Ampeo ty Hafa mba Hiaretse ty Raha Sarotse Iaigna’e

1. Akore ty fomba amalea i Jehovah ty vavake atao ty mpanompo’e?

HAI’O vao tie azo i Jehovah ampiasaegne rehe mba hamaleagne ty fihalalea ty ndaty raike? Azo’e ampiasaegne rehe ndra androanavi-pagnahy, ndra mpagnampe amy ty fiangonagne, ndra mpisava lalagne, ndra mpitory amo o fiangonagneo eo. Azo’e atao ty mampiasa azo ndra tanora rehe ndra fa antetse, ndra rahalahy ndra rahavave. Mateteke ty Jehovah ro mampiasa o androanavi-pagnahio naho ty ndaty hafa amo o fiangonagneo eo mba ‘hagnampe naho hampahery’ ty ndaty tea Aze naho mipay vonje ama’e. (Kol. 4:11) Tena mahafale antika ty manompo i Jehovah naho o rahalahintikagneo amy ze lafi’e zay. Va’e ho afake hanao ireo tika naho fa misy arete-manjamagne, loza ndra fagnenjehagne.

AMPEO TY HAFA NAHO FA MISY ARETE-MANJAMAGNE

2. Nagnino ro va’e ho sarotse ty magnampe ty hafa naho fa misy arete-manjamagne?

² Va’e ho sarotse amantika ty hifagnampe naho fa misy arete-manjamagne. Ohatse, va’e te hitilike ty ragnentikagne tika, faie tsy mete ty manao izay. Va’e misy mpiara-manompo tsy manam-bola le teantika hiarake hihinagne amantika an-tragnontikagne agne, faie tsy mete ka ty manao izay. Va’e te hagnampe avao ka tika, faie tsy afake satria ndra itikagne aza sahiragne. Faie tena te hagnampe o rahalahintikagneo tika, sady fale ty Jehovah naho manao ze azontikagne atao tika. (Ohab. 3:27; 19:17) Ino ty raha azontika atao?

3. Ino ty raha ianarantika boake amy ty androanavi-pagnahy amy i fiangona i Desi ao? (Jeremia 23:4)

³ Ty azo o androanavi-pagnahio atao. Naho androanavi-pagnahy rehe, le fantaro soa o mpiara-manompò. (Vakio ty Jeremia 23:4.) Hoe ty Desi, i rahavave nirehafegne tamy i lahatsoratse taloha itoỳ: “Lava niarake nanompo tamako naho tamy ty hafa avao ty androanavi-pagnahy tamy ty andiam-pitory nisy ahy. Niarake nanao fiarahagne tama’ay ka iareo.”b Nanjare nimora tamy iareo areke ty nagnampe i Desi naho fa niparitake i aretegne COVID-19 sady nimate tamy i aretegney ty ila’e tamy ty keleia’e.

4. Nagnino o androanavi-pagnahio ro afake nagnampe i Desi, le ino ty fianaragne ho antika?

⁴ Hoe ty Desi: “Tsy nisarotse tamako ty nirehake tamo o androanavi-pagnahio ty raha nitsapako naho nampinekoneko ahy, satria tena fa nifankazatse tamy iareo raho.” Ino ty lesogne hoahy o androanavi-pagnahio? Karakarao o agnondrio ndra tie mbe tsy misy olagne aza. Miragneta amy iareo. Mipaliava fomba hafa hifandrambesagne amy iareo, naho ohatse misy arete-manjamagne le tsy afake mitilike iareo an-tragno’e nareo. Hoe ka ty Desi: “Kindraike raho nahazo antso naho mesaze boake amy ty androanavi-pagnahy sambe hafa tagnate ty andro raike. Tena manohigne ty foko ty andinin-teny nirehafe iareo ndra tie fa laniko tsianjery aza.”

5. Akore ty hahaia o androanavi-pagnahio ty raha paliave o rahalahio naho o rahavaveo naho ty fomba hagnampeagne iareo?

⁵ Hahay ty raha paliave o rahalahi’o naho o rahavave’ò rehe naho magnontane iareo. Faie ko atao mahasanganehagne ty fagnontenea’o. (Ohab. 20:5) Managne hanegne naho fagnafoly vao iareo? Sa misy raha hafa va’e paliave iareo? Atahoragne ho montso asa vao iareo? Sa va’e tsy voaloa iareo ty hofan-tragno iareo? Kera tsy hay iareo ty atao mba hahazoagne fagnampeagne amo o fanjakagneo? Nimey o mpiharo finoagne ama’eo raha ara-nofo ty Desi. Faie ty hatea natoro o androanavi-pagnahio aze naho ty fampahereza iareo aze boake amy Baiboly ao ro tena nagnampe aze. Hoe reke: “Nivavake niarake amako o androanavi-pagnahio. Tsy tsiaroko ty raha nirehafe iareo faie tsy halignoko ty raha nitsapako tamy izay. Hoe nisaontsy tamako ty Jehovah tie: ‘Tsy irerike rehe.’”​—Isaia 41:10, 13.

