Feno Raha Nampinekoneko ty Taogne 2023: Ino ty Rehafe ty Baiboly?

Tagnate i taogne 2023-y, le maro ty raha niseho magneran-tane magnaporofo ty raha rehafe ty Baiboly tie miaigne amy “ty andro fara’e” tika. (2 Timoty 3:1) Mareho ty raha fa nirehafe ty Baiboly mialoha fa hiseho amo o andro iaignantikagne zao.

Ty Baiboly naho ty raha miseho magneran-tane

‘Aly naho tatetse miomba ty aly.’​—Matio 24:6.

• “Vao mainke mihamanjeke ty hampiarotegne magneran-tane.”a

“Horohoron-tane amy ty toeragne sambe hafa.”​—Marka 13:8.

• “Nanomboke tamy ty voalohan-doha ty taogne 2023, le 13 ty horohoron-tane fara izay ty mahery nisy magneran-tane. Amparake izay le mbe tsy nisy horohoron-tane nahery hoe izay naho tsy tamo o taogne iohoe.”b

“Hahatrea raha mampatahotse.”​—Lioka 21:11.

• “Vao mainke nihananjeke ty hafanagne magneran-tane.”​—António Guterres, Sekretera Jeneraly ty ONU.c

“Hakeré.”​—Matio 24:7.

• “2023: Taogne tena nampinekoneko hoahy o ndaty mamelogne keleiagneo.”d

“Fotoan-tsarotse tsy mora atrehegne.”​—2 Timoty 3:1.

• “Magneran-tane, le ndaty raike agnate ty valo ty managne olagne ara-tsaigne.”e

Hanao akore ka ty taogne 2024?

Tsy misy afake mamaritse ze raha hiseho amy ty taogne 2024. Faie atoro ty raha miseho magneran-tane fa tsy ho ela i Fanjakàn’Andrianagnahare an-dagnitse agney, le hagnafake o fanjakàn’olombelogneo. O Fanjakagne iohoe ty hinday sady hagnafoagne ty voka-draty o fijaleagneo naho o finekonekoagneo.​—Daniela 2:44; Apokalypsy 21:4.

Faie amparake ty hiavia izay, le azontika atao ty mangatake fagnampeagne aman’Agnahare naho fa itika minekoneko. Hoe ty Baiboly:

“Naho fa matahotse raho, le mitoky ama’o.”​—Salamo 56:3.

Akore ty anoroantika fa matoky i Jehovah tika? Asae’ay rehe mba hianatse ty raha ampitamae ty Baiboly miomba ty hoavy. Rehafe’e ao fa tsy hisy sasa o fijaleagneo tie amy izay. Mangataha hianatse Baiboly maimaim-poagne ama’ay fa hotrea’o ao tie akore ty hahavy anareo keleian-draike handrambe soa boake amy ty fampitamà ty Baiboly.