1925​—Zato Taogne Lasa Zay

HADISOAM-PANANTENAGNE

Ty ankamaroa o Mpianatse ty Baibolio, le nitamà tie hanjare Paradisa ty tane toy tamy ty taogne 1925. Ino ty anto’e? Nirehake hoe izao ty Rahalahy Albert Schroeder agnisa ty Filan-keve-pitantanagne naho fa tafara tatoy: “Nieretseretse iareo tie handeha an-dagnitse agne o voahosotseo tamy izay mba ho agnisa i Fanjakagne agney. Hatsangagne amy ty mate ze ndaty tsy nivalike taloha manahake i ry Abrahama, i Davida naho ty ndaty hafa, le hinday ty tapa’e amy i Fanjakàn’Agnaharey an-tane etoy.” Faie tsy niseho zay, le nidiso tamà ty ila’e.​—Ohab. 13:12.

Ndra tie teo aza o hadisoam-panantenagne iohoe, le nibey atao tamy ty asa fitoriagne avao ty ankamaroa o Mpianatse ty Baibolio. Nanjare nitaka iareo ty andraiky iareo amy ty maha Vavolombelo i Jehovah iareo. Dineho ohatse ty fomba nampiasà iareo radio mba hitoriagne amy ty ndaty maro.

NANANGAGNE RADIO MARO

Naho fa nandeha soa i radio WBBR-y herentaogne taloha io, le nagnoregne radio matanjake hafa narine i Chicago, Illinois agne o Mpianatse ty Baibolio tamy izay. WORD ty nitokavagne o radio vaovao iohoe. Nahatsiaro hoe izao ty Ralph Leffler, mpiandraikitse ty fagnoregnagne i radioy: “Tamy ty hale i andro asotrỳ, le ndaty maro tamy ty toeragne fara’e lavitse ty naharey o radio vaovao iohoe.” Nisy keleiagne raike ta Alaska agne, 5 000 km mahery miala ty tanàgne misy o radio iohoe ohatse, nagnarake amy ty raike amy i fandaharagne voalohandoha’e rey. Tafara ty nahareiza iareo i radioy, le nanoratse taratasy hisaoragne ze niasa tamy i radioy ao iareo noho ty fampaherezagne ara-pagnahy nalefa tamy i fandaharagney.

Nihazavae ty Fitalakesan-davitse 1 Desambra 1925 tie, nagnino ro afake naharey o radio iohoe ze ndaty tamy ty fara’e lavitse agne. Izao ty rehafe’e: “I WORD ty agnisa ty radio fara izay ty natanjake ta Etazonia ao sady nahatratse 5 000 watts ty tanja’e. Sambe naharey soa aze ty moron-driake Atlantika naho Pasifika, i Cuba naho ty fara’e avaratse ta Alaska agne. Maro tamy ze mbe tsy naharey i hamaregnagney ro niliagne naho fa naharey o radio iohoe.”

Tagnate ze fotoagne zay, le nikezake mafe o Mpianatse ty Baibolio mba hagnitaragne ty fampiasagne radio naho fa nitory i talily soay ta Kanadà agne. Tamy ty taogne 1924, le natsangagne ta Saskatoon, a Saskatchewan agne ty radio CHUC. Io ty agnisa ty radio ara-pivavahagne voaloha’e ta Kanada agne. Tamy ty taogne 1925, le nahatrea toeragne malalake hasiagne radio iareo. Nafindra i fandaminagne amy ty toeragne fanoagne tantara an-tsehatse fa ela atao tihoe Regent Building ta Saskatoon agne areke ty toeragne fangalagne feo amy i radioy. Nivilie iareo o toeragne iohoe, le nihavaozegne mifagnarake amy ty tanjo i fandaminagne.

Noho o radio iohoe, le ndaty maro nitoboke tamy ty tanàgne kedekede naho ty kominy tamy ty faritse ta Saskatchewan agne ty naharey i talily soay voaloha’e. Nangatake boke ara-baiboly ohatse ty ampela raike atao tihoe Graham, mitoboke amy ty tanàgne mitokagne raike naho fa naharey fandaharagne raike. Izao ty nitsiaro i Rahalahy George Naish: “Nangatake reke tie ‘Ampianaro zahay!’ Mazava ho aze fa nandefa ty boke Fianaragne ty Soratse Masigne ho aze zahay.” Tsiela tafara izay, le naparita i Graham tamy ty faritane lavitse ty hafatse miomba i Fanjakagney.

