Afake ty Hanagne Fiadanagne Avao Rehe Ndra tie Miaigne Agnate ty Raha Sarotse Aza

1. Ino o ‘fiadanan’Andrianagnahare’ zao, le ino ty soa azontika naho fa managne aze tika? (Filipianina 4:6, 7)

MISY karazam-piadanagne zay tena tsy rendre o ndatio ty miomba aze. Tsy ino zay fa i “fiadanan’Andrianagnaharey.” Ty dika izay, milamin-tsaigne satria mifandrambe soa amy i Babantikagne an-dagnitse agney. Mahatsiaro ho voaro tika naho fa managne i “fiadanan’Andrianagnaharey.” (Vakio ty Filipianina 4:6, 7.) Teantika ty mifandrambe marine amy ty ndaty tea aze, sady managne fifandrambesagne manokagne amy i “Andrianagnahare ty fiadanagney” ka tika. (1 Tes. 5:23) Naho itika mahafantatse naho matoky vaho mankatò i Babantikagney, le hahavy ty fontika ho tony i fiadanan’Andrianagnaharey naho fa itika miatreke raha sarotse.

2. Nagnino tika ro matoky fa afake ty hanagne i fiadanan’Andrianagnaharey?

² Faie mbe afake ty hanagne o fiadanan’Andrianagnahare iohoe vao tika naho fa miatreke raha sarotse? Ohatse, arete-manjamagne, loza, korontagne ndra fagnenjehagne? Va’e hahavy antika hatahotse o olagne rehoe. Faie ndra tie eo zay, le izao ty torohevetse nimey i Jesosy o mpanonjohy ty lia’eo: ‘Ko engagne ho tsemboke ndra hatahotse ty fo’areo.’ (Jaona 14:27) Mahafale fa nagnorike o toroheve i Jesosy iohoe ty rahalahy naho ty rahavaventika. Nampea i Jehovah iareo, le afake nanagne fiadanagne avao ndra tie niatreke olagne sarotse aza.

AKORE TY HANAGNA’O FIADANAGNE AVAO NAHO FA MISY ARETE-MANJAMAGNE?

3. Nagnino ty fisia o arete-manjamagneo ro va’e hampikorontagne ty fiaignantikagne?

³ Va’e hagnova ty fiaignantika tanterake ty fisia o arete-manjamagneo ndra o aretegne mifindrao. Dineho ohatse ty voka-draty i COVID-19 tamy ty ndaty maro. Nisy mpanao fagnadihadiagne zay nanao tatetse hoe izao: ‘Ty antsasa’e mahery amy ty ndaty nadikadigne’ay ro nirehake tie tsy niazon-droro tagnate i arete-manjamagney. Nahavy o ndatio hinekoneko mafe, kivy, ninon-toake maro naho nifoke rongony, nampijale ty keleia’e, vaho namono tegna ka io.’ Naho misy arete-manjamagne ty amy ty tane misy azo, akore ty hahavy azo tsy hinekoneko loatse sady hanagne i fiadanan’Andrianagnaharey?

4. Nagnino i faminania i Jesosy miomba ty andro fara’e rey ro magnampe antika tsy hatahotse?

⁴ Fa naminany ty Jesosy tie amy ty andro fara’e, le hisy arete-manjamagne “amy ty toeragne sambe hafa.” (Lioka 21:11) Nagnino ty fahafantarantika izay ro mahavy antika hilamin-tsaigne? Fa ampoizentika tie hisy o arete-manjamagneo. Haintika tie i raha nirehafe i Jesosy rey o tanterakeo. Toko’e hagnorike ty torohevetse nimey i Jesosy hoahy ze ndaty miaigne amy ty andro fara’ey areke tika. Hoe reke: “Ko matahotse.”​—Mat. 24:6.

5. a) Naho henteagne ty Filipianina 4:8, 9, ino ty raha toko’e hangatahentika amy ty vavake naho fa misy arete-manjamagne? b) Nagnino ty fitsanognagne i raha nalaem-peo ara-baiboly rey ro mahasoa azo?

