LESOGNE 7

Mirehafa Raha Maregne

Lioka 1:3

TY DIKA IZAY: Toko’e ho maregne soa ty fagnazavagne ampiasae’o, amy izay tsy ho diso ty raha ampianare’o.

Fagnazavagne maregne soa ro paliao. Mipaliava hevetse boake amy ty Saontsin’Andrianagnahare ao. Naho mbe azo’o atao avao, le mamakia andine’e boake ao. Naho fagnazavagne hafa ty tea’o hampiasaegne, ohatse zao vaovao ndra tantara o ndaty, le fantaro kera tsy le maregne soa reo ndra fa nisy fagnitsiagne.
Mitaoa mba tsy ho diso ty fagnazava’o. Naho hagnazava andinin-teny ohatse rehe, le fantaro tie inogne ty tea’e horehafegne naho henteagne ty andinin-teny magnodidigne. Tsy toko’e hifanohetse amy ty raha rehafe ty Baiboly manontolo naho ty “mpanompo mahihitse naho mahimbagne” ty raha rehafe’o. (Mat. 24:45) Naho te hampiasa fagnazavagne naboa o ndaty rehe, le ko amboamboaregne ndra ovagne ty tea i ndatỳ rehafegne, fa ze tena reha’e ro rehafo.

Ko mampitombo naho fa mitantara raha ndra mirehake tarehemareke. Ambeno soa mba tsy hiova ho “ndaty maro” ty firehafa’o tihoe “ndaty tsiampeampe,” ndra hiova tihoe “mateteke” tihoe “kindraikindraike.”
Hazavao soa ty porofo ampiasae’o. Naho fa boake namaky andinin-teny rehe, le ampeo i ndatỳ hahazo soa i andine’ey. Azo’o atao ohatse ty mirehake fagnoharagne ndra mametrake fagnonteneagne mete soa.