Tena Kristiana vao o Vavolombelo i Jehovah-o?

Mino zahay Vavolombelo i Jehovah tie tena Kristiana. Ino ty anto’e? Mareho tie mifototse amy ty ino ty raha inoa’ay, nagnino zahay ro atao tihoe Vavolombelo i Jehovah, sady ino ty porofo tie tena mifankatea zahay.

1. Mifototse amy ty ino ty raha inoa ty Vavolombelo i Jehovah?

Hoe ty Jesosy: “Ty Saontsi’o [Andrianagnahare] ro hamarenagne.” (Jaona 17:17) Nifototse tamy ty Saontsin’Andrianagnahare ty raha nampianare i Jesosy. Io ka ty ifotora ty raha inoa ty Vavolombelo i Jehovah. Tamy ty taogne 1870 tagne ho agne ohatse, le nisy mpianatse Baiboly tsiampe nanomboke nandineke soa o Baibolio. Nifototse tamy ze raha rehafe ty Baiboly ty raha ninoa iareo, ndra tie tsy nitovy tamy ty raha ninoa ty fiangonagne ila’e tamy izay aza. Nirehafe iareo tamy ty hafa naho fa niavy eo ze hamarenagne tagnate Baiboly ao nitrea iareo.a

2. Nagnino zahay ro atao tihoe Vavolombelo i Jehovah?

Atao i Jehovah tihoe vavolombelo’e ze ndaty mivavake ama’e satria mirehake ty maregne miomba aze. (Hebreo 11:4–12:1) Taloha ohatse, le nisaontsy tamy ty mpanompo’e ty Andrianagnahare tie: “Inareo ro vavolombeloko.” (Vakio ty Isaia 43:10.) Natao tihoe “Vavolombelogne Tsy Mivalike” ka ty Jesosy. (Apokalypsy 1:5) Tamy 1931 areke, le natao tihoe Vavolombelo i Jehovah zahay. Rehareha’ay ty minday o agnaragne iohoe.

3. Akore ty ampisehoa ty Vavolombelo i Jehovah fa managne hatea manahake i Jesosy iareo?

Tena tea i Jesosy i mpiana’e rey, le nanjare hoe keleia’e iareo. (Vakio ty Marka 3:35.) Keleian-draike hoe izay ka ty Vavolombelo i Jehovah magneran-tane satria miharo saigne. Izay ty anto’e mahavy anay mifampitoka tihoe rahalahy naho rahavave. (Filemona 1, 2) Magnorike ty lily toy ka zahay: “Teao ze rahalahy amy ty finoagne ao.” (1 Petera 2:17) Mampiseho ze hatea zay amy ty fomba maro o Vavolombelo i Jehovah-o. Mifagnampe ohatse iareo naho fa misy zoem-boigne ndra sahiragne ty mpiharo finoagne amy iareo magneran-tane.

ANDAO HANDINEKE TY PITSOPITSO’E

4. Mifototse amy Baiboly ao ty raha inoa’ay

Nisaontsy mialoha ty Jehovah fa vao mainke hihamazava ty hamarenagne amy Baiboly ao. Vakio ty Daniela 12:4, sady iharò midineke ty fagnonteneagne toy:

• Ino ty “hitombo bey” amy ty vahoan’Andrianagnahare eo naho fa manohy mandineke o Baibolio iareo?

Dineho ty natao ty mpianatse Baiboly, agnisa izay ty Charles Russell naho fa nandineke ty Saontsin’Andrianagnahare iareo. Alefaso i VIDEO oy, sady iharò midineke ty fagnonteneagne toy.

VIDEO: Nikaroke ty Hamarenagne (7:45)

• Arake i videoy, akore ty natao i Charles Russel naho i mpianatse Baiboly nama’e rey naho fa nandineke o Baibolio?

Raha mahaliagne

Kindraike le nahitsy ty raha ninoa’ay. Ino ty anto’e? Naho fa manjirike i masoandroy, le mihamazava tsikede. Hazavaen’Andrianagnahare tsikede hoe izay ka ty fahatakaragne ty hamarenagne amy ty Saontsi’e ao. (Vakio ty Ohabolana 4:18.) Ndra tie tsy miova aza o Baibolio, le ahitsi’ay ty fampianara’ay naho fa taka’ay soa ty raha rehafegne ao.

