Tsy ho Sahiragne Ara-toe-karena vao o Ndatio Indraike Andro Agne?

Migoreve an-dalagney ty ankamaroa ty ndaty amy ty firenena maro agne, satria mahatsapa iareo fa tsy rare’e ty raha miseho ara-toe-karena amy iareo agne. Vao mainke ninja ze raha rezay noho ty fisia i arete-manjamagne COVID-19. Tsy fale noho ty fisia i figobognagney iareo, sahiragne amy ty raha ho hanegne, sady tsy managne fahafahagne fire amy ty fitsaboagne. Vao mainke mibaribary ty tsy fitovia ty manam-karena naho ty mahantra voka izay.

Va’e hifaragne vao indraike andro agne o olagne ara-toe-karena manjò o ndatio? Ie, rehafe ty Baiboly fa hafahan’Andrianagnahare o olagne manjò antikagne amy izaò.

Hafahan’Andrianagnahare olagne ara-toe-karenao

Olagne: Tsy nahavita nametrake rafitse ara-toe-karena mba hagnomeagne fahafaham-po ze raha ilae ty hafa o ndatio.

Vahaolagne: Hafahan’Andrianagnahare o fanjakàn’olombelogneo, le ho soloa’e i Fanjakà’ey. Tokavegne tihoe Fanjakàn’Andrianagnahare io. Hanjaka boake an-dagnitse agne io sady hinday ty tane toy iaby.—Daniela 2:44; Matio 6:10.

Voka’e: Hiandraikitse ty raha miseho magneran-tane i Fanjakàn’Andrianagnaharey. Tsy hahantra ndra hinekoneko miomba ty raha ilae’e sasa o ndatio tie amy izay. (Salamo 9:7-9, 18) Iareo aza ho fale amy ze voka ty asa atao’e sady ho falefale avao reketse ty keleia’e. Mampitamà ty Baiboly tie: “Hamboatse tragno o ndatio, le hitoboke ao. Tsy hamboatse tragno hitoboha o ndaty hafa reke ndra hambole raha hohane o ndaty hafa.”—Isaia 65:21, 22.

Olagne: Tsy afa-miala amy ze kila raha mampijale aze o ndatio sady tsy ze kila raha ilae’e amy ty fiaigna’e ro hanagna’e iaby.

Vahaolagne: Hafahan’Andrianagnahare amy ty alala i Fanjakà’ey ze kila raha mampatahotse o ndatio.

Voka’e: Hokarakaraen’Andrianagnahare o ndatio le tsy ho eo sasa ze kila raha nahavy iareo ndra ty keleia iareo ho sahiragne. Tsy hisy sasa ohatse o alio, o tsy fanagnagne hanegneo naho o arete-manjamagneo. (Salamo 46:9; 72:16; Isaia 33:24) Hoe ty Andrianagnahare: “Hitoboke amy ty toeragne anjakà ty fiandanagne o vahoakò, le amy ty toeragne tsy misy raha atahoragne sady milamigne ao.”—Isaia 32:18.

Olagne: Magnararaotse ty hafa o ndaty tea tegna naho managne fagniriagne tsy mete afa-pò.

Vahaolagne: Hagnampe o ndatio ho tea ty hafa fa tsy ho tea tegna i Fanjakàn’Andrianagnaharey.—Matio 22:37-39.

Voka’e: Naho fa hinday i Fanjakàn’Andrianagnaharey, le ho bey hatea manahake an’Andrianagnahare o ndatio fa ‘tsy hipay ty hahasoa ty vata’e’ avao. (1 Korintianina 13:4, 5) Hoe ty Baiboly: “Tsy hagniry raty ndra ia ndra ia iareo, sady tsy hanimba ndra ino ndra ino magneragne i vohiko masigney, satria ho feno fahalalagne i Jehovaha o taneo, manahake ty andrakofa ty ambane o riakeo agne.”—Isaia 11:9.

Rehafe ty Baiboly fa miaigne amy ty andro fara’e tikagne. Sady tsy ho ela ty Andrianagnahare le hagnatanterake i fampitamà’e hamaragne ze kila raha mahavy olagne ara-toe-karenao.b (Salamo 12:5) Faie amparake ty hiavia izay, le afake magnampe azo hiatreke o olagne ara-toe-karenao ty toro lalagne amy Baiboly ao. Vakio ohatse ty lahatsoratse tihoe “Ahoana Raha Lasa Mihena ny Vola Miditra Aminao?” naho tihoe “Ahoana no Fiheveranao ny Vola?”

