ንዘመናዊ ህይወት ዚኸውን ጥንታዊ መጽሓፍ

ገሊኦም ሰባት ብዛዕባ እቲ መጽሓፍ ቅዱስ ብምንባብን ንምኽሩ ኣብ ህይወቶም ከም ዚዓዪ ብምግባርን ዝረኸብዎ ጥቕሚ እንታይ ከም ዝበሉ እስከ ንርአ።

“ህይወተይ ብዝያዳ ሚዛናዊ ዀይኑ እዩ። ኣእምሮኣውን ስምዒታውን ጥዕናይ ተመሓይሹ እዩ። ብዝያዳ ኣወንታዊ ኣመለኻኽታ ረኺበ እየ።”—ፊዮና።

“ካብ መጽናዕቲ መጽሓፍ ቅዱስ፡ ኣብ ህይወተይ ናይ ሓቂ ዕላማን ትርጉምን ረኺበ እየ።”—ግኒትኮ።

“ህይወተይ ብዙሕ ተመሓይሹ እዩ። ሕጂ ኣብ ስድራ ቤተይ ዘተኰረ ቐሊል ናብራ እዩ ዘሎኒ።”—ኣንድሪው።

እዚ ሳሕቲ ዜጋጥም ተመክሮታት ኣይኰነን። ኣብ ብዘላ ዓለም ዚርከቡ ብዙሓት ሰባት፡ መጽሓፍ ቅዱስ ንመዓልታዊ ህይወቶም ዚኸውን ግብራዊ መምርሒ ኸም ዘለዎ ርእዮም እዮም።

መጽሓፍ ቅዱስ ኣብዚ ዚስዕብ መዳያት ንህይወት ሰባት ብኸመይ ከም ዜመሓይሽ እስከ ንርአ፦

• ኣካላዊ ጥዕና

• ስምዒታዊ ጥዕና

• ናብራ ስድራ ቤትን ዕርክነትን

• ኣተሓሕዛ ገንዘብ

• መንፈሳውነት

እዚ ዚስዕብ ሓበሬታ፡ መጽሓፍ ቅዱስ ሃይማኖታዊ መጽሓፍ ጥራይ ዘይኰነስ፡ ብግብራዊ መገድታት ብኸመይ ኪሕግዘካ ኸም ዚኽእል እውን ኬርእየካ እዩ።