Ia ty Hofilie’o ho Mpitondra? Inogne ty Rehafe ty Baiboly?

Fanapahan-kevetse lahibey ty rambese o ndatio naho fa iareo mifily ty ho mpitondra iareo.

Inogne ty rehafe ty Baiboly?

Voafetra avao ty raha vita o mpitondra olombelogneo

Rehafe ty Baiboly tie voafetra avao ty raha vita o mpitondra olombelogneo.

• “Ko matoky o ndaty amboneo, ndra o ana o ndaty tsy mahavonjeo. Miala ty ai’e, le miheregne indraike amy i tane namboaragne azey reke. Amy i andro ignehoeke avao le foagne ty eretsere’e.”​—Salamo 146:3, 4, fagnamarehagne ambane peje.

Ndra o mpitondra tena mahaio aza le mbe ho mate avao. Fagnampe izay, tsy afake magnomey toky iareo tie ho tohiza ty ndaty handimbe iareo ty asa soa natao iareo.​—Mpitoriteny 2:18, 19.

Mirehake ka ty Baiboly tie tsy natao hifampinday o ndatio.

• “Tsy namboaregne hivey vatagne ka o ndatio.”​—Jeremia 10:23.

Faie misy mpitondra tena mahay vao amo ze fotoagne zao?

Misy mpitondra raike fa nekén’Agnahare

Hazavae ty Baiboly fa nanendre mpitondra raike tena mahay naho azo atokisagne ty Andrianagnahare. Tsy ia zay fa i Jesosy Kristy. (Salamo 2:6) I Jesosy ty Mpanjaka i Fanjakàn’Andrianagnaharey, le boake an-dagnitse agne reke ro hinday ty tane toy.​—Matio 6:10.

Hagneke i Jesosy ho mpitondra azo vao rehe? Rehafe ty Baiboly ty anto’e mahalahibey o fagnonteneagne iohoe.

• “Omeo voninahitse i anakey, tsy mone ho vignetse ty Andrianagnahare, le ho ringagne nareo. Fa tsielatsiela avao le avy ty havignera’e. Sambatse ze mialoke ama’e.”​—Salamo 2:12.

Izao ty fotoagne toko’e handrambesa’o fanapahan-kevetse. Naho ty faminania ty Baiboly ro henteagne, le fa tamy 1914 ty Jesosy ro nanomboke nanjaka sady kede sisa le hisolo o fanjakan’olombelogneo i Fanjakàn’Andrianagnaharey.​—Daniela 2:44.

Naho tea’o ho fantatse tie akore ty fomba hanohagna’o ty fitondrà i Jesosy, le vakio ty lahatsoratse tihoe “Miezaha Hanohana ny Fanjakan’Andriamanitra Dieny Izao!”