⁵ Va’e hahavy antika hinekoneko naho hatahotse ty fisia o arete-manjamagneo. Izay ty raha nahazo i rahavave Desi.b Naho fa nimate i corona-y ty renelahi’e, ty nimbondrene’e naho ty dokotera tamy iareo agne, le natahotse reke kera ho voa i aretegney le hamindra amy i rene’e fa antetsey. Ninekoneko ka reke kera ho montso asa, le tsy hanam-bola hiviliagne hanegne naho handoagne hofan-tragno. Nieretseretse miomba ireo avao reke hafarà’e tsy nimete azon-droro. Faie nilamin-tsaigne indraike reke naho fa nanao vavake voafaritse soa. Nangatake tamy i Jehovah reke mba hampea’e ho tony naho hifantoke amy ty lafe soan-draha. (Vakio ty Filipianina 4:8, 9.) Nitsanogne ty “saontsy” i Jehovah tamy ty alala o raha nalaem-peo ara-baibolio ka reke. Hoe reke: “Malefake ty feo i mpamaky rey, le nagnampe ahy tsy le hinekoneko loatse naho hahatsiaro tie mikarakara ahy ty Jehovah.”​—Sal. 94:19.

6. Nagnino ty fianaragne raike naho ty fagnatrehagne fivoriagne ro magnampe azo?

⁶ Va’e ho sarotse amantika ka ty hanohy ty fahazarantikagne taloha naho fa misy o arete-manjamagneo. Faie ko ovagne ty fahazara’o mianatse raike naho magnatreke fivoriagne. Misy fitantaragne ty amo o boke naho o gazetentikagneo vaho amo o videontikagneo ao. Haniahy azo rey tie tsy nivalike i rahalahi’o naho i rahavave’o rey ndra tie niatreke olagne manahake ze o atrehe’o zao aza. (1 Pet. 5:9) Magnampe azo hisaintsaigne raha mampahery boake amy ty Soratse Masigne ao ka o fivoriagneo, sady afake hampahery ty hafa naho hahazo fampaherezagne rehe naho mivory. (Rom. 1:11, 12) Naho irehe misaintsaigne ty fomba nanohagna i Jehovah i mpanompo’e rey tamy iareo narare, natahotse ndra nahatsiaro ho irerikey, le hihamafe ty finoa’o aze. Hatoky ka rehe tie hanohagne azo reke.

7. Ino ty lesogne ianara’o boake amy i apostoly Jaona?

⁷ Mikezaha hifandrambe amo o rahalahi’o naho o rahavave’o reo. Va’e ho takegne amantika ty hagnaja elagnelagne naho fa misy arete-manjamagne, ndra amo o mpiara-manompo amantikagneo aza. Va’e hahatsapa manahake i apostoly Jaona rehe naho fa miseho ty raha hoe izay. Ni-te hahatrea maso i Gaio ragne’e reke. (3 Jaona 13, 14) Faie tsy niafake nahatrea i Gaio ty Jaona tamy izay. Nanoratse taratasy hoahy i Gaio areke reke, satria izay ty azo’e natao. Naho ohatse rehe tsy afake mitilike o rahalahi’o naho o rahavave’ò an-tragno iareo agne, le mikezaha hiantso iareo, ndra hanao appel video ndra handefa mesaze amy iareo. Tsy hahatsiaro ho irerike sady hilamin-tsaigne rehe naho mifandrambe amy iareo mateteke. Mirehafa ka amo o androanavi-pagnahio naho ohatse rehe minekoneko loatse, le ekeo ty fampaherezagne mea iareo.​—Isaia 32:1, 2.

AKORE TY HANAGNA’O FIADANAGNE AVAO NAHO FA MISY LOZA?

