tie, va’e hamita-tegna tika, le hieretseretse tie ankasitraha i Jehovah avao. (Jak. 1:22) Nihoe izay ty ila’e tamy ty Kristiana ta Sardisy agne, le nampitao iareo amy ty ara-pagnahy iareo ty Jesosy. (Apok. 3:1, 2) Hohaintika tie manao akore ty ara-pagnahintika, naho ampitahaentika amy ty hafanam-pontika taloha ty zotom-pontika amy izao. (Apok. 2:4, 5) Dineho zao: Mbe mahafinaritse ahy vao ty mamaky Baiboly naho misaintsaigne? Zara fa magnomagne vao raho sady manapatapake fivoriagne? Mbe mazoto manompo vao raho? Ty raha mahafinaritse ahy naho ty fanagnagne vao ty mameno ty fotoako naho ty eretsereko?’ Naho misy eka ty raike amy ireo, le fa mihamaleme zay ty ara-pagnahintika. Hiharaty zay naho tsy manao raha tika. Naho tsy vitantika raike avao ty miala amy ty fahalementika, ndra fa nandika ty fitsipin’Agnahare tika, le toko’e hipay fagnampeagne amo o androanavio.

6. Ino ty toko’e hatao ze nanao fahotagne lahibey?

⁶ Naho nanao fahotagne lahibey va’e hahavy aze hasintake tsy ho amy i fiangonagney eo ty ndaty raike, le toko’e hagnantogne ty raike amo o androanavio. (1 Kor. 5:11-13) Ze nanao fahotagne lahibey, le mila ampeagne mba hifandrambe amy i Jehovah indraike. Hamela ty fahotantika ty Jehovah naho ‘atorontika amy ty ataontika tie mibebake vata’e tika.’ (Asa. 26:20) Agnisa izay ty fagnantognagne o androanavio naho nanao fahotagne lahibey tika.

7. Ia ka ty mipay ty fagnampea o androanavio?

⁷ Tsy ze ndaty nanao fahotagne lahibey avao ty ampea o androanavio, fa ze ndaty maleme ara-pagnahy ka. (Asa. 20:35) Va’e matahotse ho rese ty fagnirian-draty ohatse rehe. Vao mainke mafe ty aly atrehe’o, naho nandevoze ty fifohagne rongony, fagnenteagne sare vetaveta ndra naloto findesam-batagne rehe, taloha ty nianara’o ty hamaregnagne. Faie tsy toko’e hialy raike rehe. Azo’o atao ty mirehake amy ty raike amo o androanavio. Hitsanogne azo reke, hagnomey torohevetse azo’o ampiharegne sady hagnomey toky azo tie hampifale i Jehovah rehe naho mankatò aze avao. (Mpito. 4:12) Naho fa irehe manomboke kivy, le haniahy azo iareo tie tsy matoky tegna rehe kanao mahatsapa izay sady lahibey ama’o ty fifandrambesa’o amy i Jehovah.​—1 Kor. 10:12.

8. Hadisoagne manao akore ro tsy voatere hagnantognantika o androanavio?

⁸ Tsy voatere hagnantognantika o androanavio iaby ze kila hadisoantika. Va’e nanao rehake nandratse ty fo ty rahalahy ndra rahavave raike ohatse rehe ndra tsy nahafehe ty haboseha’o. Azo’o atao hey ty magnorike i toroheve i Jesosy tihoe milongoa amy ty rahalahi’oy ta tie le avy le hagnantogne androanavy. (Mat. 5:23, 24) Afake mikaroke miomba ty fahalemem-pagnahy, faharetagne naho fifehezan-tegna rehe, amy izay vao mainke haneho o toetse reo amy ty hoavy. Afake mangatake fagnampeagne amy ty androanavy raike rehe naho tsy vita’o ty mandamigne i olagney. Amy ty taratasy i apostoly Paoly hoahy o Filipianao, le nisy rahalahy raike nirehafe’e mba hagnampe i Eodia naho i Syntike handamigne ty tsy fifagnaraha iareo. Afake magnampe azo hoe izay ka o androanavio.​—Fil. 4:2, 3.

NAGNINO TIKA RO TOKO’E HIPAY FAGNAMPEAGNE AMO O ANDROANAVIO?

