ትፈልጥዶ፧

ባሬቶታት ኰና ረገቢት ንመስዋእቲ ቕቡላት ምዃነን ጠቓሚ ዝነበረ ስለምንታይ እዩ፧

ኣብ ትሕቲ ሕጊ ሙሴ፡ ባሬቶታት ኰና ረገቢት ንመስዋእቲ የሆዋ ቕቡላት እየን ነይረን። እዘን ክልተ ዓይነት ኣዕዋፍ እዚአን፡ ኵሉ ሳዕ ኣብ ትሕቲ እቲ ብዛዕባ መስዋእቲ እተዋህበ ሕጊ ብሓባር እየን ዚጥቀሳ ነይረን፣ ንሓድሕደን እውን ይተኻኽኣ ነይረን እየን። (ዘሌ. 1:14፣ 12:8፣ 14:30) እዚ ጠቓሚ ዝዀነ ስለምንታይ እዩ፧ ሓደ ምኽንያት፡ ባሬቶታት ወትሩ ይርከባ ብዘይምንባረን እዩ። ስለምንታይ እየን ወትሩ ዘይርከባ ነይረን፧

ባሬቶታት ኣብ ምዉቕ ኣዋርሕ ኣብ ብዘላ ምድሪ እስራኤል ዚርከባ ኻብ ቦታ ናብ ቦታ ዚፈልሳ ኣዕዋፍ እየን። ኣብ ወርሒ ጥቅምቲ፡ ብደቡብ ናብ ዚርከባ ዝያዳ ሙቐት ዘለወን ሃገራት ይፈልሳ፡ ኣብ እዋን ጽድያ ድማ ናብ እስራኤል ይምለሳ። (መሃ. 2:11, 12፣ ኤር. 8:7) በዚ ምኽንያት እዚ ድማ፡ ጥንቲ ዝነበሩ እስራኤላውያን ኣብ እዋን ክረምቶም ባሬቶታት ከም መስዋእቲ ጌርካ ምቕራብ የጸግሞም ነይሩ እዩ።

በቲ ሓደ ሸነኽ ግና፡ ረገቢት መብዛሕትኡ ግዜ ኻብ ቦታ ናብ ቦታ ስለ ዘይፈልሳ፡ ምሉእ ዓመት ኣብ እስራኤል ይርከባ ነይረን እየን። ኣብ ርእሲኡ እውን፡ ረገቢት ዘቤታውያን ኪዀና ይኽእላ እየን። (ምስ ዮሃንስ 2:14, 16 ኣረኣኢ።) ብመሰረት ባይብል ፕላንትስ ኤንድ ኣኒማልስ ዘርእስታ መጽሓፍ፡ “ኵለን እተን ኣብ [እስራኤል] ዝነበራ ኣቝሻትን ከተማታትን ዝለመዳ ረገቢት ነይርወን እዩ። ነፍሲ ወከፍ ብዓል ቤት እዘን ኣዕዋፍ እዚአን ዚነብራሉ ሰፈር ርግቢ፡ ወይ ኣብ መንደቕ እተነድለ ነዃል ነይርዎ እዩ።”—ምስ ኢሳይያስ 60:8 ኣረኣኢ።

በዚ ኸምዚ ኸኣ፡ የሆዋ ነተን ኣብ እስራኤል ምሉእ ዓመት ዚርከባ ኣዕዋፍ ከም መስዋእቲ ገይሩ ብምቕባል ፍቕሩን ሚዛናውነቱን ኣርእዩ እዩ።