6. Ino ty raha va’e ho azo o fiangonagneo atao mba hagnampeagne ty hafa? (Henteo i sarey.)

⁶ Ty azo ty hafa atao. Andraiky o androanavi-pagnahio ty mikarakara o fiangonagneo. Faie tea i Jehovah naho itika iaby ro mampahery naho magnampe ty hafa. (Gal. 6:10) Ndra raha kede avao aza ty ataontika mba hagnampeagne o ndaty marareo, le hampahery aze zay. Ty ajaja zao afake mandefa taratasy ndra mamboatse sare hoahy ty rahalahy raike. Ty tanora afake manao bezara ndra raha hafa hoahy ty rahavave raike. Va’e ho afake hahandro naho hanese hanegne hoahy ty ndaty marare amo o fiangonagneo eo ka ty hafa. Mipay fampaherezagne tika iaby naho fa misy aretegne manjamagne. Azo atao ohatse ty mijanogne kedekede naho fa vita i fivoriagney, le mba mifampirehake amo o mpiara-manompò, ndra mivory mivantagne tika ndra amy ty alala ty vidéoconference. Mipay fampaherezagne ka o androanavi-pagnahio. Misy mpiara-manompo mandefa taratasy fisaoragne amy iareo, satria vao mainke maro mateteke ty raha atao iareo naho fa misy arete-manjamagne. Soa areke naho mba manao ty anjarantikagne tika, le ‘mampahery sady magnampe ty hafa.’​—1 Tes. 5:11.

AMPEO ZE NIZOEM-BOIGNE

7. Ino ty raha sarotse va’e hisy naho fa misy loza?

⁷ Va’e hagnova ty fiaigna o ndatio tampoke o lozao. Va’e hisy amy iareo ohatse hamoe ty fanagna’e, ty tragno’e, ndra ty ndaty tsy foe’e. Azo ty raha hoe izay ka o rahalahy naho o rahavaventikagneo. Ino ty raha azontika atao mba hagnampeagne iareo?

8. Ino ty azo ty androanavi-pagnahy naho ty loha ty keleiagne atao aloha ty hiavia o lozao?

⁸ Ty azo o androanavi-pagnahio atao. Ampeo o rahalahi’areo reo mba ho vognogne amy ty loza va’e hiseho. Anò azo antoke fa hay o fiangonagneo ty raha toko’e hatao mba hahavy iareo ho voaro naho hifandrambe ama’areo. Hoe ty Margaret, i nirehafegne tamy i lahatsoratse taloha itoỳ: “Nampitao anay o androanavi-pagnahi’aio tamy ty raha ilae ty fiangonagne tie va’e mbe hisy ala hirehetse ty amy i faritse misy anaỳ. Nirehake iareo fa naho mirehake o fanjakagneo tie toko’e hiala ty tragnontikagne tika ndra treantika tie misy raha mampatahotse, le mila miala malaky tika.” Tena tamy ty fotoagne mete ze torohevetse zay, satria nisy ala nirehetse ty tagne vola’e raike sy tapa’e tafara igne. Azo o loha ty keleiagneo dinehegne amy ty fotoam-pivavaha ty keleia iareo ty raha toko’e hatao iareo tsikiraidraike. Naho miomagne mialoha nareo naho ty ana’areo, le ho tony nareo naho fa misy loza miseho.

9. Ino ty raha azo o androanavi-pagnahio atao aloha naho afara o lozao?

⁹ Naho mpiandraikitse andiam-pitory rehe, le ko mandigne tie fa marine i lozay vaho izay hipay ty nimerò naho ty adiresy ty andiam-pitori’o. Anò lisita mialoha rey sady hamaregno mateteke. Amy izay naho fa avy i lozay, le ho afake hifandrambe amy ty mpitory tsikiraidraike rehe mba hahafantara’o ze raha paliave iareo. Le avy le rehafo amy ty androanavi-pagnahy mpandrindra’areo zay mba hambara’e ty mpiandraikitse faritse’areo. Naho miara-miasa o rahalahy rehoe, le hahazo ty raha tena paliae’e i rahalahy naho i rahavaventika rey. Tsy niroro tagnate ty andro raike sy tapa’e i mpiandraikitse faritse ry Margaret-y tafara i ala nirehetsey. Nisahiragne nagnampe o androanavi-pagnahio, niantso naho nikarakara i rahalahy naho i rahavave 450 nila nifindra tragno rey reke. (2 Kor. 11:27) Nahazo toeragne hitobohagne iaby areke i mpiara-manompo rey.

