Mahay Mifehe Tegna

INO TY DIKA IZAY?

Mahay mifehe tegna ty ndaty raike naho:

• Mahay mandigne

• Mahafehe ty fagniria’e naho ty fihetseham-po’e

• Manao ze toko’e hatao’e ndra tie tsy tea’e aza ty manao izay

• Mipay ze hahasoa ty hafa

NAGNINO ZAY RO TENA ILAEGNE?

Naho mahay mifehe tegna ty ajaja raike, le tsy ho voatarike hanao raty ndra tie hoe mahafinaritse zay aza i rahay. Naho tsy mahay mifehe tegna reke, le va’e...

• ho mpiarotegne

• ho mora kivy

• hifoke sigara ndra rongony ndra hinogne toake maro

• tsy mahambegne ty hanegne hohane’e

Trea tamy ty fikarohagne raike fa misy voka’e soa naho mahay mifehe tegna o ajajao. Ho tea magnara-dalàna ohatse reke naho fa bey sady tsy hanagne olagne ara-bola ndra ara-pahasalamagne. Izay ty nahavy i Profesora Angela Duckworth hirehake tihoe: “Tena tsy misy voka’e raty tihoe mahafehe tegna.”

AKORE TY HAMPIANARAGNE AZE?

Mikezaha handietse sady ko miovaova hevetse.

TORO LALAGNE: “Naho fa Eka ty reha’areo le Eka, naho fa Aha’a le Aha’a, fa ze ankoatse izay le boake amy i ratỳ.”​—Matio 5:37.

Va’e hipay vane’e ty ana’o naho fa tsy orihe’o ty sitrapo’e. Va’e hanao izay reke ndra tie agnatreha o ndaty eo aza. Naho amy igne rehe ro milefetse, le hanjare hieretseretse reke tie hahazo ze raha angatahe’e reke naho fa mipay vane’e.

Faie naho tsy miovaova hevetse rehe naho fa nandietse, le ho hai’e tie tsy voatere ho azo’e iaby ze raha irie’e. “Vao mainke sambatse aza ty ndaty magneke izay” arake ty rehafe i Pr. David Walsh. ‘Tsy magnampe ty anantikagne tika naho mirehake ama’e tie ho azo’e iaby ze raha irie’e.’a

Naho mikezake mandietse rehe sady tsy magnomey ze kila raha angatahe ty ana’o, le hahay hifehe tegna reke naho fa bey. Tsy ho voatarike hifoke rongony reke ndra hila ndaty aloha ty fanambaliagne ndra hanao raha raty hafa.

Ampeo ty ana’o hahatakatse tie ino ty ho voka ty raha atao’e.

TORO LALAGNE: “Ze tongise o ndatio avao ro ho vokare’e.”​—Galatianina 6:7.

Anò azo ty ana’o soa tie misy voka’e avao ze raha atao’e sady ho raty ty voka’e naho tsy mahafehe tegna reke. Hivibìke ama’e ohatse o ndatio naho tsy mahafehe ty haboseha’e reke. Faie ho tea o ndatio reke naho mahafehe ty haboseha’e, le mitsanogne soa heike fa tsy le avy le manapake ty reha o ndaty. Anò tsapa’e tie ho sambatse reke naho mahafehe tegna.

Ampeo reke hahafantatse tie ino ty raha tena lahibey.

TORO LALAGNE: ‘Fantaro’areo soa ty raha lahibey.’​—Filipianina 1:10.

Mikezake mafe tsy hanao raty ze ndaty mahafehe tegna. Faie tsy ampe zay. Toko’e hanao ze raha mila atao’e ka reke ndra tie tsy tea’e aza zay. Mila ianara ty ana’o tie ino ty raha fara’e lahibey toko’e hatao’e voaloha’e. Ie ohatse vita ty devoara’e vaho izay reke toko’e hihisa.

Mikezaha ho modely.

TORO LALAGNE: “Fa modely ro nimeiko anareo, mba hanoa’areo manahake i nataoko tama’areoy.”​—Jaona 13:15.

Trea ty ana’o tie manao akore ty fihetse’o naho fa misy raha mahasosotse azo. Mikezaha areke ho modely. Amy izay hotrea’e tie soa ty voka’e naho fa mahafehe tegna ty ndaty raike. Ino areke ty toko’e hatao’o naho manao raha tsy mete ty ana’o? Hiroaroa vao rehe sa hikezake ho tony avao?