Fa Tao’e Raike zay ty Nisia i Aly a Ukraine Agney: Ino ty Raha Ampitamae ty Baiboly?

Feno tao’e raike amy ty Joma 24 Fevrie 2023 ty nisia i aly a Ukraine agney. Rehafe ty tatetse voarae fa maramila Ukreniana naho Rosiana 300 000 ty mate ndra naratse, le ndaty tsotra 30 000 ka ty mate tagnate i alỳ. Faie va’e hihoatse izay ty isa ty ndaty mate ndra ty naratse.

Mampalahelo fa hoe tsy ho tampetse aniany i alỳ.

• “Fa ho tao’e raike ty niziliha o maramila Rosianao a Ukraine agne, faie naho henteagne ty raha misy le tsy ho tampetse aniany o aly iohoe. Tena tsy fantatse tie ia ty handrese, sady sambe tsy vognogne hipay marimaritse iraisagne iareo.”​—NPR (National Public Radio), 19 Fevrie 2023.

Maro ka ty ndaty maren-tane malahelo mafe sady mijale noho i aly agney naho amy ty toeragne hafa. Rare’e naho maro ty ndaty malahelo noho ze raha rey zay. Ino ty raha ampitamae ty Baiboly? Ho foagne vao o alio naho fa afarafara ao?

Aly raike hagnafoagne o alio iaby

Misy aly raike rehafe ty Baiboly tie tsy hanjamagne fa hagnavotse o ndatio. Aramagedona ty itokavagne o aly iohoe sady rehafe’e tie “aly i andro lahibein’Andrianagnahare Mahery Vata’ey.” (Apokalypsy 16:14, 16) Hofoagnan’Andrianagnahare ze fitondra o ndatio iaby amo o aly iohoe. Satria iareo ty ifotora o aly magneneke ty tane toy io. Naho tea’o ho fantatse tie nagnino ro hinday fiadanagne i Aramagedonay, le vakio ty lahatsoratse retoa:

• “Ino ty Atao Tihoe Aly Hara-magedona?”

• “Talily Soa i Hara-magedonay!”