NIHANAZAVA TY RAHA INOANTIKA

Ty Fitalakesan-davitse tamy 1 Marsa 1925, le nisy lahatsoratse lahibey minday ty foto-kevetse tihoe “Ty Nahateraha i Firenenay.” Nagnino o lahatsoratse iohoe ro tena lahibey? Fa ela o Mpianatse ty Baibolio ro nahatakatse tie, managne fandaminagne ty Satana, le o anjely ratio naho o fivavahan-disò, o varotseo vaho o politike amy ty tontolo toio ty manohagne aze. Faie nampea o ‘mpanompo azo atokisagne naho mahimbagneo’ tamy ty alala o lahatsoratse iohoe o rahalahy naho o rahavave magneran-taneo mba hahatakatse tie, managne fandaminagne raike ka ty Jehovah. Tsy agnisa ty fandamina i Satana o fandaminagne iohoe sady manohetse aze. (Mat. 24:45) Nihazavae o mpanompo iohoe ka tie, niforogne tamy 1914 i Fanjakàn’Agnaharey le nisy aly tamo o taogne iohoe. Noho o aly tan-dagnitse agne iohoe, le navokovoko an-tane etoy ty Satana reketse o demonia’eo. Miheo etoy avao iareo tie amy izao.​—Apok. 12:7-9.

Sarotse tamy ty ila’e ty nagneke o fagnazavagne vaovao iohoe. Nirehake hoe izao areke i lahatsoratsey: “Manoro hevetse anareo mpamaky tsy magneke ty raha rehafegne atoa zahay tie, toko’e handigne naho hatoky i Jehovah nareo, le tsy hivalike fa hanompo aze avao.”

Nitantara ty raha tsapa ty ankamaroa ty Mpianatse ty Baiboly tamy izay ty mpizara boke (tokavegne tihoe mpisava lalagne tie amy izao) raike atao tihoe Tom Eyre, boake an’Angletera agne: “Nifale o rahalahio naho fa naharey ty fagnazavagne ty Apokalypsy 12. Tsindraike nitaka’ay tie fa mioregne an-dagnitse agne i Fanjakagney, le vao mainke nitombo ty fazotoa’ay nitory ze talily soay zay tamo o ndatio. Mazava ho aze fa nandrisike anay vao mainke hanao raha zay sady nagnampe anay hahatrea ty fomba nitariha i Jehovah o vahoa’eo ho amy ty raha lahibey.”

FITORIAGNE MIOMBA I JEHOVAH

Amy hinane zao, le mateteke o Vavolombelo i Jehovah-o ro mirehake miomba ty Isaia 43:10 tihoe toy tie: “‘Inareo ro vavolombeko’ hoe ty Jehovah. ‘Eka, mpanompoko nifiniliko.’” Faie taloha ty 1925, le tsy nirehafegne mateteke tamo o boke aman-gazetentikao o andine’e iohoe. Faie niova zay. Tagnate ty taogne 1925, le nirehake hevetse boake amy ty Isaia 43:10 naho 12 ao ty foto-kevetse 11 amo o Fitalakesan-davitseo ao.

Tamy ty fara ty Aogositra 1925, le niarake nivory tamy ty havoriambey ta Indianapolis, a Inde agne o Mpianatse ty Baibolio. Nisy fanalamagne tolisoa nisorate i Joseph F. Rutherford hoe izao ty tamy i fandaharagne havoriambeỳ: “Niavy amy ty havoriambey toy eto tika, mba hahazo ... hery boake amy i Tompo. Izay le va’e hagnatanjake antika naho fa miheregne mitory amy i faritaney ey tika.” Tagnate i havoriambey valo androy, le nirisihegne mba hipay hirike hitoriagne ty miomba i Jehovah i mpagnatreke rey.

