ንዓለም ዚቈጻጸራ ዘሎ መን እዩ፧

መጽሓፍ ቅዱስ እንታይ ይብል፧

“ብዘላ ዓለም እውን ኣብ ትሕቲ ቝጽጽር እቲ እኩይ ምህላዋ ንፈልጥ ኢና።”​—1 ዮሃንስ 5:19፡ ትርጉም ሓዳስ ዓለም።

“ወዲ ኣምላኽ ከኣ ግብሪ ድያብሎስ ምእንቲ ኼፍርስ እዩ እተጋህደ።”​—1 ዮሃንስ 3:8።

እዚ ብኸመይ ኪጠቕመካ ይኽእል፧

ጠንቂ እቲ ኣብ ዓለም ዘሎ ጸገማት መን ምዃኑ ትርዳእ።​—ራእይ 12:12።

ዓለምና ኽትመሓየሽ ምዃና ኽትኣምን መርትዖ ትረክብ።​—1 ዮሃንስ 2:17።

ነቲ መጽሓፍ ቅዱስ ዚብሎ ብሓቂ ኽንኣምኖ ንኽእልዶ፧

እወ ንኽእል ኢና፣ እንተ ወሓደ ብሰለስተ ምኽንያት።

• ግዝኣት ሰይጣን ኪጠፍእ እዩ። የሆዋ ነቲ ሰይጣን ኣብ ልዕሊ ደቂ ሰብ ዚገብሮ ዘሎ ቝጽጽር መወዳእታ ኺገብረሉ እዩ። ንዅሉ እቲ ሰይጣን ዜምጽኦ ጕድኣት ምሉእ ብምሉእ ብምልጋስ ‘ንድያብሎስ ከም ዚስዕሮ’ ኣተስፍዩ እዩ።​—እብራውያን 2:14።

• ኣምላኽ ንየሱስ ክርስቶስ ንዓለም ኪገዝኣ መሪጽዎ እዩ። የሱስ ካብቲ ጨካንን ስሱዕን ገዛኢ እዛ ዓለም እዚኣ ፈጺሙ እተፈልየ እዩ። ንሱ ምስ ነገሰ፡ “ንትሑትን ንድኻን ኪድንግጸሎም፡ . . . ካብ ጭቈናን ካብ ዓመጻን ኬናግፎም” ምዃኑ፡ ኣምላኽ ኣተስፍዩ ኣሎ።​—መዝሙር 72:13, 14።

• ኣምላኽ ኣይሕሱን እዩ። መጽሓፍ ቅዱስ ኣነጺሩ፡ ‘ኣምላኽ ኪሕሱ ኸም ዘይክእል’ ይገልጽ እዩ። (እብራውያን 6:18) እቲ የሆዋ ኺገብሮ ዘተስፈዎ ተስፋ፡ ከይተፈጸመ ኣይተርፍን እዩ። (ኢሳይያስ 55:10, 11) “ገዛኢ እዛ ዓለም እዚኣ ሕጂ ንወጻኢ ኺድርበ እዩ።”​—ዮሃንስ 12:31።