Fitaovagne Fianaragne Baiboly Tena Miambake

Natalily o Filan-keve-pitantanagneo tamy Janvie 2021 ty fiboaha ty fitaovagne fianaragne Baiboly tihoe Ankamamio Nainai’e o Fiaignagneo!a Ino ty nitsapa’o naho fa naharey o fitaliliagne iohoe? Hoe ty Matthew boake a Kanada agne: “Tena nifale raho! Vao mainke nitombo ze hafaleako zay naho fa nitsanogne i lahajaka naho i video magnazava ty fomba namboaragne sady nanoagne andragne o fitaovagne iohoe. Tena tsy niligneko ty hahatrea sady hampiasa aze.”

Vaovao ty fomba fitarihagne fianaragne Baiboly amy i Ankamamio Nainai’e o Fiaignagneoy! Faie tsy izay avao ty mampiambake aze amy ze fitaovagne fianaragne Baiboly taloha’e. Naho mampiasa i Ankamamio Nainai’e o Fiaignagneoy! vita pirintỳ rehe, le tena hotrea’o ty mampiambake aze. Andao moa tikagne hagnente tie akore ty fomba namboaragne o boke iohoe mba hahafantara’o izay.

Boke Vaovao Sady Miambake amy i Taloha Rey

Taratasy matevegne. Nagnino io ro tena ilaegne? Misy sare miloko losotse ty 600 i boke Ankamamio Nainai’e o Fiaignagneoy! Miheregne impolo eo ho eo ty sare amy i boke Ampianaregne Antikagney, vaho izay mitovy amy izay. Nahatreavagne faritse foty tsy misy soratse sady tsy misy sare isake peje amy i boke vaovaoy. Faie ty olagne naho matify i taratasỳ, le va’e hotrea ty sare amy ty ambaly ty peje raike. Mba hialagne amy izay areke, le nanao fagnandramagne karazan-taratasy efatse fa nampiasaentikagne amy ty fanoagne pirinty o rahalahy amy Sampan-draharaha Fanoagne Pirinty Magneran-tane (IPD), a Wallkill, New York, Etazonia etoao. Nidinehe o Komity ty Fanoratagne amo o Filan-keve-pitantanagneo soa ty tsikiraidraike amy i karazan-taratasy efatse rey, le i aze tsy le tena mangarakarakey ty nijobogne iareo. Maregne fa sarotse ty vily o karazan-taratasy jinobo iareo iohoe naho ampitahaegne amy i karazan-taratasy nampiasaegne amy ty boke naho gazetentika mahazatse rey, faie mba tsy le hagnelengelegne ty maso o mpianatse Baibolio ty sare ambaly ty peje raike naho fa mamaky ty peje tsikiraidraike amy i boke Ankamamio Nainai’e o Fiaignagneoy! iareo.

Miambake ty fogno i boke vaovaoy. Tsy mitovy amy ty fogno o boke hafao ty fogno’e satria nirakofagne sasé tena matify reke mba ho fiarovagne aze. Miambake o raha napiteke ama’e iohoe satria manahake o sikotsio reke faie tsy i ila’e mahazatse antikagney. Noho ze raha zay, le nanjare trea soa i sare amy fogno’e eoy sady tsy tsiela simba ka i bokey ro tsy le hisy fiovà’e bey ndra tie ampiasaegne mateteke aza. Faie miheregne in-dime amy ty vily i ila’e mahazatse rey ty vily o raha hoe sikotsy apiteke amy ty fogno i bokey iohoe. Niara-niasa areke ty birò i sampagne maromaro mba hivilianagne aze.

Nagnino o fitaovagne sarotse rehoe ro finily? Izao ty nihazavae ty rahalahy raike miasa amy ty IPD ao: “Mitamà tikagne fa hampiasaegne soa o boke iohoe, sady teantikagne mbe ho soa avao ty fagnenteagne aze ndra tie fa ampiasaegne mateteke aza reke.” Nirehake ty Eduardo, miasa amy ty Birò Fanoagne Pirinty amy ty sampa i Brezily agne tie: “Tena fale tikagne fa fitaovagne tena fanjaka ty ampiasae ty fandamina i Jehovah mba hahavy i bokey ho soasoa, haharetse, hahafale ty hampiasa aze, sady mba tsy lanilany avao o vola fagnomezagneo.”