5. Magnambara ty maregne miomba i Jehovah zahay

VIDEO: Agnaragne Amantaragne Antika (2:40)

• Nagnino ro mete soa ty anoagne anay tihoe Vavolombelo i Jehovah?

Nagnino ty Jehovah ro nifily ndaty ho vavolombelo’e? Satria maro ty vande mahakasike aze, le nifily ndaty reke mba hampahafantatse ty maregne miomba aze. Intoa misy vande roe:

Misy fivavahagne ila’e mampianatse ty ndaty mivavake ama’e ao fa tean’Andrianagnahare hampiasa sare masigne iareo naho fa mivavake. Vakio ty Levitikosy 26:1, sady iharò midineke ty fagnonteneagne retoa:

• Ino ty tena maregne? Akore ty fivazohoa i Jehovah ty fampiasagne sare masigne?

Mampianatse ty mpitarike fivavahagne ila’e fa Andrianagnahare ty Jesosy. Vakio ty Jaona 20:17, sady iharò midineke ty fagnonteneagne retoa:

• Ino ty tena maregne? Ndaty raike avao vao ty Andrianagnahare naho i Jesosy?

• Nagnino ro mahasoa azo ty nagniraha i Jehovah i Vavolombelo’e rey mba hampahafantatse ty maregne miomba Aze naho i Ana’ey? Ino ty tsapa’o noho ze raha zay? Tsy mba magniry ho agnisa i Vavolombelo’e rey ka vao rehe?

6. Mifankatea zahay

Ampitovie ty Baiboly amy ty ratsam-batagne ty Kristiana. Vakio ty 1 Korintianina 12:25, 26, sady iharò midineke ty fagnonteneagne retoa:

• Ino ty atao ty tena Kristiana naho fa misy nama’e mijale?

• Akore ty heve’o, tena mifankatea vao o Vavolombelo i Jehovah-o?

Naho fa misy Vavolombelo i Jehovah amy ty tane ila’e mijale, le avy le manao raha ty Vavolombelo i Jehovah magneran-tane mba hagnampeagne aze. Intoy misy ohatse raike, alefaso i VIDEO oy. Iharò midineke ty fagnonteneagne toy naho fa avy eo.

VIDEO: Niazo ty Tsikolony Matio ty Haiti (5:29)

• Ino ty natao o Vavolombelo i Jehovah-o naho fa nisy nizoem-boigne? Magnaporofo ino zay?

FAMEREGNAGNE

Tena Kristiana o Vavolombelo i Jehovah-o. Keleian-draike magneran-tane zahay sady mifototse amy Baiboly ao ty raha inoa’ay. Mampahafantatse ty maregne miomba i Jehovah ka zahay.

Fameregnagne

• Nagnino zahay ro atao tihoe Vavolombelo i Jehovah?

• Akore ty ampisehoa’ay tie mifankatea zahay?

• Tena Kristiana vao o Vavolombelo i Jehovah-o, arake ty heve’o?

FAGNAZAVAGNE FAGNAMPE’E

Fantaro soa ty tantara’ay.

Nampiseho ny Finoany ny Vavolombelon’i Jehovah ​—Fizarana Voalohany: Niala Tamin’ny Haizina (1:00:53)

Misy ohatse raike ty ato mampiseho ty natao ty Vavolombelo i Jehovah mba hialàgne amy ty fampianaran-diso.

Magnomey Voninahitse ty Tahina i Jehovah ty Vahoa’e (7:08)

Ho trea’o ato ty valem-pagnonteneagne miomba o Vavolombelo i Jehovah-o.

“Fagnonteneagne Fapetra o Ndatio Miomba o Vavolombelo i Jehovah-o” (lahatsoratse amy jw.org ao)

Nimpiarotegne ty Stephen tie taloha. Faie ho trea’o ato tie, ino ty raha nitrea’e tamo o Vavolombelo i Jehovah-o eo le nahavy aze niova.

“Vao Mainke Nanjeke ty Hatea Aliko” (Fitalakesan-davitse 1 Jolay 2015)