LESOGNE 28
Ankasitraho ty Raha Natao i Jehovah Naho i Jesosy ho Azo
Fa nisy fotoagne vao rehe nahazo fagnomezagne tamy ty nama’o? Azo antoke fa tena nifale rehe sady tea’o haseho ama’e ty fankasitraha’o i fagnomezagney. Misy fagnomezagne tsy misy hoe’e nimey i Jehovah naho i Jesosy antikagne. Akore ty ampisehoantikagne fa mankasitrake io tika?
1. Ino ty toko’e hataontikagne naho mankasitrake ty raha natao i Jehovah naho i Kristy ho antikagne tika?
Mampitamà ty Baiboly fa hiaigne nainai’e ze “manoro ty finoa’e [i Jesosy].” (Jaona 3:16) Ino ty dika tihoe manoro ty finoa’e? Tsy ampe ty mirehake tie mino i Jesosy. Toko’e hatorontikagne amy ty safidy ataontikagne naho ty raha ataontikagne i finoantikagne zay. (Jakoba 2:17) Vao mainke ho nama i Jesosy naho i Jehovah Rae’e tikagne, naho atorontikagne amy ty raha ataontikagne vaho ty raha rehafentikagne tie manam-pinoagne tika.—Vakio ty Jaona 14:21.
2. Ino ty fankalazagne manokagne hagnampe antikagne hampiseho ty fankasitrahantikagne ty raha natao i Jehovah naho i Jesosy?
Misy fomba raike hafa ka azontikagne ampisehoagne tie mankasitrake i sorogne natao i Jesosỳ tikagne. Nirehafe i Jesosy tamy i mpiana’e rey zay, taloha i halegne nimateza’ey. Tamy io reke ro nankalaza voaloha’e i atao ty Baiboly tihoey: “Mahakama Hariva i Tompo”, ndra Fahatsiarovagne ty nimateza i Kristy. (1 Korintianina 11:20) Tea i Jesosy ho tadidy i apostoli’e rey naho ty Kristiana maregne afara atoy fa nanolotse ty fiai’e ho antikagne reke. Nagnomey lily miomba o fankalazagne iohoe ty Jesosy tie: “Tohizo avao zao ho fahatsiarovagne ahy.” (Lioka 22:19) Naho fa magnatreke fahatsiarovagne rehe, le izay ty ampisehoa’o fa ankasitraha’o ty hatea lahibey naseho i Jehovah naho i Jesosy ho antikagne.
ANDAO HANDINEKE TY PITSOPITSO’E
Hodinehentikagne ato ty fomba hafa azontikagne ampisehoagne ty fankasitrahantikagne ty hatea lahibey naseho i Jehovah naho i Jesosy. Ho treantikagne ato ka ty mahalahibey ty Fahatsiarovagne ty nimateza i Kristy.
3. Ino ty azontikagne atao mba hampisehoagne fa tena mankasitrake i solovoigney tika?
Alao sare an-tsaigne tie nalipo ty rano rehe, faie nisy ndaty nagnavotse azo. Tsy ho raharahae’o vao i raha natao o ndaty iohoe tama’o zay? Sa hipay fomba hampisehoa’o ama’e rehe tie tena mankasitrake aze?
Tsy ho niavotse ka tikagne naho tsy nanao raha ty Jehovah. Vakio ty 1 Jaona 4:8-10, sady iharò midineke ty fagnonteneagne retoa:
Nagnino ro atao tihoe fagnomezagne miambake i sorogne natao i Jesosỳ?
Ino ty tsapa’o naho fa mieretseretse ty raha natao i Jehovah naho i Jesosy ho azo rehe?
Akore ty ampisehoantikagne tie ankasitrahantikagne ty raha natao i Jehovah naho i Jesosy ho antikagne? Vakio ty 2 Korintianina 5:15 naho ty 1 Jaona 4:11; 5:3. Naho fa boake namaky andinin-teny raike rehe, le iharò midineke ty fagnonteneagne toy:
Naho henteagne ze andinin-teny zay, akore ty ampisehoantikagne fa mahay mankasitrake tikagne?
4. Tahafo ty Jesosy
Fomba hafa azontikagne anoroagne ty fankasitrahantikagne i Jesosy ty fanahafagne aze. Vakio ty 1 Petera 2:21, sady iharò midineke ty fagnonteneagne toy:
Akore ty ampisehoa’o fa magnorike marine ty lia i Jesosy rehe?
Tea i Jesosy o Saontsin’Andrianagnahareo. Nitory i talily soay reke, sady nagnampe ty hafa
5. Magnatreha ty Fahatsiarovagne ty nimateza i Kristy
Vakio ty Lioka 22:14, 19, 20, mba hamantaragne ty raha niseho tamy ty fankalazagne voaloha’e i Mahakama Hariva i Tompoy. Iharò midineke ty fagnonteneagne retoa:
Ino ty raha niseho tamy i Mahakama Hariva i Tompoy?
Mampiseho ino i mofoy naho i divaỳ?—Henteo ty andine’e 19, 20.
Tea i Jesosy hankalaza i Mahakama Hariva i Tompoy i mpiana’e rey naho fa miheregne i andro nimateza’ey. Izay ty mahavy ty Vavolombelo i Jehovah mivory isan-taogne mba hahatsiaro ty nimateza i Kristy. Magnorike soa ty modely nengà i Jesosy iareo naho manao izay. Mba hahafantaragne o fotoagne lahibey iohoe, le alefaso i VIDEO oy. Iharò midineke ty fagnonteneagne toy naho fa avy eo.
Ino iaby ty raha ho trea’o naho fa amy i fahatsiarovagney agne?
Mampiseho i vata i Jesosy voririke sady nafoe’e ho antikagney i mofoy. Mampiseho ty lio’e i divaỳ
MISY TY MIREHAKE TIE: “Naho fa i rehe mino i Jesosy, le fa ho voavonje zay.”
Akore ty azo’o ampiasagne ty Jaona 3:16 naho ty Jakoba 2:17 mba hampisehoagne fa misy raha hafa toko’e hatao ka?
FAMINTIGNAGNE
Mampiseho ty fankasitrahantikagne ty raha natao i Jesosy ho antikagne tika naho manoro ty finoantikagne aze sady magnatreke ty Fahatsiarovagne ty nimateza’e.
Famintignagne
Ino ty dika tihoe manoro finoagne i Jesosy?
Ino ty tea’o hatao mba hampisehoa’o fa mankasitrake ty raha natao i Jehovah naho i Jesosy ho azo rehe?
Nagnino ro tena lahibey ty magnatreke ty Fahatsiarovagne ty nimateza i Kristy?
FAGNAZAVAGNE FAGNAMPE’E
Mandrisike antikagne hanao ino ty nimateza i Kristy?
Ino ty atao tihoe finoagne sady akore ty ampisehoantikagne fa manam-pinoagne tika?
“Asehò fa Tena Mino i Fampitamà i Jehovah-y Rehe” (Fitalakesan-davitse Oktobra 2016)
Ino ty voka’e tamy ty ampela toy naho fa nisaintsaigne i sorogne natao i Kristỳ reke?
“Magnova Ndaty ty Baiboly” (Fitalakesan-davitse 1 Aogositra 2011)
Nagnino ro ndaty tsy ampe avao ty homagne amy i mofo ty fahatsiarovagney naho minogne amy i divaỳ?