Tamy Sabotsy 29 Aogositra, le nanao ty lahajaka tihoe “Risihegne o Mpitorio” ty Rahalahy Rutherford. Nasongadi’e tamy io ty mahalahibey i asa fitoriagney: “Hoe ty Jehovah amo o vahoa’eo: ‘Inareo ro vavolombeloko ... le Iraho ro Andrianagnahare.’ Tafara izay reke, le nandily iareo mazava soa tie: ‘Manangàna oren-katae famantaragne hoahy o firenenao.’ Amy ty ndaty an-tane etoy, le ze mitory miomba i Jehovah avao ro tarihe ty fagnahi’e satria vahoa’e.”​—Isaia 43:12; 62:10.

Tafara i lahajaka’ey ty Rahalahy Rutherford, le namaky ty taratasy minday ty foto-kevetse tihoe “Hafatse Magnomey Fanantenagne.” Nagneke ty hafatse tao i mpagnatrekey iaby, le tihoe i Fanjakàn’Agnaharey avao ty afake magnomey “fiadagnagne, harena, fahasalamagne, fiaignagne, fahafahagne vaho hasambaragne nainai’e.” Tafara izay, le nadika amy ty firehake sambe hafa o taratasy milimpy iohoe sady natao pirinty mba hozaraegne amy i fanompoagney ey. Eo ho eo amy ty 40 tapetrisa ty nivoazara.

Tagnate ty taogne maro, le mbe tsy niova tihoe Vavolombelo i Jehovah ty agnara o Mpianatse ty Baibolio. Faie nanomboke nitaka iareo ty andraiky iareo amy ty maha vavolombelo’e iareo.

FIHEREGNAGNE MITILIKE ZE NDATY LIAGNE

Nihamaro ty Mpianatse ty Baiboly magneran-tane. Nirisihegne areke iareo mba hiheregne hitilike ze ndaty nitoria iareo naneho fahaliagnagne i talily soay. Tafara i kezake manokagne mba hizaragne i taratasy milimpy tihoe Hafatse Magnomey Fanantenagney, le nisy hoe izao ty tamo o Gazeteoa ao: “Manoa fiheregnagne mitilike. Tsy tihoe mitilike mba hametrake boke, fa mitilike ty ndaty nametrahagne i taratasy milimpy tihoe Hafatse Magnomey Fanantenagney.”

Nisy tatetse hoe izao ty tamy ty Gazete Janvie 1925, boake amy ty Mpianatse ty Baiboly ta Plano a Texas agne: “Tampoke anay fa naho fa niheregne indraike tamy i faritane fa nitoria’ay taloha rey zahay, le nahatrea vokatse soa mihoatse ty ho nihita’ay naho nitory amy ty faritane vaovao. Ty tanàgne kedekede amy i faritane’ay ao, le fa nitilihegne in-dime tagnate ty folo taogne lasa ... Vaho tsiela zay ty Rahavave Hendrix naho i reneko ty nitilike tagne, le nahapetrake boke maro mandikoatse ty taloha.”

Nanoratse hoe izao ty mpizara boke raike amy ty tanàgne a Panama agne: “Ty ankamaroa ty ndaty tsy nandrambe ahy tamy ty voaloha’e, le nagnova ty toe-tsai’e naho fa niheregne nitilike iareo fagnindroe’e ndra fagnintelo’e raho. Tamy i taon-dasay, le nampiasaeko mba hitilihagne ty ndaty fa nitiliheko taloha ty ankamaroa ty fotoagne nitoriako. Nanjare nitombo areke ty fahaiako iareo.”

MIFANTOKE AMY TY HOAVY

Tamy ty fara ty taogne 1925, le nanoratse hoahy ty mpisava lalagne ty Rahalahy Rutherford. Nirehake ty raha nivita tamy i taon-dasay naho ty raha mbe toko’e hatao iareo amy ty hoavy reke. Hoe reke: “Tagnate i taon-dasay, le tombotsoa ho anareo ty nampahery ze ndaty maro nikivy. Nahafale ty fo’areo o asa iohoe ... Amy ty taogne hoavy toy, le hanagne fahafahagne hitory miomba an’Agnahare, i Fanjakà’ey naho hitagne i famantaragne hoahy o ndatioy nareo ... Lonike areke tika mba hiarake hidera i Andrianagnaharentika naho Mpanjakantikay avao.”

Tamy ty farapara ty taogne 1925, le nanao plany mba hagnitaragne i Brooklyn o rahalahio. Tamy ty taogne 1926 ty voaloha’e nahavità i fandaminagne nanao tetik’asa tena lahibey.