10. Nagnino ty fitilihagne agnondry ro toko’e ho hevere o androanavi-pagnahio ho lahibey? (Jaona 21:15)

¹⁰ Andraiky ty androanavi-pagnahy ty mampahery o rahalahio naho ty magnampe ze kivy. (1 Pet. 5:2) Naho fa misy loza, le toko’e hatao o androanavi-pagnahio azo antoke tie voaro, managne hanegne, akanjo naho toeragne hitobohagne ty rahalahy naho ty rahavave tsikiraidraike. Faie naho fa mandeha ty fotoagne, le mbe mipay fampaherezagne avao iareo. (Vakio ty Jaona 21:15.) Hoe ty Harold, agnisa ty Komity i Sampagne sady fa nifampirehake tamy ty rahalahy naho ty rahavave maro niazom-boigne: “Ela vaho tsy le malahelo sasa i ndaty rey. Va’e fa manomboke miaregne tsikede ty fiaigna iareo, faie mbe eo avao ty alahelo iareo i ndaty tea’e nimatey, ty fanagna iareo, ndra mbe tsiaro iareo avao i raha nanjò iareoy. Va’e hahavy iareo halahelo lava i raha rey. Fihetseham-po ara-dalàna zay fa tsy tihoe tsy ampe finoagne iareo.”

11. Ino ty raha va’e ho paliae ty keleiagne nizoem-boigne?

¹¹ Magnorike ty torohevetse toy o androanavi-pagnahio: “Mitagnia miarake amy ze tomagny.” (Rom. 12:15) Mila meigne toky i rahalahintika niazom-boigne rey tie tea i Jehovah naho o mpiara-manompò iareo. Toko’e hagnampe ty keleiagne hanohy avao ty fahazara iareo ara-pagnahy o androanavi-pagnahio. Agnisa izay ty mivavake, mianatse, magnatreke fivoriagne naho mitory. Azo iareo atao ka ty mandrisike o rae aman-dreneo hagnampe ty ana iareo hifantoke amy ty raha tsy azo o lozao simbagne. Tiahivo’areo rae aman-drene ty ana’areo tie ho Baba iareo avao ty Jehovah sady ho eo avao reke hagnampe iareo. Hazavao’areo amy iareo tie managne rahalahy naho rahavave magneran-tane vognogne hagnampe aze iareo.​—1 Pet. 2:17.

12. Ino ty raha azo ty hafa atao mba hagnampeagne ze nizoem-boigne? (Henteo i sarey.)

¹² Ty azo ty hafa atao. Naho misy loza ty tane marine azo, le agnonteneo o androanavi-pagnahio ty raha azo’o atao mba hagnampeagne ty hafa. Va’e ho afake hagnomey tragno hitoboha i ndaty niazom-boigne rey ndra i mpagnampe ze niazom-boigne rey rehe, ndra hanese hanegne naho fagnampeagne hafa hoahy ze mpitory mipay izay. Faie mbe afake magnampe avao rehe ndra tie lavitse aza ty misy azo. Amy ty fomba akore? Mivavaha hoahy ze niazom-boigne. (2 Kor. 1:8-11) Va’e ho afake hagnomey vola hanohagnagne iareo ka rehe, amy ty alala ty fanoagne fagnomezagne hoahy ty asa magneran-tane. (2 Kor. 8:2-5) Naho afake mandeha amy i toeragne nisy i lozay agne rehe, le agnonteneo o androanavi-pagnahio ty raha azo’o atao. Va’e hampiofagnagne rehe naho voasa mba hagnampe, amy izay ho azo ampiasaegne soa naho fa ilaegne.

AMPEO ZE RAHALAHY ENJEHEGNE

13. Ino ty raha sarotse mahazo ty rahalahintika amo o tane andraragne ty asantikagneo agne?

¹³ Vao mainke magnasarotse ty fiaignagne amo o tane andraragne ty asantikagneo agne o fagnenjehagneo. Sahiragne ara-bola, marare, naho mamoe longo tsy foen-troke ka ty rahalahintika amy i tane rey. Faie va’e tsy ho afake hitilike ndra hifandrambe mivantagne amy ze mipay fagnampeagne o androanavi-pagnahio noho i fandraragney. Izay ty raha niaigna i Andrei, i nirehafegne tamy i lahatsoratse taloha itoỳ. Tsy le nanam-bola ty rahavave raike tamy ty andiam-pitori’e. Niaksidà tamy ty tobile ka i rahavavey. Nila nirasagne reke, le tsy niafake niasa. Faie nanao ze azo’e natao o rahalahio mba hagnampeagne aze, ndra tie teo aza i fandraragney naho i arete-manjamagney. Nahavazoho ty raha niaigna i rahavavey ty Jehovah, le nanao raha.

