Nagnino o Politikeo ro Mampizarazara o Ndatio ? Ino ty Rehafe ty Baiboly?

Mampizarazara firenena maro magneran-tane o politikeo. Arake ty fagnadihadiagne natao ty Foibeim-pikaroha i Pew tamy 2022, le “65% amy ty ndaty bey amy ty tane 19 nanoagne fagnadihadiagne ro nisaontsy tie tsy miharo saigne ty ndaty sambe hafa antoko politike amy ty tane misy iareo agne.”

Tsikari’o ka vao fa vao mainke mizarazara ty ndaty ama’areo agne noho o politikeo? Ino ty anto’e? Va’e hisy vahaolagne avao vao? Dineho ty raha rehafe ty Baiboly.

Toe-tsaigne mampizarazara

Fa nirehafe ty Baiboly mialoha tie, ho raty ty toe-tsay ty ndaty amy ty “andro fara’e”, ty dika izay amo o androntikagne zao, le manjare tena sarotse ty miharo saigne.

• “Amy ty andro fara’e, le hisy fotoan-tsarotse tsy mora atrehegne. Fa ho tea ty vata’e o ndatio, ... tsy ho azo ifagnarahagne.”​—2 Timoty 3:1-3.

Maro ty ndaty mikezake mafe mba hahavy o fitondram-panjakagneo ho tomombagne ty raha atao’e, faie le minaoke avao ze raha zay. Naho fa tsy mitovy hevetse o ndatio, le tena ho sarotse ama’e ndra tena tsy ho vita’e ty hiara-miasa mba hamahagne o olagneo. Fa ela bey ty nirehafa ty Baiboly tie, ino ty ho voka izay.

• “Nifampinday ty ndaty sambe ndaty, le nijale o vahoakeo.”​—Mpitoriteny 8:9.

Ino ty vahaolagne atoro ty Baiboly? Fitondram-panjakagne raike, le ty mpitondra aze afake mamaha i olagne mahavy o ndatio hijale.

Mpitondra mahay sady tea ndaty

Rehafe ty Baiboly fa i Jesosy Kristy raike avao ty mpitondra tena hahavita hamaha i olagne rey. Tsy vita tihoe te hampiadagne naho te hampiharo saigne o ndatio avao reke, fa managne hery naho fahefagne hanoagne izay ka.

• “Amy ty andro anjaka’e, le ho maro ty ndaty maregne. Sady ho bey ty fiadanagne.”​—Salamo 72:7.

• “Hanompo aze iaby ze kila firenena.”​—Salamo 72:11.

I Jesosy ty mpitondra fara izay ty soa satria tena tea ndaty reke ro mbe te hagnampe iareo ka, lohotsie fa ze nihara ty tsy rare’e.

• “Hovonje’e ty ndaty mipay vonje, naho ze ambane, naho ze tsy mba misy magnampe. Hagnampe ze ambane naho ze mahantra reke, sady hamonje ty ay ze mahantra. Hagnafake iareo amy ty fampijaleagne naho ty hampiarotegne reke.”​—Salamo 72:12-14.

Mikezaha hahafantatse soa ty miomba i Fanjakàn’Andrianagnaharey, ty dika izay i fitondram-panjakagne an-dagnitse agne tarihe i Jesosy Kristỳ. Henteo tie ino ty soa ho azo’o boake amo o fanjakagne iohoe sady akore ty hanohagna’o aze.

• Henteo ty video tihoe Inogne o Fanjakàn’Andrianagnahare Zao?

• Vakio ty lahatsoratse tihoe “Tsy Manao Kolikoly ny Fanjakan’Andriamanitra.”