LESOGNE 11
Inogne ty Mahasoa ty Lalàn’Andrianagnahare?
1. Nagnino tikagne ro mila ty tari-dalan’Andrianagnahare?
Akore ty hampihara’o i toro lalagne tihoey tie sarobily o aigneo? —SALAMO 36:9.
Mahilala mihoatse antikagne i Mpamorogne antikagney. Tea’e tikagne, le mipay ze hahasoa antikagne reke. Fanta’e fa tsy mahavita tegna raike avao tikagne, fa mila ty fagnampea’e. (Jeremia 10:23) Mila ty tari-dala i Jehovah tikagne, manahake ty ajaja kedekede mipay ty rae aman-drene’e hitari-dalagne aze. (Isaia 48:17, 18) Nagnomey lalàna maro agnate Baiboly ao reke, mba hanoroagne antikagne ze toko’e hataontikagne.—Vakio 2 Timoty 3:16.
Naho magnorike ty lalàna naho ty toro lalagne mey i Jehovah tikagne, le ho soa ty fiaignantikagne manomboke amy hinane zao sady ho velogne nainai’e tikagne. I reke ty namorogne antikagne, le toko’e ho vognogne hankatò ty lalà’e naho ty toro lala’e tikagne.—Vakio Salamo 19:7, 11; Apokalypsy 4:11.
2. Inogne ty tsy mampitovy ty lalàna naho ty toro lalagne?
Mivantagne ty lalàna sady le avy le mandrara ty tsy hanoagne raha raike. (Deoteronomia 22:8) Faie azo ampiharegne amy ty raha maro ty toro lalagne. Tsy mivantagne reke. Mila mampiasa saigne tikagne mba hahatreavagne ze toko’e ampiharagne aze. (Ohabolana 2:10-12) Intoy zao misy toro lalagne raike: Fagnomezagne boake aman’Andrianagnahare ty aigne. Naho mitadidy izay tikagne, le hitao mba tsy hagnoho-doza amy ty vatantikagne naho amy ty ndaty hafa. Hitao soa avao ka tikagne, ndra tie am-piasagne agne, ndra an-tragno ao, ndra naho fa mandeha an-dalagney.—Vakio Asan’ny Apostoly 17:28.
3. Inogne ty lily roe fara’e lahibey?
Nirehake ty Jesosy fa misy lily roe fara’e lahibey, sady misy toro lalagne azo ampiharegne boake ama’e. Ty voaloha’e: Teao ty Jehovah. Ilaegne areke ty mianatse ty miomba aze naho manompo aze, naho teantikagne hisy dika’e ty fiaignantikagne. Toko’e hitadidy o toro lalagne iohoe tikagne, isake ty hanapa-kevetse. (Ohabolana 3:6) Ho naman’Andrianagnahare ze manao izay, sady hiaigne nainai’e vaho ho sambatse vata’e.—Vakio Matio 22:36-38.
Ty faharoe: Teao ty nama’o. Magnampe antikagne hilongo amy ty hafa zay. (1 Korintianina 13:4-7) Manahake ty toetsen’Andrianagnahare tikagne naho mampihatse o toro lalagne iohoe.—Vakio Matio 7:12; 22:39, 40.
4. Nagnino ty lalàn’Andrianagnahare ro mahasoa?
Manjare miharo saigne naho mifankatea ty keleiagne, naho fa mampihatse ty toro lala ty Baiboly. (Kolosianina 3:12-14) Sambatse ka ty mpivaly naho ty ana’e, naho fa magnorike i toro lalagne tihoey tie natao haharetse o fanambaliagneo.—Vakio Genesisy 2:24.
Naho fa mampihatse ty toro lala ty Baiboly tikagne, le manjare milamigne ty saintikagne naho ty fontikagne. Hihasoa ty fari-piaignantikagne. Tea ty mpampiasa ohatse tikagne naho manao ty maregne sady mazoto miasa. (Ohabolana 10:4, 26; Hebreo 13:18) Mampianatse antikagne ka ty Baiboly mba hionogne amy ze fa anagnantikagne, sady hitadidy fa sarobily mihoatse ty harena tihoe nama i Jehovah.—Vakio Matio 6:24, 25, 33; 1 Timoty 6:8-10.
Manjare salama ka tikagne naho fa mampihatse ty lalàn’Andrianagnahare. (Ohabolana 14:30; 22:24, 25) Mirehake ohatse ty Baiboly tie tsy mete ty manao mamo. (Ohabolana 23:20) Tsy ho azo ty aretegne mahafate ndra ho azon-doza tikagne naho mankatò izay. Tsy faly ty minon-toake, faie atao antognotogno’e avao. (Salamo 104:15; 1 Korintianina 6:10) Mahasoa vata’e ty toro lala ty Baiboly, satria mandrara antikagne tsy hanao raty sady misakagne antikagne tsy hieretseretse raha raty. (Salamo 119:97-100) Mankatò ty lalàn’Andrianagnahare ty Kristiana, satria mahasoa ty fanoagne izay, sady magnomey voninahitse i Jehovah.—Vakio Matio 5:14-16.