Miaro ty Laza’e i Vahoake Tea Filongoagney

NIREHAKE ty roe amy ty fitsaràgne ambone a Rosia agne, tamy Desambra 2009 naho Janvie 2010, fa mandrisike o ndatio higoreve amo o fanjakagneo ty fivavaha ty Vavolombelo i Jehovah. Miheregne indraike i raha talohay. Vavolombelogne agn’arivo’e ro natao kitomboke ho fahavalo o firenenao, tamy ty fotoagne nitondrà o Sovietika a Rosia agneo. Natao sese-tane iareo, ginadra sady nampanoegne asa an-terevozogne tamo o tobeo agne. Faie naho fa rava o fitondragne iohoe, le nafahagne maliolio o Vavolombelo i Jehovah-o. Nagneregne ty laza iareo ty fitondragne vaovao.a Faie misy ty te hagnaratiraty iareo ka ty amy izao.

Tsy nimea o manam-pahefagneo, halalahagne sasa o Vavolombelo i Jehovah-o nanomboke tamy ty voalohandoha ty taogne 2009. Tamy Fevrie avao, le fagnadihadiagne 500 mahery ty natao ty mpampanoa lalàna magneragne i Rosia, mba hahatreavagne tie tena nandika lalàna vata’e i Vavolombelogne rey. Nirodorodo mbamy i Anjomba i Fanjakagney mbeo naho tragno o ndaty nivoria iareo tam-pilaminagne o polisio tagnate ty volagne tsiampeampe tafara izay. Nalae i polisy rey ty boke naho ty fanagna iareo. Niroahe o fanjakagneo ka ze zizy ambahiny nagnampe iareo, sady tsy nengagne hizilike ta Rosia ao sasa.

Nazy ty mpiasa amo o doanio ey ty boke naho ty gazete ara-baiboly nandese i samboy, tamy ty sisin-tane marine i Saint-Pétersbourg, tamy 5 Oktobra 2009. Ta Alemaina agne ty nanoagne pirinty o boke rehoe sady natao hoahy ty fiangonagne maro a Rosia agne. Nisy taratasy boake amy ty manam-pahefagne nirehake fa “va’e hisy raha natao mba hampialy fivavahagne” ty tao.

Nihamafe i fagnenjehagney tsy ela tafara izay. Nirehafe ty Fitsaragne Ambone Federasiona i Rosia naho ty Repoblika i Altaï (agnisa i Rosia), fa mandrisike o ndatio higoreve amy ty fanjakagne ty ila’e amy ty boke ampiasae ty Vavolombelo i Jehovah, agnisa izay ty gazete vakie’o toy. Nampiakatse tamy ty fitsaràgne ambone o Vavolombelo i Jehovah-o, sady firenena maro ty nanohagne, faie tsy nampiova ndra ino ndra ino zay. Mbe mihatse o lilim-pitsaràgne iohoe ty a Rosia agne, le voarara ty magnafatse ndra mizara boke naho gazete ara-baiboly.

Akore areke ty natao ty Vavolombelogne tamy ze fandratiratiagne naho fandraragne ty asa iareo zay? Inogne ty voka o lilim-pitsaràgne iohoe amy ty fahalalahagne ara-pivavahagne anagna ze ndaty Rosiana?

Nanao raha malaky i Vavolombelogne rey

Nizara taratasy manokagne miiake 12 tapetrisa i Vavolombelogne 160 000 eo ho eo magneragne i Rosia rey tamy Joma 26 Fevrie 2010. Izao ty lohan-dreha io: Hiheregne Indraike vao i Fampijaleagney? Fagnonteneagne Hoahy ty Vahoake a Rosia Ao. Vavolombelogne an-jato’e ta Ousolie-Sibirskoïe, a Siberia agne, ohatse ro nifanao fotoagne tan-dalagne ey tamy 5.30 maraindraigne. Agnisa ty natao sese-tane ta Siberia agne tamy 1951 ty ila’e amy iareo sady noho ty finoa’e ty anto izay. Niaretse tsintsigne 40 degre ambane ty zero iareo mba hizaragne taratasy milimpy 20 000, anjara iareo.

