Vita o Firenenao vao ty Mikalagne ty Loza Atera o Toetsandro Ratio? : Ino ty Rehafe ty Baiboly?

Vita tamy lahady 20 Novambra 2022 ty COP27 ndra ty Fivoriagne Fanoe ty Firenena Mikambagne Miomba ty Fiova o Toetsandrò. Nitapahegne tamy izay fa homeagne vola o firenena mateteke iharam-boigneo, mba hiatreha iareo ty loza boake amy i toetsandroy. Faie sambe nagneke iareo fa tsy mahavoavaha ty tena foto i olagney zay.

“Mahafale ahy i fanapahan-kevetse tie hampeagne ze niharam-boigne boake amo o toetsandro ratioy,” tasa i António Guterres, sekretera generaly o Firenena Mikambagneo, tamy 19 Novambra 2022. “Faie tsy ampe zay naho ty maregne ... Tena mipay famonjeagne meke ty tanentikagne toy.”
“Hampoizegne ty hisia ty fiovagne lahibey amo o toetsandrò naho fa afarafara ao, sady ho raty ty voka’e amy ty ndaty tsikiraidraike.”— Mary Robinson, prezida Irlandy taloha sady Ambasadoro taloha Hoahy ty Zo o Ndatio, tamy 20 Novambra 2022.

O tanorao ty tena minekoneko amy ty hoavy ty tanentikagne toy. Faie afake miara-miasa mba hialagne amy ty voka-draty o toetsandro ratio arake ty nieretserete’e vao o firenenao? Ino ty rehafe ty Baiboly?

Ho tomombagne vao ty raha atao o firenenao?

Maregne fa mikezake mafe o firenena magneran-taneo tie amy izao mba hamahagne o olagne iohoe. Faie rehafe ty Baiboly fa tsy hahavita hamoagne ty olagne atera o toetsandro ratio iareo. Intoagne misy anto’e:

“Ze miviogne tsy azo ahitsy sasa.”—Mpitoriteny 1:15.

Ino ty dika izay? Voafetra ty raha vita o fanjakagneo satria tsy natao hifampinday o ndatio. (Jeremia 10:23) Va’e mahavita miara-miasa o firenenao, faie tsy ombia hahavita hamoagne ty olagne amy ty tontolo toy eto ndra tie hikezake mafe manao akore aza.
“Ho tea ty vata’e o ndatio, ho tea vola, ... tsy ho azo ifagnarahagne.”—2 Timoty 3:2, 3.

Ino ty dika izay? Fa nirehafe ty Baiboly mialoha fa ho tea tegna ty ankamaroa o ndatio amo o androntikagne zao, le tsy te hiara-miasa mba hagnasoagne ty fiaigna ty hafa.

Faie misy raha tamaegne

Tsy miankigne amy ty raha ampitamae o fanjakàn’olombelogneo ty hoavy ty tanentikagne toy. Fa nagnomey Mpitondra mahay ty Andrianagnahare, le i Jesosy Kristy. Hinday magneran-tane reke, sady izao ty raha rehafe ty Baiboly miomba aze:

“Ty agnara’e hatao tihoe Mpanoro Hevetse Mahalatsa, Andrianagnahare Mahery, Rae Nainai’e, Roandria ty Fiadanagne.”—Isaia 9:6, fagnamarehagne ambane peje.

I Jesosy ty Mpanjaka i Fanjakàn’Andrianagnaharey, sady an-dagnitse agne ty misy o fitondragne iohoe. (Matio 6:10) Managne hery naho fahendreagne hikarakaragne ty tanentikagne toy naho ty mponegne etoagne reke, sady tena te hanao izay. (Salamo 72:12, 16) Naho fa hinday o fitondragne an-dagnitse agne iohoe, le tsy hisy henga’e ‘hanimba ty tane’ toy sasa, sady hahere’e manahake tamy ty voaloha’e indraike o tontolo iaignagneo.—Apokalypsy 11:18; Isaia 35:1, 7.

Naho tea’o ho fantatse tie, ino ty tena vahaolagne amy ty loza voka o fiovaovà o toetsandrò, le vakio ty lahatsoratse tihoe “Ty Fiovaovà o Toets’andrò Naho ty Hoavintikagne.”