Anton Petrus/Moment via Getty Images
MIAMBENA LOGNANDRO!
Hisy Aly Lahibey vao Hiseho Tsy Hoela? Ino ty Rehafe ty Baiboly?
Tagnate ze 30 taogne lasa zay, le maro ty ndaty nahatsapa fa nilamigne sady nihasoa avao ty fifandrambesa ty tanàgne sambe hafa. Faie naho henteagne ty raha miseho amy izao, le mifanohetse amy izay ty raha misy.
‘Atahoragne hisy voka’e amy ty firenena hafa i aly a Gaza aoy. Manahake i Israely zao le fa manomboke mialy amy i Hezbollah amy ty sisin-tane i Liban eo.’—Reuters, tamy 6 Janvie 2024.
“I Iran ka ty amy izao le fa manafike tanàgne maromaro. Tsy izay avao fa nanomboke namboatse fitaovam-pialiagne tena mahery indraike iareo. Manohagne aze ka ty Rosia naho i Chine ty amy hinane zao. Tena olagne lahibey hoahy o firenena Tahandrefagneo zay”—The New York Times, tamy 7 Janvie 2024.
“Mbe mitohy avao ty aly atao i Rosia amy i Ukraine sady manimba raha maro.”—UN News, 11 Janvie 2024.
“Mihamatanjake ara-toe-karena naho ara-tafike ty chine. Manomboke mihamahaleo tegna ka ty Taiwan. Tsy tena milamigne soa ka ty fifandrambesa i Chine naho i Etazonia, le atahoragne hiterake aly naho kirizy ze raha rey zay.”—The Japan Times, tamy 9 Janvie 2024.
Ino ty raha rehafe ty Baiboly miomba ty korontagne misy magneran-tane? Hiterake aly lahibey vao zay?
Fa nirehafe ty Baiboly mialoha ty raha hiseho
Tsy nirehake mialoha o aly miambake treantikagne amy izaò ty Baiboly. Faie ndra tie eo zay, le fa nirehafe’e mialoha tie hisy aly hampiambake ze andro iaignantikagne zao sady “hagnafake ty filaminagne an-tane etoy.”—Apokalypsy 6:4.
Fa nirehafe ty boke i Daniela mialoha “fa amy ty fotoa ty fara’e,” le hifaninagne o fanjakagne matanjakeo. “Hifanoseke” iareo, ty dika izay hifaninagne satria sambe te hanjare fanjakagne fara izay ty matanjake. Handany “harena” ndra vola bey iareo mba hanoagne izay.—Daniela 11:40, 42, 43.
Hisy aly raike hoavy tsy hoela
Rehafe ty Baiboly fa vao mainke hiharaty heike ty raha misy amy ty tontolo toy eto aloha ty hihasoa’e. Nirehafe i Jesosy mialoha fa ‘hisy haoreagne lahibey mbe tsy nisy amparake izay.’ (Matio 24:21) Ty aly atao tihoe Haramagedona ty hamaragne o “haoreagne lahibey” iohoe. Rehafegne tihoe “aly ty andro lahibein’Andrianagnahare Tompo ty Herỳ” o aly iohoe.—Apokalypsy 16:14, 16.
Faie hagnavotse fiay o ndaty maro o Haramagedona iohoe fa tsy hamono iareo. Amy ty alala o alin’Andrianagnahare iohoe ty hamoagna’e o fanjakàn’olombelogne mampisy aly sady manimba raha marò. Vakio ty lahatsoratse retoa naho tea’o ty hahafantatse tie akore ty hahavy o aly Haramagedona iohoe hinday filaminagne nainai’e: