Hira Mahavy Antikagne Hiharine an’Andrianagnahare

Fagnomezagne fanjaka boake amy i Jehovah o hirao. Misy voka’e amy ty eretserentikagne, magnova ty fihetseham-pontikagne sady mandrisike antikagne hanao raha. Tena maregne zay naho i hirantikagne rey ro rehafegne. Tsy vita izay ka fa mahavy antikagne hiharine i Jehovah i hira rey.

Nanomboke tamy 2014, le hira miiake 70 ty fa naboake, sady misy amy ty firehake losotse ty 500 ty raike amy i hira rey fara fahatsiampe’e. Va’e hieretseretse rehe tie: ‘Ia iaby ty miasa amy i hira rey? Akore ty atao iareo naho fa manao aze?’

Akore ty Atao mba Hahavitagne i Hira Rey?

Ty ekipa mikarakara hira, amy ty Sampan-draharaha ty Feo Naho Video ty mamokatse i hira rey, le ty Komity ty Fampianaragne amy ty Filan-keve-pitantanagne eo ty miandraikitse o sampan-draharaha iohoe. Rahalahy naho rahavave 13 ty mahaforogne o ekipa iohoe sady magnampe amy ty famorognagne i togno’ey, fagnamboaragne ty feo’e, ty fanoagne ty fandaharam-potoa’e, vaho ty asa hafa mifandrambe ama’e. Tsy vita izay fa neké o Komity ty Fampianaragneo ka ty hampiasaegne mpiasa an-tsitrapo, miasa an-tragno’e agne, magneran-tane mba hagnampe amo o asa iohoe, agnisa izay ty mamorogne i togno i hiray, mititike raha magneno vaho i mihira rey. Miambane o rahalahy naho o rahavave rehoe, le mampiasa ty fahaiza’e faie tsy mipay voninahitse hoahy ty tegna’e iareo naho fa manao o asa iohoe.

Akore ty atao mba hahavitagne hira raike? Voaloha’e, le mifily ty andinin-teny ioregna’e ty Komity ty Fampianaragne naho ty fihetseham-po teagne haboake ama’e. I ekipa ty mozikey amy izay manendre ze hamorogne i mozikey naho ze hamorogne i togno’ey. Afara izay, le rambesem-peo heike ireke mbe tsy tena vita soay. Hamaregne i Komity ty Fampianaragney heike igne, le magnomey soso-kevetse amy ty fomba hagnasoagne aze iareo naho fa avy eo. Hasoae i ekipa mikarakara hiray reke naho fa avy eo sady rambesem-peo amy izay amy ireke tena fa vita milamigne soay. Rambesem-peo amy ty toeragne sambe hafa i hira rey, ohatse amy ty sampagne agne ndra amy ty tragno o ndaty managne fitaovagne fandrambesam-peo.

Mampiasa programan’ordinatera sambe hafa i rahalahintikagne rey naho fa mamoron-kira sady mandrambe feo. Tsy maintsy mampiasa fitaovagne hafa ka iareo, ohatse raha magneno, bafila naho fitaovagne hafa mifandrambe amy izay, vaho mikro. Eo amy ty 100  dolara (amerikana) hatrake 1 000 dolara mahery ty vily ty mikro raike. Nandany 116 000 dolara (amerikana) tikagne tamy 2020 mba hivilianagne fitaovagne fandrambesam-peo hira.

Akore ty atao mba hitsitsiagne vola? Mpiasa an-tsitrapo miasa an-tragno’e agne ty tena maro amy ty ekipa mikarakara o hirao fa tsy Betelita. Mateteke ka programan’ordinatera ty ampiasaegne mba hamorognagne naho hamokaragne hira, fa tsy tihoe mpititike raha magneno maro ro avory amy ty toeragne raike le rambesem-peo.

“Magnatanjake ty Finoako”

Tea o rahalahio naho o rahavaveo ty mitsanogne i hirantikagne rey. Hoe ty Tara, mipetrake an’Alemaigne agne: “Magnampe ahy ho tony i hira rey naho fa minekoneko raho. Hoe mamihigne ahy zay ty Jehovah naho fa mitsanogne i hira rey amy ty firehako raho.” Hoe ka ty Dmitry, rahalahy a Kazakhastan agne: “Teako ty mitsanogne i hira rey satria magnampe ahy hagnorike ty toro lala ty Baiboly fa tsy manahake ty hira amy ty tontolo toy. Magnampe ahy hifantoke amy ty raha ara-pagnahy avao i hira rey.”

Nirehake ty fihetseham-po’e miomba o hirantikagneo ka ty Delia, boake Afrika Atimo agne. Hoe reke: “Magnatanjake ty finoako i hira rey. Naho fa kivy ndra miatreke olagne raho, le mateteke misy hira mifanandrife amy i rahay afake magnampe ahy. Ndra ty feo i mozikey avao aza le fa misy voka’e amy ty fihetseham-poko.”

Ty ila’e amy i hirantika rey ka ty hira nanjare fara izay ty tea o rahalahio naho o rahavaventikagneo. Hoe ty Lerato, boake an’Afrika Atimo agne ka: “Ty hira ‘Efa ao Ambadika Ao’ naho i ‘Alao Sare An-tsaigne i Paradisay’, le nagnampe ahy hisaintsaigne ty fotoagne hifankatreavako indraike amy i reneko. Isake tie mitsanogne o hira rehoe raho, le hoe treako zay reke milay mbamako mbeo sady hamihigne ahy.”

Misy hirantika raike zay tena nagnampe ze tanora raike a Sri Lanka agne zay. Hoe reke: “Niharatieratie i mpampianatse anaỳ tagnatreha i mpiara-mianatse ama’aỳ eo raho noho iraho Vavolombelo i Jehovah. Natahotse raho, le tsy nifantako iaby ty raha horehafeko. Nirisihe i nene hitsanogne ty hira tihoe ‘Mianara mba Handroso Tsara’ raho naho fa niavy an-tragno ama’ay agne. Nitreako tamy i hira igne fa toko’e hanao fikarohagne sady hagnomagne ty raha havaleko raho. Nirehake tamy i mpampianatse anaỳ raho naho fa nimaray igne. Nitsanogne ahy reke sady nirehake tie izay vaho azo’e ty raha inoa o Vavolombelo i Jehovah-o. Misaotse ty fandamina i Jehovah raho magnomey antikagne i hira magnampe antikagne hanagne herim-po rey.”

Aia ty ahazoantikagne vola mba hamokaragne i hira rey? Amy ty alala ty fagnomezagne hoahy ty asa magneran-tane. Maro ty fomba azo anoagne io amy donate.jw.org ao. Misaotse anareo amy ty fatariha’areo.