9. Nagnino tika ro tsy toko’e ho megnatse ty hipay fagnampeagne amo o androanavio? (Ohabolana 28:13)

⁹ Mila finoagne naho herim-po tika, mba hahavita hangatake fagnampeagne naho nanao fahotagne lahibey ndra mahatsapa tie rese ty fahalementika. Tsy toko’e ho megnatse ty hipay fagnampeagne amo o androanavio tika. Ino ty anto’e? Satria ty fagnorihantika ty fandaharagne natao i Jehovah ty anoroantika tie, matoky aze naho ty tari-dalagne mea’e mba hagnampeagne antika ho salama naho hatanjake ara-pagnahy tika. Ekentika fa mila ty fagnampea’e tika naho fa ho tonta. (Sal. 94:18) Naho mieke ty fahotantika sady miala amy izay tika, le hahazo ty famindram-pon’Agnahare.​—Vakio ty Ohabolana 28:13.

10. Ino ty ho voka’e naho magnetake ty fahotantikagne tika?

¹⁰ Hahazo fitahiagne tika naho mangatake fagnampeagne amo o androanavio, faie vao mainke hijale naho magnetake ty fahotantika. Naho fa nagnetake ty fahota’e ty Davida Mpanjaka, le nikivy naho nahatsiaro ho narare. (Sal. 32:3-5) Manahake i aretegne ndra ratse rey avao o olagne ara-pagnahio. Vao mainke hiharaty zay naho tsy le avy le mangatake fagnampeagne tika. Izay ty mahavy i Jehovah mandrisike antika mba “hifandamigne” ama’e, amy ty alala ty fandaharagne atao’e mba hagnampeagne antika ho sitragne ara-pagnahy.​—Isaia 1:5, 6, 18.

11. Ino ty ho voka’e amy ty hafa naho magnetake ty fahotantika tikagne?

¹¹ Naho magnetake ty fahotagne lahibey nataontikagne tika, le hisy voka’e amy ty hafa zay. Tsy hiasa amo o fiangonagneo eo i fagnahin’Agnaharey sady tsy hahatsapa fiadagnagne o rahalahy naho o rahavaveo. (Efes. 4:30) Naho haintika tie misy ndaty nanao fahotagne lahibey, le toko’e ho risihentika hirehake amo o androanavio reke.a Manota tika naho magnetake ty fahotagne lahibey natao ty hafa. (Lev. 5:1) Ty hateantika i Jehovah ty toko’e handrisike antika hirehake amo o androanavio. Magnampe o fiangonagneo halio avao tika naho manao izay sady magnampe i ndatỳ hifandrambe soa amy i Jehovah indraike.

AKORE TY AGNAMPEA O ANDROANAVIO ANTIKAGNE?

12. Akore ty atao o androanavio naho fa magnampe ze maleme ara-pagnahy?

¹² Risihegne mba hanohagne ze maleme ara-pagnahy o androanavio. (1 Tes. 5:14) Naho nanota rehe, le va’e hagnontane azo o androanavio mba ‘hahafantara’ iareo ty an-tsai’o agne naho ty am-po’o ao. (Ohab. 20:5) Magnampe iareo rehe naho tsy misalasala mirehake, ndra tie tsy mora ama’o aza zay noho ty kolontsai’o, ty maha ie azo ndra mahamegnatse azo ty hirehake i raha nisehoy. Ko matahotse ndra tie hoe “mirehadrehake avao” zay aza rehe. (Joba 6:3) Tsy le avy le mitsaratsara o androanavio. Mitsanogne naho mamantatse soa ty raha misy hey iareo vaho manoro hevetse azo. (Ohab. 18:13) Tsapa o androanavio tie mitake fotoagne ty miarake o agnondrio, le tsy mitamà iareo tie hahavoavaha i olagney ty fifampirehafagne indraike avao.

13. Nagnino ty vavake naho ty tari-dalagne boake amy ty Soratse Masigne mea o androanavio ro magnampe antika? (Henteo ka i sare rey.)

¹³ Tsy tihoe hagnindra ty raha tsapa’o o androanavio naho fa mangatake fagnampeagne amy iareo rehe. Iareo aza hivavake ho azo. Va’e hogaga rehe fa “misy heri’e lahibey” ty vavake atao iareo. Agnisa ty fagnampeagne omea iareo ka ty ‘fagnosoragne menake azo amy ty tahina i Jehovah.’ (Jak. 5:14-16) Tihoe “menake”, le ty hamaregnagne agnate ty Saontsin’Agnahare ao. Hamelombelogne naho hampitony azo ty fahaia o androanavio mampiasa o Baibolio, le hahavy azo hifandrambe soa amy i Jehovah indraike. (Isaia 57:18) Ty tari-dala ty Soratse Masigne rehafe iareo ama’o, le hagnampe azo ho tapa-kevetse hanao ty soa. Haharey ty fiaragnana i Jehovah misaontsy ama’o amy ty alala iareo hoe izao rehe: “Intoy ty lalagne, le andehano.”​—Isaia 30:21.

