ንኣምላኽ ቅረቦ

መዳርግቲ ዘይብሉ ኣቦ ማቴዎስ 3:16, 17

“ኣቦ።” ከምዛ ቓል እዚኣ ገይረን ኣብ ደቂ ሰብ ዓሚቝ ስምዒት ዜለዓዕላ ብዙሓት ቃላት የለዋን። ንደቁ ብሓቂ ዜፍቅር ኣቦ ብጽቡቕ እናዓበዩ ንኪኸዱ ይሕግዞም። መጽሓፍ ቅዱስ ንየሆዋ ኣምላኽ ከም “ኣቦ” ገይሩ ኺገልጾ እምበኣር ሓቁ እዩ። (ማቴዎስ 6:9) የሆዋ ኸመይ ዝበለ ኣቦ እዩ፧ ነዚ ንምምላስ: የሱስ ኣብ እተጠምቀሉ እዋን እቲ የሆዋ ንየሱስ እተዛረቦ ቓላት እስከ ንመርምር። ከመይሲ: እቲ ኣቦ ንደቁ ዚዛረበሉ መገዲ እንታይ ዓይነት ኣቦ ምዃኑ የርእየና እዩ።

ኣብ ከባቢ ጥቅምቲ 29 ድ.ክ. የሱስ ንኺጥመቕ ናብ ፈለግ ዮርዳኖስ ከደ። መጽሓፍ ቅዱስ እንታይ ከም ዘጋጠመ ኸምዚ ብምባል ገለጸ:- “የሱስ ምስ ተጠምቀ: ብኡብኡ ኻብ ማይ ወጸ። እንሆ ኸኣ: ሰማያት ተኸፍተ: መንፈስ ኣምላኽ ድማ ከም ርግቢ ወሪዱ: ኣብ ርእሱ ኪቕመጥ ረአየ። እንሆ ድማ: ብእኡ ዝሰመርኩ ፍትዊ ወደይ እዚ እዩ: ዚብል ድምጺ ኻብ ሰማይ መጸ።”a (ማቴዎስ 3:16, 17) እዘን የሆዋ ባዕሉ እተዛረበን ለውሃት ዝመልአን ቃላት ክሳዕ ክንደይ ሕያዋይ ኣቦ ምዃኑ ብዙሕ ይነግራና። የሆዋ ንወዱ ሕያውነቱ ዘርኣየሉ ሰለስተ ነገራት እስከ ንርአ።

ቀዳማይ: እተን የሆዋ “ወደይ እዚ እዩ” ዝበለን ቃላት: ብኻልእ ኣበሃህላ ‘ኣቦኻ ብምዃነይ ተሓቢነ’ ማለት እየን። መስተውዓሊ ኣቦ: ደቁ ኣፍልጦን ኣቓልቦን ንኺረኽቡ ዘለዎም ባህጊ የማልኣሎም እዩ። ቈልዑ ዋጋ ዘለዎም ፍሉያት ኣባላት ስድራ ቤት ምዃኖም ኪረጋገጸሎም ይደልዩ እዮም። የሱስ በጽሒ እኳ እንተ ነበረ: ከምዚ ዓይነት ኣፍልጦ ምርካቡ ግን እንታይ ማለት ምዃኑ እሞ ሕስብ ኣብሎ!

ካልኣይ: የሆዋ ንወዱ “ፍትዊ” ኢሉ ብምጥቃስ ንየሱስ ዘላቶ ፍቕሪ ብግህዶ ገሊጹ እዩ። ብኻልእ ኣዘራርባ እቲ ኣቦ: ‘ኣፍቅረካ እየ’ እዩ ዚብል ነይሩ። ንፉዕ ወላዲ ንደቁ ኣዝዩ ኸም ዜፍቅሮም ይነግሮም እዩ። ብግቡእ ፍቕሪ እተሰነየ ኸምዚ ዝኣመሰለ ቓላት: ቈልዑ ብጽቡቕ ንኺዓብዩ ይሕግዝ። የሱስ ከም ዚፍቀር ካብ ድምጺ ኣቦኡ ምስማዑስ ንልቡ ኽሳዕ ክንደይ ኰን ተንኪፍዎ ኪኸውን ኣለዎ!

ሳልሳይ: የሆዋ በተን “ብእኡ ዝሰመርኩ” ዚብላ ቓላት ገይሩ ብወዱ ኸም ዝሰመረ ወይ ከም እተሓጐሰ ገለጸ። የሆዋ: ‘ወደየ: በቲ ዝገበርካዮ ነገር ባህ ኢሉኒ’ እዩ ዚብሎ ነይሩ። ፈቃር ኣቦ በቲ ደቁ እተዛረብዎ ወይ ከኣ ዝገበርዎ ጽቡቕ ነገር ከም እተሓጐሰ ንኺገልጸሎም ዜኽእሎ ኣጋጣሚታት የናዲ እዩ። ወለዲ ስምረቶም ኪገልጹሎም ከለዉ: ውሉዳት ብርታዐን ትብዓትን ይረኽቡ። ብርግጽ እምበኣር: የሱስ ስምረት ኣቦኡ ኸም ዝረኸበ ምስማዑ ኽንደይ ኰን ኣተባቢዕዎ ኪኸውን ኣለዎ!

ብሓቂ: የሆዋ መዳርግቲ ዘይብሉ ኣቦ እዩ። ከምዚ ዝበለ ኣቦ ንምርካብ ትብህግዶ፧ ትብህግ እንተ ዄንካ: ምስ የሆዋ ርክብ ምግባር ኪብጻሕ ዚከኣል ምዃኑ ምፍላጥካ ኼጸናንዓካ ይኽእል እዩ። ብእምነት ብዛዕባኡ እንተ ተማሂርካን ካብ ልብኻ ፍቓዱ ንምግባር እንተ ጽዒርካን: ጽቡቕ ምላሽ ኪህበካ እዩ። መጽሓፍ ቅዱስ “ንኣምላኽ ቅረብዎ: ንሱውን ኪቐርበኩም እዩ” ይብለና። (ያእቆብ 4:8) ምስቲ ኻብ ኵሉ ዝበለጸ ኣቦ ዝዀነ የሆዋ ኣምላኽ ካብ ዚህልወካ ጥብቂ ርክብ ንላዕሊ ቕሳነት ኪስምዓካ ኺገብር ዚኽእል እሞ እንታይ ኣሎ፧

[እግረ-ጽሑፍ]