Heve-diso miomba ty raha rehafe ty Baiboly mifandrambe amy ty toe-karena

Heve-diso: Tsy hisy fifaragna’e o fahantragneo arake i reha i Jesosy tihoey: “Hisy ndaty mahantra avao ty ama’areo eo.”—Matio 26:11.

Ty Maregne: Nirehake ty raha tena misy avao ty Jesosy tie, naho mbe eo ty tontolo anjakà ty tsy rare’e toy, le mbe hisy hahantra avao o ndatio. Faie ninday “talily soa hoahy ty mahantra” ty Jesosy, agnisa izay i tihoey tie ho faragna i Fanjakàn’Andrianagnaharey tsy hisy nainai’e o fahantragneo.—Lioka 4:18, 43.

Heve-diso: Naho te hampifale an’Andrianagnahare rehe, le tsy maintsy mahantra arake i reha i Jesosy tihoey: “Avaroto o fanagna’ò, le omeo o mahantrao.”—Matio 19:21.

Ty Maregne: Tsy tihoe nirehake fitsipike toko’e horihe o mpanonjohy ty lia’eo amy ty fiaigna’e ty Jesosy naho fa nirehake ireo. Nagnomey tari-dalagne toko’e horihe i ajalahy nitondregne tamy i harena’ey avao reke tamy io. Nirisihe i Jesosy reke mba hagnatsotra ty fiaigna’e sady hagneke i fanasagne mba hanjare mpanonjohy ty lia’ey.

Heve-diso: Mitahy o ndatio ty Andrianagnahare, le manao ze hahavy iareo hanan-karena arake ty rehafe ty Baiboly tihoe: “Ty fitahia i Jehovah ro mampanan-karena.”—Ohabolana 10:22.

Ty Maregne: Tihoe “fitahia i Jehovah” amy Baiboly ao, le mateteke manondro fitahiagne ara-pagnahy, tafilitse amy izay tihoe fiaignagne misy dika’e, fifandrambesagne soa aman’Andrianagnahare, fanagnagne raha tamaegne amy ty hoavy. (Salamo 25:14; Jaona 17:3) Maregne fa misy mpanompon’Andrianagnahare ila’e nitahie’e le nanjare mpanan-karena, faie tsy mpanan-karena ty ankamaroa ty ndaty nanjare Kristiana. (Genesisy 24:34, 35; Jakoba 2:5) Ndra i Jesosy Kristy aza tsy le nanan-draha fire.—Matio 8:20.

Heve-diso: Mampianatse miomba ty karazana kominisma ty Baiboly satria izao ty rehafe’e miomba ty Kristiana tamy ty taonjato voaloha’e: ‘Niharoa iareo iaby ze kila raha sady nivarotse ty fanagna’e naho ty tane iareo.’—Asan’ny Apostoly 2:44, 45.

Ty Maregne: Mirehake miomba ty fandaharagne tagnate ty fotoagne fohe natao ty Kristiana tamy ty taonjato voaloha’e, mba hagnampeagne ze vaho nanjare Kristiana o andine’e iohoe. Niavy a Jerosalema ao mba hankalaza ty fankalazagne Pentekosta Jiosy o ndaty rehoe. (Asan’ny Apostoly 2:5) Faie ndra naharetse tsy arake ty nieretsereta iareo aze ty nijanogna iareo ta Jerosalema ao, mba hianara iareo ty miomba i finoa iareo vaovaoy. Naho izay areke, le nagnampe iareo amy ty hanegne naho ty tragno hitoboha iareo i Kristiana nama iareo rey.—Asan’ny Apostoly 2:41, 42, 46, 47.

a Rehafe ty Baiboly fa i Jehovah ty tahinan’Andrianagnahare.—Salamo 83:18.

b Nagnino rehe ro afake matoky ty raha rehafe o Baibolio? Henteo ty lahatsoratse tihoe “Milaza ny Marina Foana ny Baiboly.”