Ombia Vaho ho Tapetse o Alio? Ino ty Rehafe ty Baiboly?

Hoe ty António Guterres, Sekretera Jeneraly ty Firenena Mikambagne, miomba ty aly atao Iran amy i Israely, tamy 13 Avrily 2024: ‘Toko’e hikezake hanao ze azo’e atao ty tsikiraidraike mba hampihegnagne o alio. Izao ty fotoagne toko’e hanoagne izay.’

Maro ty raha miseho magneran-tane, le agnisa izay i aly a Azia ahandrefagne agney.

“Vao mainke mihamaro mandikoatse i tamy i Aly Lahibey II ty isa ty ndaty mijale noho o alio. Ndaty raike agnate ty efatse ty ihara izay magneran-tane.”​—United Nations Security Council, tamy 26 Janvie 2023.

Retoa iaby ty faritse ahatreavagne aly ty amy hinane zao: Israely, Gaza, Siria, Azerbaijan, Ukraine, Soudan, Etiopia, Niger, Myanmar, naho Haiti.a

Ombia vaho ho tapetse o alio? Afake ty hampisy filaminagne vao o mpitondrao? Ino ty rehafe ty Baiboly?

Trea magneran-tane o alio

Manjeke o alio magneran-tane. Trea boake amy izay tie fa marine ty hitapera’e. Magnatanterake ty faminania ty Baiboly miomba ze o fotoagne iaignantikagne zao ty fisia o aly magneran-taneo. Tokave ty Baiboly tihoe ‘fotoagne fifaragna ty tontolo toy’ o fotoagne iohoe.​—Matio 24:3.

• “Haharey aly naho talily miomba ty aly nareo. ... Hisy firenena hanafike firenena, le hisy fanjakagne hialy amy ty fanjakagne.”​—Matio 24:6, 7.

Vakio ty lahatsoratse tihoe “Ino ty Famantaragne i ‘Andro Fara’ey’ ndra i ‘Fara Androy’?” mba hahatreava’o tie nagnino ty fisia o alio ro magnatanterake ty faminania ty Baiboly.

Ty aly raike hamaragne ze aly misy magneran-tane

Fa nirehafe ty Baiboly mialoha fa agne ze aly raike hamaragne o alio iaby zay. Akore ty fomba hisehoa’e? Tsy aly atao o ndatio io fa “aly ty andro lahibein’Andrianagnahare Tompo ty Herỳ.” Izay i atao tihoe Haramagedonay. (Apokalypsy 16:14, 16) Afara o alio iohoe, le hiadagne o ndatio sady toe izay ty fa nampitamaen’Andrianagnahare o ndatio.​—Salamo 37:10, 11, 29.

Naho te hahazo fagnazavagne fagnampe’e miomba o aly hamaragne ze kila aly iohoe rehe, le vakio ty lahatsoratse tihoe “Ino ty Atao Tihoe Aly Hara-magedona?”