8. Nagnino ty fisia o lozao ro va’e hahavy azo tsy hilamin-tsaigne?

⁸ Va’e tena ninekoneko mafe rehe naho fa nisy rano bey, horohoron-tane ndra tragno mae ty amy ty tanàgne misy azo. Naho nimate tamy i lozay ty ndaty tea’o ndra nirava ty fanagna’o, le va’e nalahelo mafe naho tsy nanagne raha tamaegne rehe. Va’e niboseke iaby aza rehe. Faie tsy midika zay tie tea harena rehe ndra tsy ampe finoagne. Mafe ze raha nahazo azo zay, le va’e misy ndaty fa mahay tie ireo ty raha ho tsapantikagne. (Joba 1:11) Faie mbe afake ty hiadagne avao rehe ndra tie miatreke raha mafe hoe izay aza. Amy ty fomba akore?

9. Ino ty raha nirehafe i Jesosy mba hampiomanagne antika amo o lozao?

⁹ Tsiarovo i faminaniagne nirehafe i Jesosỳ. Misy ndaty mieretseretse tie tsy misy loza hahazo iareo zao. Faie haintika tie ho maro ty loza hiseho amo o androntika zao, sady va’e ho tratse ty ila’e amy ireo tika. Nirehake tamo o mpanonjohy ty lia’eo ty Jesosy tie hisy horohoron-tane mafe naho loza hafa hiseho, aloha ty hiavia ty fara’e. (Lioka 21:11) Naminany ka ty Jesosy tie ‘hihamaro o ndaty mpandika lalànao.’ (Mat. 24:12) Tanterake io tie amy izao, satria maro ty mangalatse naho mamono ndaty, mpiarotegne naho magnorohoro. Tsy nirehake ty Jesosy tie nafoe i Jehovah tika kanao azo ty raha hoe ireo. Maro ty mpanompo i Jehovah fa nihara ireo. (Isaia 57:1; 2 Kor. 11:25) Va’e tsy hanao fahagagagne ty Jehovah mba hiarovagne antika amy ze loza miseho. Faie homei’e antika ze raha paliaentika mba hahavy antika ho tony naho hilamin-tsaigne.

10. Trea tie manam-pinoagne tika naho miomagne mialoha amy ty loza hiseho. Ino ty anto’e? (Ohabolana 22:3)

¹⁰ Naho itika miomagne mialoha, le vao mainke ho mora amantika ty ho tony naho misy loza tampoke. Fa tsy ampe finoagne vao tika kanao miomagne mialoha? Oho’o. Ty fiomanantika mialoha le manoro fa tena mino tika tie vita i Jehovah ty mikarakara antikagne. Ino ty anto’e? Satria manoro hevetse antika ty Saontsi’e mba hiomagne mialoha amy ty loza va’e hiseho. (Vakio ty Ohabolana 22:3.) Risihe i fandaminagne mateteke ka tika mba hiomagne mialoha amy ty loza va’e hiseho tampoke. Mahazo izay tika amy ty alala o gazetentikagneo, o fivoriagneo naho o fitaliliagneo.c Hagnorike o toroheve i Jehovah iohoe areke tika amy izao naho matoky aze.

11. Ino ty ianara’o boake amy i Margaret?

¹¹ Dineho ty raha niaigna i rahavave Margaret. Nampialà o fanjakagneo i tragno’ey reke, satria nisy ala nirehetse tamy ty tanàgne nisy aze. Maro ty ndaty le avy le nilay, hafarà’e tsy nisy lalagne hombagne satria nimaro loatse ty tobile tan-dalagne ey. Nifeno hatoegne ty magnodidigne iareo, le i Margaret tsy afake niakatse boake amy i tobile’ey ao. Faie tsy nimate reke satria niomagne mialoha. Nisia’e sare tane ty amy i poketsa’e zay ao, le igne ty nagnentea’e tie aia ty lalagne hafa hahafaha’e miala i tanà iareoy. Fa nandeha tamy i lalagne rey aza reke taloha, amy izay ho mora ama’e ty mamantatse tie aia ty homba’e naho misy loza tampoke. Tsy nimate tamy i loza ignehoe ty Margaret satria reke fa niomagne mialoha.

