Trea Magneran-tane ty Fipisampisa o Tarignandrokeo: Ino ty Rehafe ty Baiboly?

Retoa ty tatetse nivoarae miomba ty hafanam-bey magneran-tane, tamy Jolay 2022:

• “Tamy ty volagne toy avao, le fa indroe zay ty manam-pahefagne a Chine agne ro nampitao ty ndaty tamy ty tanàgne miiake 70 eo ho eo tie, le vata’e ho mae mipisampisagne o andrò sady hagnoho-doza.”​—25 Jolay 2022, CNN Wire Service.

• “Lava ahatreavagne ala mae avao ty amy ty tane maro a Eropa agne noho ty hafanam-bey tsy mahazatse.”​—17 Jolay 2022, The Guardian.

• “Arake ty tatetse nivoarae magneneke i Etazonia tamy i lahadỳ, le trea tie mae bey tsy manahake ty amparake izay ty amy ty faritse Antignana i Etazonia, naho ty faritse Atimo vaho ty faritse Avaratse.”​—24 Jolay 2022, The New York Times.

Ino ty tea o raha iaby reo ambara amantika? Tsy ho azo iaignagne sasa vao ty tane toy amy ty fara’e? Ino ty rehafe ty Baiboly?

Magnatanterake ty faminania ty Baiboly vao ty fisia o hafanam-bey tsy tameo?

Ie. Mifagnarake amy ty raha fa nirehafe ty Baiboly mialoha fa hiseho amo ze o androntikagne zao ty fiakara o hafanagne magneran-taneo. Naminany ohatse ty Jesosy fa hahatrea “raha mampatahotse” tikagne. (Lioka 21:11) Noho ty fiakara o hafanagne magneran-taneo, le manjare matahotse o ndatio fa tena hanimba ty tane toy ty raha atao o ndatio.

Tsy ho azo iaignagne sasa vao ty tane toy?

Aha’a. Finoron’Andrianagnahare hitoboha o ndatio nainai’e ty tane toy. (Salamo 115:16; Mpitoriteny 1:4) Fa nampitamà reke fa ‘hamonovono ze ndaty manimba ty tane toy’ satria tsy henga’e hanimba ty tane toy iareo.​—Apokalypsy 11:18.

Dineho ohatse ty faminaniagne roe retoa, fa mampiseho ty raha hafa nampitamaen’Andrianagnahare:

• “Hifale ty tane fatrambey naho ty tane maike, le hirebeke ty lemake maike sady ho feno folera.” (Isaia 35:1) Tsy hengan’Andrianagnahare tsy ho azo iaignagne hoe tane fatram-bey ty tane toy satria hahere’e amy ty toko’e ho ie ze nisimbae o ndatio.

• “Mikarakara o taneo rehe, sady atao’o mahavokatse naho legne reke.” (Salamo 65:9) Noho ty fitahian’Andrianagnahare, le hanjare ho paradisa ty tane toy.

Naho tea’o ho fantatse tie nagnino ro magnatanterake ty faminania ty Baiboly ty fiova o toets’andrò, le vakio ty lahatsoratse tihoe “Ty Fiovaovà o Toets’andrò Naho ty Hoavintikagne.”

Naho tea’o ho fantatse ty fampitamà ty Baiboly miomba ty fagneregnagne o tontolo iaignagneo ho soa indraike, le vakio ty lahatsoratse tihoe “Iza no Hahavita Hanavotra ny Tany?”