ገሊኦም እንታይ ኢሎም ይኣምኑ፧

ሂንዱ

ንመከራ ኸም ሳዕቤን እቲ ኣብ መጀመርታ እዛ ህይወትካ ወይ ኣብ ሕሉፍ ህይወትካ ዝፈጸምካዮ ተግባራት ገይሮም ይርእይዎ። ሓደ ሰብ ካብ ዓለማዊ ነገራት ፈጺሙ ኣብ እተነጸለ ጽፍሒ ኣተሓሳስባ ምስ በጽሐ፡ ኣብ ሞክሻ፡ ማለት ካብ ዑደት ዳግመ ልደት ሓራ ኣብ ዚዀነሉ ዅነት ይበጽሕ።

እስላም

መከራ ስለቲ ሓጢኣቶም ዚቕጽዕዎ መቕጻዕትን ከም መፈተኒ እምነቶምን ገይሮም ይርእይዎ። ፕረዚደንት ማሕበር እስላም ሰሜን ኣመሪካ ዝዀነ ዶ/ር ሳይድ ስዒድ ከም ዝበሎ፡ ዜሕዝን ፍጻመታት “ንኣምላኽ ስለቲ ዅሉ በረኸቱ ኣመስገንቲ ምእንቲ ኽንከውንን ንእተሸገሩ ኽንሕግዝ ከም ዘሎና ምእንቲ ኽንግንዘብን” ዜዘኻኽር ኣጋጣሚ እዩ።

ኣይሁድነት

መከራ ብሰንኪ ተግባርካ ኸም ዝመጸ ጌርካ ይእመነሉ። ገሊኦም ኣይሁድ ትንሳኤ ኸም ዚኸውን፡ ድሕሪኡ ኸኣ ነቶም መከራ ዝጸገቡ ንጹሃት ፍትሒ ኸም ዚወጸሎም ይኣምኑ። ኣብ ካባላዊ (ምስጢራዊ) ኣይሁድነት ድማ ሪኢንካርነሽን ወይ ሰብ ዳግም ስጋ ለቢሱ ይመጽእ ተባሂሉ ይእመነሉ እዩ፣ በዚ ኸምዚ ኸኣ ንጌጋታቱ ንምኽሓስ ተደጋጋሚ ኣጋጣሚታት ከም ዚረክብ ጌርካ ይእመን።

ቡድሃውያን

ሰብ ኣሉታዊ ተግባራቱን ስምዒታቱን ህርፋናቱን ክሳዕ ዜቋርጽ፡ ዳግም እናተወልደ ኣብ ዚህልዎ ብዙሕ ህይወት መከራ ኸም ዚጸግብ ይኣምኑ። ብጥበብን ብሰናይ ግብርን ብኣእምሮኣዊ ተግሳጽን ኣቢሉ ኸኣ ናብ ኒርቫና፡ ማለት ኵሉ መከራ ናብ ዜብቅዓሉ ዅነት ኸም ዚበጽሕ ይኣምኑ።

ኩንግፉትጽያውያን

ኤ ዲክሽነሪ ኦቭ ኮምፓራቲቭ ረሊጅን ዚብሃል መዝገበ ቓላት፡ ሰዓብቲ እዚ እምነት እዚ ንመከራ መብዛሕትኡ ግዜ ምስ “ፍሽለትን ስሕተትን ሰብ” ከም ዜተሓሕዝዎ ገሊጹ ኣሎ። ኣብቲ ሰረተ እምነቶም ከኣ ብሰናይ ኣነባብራ ጌርካ ንመከራ ኽትንክዮ ኸም እትኽእል እኳ እንተ ተገልጸ፡ መብዛሕትኡ መከራ ግና ካብቶም “ካብ ቍጽጽር ሰብ ወጻኢ ዝዀነ መንፈሳውያን ፍጡራት” ከም ዚመጽእ እዩ ዚእመነሉ። “ስለዚ፡ ሰብ ነቲ እተደንገገ ዕድሉ ስቕ ኢሉ ኪቕበሎ ኣለዎ” ይብሉ።

ገሊኡ ቐቢላዊ ሃይማኖታት

ንመከራ ምስ ጥንቈላ የተሓሕዞ። ኣብዚ እምነታት እዚ፡ ጠንቈልቲ ጽቡቕ ዕድል ወይ መዓት ኬምጽኡ ኸም ዚኽእሉ፡ ነቲ ዜምጽእዎ መከራ ኸኣ ብእተፈላለየ ጽምብላት ጌርካ ኽትንክዮ ኸም እትኽእል ይእመን። ስለዚ፡ ሰብ ምስ ዚሓምም፡ እቲ ገሊኦም ጠንቈልቲ ንምሕዋዩ ዚገብርዎ ጽምብላትን ዚህብዎ ኣፋውስን ንተግባራት ካልኦት ጠንቈልቲ ዜበርዕን ከም ዝዀነ ጌርካ እዩ ዚእመነሉ።

ክርስትያናት

ኣብ መጽሓፍ ዘፍጥረት ተገሊጹ ኸም ዘሎ፡ መከራ ብሰሪ ሓጢኣት ቐዳሞት ክልተ ሰባት ከም ዝመጸ ይኣምኑ። ኰይኑ ግና፡ ብዙሓት ሃይማኖታት ክርስትና ንትምህርትታተን ተወሳኺ ነገራት ኣእትየናሉ ኣለዋ። ንኣብነት፡ ገሊኦም ሰዓብቲ እምነት ካቶሊክ፡ ነቲ ኣብ ርእስኻ ዝወረደ መከራ ናብ ኣምላኽ ከም መስዋእቲ ኸተቕርቦ ኸም እትኽእል፡ ነዚ ድማ ኣምላኽ ንጥቕሚ ቤተ ክርስትያን ወይ ንድሕነት ካልእ ሰብ ኬውዕሎ ኸም ዚኽእል ይኣምኑ እዮም።