ኣካላዊ ጥዕና

ንሰብነትካ ተኸናኸኖ

ስርዓት መጽሓፍ ቅዱስ፦ “ሰብ ንሰብነቱ ይምግቦን ይሕብሕቦን እምበር፡ ዚጸልኦስ ሓደ እኳ የልቦን።”—ኤፌሶን 5:29።

እዚ እንታይ ማለት እዩ፧ እዚ ስርዓት መጽሓፍ ቅዱስ እዚ፡ ንኣካላዊ ጥዕናና ንምክንኻን ዚከኣለና ዘበለ ኽንገብር የተባብዓና እዩ። ብዙሕ ጸገማት ጥዕና ምስቲ ኣብ ኣነባብራና እንገብሮ ብሕታዊ ምርጫታት ዚተሓሓዝ ምዃኑ፡ ሓደ መጽናዕቲ ይሕብር እዩ። ስለዚ፡ ቅኑዕ ብሕታዊ ምርጫታት እንተ ጌርና፡ ዝሓሸ ጥዕና ኽንረክብ ንኽእል ኢና።

ክትገብሮ እትኽእል፦

• ኣመጋግባ። ንጥዕና ዚጠቅም ምግቢ ብላዕ፡ እኹል ማይ ድማ ስተ።

• ንጡፍ ኩን። ዕድመኻ ብዘየገድስ ኣካላዊ ንጥፈት ንጥዕናኻ ኼመሓይሾ ይኽእል እዩ፣ ዋላ እውን ስንክልና ወይ ሕዱር ሕማም ዘሎካ እንተ ዀንካ፡ ኪሕግዘካ ይኽእል እዩ። እትፈትዎም ሰብካን ሰብ ሞያ ጥዕናን ኣብ መደብ ኣካላዊ ምውስዋስካ ኺሕግዙኻ ዚኽእሉ እኳ እንተ ዀኑ፡ ጥቕሚ ንምርካብ ግና ንስኻ ባዕልኻ ኣብኡ ኽትሳተፍ ኣሎካ።

• እኹል ድቃስ ደቅስ። ንነዊሕ እዋን ዝቐጸለ ስእነት ድቃስ ንኸቢድ ሕማም ኬቃልዕ ይኽእል እዩ። ብዙሓት ሰባት ብሰንኪ እቲ ኣብ ህይወቶም ዚገብርዎ ምርጫታት፡ እኹል ድቃስ ኣይረኽቡን እዮም። ይኹን እምበር፡ እኹል ድቃስ ክትረክብ እንተ ወሲንካ፡ ህይወትካ ኺመሓየሽ ይኽእል እዩ።

ጐዳኢ ልማዳት ኣወግድ

ስርዓት መጽሓፍ ቅዱስ፦ “ካብ ኵሉ እቲ ስጋን መንፈስን ዜርክስ ርእስና ነንጽህ።”—2 ቈረንቶስ 7:1።

እዚ እንታይ ማለት እዩ፧ ብኸም ፍርያት ትምባኾ ዝኣመሰለ ጐዳኢ ነገራት ንሰብነትና ዘይንብክሎ እንተ ዄንና፡ ገዛእ ርእስና ንጠቅም ኢና። እዚ ፍርያት እዚ፡ ጠንቂ ብዙሕ ሕማምን ሞትን እዩ።

ክትገብሮ እትኽእል፦ ሽጋራ ምትካኽ እትሓድገላ ዕለት ወሲንካ፡ ኣብ ዓውደ ኣዋርሕካ ምልክት ግበር። ድሮ እታ መዓልቲ ድማ፡ ኵሉ ሽጋራን መንገፍ ሽጋራን መወልዕ ሽጋራን ምስዚ ጐዳኢ ልማድ እተተሓሓዘ ነገራትን ኣወግድ። እዚ ልማድ እዚ ኻብ ዚዝውተረሉ ቦታታት ርሓቕ። ንዚድግፉኻ ፈተውትኻ ብዛዕባ ውሳነኻ ንገሮም።

ካልእ ስርዓታት መጽሓፍ ቅዱስ

ንድሕንነት ጥንቁቕ ኩን።

“ሓድሽ ቤት እንተ ሃኒጽካ፡ ሰብ ካብኣ ኸይጸድፍ እሞ፡ ንቤትካ ዕዳ ደም ከየምጽኣላ፡ ንናሕስኻ መጋረዲ ግበረሉ።”​—ዘዳግም 22:8።

ቍጥዓኻ ተቘጻጸር።

“ንቝጥዓ ደንጓዪ ብዙሕ ምስትውዓል ኣለዎ፣ ዓቕሊ ዘይብሉ ግና ዕሽነት የርኢ።”​—ምሳሌ 14:29።

እምብዛ ኣይትብላዕ።

“ካብቶም ሃርጓፋት በላዕቲ ስጋ ኣይትኹን።”​—ምሳሌ 23:20።