12. Nagnino tika ro magnorike i toromareke miomba ty raha toko’e hatao naho fa misy loza rey?

¹² Va’e handily antika tsy hiboaboake, ndra hilay ndra hanao raha o manam-pahefàgneo mba hiarovagne antika naho ty ndaty hafa. Misy ndaty tsy le avy le magnorike i toromareke rey, satria tsy mahafoe ty fanagna’e. Faie ino ty toko’e hatao ty Kristiana? Hoe ty Baiboly: “Noho ty amy i Tompo, le ekeo ze fahefàgne naore o ndatio. Ndra mpanjaka zay, satria reke ambone, ndra governora satria nirahe i mpanjakay hagnasaze ze ndaty mpanao raty reke.” (1 Pet. 2:13, 14) Mey i fandaminagne toromareke ka tika mba hiarovagne ty fiaintika. Tiahivegne mateteke zao tika mba hagnomey ty nimerò telefonintika o androanavi-pagnahio. Ho afake hifandrambe amantika iareo amy izay naho misy loza tampoke. Fa nanao izay vao rehe? Va’e hahazo toromareke ka tika miomba ty toeragne hietahagne, hilaisagne, hahazoagne fagnampeagne ndra miomba tihoe akore le ombia ro hagnampe ty hafa. Naho tsy magnorike i toromareke rey tika, le va’e hagnoho-doza ty fiaintikagne naho ty fiay o androanavi-pagnahio. Ko haligno fa miaro antika lognandro o lahilahy tsy mivalike rehoe. (Heb. 13:17) Hoe ty Margaret: “Tena mino raho fa noho ty fagnorihako ty toromareke nimey o androanavi-pagnahio naho i fandaminagne ro namonje ty fiaiko.”

13. Ino ty nagnampe i Kristiana nifindra toeragne rey ho falefale naho hiadagne avao?

¹³ Maro ty rahalahy naho ty rahavaventika tsy maintsy nienga ty tragno iareo, satria nisy loza ndra aly ndra korontagne ty tamy iareo agne. Nikezake iareo mba ho zatse i fiaigna iareo vaovaoy sady le avy le nandrambe anjara tamy ty asa fanompoagne. Nanahake i Kristiana tamy ty taonjato voaloha’e rey iareo. Mbe nanohy ‘nitory i talily soay’ avao iareo, ndra tie tsy maintsy nilay aza noho iareo nenjehegne. (Asa. 8:4) Ty fanoagne ty asa fitoriagne, le nagnampe iareo hifantoke amy i Fanjakagney fa tsy amy ty raha sarotse niaigna iareo. Izay ty nahavy iareo ho falefale naho hiadagne avao.

AKORE TY HANAGNA’O FIADANAGNE AVAO NAHO FA MISY FAGNENJEHAGNE?

14. Nagnino o fagnenjehagneo ro va’e hahavy antika hatahotse ndra hinekoneko?

¹⁴ Va’e hatahotse ndra hinekoneko tika naho fa enjehegne. Fale zao tika naho fa afake miarake mivory naho mitory malalake vaho manao ty raha fataontika faie tsy matahotse ty ho tsepahegne. Va’e hinekoneko ndra hatahotse ty raha hanjò antikagne tika naho tsy engagne hanao ireo. Tsy diso tika naho mahatsapa hoe izay. Faie mila mitao tika. Nirehake ty Jesosy tie va’e hahavy o mpanonjohy ty lia’eo hiala amy i Jehovah o fagnenjehagneo. (Jaona 16:1, 2) Akore areke ty hahavy antika hanagne fiadanagne ndra tie enjehegne aza?

