Hafanagne Mbe Tsy Nisy Ndra ho Indraike Tan-tegnategna ty Taogne 2023: Ino Ty Rehafe Ty Baiboly?

Mbe tsy nisy fana hoe izao indraike nisendreke o ndatio amparake izay. Tsy vita izay fa misy loza hafa ka atera o hafanam-bey tsy tan-tane iohoe. Mareho moa ty rehafe ty tatetse retoa:

• “Fa 174 taogne zay o ndatio ro nanomboke nitàgne an-tsoratse ty hafanagne misy magneran-tane, faie tamy i volagne Jonay ty fara izay ty nafana naho ampitahaegne amy ty amparake izay.”​—13 Jolay 2023, National Oceanic and Atmospheric Administration, U.S. Department of Commerce.

• “Tsy manahake ty mahazatse fa le vata’e mafana ty a Italia, Esipaigne, Frantsa, Alemaigne vaho a Polony agne, le va’e hahatratse amy ty 48°C aza ty hamae ty tioke amy ty tokonose i Sisila naho i Sardaigne agne. Va’e ho ireo ty hafanagne fara’e ambone a Eropa etoa amparake izay.”​—13 Jolay 2023, European Space Agency.

• Azo inoagne tie hateteke hoavy naho ho bey i oragney sady va’e hiterake ranobey, arakarake ty itomboa o hafanagneo.”​—17 Jolay2023, Stefan Uhlenbrook, direktera amy ty hydrology, water and cryosphere at the World Meteorological Organization.

Mampinekoneko azo vao ty tatetse maro isan-karaza’e miomba ty fiakara o hafanagneo? Andao tika hagnente ty raha rehafe ty Baiboly.

Magnatanterake ty faminania o Baibolio vao ty fiovaovà o toets’andrò?

Ie. Tena mifagnarake amy ty raha nirehafe o Baibolio mialoha ty raha misy amo o androntikagne hinane zao. Ohatse zao, nirehake ty Jesosy fa hahatrea “raha mampatahotse” o ndatio. (Lioka 21:11) Ndaty maro hinane zao ty manjare matahotse tie tsy ho azo iaignagne sasa ty ambone tane etoy noho ty fionjogna ty hafanagne magneran-tane.

Fa tsy ho azo iaignagne sasa vao ty ambone tane etoy?

Aha’a. Hitobohantikagne nainai’e ty namboaran’Agnahare ty tanentikagne toy. (Salamo 115:16; Mpitoriteny 1:4) Ireke aza mampitamà fa “hamonovono ze manimba o taneo.”​—Apokalypsy 11:18.

Rehafe ty Baiboly fa vitan’Andrianagnahare ty miaro ty tane toy amy ze loza atera ty fahasimba o tontolo iaignagneo sady toe hanao izay reke.

• “Mampitony tiobey reke [Andrianagnahare], le nanjare tsy nivalitaboake sasa o onjan-driakeo.” (Salamo 107:29) Tena mahery ty Andrianagnahare, le vita’e ty mifehe o hery ty natiorao. Noho o tontolo iaignagneo simba ty mahavy o toets’andrò miovaova sady mampijale o ndatio, faie hain’Andrianagnahare ty mamaha o olagne rehoeke.

• “Karakarae’o o taneo, le atao’o ty hahavy aze hamokatse naho ty hahavy aze ho legne.” (Salamo 65:9) Noho ty fitahian’Agnahare, le hanjare paradisa ty tane toy.

Mampitamà ty Baiboly fa haheregne amy ty pilasi’e indraike o tontolo iaignagneo. Naho mipay fagnazavagne fagnampe’e miomba izay rehe, le vakio ty lahatsoratse tihoe “Iza no Hahavita Hanavotra ny Tany?”