Natao Pirinty Tamy i Arete-manjamagne COVID-19-oy

Nanomboke nanao pirinty i Ankamamio Nainai’e o Fiaignagneoy! tikagne tamy Marsa 2021. Tsy mora ty nanao izay tagnate ty arete-manjamagne COVID-19. Ty anto’e, nikatogne ty Betela, le tsy nisy mpiasa an-tsitrapo afake nagnampe amy i fanoagne pirintỳ, sady tsy niafake nampilitse Betelita vaovao iareo. Misy amy ty toeragne fanoagne pirinty ila’e areke tsy niampe ty ndaty niasa tao. Ty toeragne fanoagne pirinty ila’e tsy niazo nampiasaegne naharetse satria tsy maintsy nakatogne noho ty fepetse apetra o fanjakagneo.

Akore ty nandreseagne o raha sarotse rehoe? Naho fa niazo nampiasaegne i toeragne fanoagne pirinty rey, le nisy rahalahy naho rahavave boake amy ty sampan-draharaha ty Betela hafa tinendre mba hagnampe amy i fanoagne pirintỳ. Hoe ty Joel, miasa amy ty IPD: “Tena sarobily ty fahafoezan-tegna naho ty fahavognona iareo hianatse fanendreagne vaovao mba hahavitagne i asay.”

Ndra tie nisy aza i raha sarotsey, le fa nahavita nanao pirinty i Ankamamio Nainai’e o Fiaignagneoy! an-tapetrisa’e tikagne. Intoagne iaby ty fitaovagne nilaentikagne mba hanoagne aze: Fitaovagne fanoagne pirinty, raha hoe sikotsy, taratasy, ranomainte, naho lakoly. Dime volagne tafara ty nanoagne pirinty voaloha’e, le fa ho 2,3 tapetrisa dolara amerikana ty vola nilany amo o fitaovagne rehoe avao. Mba hitsitsiagne vola, le nandineke soa ty isa ty nilae o fiangonagneo avao heike zahay, le izay ro natao pirinty.

“Tena Miambake Vata’e”

Manao akore ty fihetseham-po o mpampianatse Baibolio naho i ndaty ampianare iareo rey amo o fitaovagne fampianaragne Baiboly vaovao iohoe? Hoe ty Paul, rahalahy boake a Ostralia agne: “Tena mahafinaritse ty mampiasa i Ankamamio Nainai’e o Fiaignagneoy! sady fale avao raho naho fa mitarike fianaragne Baiboly ama’e. Soasoa ty pozipozi’e sady mora ampiasaegne i bokey. Mazava ty fagnazavagne ao, manohigne ty fo o mpianatseo i fagnonteneagney, i videoy, i sare rey, ty tabilò ao, vaho i tihoey ‘anò toy” hoahy i mpianatsey. Tena miambake vata’e io sady mandrisike ahy hagnasoa ty fomba fampianarako.”

Izao ty nirehafe ze mpianatse Baiboly raike a Etazonia agne zay: “Tena teako i boke vaovaoy. Magnampe ahy hahazo soa ty hevetse lahibey amy i lesogney i sarey. Manohigne ty foko i video rey sady mandrisike ahy hanao raha.” Mianatse indroe isan-keregnandro o mpianatse Baiboly iohoe sady magnatreke tsy tapake ty fivoria ty fiangonagne.

An-tapetrisa’e ty natao pirinty amy i Ankamamio Nainai’e o Fiaignagneoy! amy ty firehake maro. Naho ty maregne, le neké ty Filan-keve-pitantanagne haboake amy ty firehake 710 o boke iohoe. Miheregne in-340 ty firehake nampiboahagne i boke Ampianaregne Antikagney vaho izay mitovy amy izay.

Akore ty nahavitagne nandoa i vola nanoagne pirinty rey? Amy ty alala ty fagnomezagne hoahy ty asa magneran-tane. Maro amy i fagnomezagne rey ro atao amy donate.jw.org ao. Tena ankasitraha’ay ty fatariha’o, satria magnampe amy ty famokaragne fitaovagne fianaragne Baiboly hoahy ze te hianatse ty miomba i Jehovah sady te “hankamamy o fiaignagneo nainai’e.”​—Salamo 22:26.