14. Arake ty Galatianina 6:1, akore ty agnampea o androanavio ze nanao “raha tsy mete”? (Henteo ka i sare rey.)

¹⁴ Vakio ty Galatianina 6:1. Ty Kristiana “manao raha tsy mete,” le manao raha tsy mifagnarake amy i fitsipin’Agnahare maregney. Va’e tsy fahaiagne mitsara zay ndra fandikagne ty lalàn’Agnahare. Ty hatea ty mandrisike o androanavio “hikezake hagnitsy i ndatỳ am-pahalemem-pagnahy.” Ty rehake Grike nadika tihoe “magnitsy”, le azo irehafagne ty fagneregnagne taolagne raike amy ty toera’e mba hahavy aze hositragne. Naho fa manao izay ty dokotera mahay raike, le atao’e ze hahavy i ndatỳ tsy haharey marare loatse. Mifantoke amy ty hahasitragne ty ara-pagnahintika ka o androanavio fa tsy magnindra aze. Risihegne ka ireo mba ‘hitao soa amy ty vata iareo.’ Naho fa magnampe antika mba hagnitsy ty lalantika iareo, le tadidie iareo tie tsy voririke ka iareo sady va’e hanao raha tsy mete. Mikezake ho soa fagnahy iareo, fa tsy miseho ho ambone ndra maregne loatse ndra mitsaratsara i ndaty ampeagney.​—1 Pet. 3:8.

15. Ino ty va’e hataontika naho fa managne olagne?

¹⁵ Afake matoky o androanavio tika. Nampiofagnegne hahay hitagne tsiambaratelo iareo. Nampeagne ka iareo mba hanoro hevetse mifototse amy ty Baiboly, fa tsy amy ty heve iareo manokagne sady hagnampe antika avao. (Ohab. 11:13; Gal. 6:2) Sambe managne ty toetse’e naho ty fahaia’e iareo, faie afake irehafantika o androanavio iaby naho fa managne olagne tika. Tsy tihoe hotsitsihentika iaby iareo amparake ty hahatreavantika ze hirehake ty raha teantika ho rey. Naho manao izay tika, le manahake ty ndaty raike te haharey ze “raha mahafinaritse ty sofi’e” avao, fa tsy te hahay ty “fampianaragne mahasoa” amy ty Saontsin’Agnahare ao. (2 Tim. 4:3) Naho mirehake olagne amy ty androanavy raike rehe, le va’e hagnontane reke tie fa nirehake tamy ty androanavy hafa vao rehe, le ino ty torohevetse nimea’e. Ty fiambaneagne, ro va’e hahavy ty androanavy raike hangatake soso-kevetse amy ty androanavy hafa.​—Ohab. 13:10.

TY ANDRAIKINTIKA MANOKAGNE

16. Ino ty tsy maintsy ataontika tsikiraidraike?

¹⁶ Tsy manapa-kevetse ho antika o androanavio ndra tie manoro hevetse aza. Tsy maintsy atorontika tsikiraidraike amy ty raha rehafentika naho ataontika tie, miaigne mifagnarake amy ty fanokanan-tegnantikagne tika. (Rom. 14:12) Noho ty fanohagnan’Agnahare, le afake ty tsy hivalike tika ndra tie miatreke raha sarotse aza. Manoro antika ty fomba fiheven’Agnahare areke o androanavio, fa tsy manapa-kevetse ho antika. Naho magnorike ty toroheve ty Baiboly mea iareo tika, le mampiofagne ty ‘fahaiantika misaigne’ mba hanapa-kevetse aman-kilala.​—Heb. 5:14.

17. Toko’e ho tapa-kevetse ty hanao akore tika?

¹⁷ Tena tombotsoa sarobily tihoe agnondry i Jehovah! Nandefa i Jesosy, i “mpiarake fanjakay” ty Jehovah, mba hagnomey i solovoigney ho antika, amy izay tika ho afake hiaigne nainai’e. (Jaona 10:11) Amy ty alala o androanavio ty agnatanteraha i Jehovah ty fampitamà’e toy: “Mpiarake zoto ty arofoko ty homeako anareo, le hofahana iareo fahalalagne naho fahaiagne mandineke nareo.” (Jer. 3:15) Naho fa maleme ndra marare ara-pagnahy tika, le tsy toko’e hisalasala ty hangatake fagnampeagne amo o androanavio. Lonike tika mba ho tapa-kevetse ty handrambe soa boake amy ty fandaharagne natao i Jehovah amy ty alala o androanavio.