Mete amy ty Kristiana vao ty Mandrambe Anjara amy ty Aly?: Ino ty Rehafe ty Baiboly?

Trea amy i aly a Ukraine agney, fa maro ty mpitarike fivavahagne Kristiana mandrisike o ndatio mba handrambe anjara amy ty aly. Hotrea’o eto fa sambe manohagne i antoko o ndaty mialy rey iareo:

• “Fagneva ty homeim-boninahitse naho fankasitrahagne o maramilantikagneo satria miaro i Ukraine, i mpiharo firenena amy iareoy, amy i mpanafike rey. ... Mamy ty fo’ay nareo. Mivavake ho anareo naho manohagne anareo avao zahay.”​—Reha i Épiphane I, i mpitarike Fivavahagne Ortodoksa Ukreniana a Kiev agney, arake ty tatetse nitrea tamy The Jerusalem Post tao, tamy 16 Marsa 2022.

• “Tamy i lahadỳ, le nandamigne fotoam-pivavahagne hoahy ty maramila Rosiana ty filoha ty Fivavahagne Ortodoksa a Rosia agne mba handrisihagne iareo hiaro ty tanendraza iareo. ‘I Rosia avao’ tasa’e ro ‘mahavita manao izay.’ Ty a Moscou ao zao, fa agnate ty manohy i aly atao amy i Ukraine-y.”—Reuters, 3 Avrily 2022.

Toko’e handrambe anjara amy ty aly vao o Kristianao? Ino ty rehafe ty Baiboly?

Ino maregne ty raha rehafe ty Baiboly?

Atoro ty Baiboly fa tsy mandrambe anjara amy ty aly ze tena mpanonjohy i Jesosy Kristy.

• “Aheregno amy ty tragno’e i mesa’oy, fa hovonoegne amy ty mesa ze mampiasa mesa.”​—Matio 26:52.

  Tena mankatò o reha i Jesosy rehoe vao o ndaty mankasitrake ndra mandrambe anjara amo o alio?

• “Meako lily vaovao nareo, le ty mba hifankateava’areo. Manahake ty niteavako anareo ro toko’e mba hifankateava’areo ka. Naho mifankatea nareo, le izay ty hahafantara ze kila ndaty fa mpianako nareo”​—Jaona 13:34, 35.

  Managne i hatea amantaragne ze mpanonjohy ty lia i Jesosỳ vao o ndaty manohagne ndra mandrambe anjara amy ty alio?

Naho mipay fagnazavagne fagnampe’e rehe, le vakio ty lahatsoratse tihoe “Mety ve Raha Miady ny Kristianina?”

Ty Kristiana naho ty aly

Ho vita ty Kristiana vao ty tsy handrambe anjara amo o alio? Ie. Fa nirehafe ty Baiboly mialoha fa amo o andro iaignantikagne hinane zao, i atao tihoe “andro fara’ey”, le hisy ndaty boake amy ty firenena sambe hafa “tsy hianatse aly sasa” mifagnarake amy i raha nampianare i Jesosy rey.​—Isaia 2:2, 4, fagnamarehagne ambane peje.

• Naho mipay fagnazavagne fagnampe’e rehe, le vakio i lahatsoratse mifanohy amy ty Fitalakesan-davitse minday ty lohan-drehake manao tihoey “Mankasitraka ny Ady ve Andriamanitra?”

Tsy ho ela ty Jehovah,a i “Andrianagnahare ty fiadanagney,” le hampiasa i Fanjakà’e an-dagnitse agney mba handrombahagne o ndatio amy ty “fampijaleagne naho ty hampiarotegne.”​—Filipianina 4:9; Salamo 72:14.

• Henteo ty video tihoe Inogne o Fanjakan’Andrianagnahare Zao? mba hahatreava’o ty fomba hanoa’e izay