Fire ty Isa ty Vavolombelo i Jehovah Magneran-tane?

Akore ty fomba agnisaha’areo ty mpino ama’areo ao?

Ze mitory i talily soay isam-bolagne avao ro isahe’ay ho agnisa ty Vavolombelo i Jehovah. (Matio 24:14) Fa Vavolombelo i Jehovah vita badisa ty ila’e amy iareo, fa ty ila’e mbe tsy vita badisa faie fa mahafeno fepetse hitory.

Misy vola tsy maintsy aloa vao vaho izay manjare Vavolombelo i Jehovah ty ndaty raike?

Aha’a. Tsy miankigne amy ty fagnomezagne atao ty ndaty raike ty agnekeagne aze ho Vavolombelogne, ndra agnomezagne aze andraikitse ndra tombotsoam-panompoagne amy ty fivavaha’ay ao. (Asan’ny Apostoly 8:18-20) Tsy manognogne ty agnara’e ty ankamaroa o ndaty manao fagnomezagneo. Magnomey ty fotoa’e naho ty heri’e vaho ty vola’e ka ty Vavolombelogne tsikiraidraike mba hanohagnagne ty asa atao’ay magneran-tane. Atao an-tsitrapo zay arakarake ze vita’e.​—2 Korintianina 9:7.

Akore ty ahafantara’areo ty isa ty mpitory ama’areo ao?

Manao tatetse miomba ty asa fitoriagne natao’e amy ty fiangonagne misy aze agne ty Vavolombelogne iaby isam-bolagne. An-tsitrapo ty anoagne izay.

Atambatse ty tatetse voarae i fiangonagney, le alefa amy ty birò i sampagne an-toeragne eo. Atamba ty sampagne tsikiraidraike ty tatetse ty fiangonagne iaby amy ty firenena ndra ty faritane fehé’e, avy eo alefa’e amy ty foibey ty Vavolombelo i Jehovah agne.

Isake tie tapetse i taom-panompoagney,a le henteagne tie fire ty tampon’isa ty Vavolombelogne amy ty tane tsikiraidraike tamy i taogney. Atambatse zay naho fa avy eo, mba hahatreavagne ty isa ty Vavolombelo i Jehovah magneran-tane. Misy tatetse miomba ty tane tsikiraidraike amy ty fizaràgne manao tihoe “Maneran-tany” amy ty tragnom-poraro’ay ao. Misy fitantaragne miomba ty asa fitoriagne ka ty ao. Mampahery anay i tatetse rey, manahake ty niseho tamy i Kristiana voaloha’e rey avao.​—Asan’ny Apostoly 2:41; 4:4; 15:3.

Isahe’areo ho agnisa ty Vavolombelo i Jehovah ka vao ndra ty ndaty miarake mivory ama’areo avao?

Aha’a. Faie rambese’ay soa avao iareo naho fa avy mivory miarake ama’ay. Avy magnatreke ty Fahatsiarovagne ty nimateza i Kristy ka ty ankamaroa’e. Fantatse avao areke tie fire iareo naho fa afahagne amy ty isa ze ndaty magnatreke o fivoriagne io ty isa ze Vavolombelogne. Nisy 21 119 442 ty nagnatreke fahatsiarovagne tamy 2024.

Maro ka ty ndaty ampianare’ay Baiboly maimaim-poagne, ndra tie mbe tsy magnatreke ty fivoria’ay aza. Nitarike fampianaragne Baiboly 7 480 146 isam-bolagne zahay tamy 2024. Soa ho marehegne fa ndra tie maromaro aza ty ndaty miarake mianatse, le isahe’ay ho fampianaragne Baiboly raike avao zay.

Nagnino ro maro ty isa’areo amo o fanjakagneo agne, naho ampitahaegne amy ty isake mei’areo?

Mateteke ty biròm-panjakagne miomba ty fagnisaham-bahoake ro magnontane tie ino ty fivavaha ty ndaty raike, le arakarake ty toin-drehake azo’e ty amarita’e ty isa ty ndaty amy ty fivavahagne raike ao. Mirehake ohatse ty birò miomba ty fagnisaham-bahoake a Etazonia agne fa naho fa manao ty asa’e iareo, le “ikezaha’e fantaregne tie mihevetse ty tegna’e ho agnisa ty mpivavake amy ty fivavahagne raike ao” i ndatỳ ndra tsy agnisa’e. Nirehake areke iareo fa “tsy voatere hitombegne” ty isake azo’e. Faie izahay naho fa magnisake, le ze mitory naho magneregne tatetse avao ro isahe’ay ho agnisa ty Vavolombelo i Jehovah fa tsy ze manao ty tegna’e ho Vavolombelogne.