MIAMBENA LOGNANDRO!

Ty Fivavahagne Naho ty Aly a Ukraine Agne: Inogne ty Rehafe ty Baiboly Miomba Izay?

Mareho ty raha voarehake miomba ty mpitarike fivavahagne naho ty aly a Ukraine agne retoa:

“Tsy nagnameloke i Rosia tsy hanao i alỳ ty filoha ty Fivavahagne Ortodoksa atao tihoe Patriarika Kirill, a Rosia agne. ... Lava manao propagandy miomba i Ukraine avao o fivavahagne tarihe’e iohoe, le izay ro ampiasae i Poutine mba hagnamaregnagne ty aly atao’e amy i Ukraine.”—EUobserver, 7 Marsa 2022.
“Niaro o rosianao o Patriarika Kirill-io tie tsy misy maha diso iareo amy ty fanafihagne i Ukraine. Nirehake ka reke tie agnisa ty kezake atao mba handreseagne i otay ty fanoagne o aly iohoe.”—AP News, 8 Marsa 2022.
“Tamy tinainy, le nitso-drano ty vahoake a Ukraine agne ty mpitarike Fivavahagne Ortodoksa, i Épiphane I a Kiev agney, mba hialy amy i Rosia, i manafike iareoy. ... Nirehake ka reke tie tsy manota ze ndaty mamono o maramila rosiana reo.”—Jerusalem Post, 16 Marsa 2022.
“Izahay agnisa ty Mpitarike Fivavahagne a Ukraine eto Naho ty Fikambanagne Ara-pivavahagne Hafa (UCCRO), le manohagne sady mivavake hoahy ty maramila i Ukraine naho ze miaro ty tane’ay toy amy ty fanafihagne anay.”—Fagnambaragne natao ty UCCROa tamy 24 Fevrie 2022.

Akore ty heve’o? Toko’e handrisike ty mpivavake ama’e ao mba handeha hialy vao ty fivavahagne mirehake ty vata’e ho mpanonjohy ty lia i Jesosy Kristy? Ino ty rehafe ty Baiboly?

Ty fivavahagne naho ty aly

Trea amy ty tantara amparake izay fa tsy nikalagne ndra nagnameloke o alio ty fivavahagne fa ndra vao mainke nandrisike o ndatio hialy sady tsy mba nanao ze hampisy filaminagne. Fa an-tao’e maro o Vavolombelo i Jehovah-o ro nirehake tie manao soamiatreke o fivavahagneo. Mareho ty raha nirehafe ty boke aman-gazete’ay retoa:

“Nandiso Tamà ty Kroazada” (frantsay), atoro o lahatsoratse iohoe tie o fivavahagne katolika a Roma agneo ro tompon’andraikitse amy ty famonoagne ndaty natao tamy ty tahinan’Andrianagnahare naho i Kristy.
“Tantaraegne amy ty lahatsoratse manao tihoe ‘Ny Eglizy Katolika ao Afrika’” fa tsy nahavita nikalagne o alim-pokò o fivavahagneo. Iareo aza nandrisike ty hamonoagne ndaty foko hafa.
Rehafe ty lahatsoratse manao tihoe “Ny Fivavahana ve no Diso?”, “Ty Anjara Asa ty Fivavahagne Tamy ty Aly” (frantsay), “Manohagne o Alio o Fivavahagneo” (frantsay) ty fomba nanohagna ty fivavahagne Katolika, Ortodoksa, naho ty mpitarike fivavahagne amy ty fiangonagne Protestanta, o alio. Sambe manohagne ty aly amy ty tane misy aze iareo.

Toko’e hanohagne o alio vao ty fivavahagne kristiana?

Izao ty nampianare i Jesosy: “Teào manahake ty vata’o ty ragne’o.” (Matio 22:39) “Teào avao ty fahavalo’areo.”—Matio 5:44-47.

Dineho zao: Afake mirehake vao o fivavahagneo tie magnorike ty lily i Jesosy miomba ty hatea, ie amy izao iareo mandrisike o ndatio hialy mba hamono ty hafa? Mba hahafantara’o ty vale izay, le henteo ty lahatsoratse manao tihoe “Ty Tena Kristiana Naho ty Aly” (frantsay), “Misy Mahavita Mitia ny Fahavalony Ve?”

