Ia ty Hagnavotse ty Ndaty Tsotra Ndra ty Ndaty Tsy Mandrambe Anjara amo o Alio? Ino ty Rehafe ty Baiboly?

Tatetse boake amy ty Firenena Mikambagne:

• Nanomboke tamy 7 Oktobra hatrake amy 23 Oktobra 2023, le ndaty mihoatse ty 6 400 ty nimate, noho ty aly atao i Gaza naho Israely. Ndaty 15 200 ka ty naratse. Ndaty tsotra ty ankamaroa ireo. An-ketse’e ka ty ndaty nafindra toeragne.

• Tamy 24 Septambra 2023, le ndaty tsotra mihoatse ty 9 701 ty nimate, le 17 748 ty naratse noho ty aly atao i Rosia naho i Ukraine.

Ino ty raha ampitamae ty Baiboly o ndaty mijale noho o alio?

Ty raha azontika tamaegne

Fa nirehafe ty Baiboly mialoha fa ‘hampijanogne ty aly magneran-tane’ ty Andrianagnahare. (Salamo 46:9) I fitondragne an-dagnitse agney ndra i Fanjakà’ey ty hasolo’e o fitondran’olombelogneo. (Daniela 2:44) Hinday fiadanagne hoahy o ndatio i Fanjakàn’Andrianagnaharey.

Mareho tie ino ty raha hatao i Jesosy Kristy, i Mpanjaka i Fanjakàn’Andrianagnaharey:

• “Hovonje’e ze mahantra mipay vonje naho ty ndaty ambane tsy misy mpagnampe. Hitretré ty ndaty ambane naho ty mahantra reke sady hamonje ty fiay ty mahantra. Hafaha’e amy ty raha mahaore naho ty hampiarotegne iareo, sady ho sarobily ama’e ty lio iareo.”​—Salamo 72:12-14.

Hampiasa i Fanjakà’ey ty Andrianagnahare mba hamoagne ty alahelo naho ty fijaleagne atera o alio naho o hampiarotegneo.

• “Hofafa’e ze ranomaso amy ty maso iareo, le tsy hisy sasa ty fate, ty alahelo ndra ty toreo ndra ty fanaintaignagne, fa tsy ho eo iaby ty raha taloha.”​—Apokalypsy 21:4.

Tsy ho ela i Fanjakàn’Andrianagnaharey, le hinday fagnovàgne lahibey ambone tane etoy. Fa nirehafe ty Baiboly mialoha fa ‘hisy aly naho tatetse miomba ty miomba ty aly’ ty amo o androntikagne hinane zao. (Matio 24:6) I raha miseho rey naho ty raha hafa le manoro amantika fa miaigne amy ty “andro fara’e” tika sady fa marine ty hifaragna o fitondran’olombelogneo.​—2 Timoty 3:1.