Nifampirehake tamy ty mpanao gazete ta Moscou rovabey i Rosia, i Vavolombelogne rey mba hirehafagne fa hanao kezake manokagne iareo agnate ty telo andro. Agnisa ty nampirehafegne tamy izay ty A^toa Lev Levinson, manam-pahaiagne boake amy ty Fikambanagne Miaro ty Zon’olombelogne. Nitantarae’e fohefohe ty fagnenjehagne naho ty fampijaleagne tsy amy ty anto’e ty Vavolombelogne ta Alemaina Nazia naho tamy ty Firaisagne Sovietika agne reo. Nirehafe’e fa nafaha o fanjakagneo maliolio iareo naho fa tafara tatoy. Hoe ka reke: “Namoake lily ty Porezidà Yeltsin fa toko’e hafahagne maliolio ze fivavahagne nenjehegne tamy fitondragne sovietikao. Toko’e haheregne amy iareo iaby ze raha nafoe iareo. Tsy nanagne fanagnagne manokagne o Vavolombelo i Jehovah-o, fa ty laza soa nanagna’e ro naheregne tamy iareo.”

Faie atahoragne ho montso indraike ze laza soa’e zay tie amy izao. Nirehake ty A^toa Levinson fa “nanegnegne noho ty raha natao’e o tane iohoe, faie mbe amo o tane iohoe avao iareo ro enjehegne tsy amy ty anto’e.”

Ndra nivalike raha soa i fagnenjehagney

Nisy voka’e vao i kezake manokagney? Hoe ty A^toa Levinson: “Tamy i raho nimbetoagney, le nahatrea ndaty tagnate lamasina ao raho, namaky ty bokekele zinara ty Vavolombelo i Jehovah magneragne i Rosia t’androany. ... Nitoboke sady namaky aze soa o ndatio.”b Dineho moa ty fitantaragne retoa:

Nisy rakemba raike zay nipetrake tamy ty faritse maro Silamo tagnivo i Rosia agne. Nandrambe i taratasy milimpỳ reke sady nagnontane tie ino ty rehafe igne. Naho fa nirehafegne tama’e fa mirehake miomba ty zon’olombelogne naho ty halalahagne a Rosia agne igne, le hoe reke: “Le nisy nagnente avao tamy ty fara’e ty miomba izay. Nanjare manahake tamy ty andro ty Firaisagne Sovietika indraike zao ty a Rosia eto amo o raha iohoe. Misaotse. Tena mete ty atao’areo!”

Hoe ty ampela raike a Tcheliabinsk agne, naho fa nimeagne i taratasy milimpỳ: “Fa nahazo ty raike tamy itoy raho sady fa nivakieko. Manohagne anareo zato isan-jato raho. Tsy mahatrea fivavahagne hafa mahavita miaro ty finoa’e manahake ty atao’areo raho, sady milamigne soa ty fomba anoa’areo izay. Teako ty fomba fisikina’areo, mahay manahatsahatse ka nareo. Trea tie tena atokisa’areo fa maregne ty raha inoa’areo. Mino raho fa manohagne anareo ty Andrianagnahare.”

Nirehake ty lahilahy raike ta Saint-Pétersbourg agne, fa nahazo ty raike tamy i taratasy milimpỳ reke. Nagnonteneagne areke reke naho tea’e i raha nivakie’ey ndra tsy tea’e. Hoe reke: “Teako! Nangolitse akoho raho naho fa namaky aze. Nitagny aza raho. Nampijalegne ka ty bebeiko [tamy ty andro o Sovietikao], sady maro ty raha nitantarae’e tamako miomba i niarake nigadra tama’e rey. Maro ty mpiarotegne, faie nisy ka ty ndaty tsy nanan-tsiny ginadra noho ty finoa’e. Toko’e ho fanta o ndatio iaby ty raha niseho, le tena mete o atao’areo zao.”

Ino ty raha mbe hiseho a Rosia agne?

Sarobily amy ty Vavolombelo i Jehovah a Rosia agne ty halalahagne kede nanagna iareo tagnate ty 20 taogne lasa. Faie fanta iareo ka fa mora afahagne zay. Tsy fantatse naho hisy fotoan-tsarotse hisia ty fampijaleagne manahake ty taloha indraike ty a Rosia ao, kanao vaho tsy ela iareo niharatiratiegne. Ho trea eo zay naho fa mandeha ty fotoagne.

Faie tena tapa-kevetse i Vavolombelo i Jehovah rey fa hitory ty hafatse amy Baiboly ao miomba ty filaminagne naho fanantenagne ndra inogn’ino ty raha hiseho. Izao ty rehafe i taratasy milimpỳ miomba izay: “Tsy ombia hahomby o fampijaleagneo. Hirehake miomba i Jehovah Andrianagnahare naho ty Saontsi’e, le ty Baiboly zahay, sady hahay hanahatsahatse naho haneho fagnajagne naho fa manao izay. (1 Petera 3:15) Tsy nahakalagne anay ty fandreberebeagne tamy ty andro o Naziao. Tsy nahakalagne anay ka ty fampijaleagne amy ty tanentikagne toy eto, sady tsy hijanogne zahay fa hitory avao.—Asan’ny Apostoly 4:18-20.”