Izao ty nampianare i Jesosy: “Tsy agnisa ty tontolo toy ty fanjakàko. Fa naho tagnisa ty tontolo toy, le ho nialy o ndatikò.” (Jaona 18:36) “Hovonoegne amy ty mesa ze mampiasa mesa.”—Matio 26:47-52.

Dineho zao: Naho ohatse areke tsy mialy o Kristianao ndra tie hiarovagne i Jesosy aza, toko’e hampiasa fitaovam-pialiagne noho ty anto’e hafa vao iareo? Vakio ty lahatsoratse manao tihoe “Mety ve Raha Miady ny Kristianina?”, hahatreava’o ty raha natao ty Kristiana tamy taonjato voaloha’e mba hagnorihagne ty modely i Jesosy naho ty fampianara’e.

Hanao akore ty hiafara o fivavahagne mandrisike o ndaty hialio?

Ampianare ty Baiboly fa hejen’Agnahare ty fivavahagne mirehake ty vata’e ho Kristiana ie amy izao iareo tsy magnorike ty fampianara i Jesosy.—Matio 7:21-23; Titosy 1:16.

Rehafe ty boke Apokalypsy tie melohen’Andrianagnahare o fivavahagne mirehake ty vata’e ho Kristiana reo satria iareo ty tompon’andraikitse amy ty fahafateza ‘o ndaty nivonovonoegne tan-tane etoa’ reo. (Apokalypsy 18:21, 24) Naho tea’o ty hahafantatse ty anto izay, le vakio ty lahatsoratse manao tihoe toy: “Iza moa i Babylona Lehibe?”
Nirehafe i Jesosy tie horinganegne ze fivavahagne lieren’Andrianagnahare satria nanao raty. Manahake ty hatae mamoa voa raty iareo “le hofiraegne vaho hatorake agnate afo ao.” (Matio 7:15-20) Vakio ty lahatsoratse manao tihoe “Ho Ringana Tsy ho Ela ny Fivavahan-diso!” mba hahafantara’o ty fomba hahatanteraha izay.

Tena Miambake o Vavolombelo i Jehovah-o

Magnorike ty lily i Jesosy mba tsy hiomba ty atia naho ty aroa amo o politikeo sady tsy mandrambe anjara amy ty aly, ty Vavolombelo i Jehovah a Rosia naho a Ukraine agne vaho amy ty tane hafa agne. Noho ze anto’e zay, le tsy mandrambe anjara amo o aly iohoe zahay ndra manohagne ty aly hafa. Noho izahay tapa-kevetse hagnorike avao ty raha inoa’ay amy Baiboly ao, le misy ty ila’e ama’ay enjehegne. (Jaona 15:19, 20; 2 Timoty 3:12) Maro zao ohatse ty Vavolombelo i Jehovah nigadrae ty fitondragne Rosiana. Ty ila’e aza nampijalé iareo. Nalae iareo ka ty toeram-pivavaha iareo a Rosia agne. Henteo ty www.jw-russia.org.

Henteo ty video maharetse efatse minitra manao tihoe “Tsy Nivalike ty Vavolombelo i Jehovah a Irkoutsk Agne Ndra tie Nampijale Iareo aza o Polisio” (frantsay) mba hahatreavagne ty fomba agnenjehagne o Vavolombelo i Jehovah a Rosia agneo noho ty finoa iareo.
Fa ela ty nahafantaragne o Vavolombelo i Jehovah tie tsy miomba ty atia naho ty aroa. Henteo ty video tihoe “Tsy Mivadika na eo aza ny Fanenjehana” mba hahatreava’o tie ino ty nagnampe iareo tsy hiomba ty atia naho ty aroa ndra tie nagnenjeke iareo aza ty Nazia tan’Alemaigne agne naho ty Firaisana Sovietika.

Henteo ty tragnom-poraro’ay mba hahaia’o soa ty raha inoa’ay, agnisa izay ty fampitamà ty Baiboly tie tsy hisy aly sasa amy ty hoavy. (Isaia 2:4; Jeremia 29:11) Naho te hahazo fagnazavagne fagnampe’e rehe, le ko misalasala magnantogne anay.

Sare nahazoan-dalagne, boake ankavia magnavana: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Misy fivavahagne 15 ty amy UCCRO ao, agnisa izay ty Ortodoksa, ty fivavahagne Grike, ty Katolika a Roma agne, ty Protestanta naho i Fivavahagne ara-pilazantsara rey, vaho ty Jiosy naho ty Silamo.