14. Akore ty azo o androanavi-pagnahio atao mba hanoroagne fa miantehetse amy i Jehovah iareo?

¹⁴ Ty azo o androanavi-pagnahio atao. Nivavake ty Andrei, le nanao ze azo’e natao. Le akore ty natao i Jehovah? Nisy mpiara-manompo nanagne fahafahagne hagnampe, le irey ty nampiasae’e hinday i rahavavey an-dapotaly agne naho hagnomey vola aze. I Jehovah ty nandrisike iareo hanao izay, sady nitahie’e ty firaisan-tsay iareo naho ty kezake natao iareo. (Heb. 13:16) Naho voasakatsakagne ty asantikagne le mipalia fagnampeagne nareo androanavi-pagnahy. (Jer. 36:5, 6) Fa ty tena lahibey, le miantehera amy i Jehovah. Afake magnampe azo reke mba hikarakara o rahalahintika reo.

15. Ino ty azontika atao mba hahavy antika hiharo saigne avao naho fa itika enjehegne?

¹⁵ Ty azo ty hafa atao. Va’e tsy tena ho afake hifandrambe amy ty mpitory namantikagne tika naho fa misy fandraragne. Vao mainke tena ilaegne areke ty mikezake hilongo soa avao. I Satana ro ialio fa tsy o rahalahio naho o rahavaveo. Ko mifantoke amy ty hadisoagne atao iareo, ndra mikezaha hifandamigne malaky naho misy olagne. (Ohab. 19:11; Efes. 4:26) Mivognona hagnampe ty hafa. (Tit. 3:14) Nisy voka’e soa tamy ty andiam-pitory nisy i rahavavey ty fagnampea ty hafa aze. Nanjare nifandrambe soa manahake ty keleian-draike iareo.​—Sal. 133:1.

16. Akore ty azontikagne agnampeagne o rahalahy naho o rahavaventikagne enjehegneo, naho henteagne ty Kolosianina 4:3, 18?

¹⁶ Maro ty rahalahintika manompo i Jehovah avao ndra tie rarà o fanjakagneo aza. Misy ty gadraegne noho ty finoa’e. Afake mivavake hoahy iareo naho ty keleia iareo tikagne. Azo atao ka ty mivavake hoahy ze manohagne i mpiara-manompo amantika rey. Ty anto’e, va’e ho gadraegne ka iareo noho ty fanohagna iareo i nama iareo rey ara-pagnahy naho ara-nofo vaho amo o fitsaragneo ey.c (Vakio ty Kolosianina 4:3, 18.) Ko ambanegne areke ty hery o vavakeo!​—2 Tes. 3:1, 2; 1 Tim. 2:1, 2.

17. Ino ty raha azo’o atao amy izao mba hahavy azo ho vognogne hiatreke fagnenjehagne?

¹⁷ Afake miomagne mba hiatreke fagnenjehagne rehe naho ty keleia’o amy izao. (Asa. 14:22) Ko mifantoke amy ze kila raha raty va’e hiseho. Ty fifandrambesa’o amy i Jehovah ro hamafeso, le ampeo ty ana’o mba hanao hoe izay ka. Naho misy fotoagne rehe minekoneko, le voraho amy i Jehovah ze raha am-po’o ao. (Sal. 62:7, 8) Dineho’areo keleian-draike ty anto’e atokisa’areo i Jehovah.d Naho inareo miomagne mialoha sady matoky i Jehovah, le tsy hatahotse naho ho tony i ana’areo rey naho fa misy fagnenjehagne.

18. Ino ty raha mandigne antika amy ty hoavy?

¹⁸ Mahavy antika hahatsiaro ho voaro ty fiadanan’Andrianagnahare. (Fil. 4:6, 7) Va’e hisy voka’e amantika o arete-manjamagneo, o lozao ndra o fagnenjehagneo. Faie vita i Jehovah ty hampitony ty fontika amy ty alala i fiadana’ey. Mampiasa o androanavi-pagnahio reke mba hitilike antika. Mei’e tombotsoa ka tika iaby mba hagnampe ty hafa. I fiadanagne tsapantikagne amy izaoy, le hagnampe antika ho vognogne hiatreke ty fitsapagne mafe va’e hahazo antika naho i “haoreagne lahibeỳ.” (Mat. 24:21) Mila mikezake mba hanagne fiadanagne avao naho hagnampe ty hafa tika ndra amy ze fotoagne zay. Tsy hisy olagne hampinekoneko antika sasa afara i “haoreagne lahibeỳ.” Hahazo i fiadanagne fa nirie i Jehovah amparake izaỳ tika, le i tena fiadanagne haharetse nainai’ey.​—Isaia 26:3, 4.