15. Nagnino tika ro tsy toko’e hatahotse fagnenjehagne? (Jaona 15:20; 16:33)

¹⁵ Hoe ty Baiboly: “Henjehegne avao ka ze ndaty te hampiseho amy ty fiaigna’e tie mahafoe tegna ho an’Andrianagnahare sady miharo amy i Kristy Jesosy.” (2 Tim. 3:12) Nisarotse tamy i rahalahy Andrei ty nino tie voarara ty asantika amy iareo agne. Hoe reke: ‘Tena maro ty Vavolombelo i Jehovah etoagne. Akore ty ahasahia o fanjakagneo mandrara anay iaby?’ Nahavy i Andrei hialy saigne ty fisaintsaigna’e ze raha zay. Ty rahalahy hafa nagnenga i olagney am-pità i Jehovah eo, fa tsy nieretseretse tie tsy toko’e henjehegne iareo. Nagneke iareo tie va’e henjehegne, faie tsy le ninekoneko loatse iareo naho ampitahagne amy i Andrei. Nanapa-kevetse areke ty Andrei fa hagnitsy ty toe-tsai’e sady hatoky i Jehovah. Nilamin-tsaigne reke tsiela tafara izay, le amy izao reke falefale avao ndra tie miatreke olagne maro aza. Afake ty hahatsapa hoe izay ka tika. Maregne fa nirehake ty Jesosy tie henjehegne tika, faie nagnomey toky antika ka reke tie vitantika ty tsy hivalike.​—Vakio ty Jaona 15:20; 16:33.

16. Ino ty toromareke mila orihentikagne naho fa itika enjehegne?

¹⁶ Va’e hahazo toromareke boake amy i sampagne naho amo o androanavi-pagnahio tika naho voarara ty asantika. Natao hiarovagne antika naho hagnomeagne toky antika rey tie mahazo hanegne ara-pagnahy avao tika. Natao ka rey mba hagnampeagne antika hitory avao. Oriho soa i toromareke rey, ndra tie tsy tena taka’o ty anto’e agnomeagne aze. (Jak. 3:17) Ko rehafegne amy ze ndaty tsy manan-jò hahafantatse izay ty mombamomba o rahalahintikagneo ndra ty raha atao o fiangonagneo.​—Mpito. 3:7.

17. Toko’e ho tapa-kevetse ty hanao ino tika?

¹⁷ Ty anto’e lahibey raike mahavy i Satana magnenjeke mafe o vahoa i Jehovah-o, le noho iareo ‘nirahegne hitory ty miomba i Jesosy.’ (Apok. 12:17) Faie ko engagne hampatahotse azo ty Satana naho ty tontolo’e toy. Ho falefale naho hiadagne rehe, naho mitory sady mampianatse avao ndra tie misy fagnenjehagne aza. Naho fa rinara o manam-pahefàgne Jiosio o apostolio mba tsy hitory sasa, le tsy nimete iareo fa nankatò an’Andrianagnahare avao. Nitory avao iareo, hafarà’e nifalefale avao. (Asa. 5:27-29, 41, 42) Maregne fa mila mitao tika naho fa mitory naho ohatse voasakatsakagne ty asantika. (Mat. 10:16) Faie hahazo fiadanagne tika naho manao ze fara’e soa vitantika, satria mampifale i Jehovah sady magnambara i hafatse mamonje aigney.

‘HO AMA’AREO ABEY I ANDRIANAGNAHARE TY FIADANAGNEY’

18. Ino ty raha toko’e hotadidientikagne miomba i Andrianagnahare ifotora i fiadanagne paliantikagneỳ?

¹⁸ Matokia rehe fa afake ty hanagne fiadanagne avao ndra tie miaigne agnate ty raha tena sarotse aza. Toko’e ho tadidientikagne amy i fotoagne rey tie, i Jehovah avao ro afake magnomey antika i fiadanan’Andrianagnahare paliaentikagney. Miantehera ama’e naho misy arete-manjamagne, loza, ndra fagnenjehagne ty tane misy azo. Ko miala amy i fandaminagne. Mifantoha ka amy ty raha fanjaka mandigne azo amy ty hoavy. ‘Ho ama’o i Andrianagnahare ty fiadanagney’ naho manao izay rehe. (Fil. 4:9) Amy ty lahatsoratse magnarake tika, le handineke ty raha azontika atao mba hagnampeagne o mpiara-manompo amantika miatreke raha sarotseo hanagne i fiadanan’Andrianagnaharey avao.